2017年11月17日 星期五

周末日常之藝趣嘉年華

睇到「藝趣嘉年華」喱個題目係咪有少少似曾相識的感覺?果然好記性喎!翻查大典網誌原來上次基爾到此一遊已經係2014年11月,今年咁橋喱個11月的weekend又有時間,所以再去巡一巡這個年度盛會吧!



反正有時間咁就搭電車去維園啦!很久沒有享受過坐電車的悠閒,其實如果完全唔趕時間的話,電車確是不錯的交通工具。在電車上無無聊聊唔睇手機反而用心欣賞下街上的浮世繪,突然間覺得都幾有遊客feel。



4點左右終於hea到去維園,外圍的燈柱都掛了藝趣嘉年華的旗仔,上圖右的入口貫徹了簡約風格。至於紅色帳篷果邊係硬地足球場舉行的明愛賣物會,由於是翌日(周日)才開幕所以基爾無過去八了。



大門口這個牌坊上寫了「The World of Roald Dahl」,是今屆Arts in the Park 2017的主題。咁到底喱位羅德達爾先生係乜水?



一時間可能未必醒起Roald Dahl是誰吧!(知道果D記得在留言叫基爾畀返個叻你)……有睇過Johnny Depp做果套《Charlie and the Chocolate Factory》(朱古力掌門人)又或者Steven Spielberg拍果套《The BFG》(吹夢的巨人),就可能會認識這位來自英國的兒童文學作家。



見大舞台果邊好似有表演進行中,拿拿林先行過去睇下啦!今年個舞台設計都幾靚喎!見到個十幾廿米咁高的巨人就醒起意念來自吹夢的巨人……



可惜大舞台前面實在企得太多人,哈比人身高的基爾基本上係完全睇唔到台上表演緊D乜,只能從旁邊的大電視直播睇到係一大班人跳緊舞……提議來年個stage可唔可以搭高返少少!



看了一陣表演後,咁梗係要行埋過去另一邊睇巡遊大木偶啦!今次以兒童小說為主題,所以大部份巡遊木偶都幾卡通,有冇人認得上面喱隻小雞雞?話係來自《George's Marvellous Medicine》(喬治的神奇魔藥),唔知有冇拍成電影呢?



再去睇埋隔籬條大鱷魚先,是來自《The Enormous Crocodile》個故仔,上網睇原來都有好多集拍成卡通片喎!可能歐美小朋友會好熟悉喱條青色大鱷……旁邊果D舞蹈員衣飾都幾靚,可惜基爾今年來得太早,夜巡要等到夜晚8-9點先開始,如果著晒燈巡遊一定會靚好多啦!(想睇返上次基爾去睇夜巡的盛況,不妨click返去舊網誌:渣打藝趣嘉年華@銅鑼灣



最後再睇埋喱個擺滿晒cupcake朱古力蛋糕糖果的木偶公仔,唔駛問阿貴一定就係來自《朱古力獎門人》啦!小朋友相信都好想要Willy Wonka果張golden ticket係咪?



睇完D巡遊木偶展覽之後,又行返去攤位遊戲果邊……嘩!檔檔都好似超級多人喎!同埋大部份都係畀小朋友玩的手作坊或者遊戲之類,基爾伯伯就無謂同D小朋友逼了,在外圍遠觀一下就算。



唯一係上面喱檔基爾有行埋少少去睇,因為類似有人係度打非洲鼓和跳土人舞之類,哈比人基爾趷高晒腳伸到盡隻手舉定部手機才影到喱張相,都算叫做交到功課了吧!



度度都好逼人,都係行去D無咁多人的地方算了。喱邊喱一大幅青綠色拼畫壁佈都幾壯觀!唔知係咪全部都係學生的美術作品呢?



行埋去睇真D,原來每幀都幾colourful幾cute喎D公仔,同埋咁樣拼為一大幅牆展覽出來,又突然加添了100%藝術風味,幾正!



基爾覺得在全個嘉年華場地裏,喱part人少少其實就最適合影相不過,事實上不論大朋友小朋友都有在畫牆前擺下甫士!唔知會唔會有人想搵返自己幀貼堂畫作出來合照留念呢?



行了一大個圈差不多係時候要走了,臨走前再去八下門口果個紀念品檔,因為人太多條龍又萬里長城長又長咁款,所以基爾都無謂埋去睇究竟有D乜野免費紀念品派……

46 則留言:

  1. 我哋啲冇乜文化嘅人,真係唔識欣賞...
    不逍成班人玩下都幾好

    回覆刪除
    回覆
    1. 但係你有深厚歐洲文化喎....XXD

      刪除
  2. 我真係唔曉, 自認無文化

    回覆刪除
    回覆
    1. 你果邊多唔多去睇喱類巡遊?

      刪除
  3. 聽基爾介紹咁多我完全唔知的事物,我就知基爾一定係好年輕,仲係個大細路呢…咭咭咭咭咭……😅😁👍

    回覆刪除
    回覆
    1. wakakakakaka.....係咪叫童心未泯<=====老夫子成日有喱個XXXD

      刪除
  4. 回覆
    1. 有統一主題去設計啲大木偶會好睇啲^^

      刪除
  5. 來年個stage可唔可以搭高返少少....來年不如擔把梯嚟。

    回覆刪除
    回覆
    1. 有啲人專登去影相果啲,真係係會帶埋把梯仔企高影㗎.....

      刪除
  6. 冇等夜晚木偶亮燈嗎?幾靚架不過會好迫人.

    回覆刪除
    回覆
    1. 無等啊,要等到成8-9點對我來說太夜啦,我又唔係住果頭,中間成4-5個鐘又唔知做乜,去行街都唔行到咁耐:P

      刪除
  7. 多些這類活動是好的,大、小朋友不要習慣只行商場呢!

    回覆刪除
    回覆
    1. 秋冬天多點戶外活動會開心啲,商場行來街去都係果啲,無乜特別野睇,行到悶XXD

      刪除
  8. 人太多了,啱小朋友多d!

    回覆刪除
    回覆
    1. 小朋友好多手作活動參與,可以玩足成日添啦^^

      刪除
  9. 這個場地小孩子最喜歡,也是一個親子樂園。基哥都好有童真。

    回覆刪除
    回覆
    1. 小朋友去到可以當係去主題樂園咁....同埋唔駛入場費嘛^^

      刪除
  10. 這類活動很好,給個機會讓成年人與孩子到戶外走走,好過只是逛商場啊。

    回覆刪除
    回覆
    1. 萬里長城萬里長
      維園悠閒維園閒

      刪除
    2. SU:作為周末親子活動唔錯啊^^
      玩完再去商場食下野,又一個weekend!!!

      刪除
    3. 夫:兵馬呼叫城內外,但到今日多孤清

      刪除
  11. 基爾近來出多咗卜噃!
    呢篇卜好有王子嘅感覺~

    回覆刪除
    回覆
    1. 銀哥:係咪好勤力呢....XXD

      刪除
    2. 係呀!人大了才發現,卜友一個都不能少!

      刪除
    3. 話時話,今時今日仲有留下來繼續寫blog都不多啦,自然要珍惜^^

      刪除
  12. 記憶力超強,行一圈寫左幾千字出來。

    回覆刪除
  13. 其實我覺得最自在的逛街, 就係Hea住行…唔需要為時間而怱怱忙忙~~~
    睇咗咁多最特別算是細圖的壁畫很有藝術感…

    回覆刪除
    回覆
    1. 不過HK度度人多車多,都唔係咁多地方可以畀森兄hea住行,有時如果去旺角銅鑼灣果啲你行得太慢太hea,會畀後面啲人怒睥或踩你鞋㬹㗎!!!!XXXXD
      全場只有這幅拼畫牆比較少人咋,無咁人頭湧湧,可以舒服啲影下相又唔驚前面有路人甲乙丙丁同阿茂閃出來遮住晒囉:P

      刪除
    2. 其實我講的hea住行係指用不慌不忙的心情去行, 唔係話好似蝸牛咁行…
      乜gael兄試過畀人怒啤…踩鞋…轆腳咩?!!

      刪除
    3. 明白晒.......不過話時話HK市區啲街又窄又車來車往廢氣煙塵瀰漫再加上喧鬧拖篋大叔大媽,要做到以不慌不忙心情去行咁高境界都唔易喎!!!wakakaka....

      刪除
  14. 我去港島都好中意坐電車睇風景,宜家好多遊客都中意坐.

    回覆刪除
    回覆
    1. 我覺得可以揀假日去坐,一來無咁塞車二來人少啲.....

      刪除
  15. 我媽都好鐘意搭叮叮同渡海小輪架哈哈~
    可以就係鐘意佢慢~
    呢個幾得意喎~香港就好啦~有咁多野睇~

    回覆刪除
    回覆
    1. 唔趕時間搭叮叮享受一下悠閒也不錯,尤其係天涼時候啦^^
      之前興捉精靈果陣好多人特登去搭叮叮XXD
      但係你果邊成日有錢袋喎......如果有得揀我寧願袋錢好過多野睇喇wakakakakakaka!!!!!

      刪除
  16. 真係好多人呀 , 一定好多嘢睇同玩呢~!!

    回覆刪除
    回覆
    1. 證明啲HK人周末放假真係無乜地方好去囉....XXXD

      刪除
  17. 咁鬼多人,睇見都煩😰

    回覆刪除
    回覆
    1. 咁如果同年宵花市比,都叫做少人啲啲嘅....XXD

      刪除
  18. 唔講都唔知有呢個活動@@不過咁多人有啲怕怕@@

    回覆刪除
    回覆
    1. 我都覺得太多人,唔知夜巡果陣係咪都咁墟陷呢?

      刪除