2017年1月12日 星期四

生生社企餐廳@灣仔

好似好耐無寫過為食網誌,不過咁又唔代表基爾唔再為食喎,積埋D存貨都要快快手寫晒佢以免過晒時!



先寫上面喱間New Life生生餐廳,如果唔係友人帶路,真係完全唔知灣仔這些橫街窄巷裏有喱間社企食肆,仲要係在樓上不是地舖,而且電梯口設在交加街,都算幾隱秘……記憶中這晚係平安夜前一晚去(23日晚),基爾提早收工,趕出灣仔都已經成8點幾,上到餐廳一看,還以為打烊了,竟然一台食客都無?



友人話來過食lunch都幾旺場,估不到晚市咁冷冷清清門堪羅雀。見佢門口仲有話做聖誕大餐,唔知有冇生意呢?Anyway包場的感覺真不錯,連廚師侍應相信都有6-7人服侍,很有點富豪感覺!那晚叫了三文魚和燒豬肋兩個set,連前菜沙律(幾大碟而且幾好味,比主菜好味)和餐湯麵包share食都幾飽,埋單人均兩舊,今時今日吃晚餐算是常態價吧!



晚餐全程約個多鐘,期間同場也只有另外兩台客,估唔到灣仔區都咁淡市(仲要係聖誕前夕喎)!不過基爾反而幾樂得清靜自在,侍應輕鬆之餘也服務殷勤(有笑容+添茶換碟),相比油尖旺那些旺場又煩囂的食肆,反正價錢味道也相若的話,基爾寧願揀這間食得坐得傾得悠閒舒服的社企餐廳(絕不會限時90分鐘逼你交台埋單走人果隻,也沒有A4迷你桌子)。



飽餐一頓後再去隔籬利東街散散步消化下(順便感受下聖誕熱鬧氣氛),揀來灣仔食飯某程度也是想來逛逛這條「新街」。雖然利東街春園街那一帶都有好耐歷史,不過經豪宅發展項目美化後又果然令人耳目一新。



走在街上有點似去了日本的感覺(條街其實好短,半粒鐘乜都行晒),可能因為街道兩旁的店舖櫃窗設計都有點外國feel,行人道上的聖誕燈飾佈置也不落俗套,就連上面喱間零食店的貨品擺設都有點似日本的手信店。



由於是聖誕前夕,同場還加映了詩歌班唱聖詩報佳音的節目,圍觀的人多而不亂也不嘈雜,大多都好靜心欣賞演出,只在樂章之間報以掌聲。



值得一提係喱度仲有一個迷你版的地下商場,除了有間高尚百佳之外仲有唔少手作店和cafe食肆之類,還預留了隧道位連接灣仔地鐵站(工程進行中),地下商場最重要是提供了乾淨典雅的洗手間。



至於地面店舖就多數係酒吧食肆或名店,但罕有地沒有慣見的連鎖藥妝店或者金舖之類,記憶中有些賣精緻糕點甜品的小店,還有間施德樓文具店。之前聽聞聖誕期間街上還會定時有飄雪效果增加節日氣氛,可惜基爾當晚只匆匆走一轉沒遇上飄雪奇景。總括而言以豪宅區活化項目而言,都可以算是有特色得來亦幾成功了!

p.s.臨走前就穿過隔籬未活化的春園街,突然覺得好有穿越時空的奇幻感覺,好似一瞬間走過了叮噹的隨意門又返到現實世界一樣,當中只是一街之隔而已!

生生社企餐廳 New Life Social Enterprise Restaurant
灣仔太原街33號囍匯5座1樓



反正講開食,咁再講埋之前同基爾媽慶祝的壽宴吧!記憶中這間龍門客棧好似舊年定或是前年的冬至飯也來過這裏食過,不過以前係地舖,依家就搬上了酒店一樓。



雖然搬過新舖,不過室內格局都係沿用舊舖那種傳統古典氣派的中式設計,唔知點解感覺上翻鬼心目中的中餐廳(或者電影裏拍的中式食肆場景),總是這種大紅燈籠高高掛的「中國風」。



基爾向來幾怕食東坡肉之類的肥膩菜式(不單是因為肥膏,還怕那種林滋滋的口感),甚至元蹄也是第一次食,睇外表又幾圓潤豐滿幾靚,食落就是典型上海菜濃油赤醬的味道,不會令人感到抗拒。



基爾媽點名要食片皮鴨,女廚即席表演刀法也很乾脆利落,其餘幾款還有窩粑、炒鱔餬和醉雞都很美味,加上坐得舒適沒有一般酒樓的嘈雜喧鬧,價錢雖然貴一點但仍在合理範圍,值得一嚐再嚐。

龍門客棧 Dragon Inn
沙田大涌橋路34-36號麗豪酒店1樓

49 則留言:

  1. 回覆
    1. 對呀,今次講兩間,有冇去過?

      刪除
  2. 有時在 office 區,晚市的生意係差D。英國都係架。 好少人鍾意食上海菜做生日喎。祝基爾媽生日快樂。

    回覆刪除
    回覆
    1. 我仲以為啲人放工後會去happy hour,原來好多都即時遠離工作範圍雞飛狗走wakakakakaka....
      上海菜我幾鍾意食小籠包窩貼生煎包粢飯豆沙鍋餅果類小食,排骨菜飯和肴肉果啲都鍾意,醬骨架和抄手算唔算上海菜?我都搞到亂晒:P

      刪除
    2. 多謝,也祝大家新年身體健康萬事如意老少平安^^

      刪除
  3. 再去多次,睇吓你介紹完會唔會多咗客。

    回覆刪除
    回覆
    1. 你估我係王子你咩,邊有咁大影響力先XXXD

      刪除
  4. 生生社企餐廳的一餐對客人的確很妙,對老闆的確很不妙!咭咭咭!
    我都多年冇幫趁麗豪酒店,原來龍門客棧食品咁正,我都要揾日試試。
    補祝賀伯母生日快樂!安康幸福!

    回覆刪除
    回覆
    1. 卡卡卡.....咁我諗老闆都係諗過度過唔會蝕大本先繼續營運到,況且社企我諗唔係同一般商業機構咁要賺到盡先得嘅,都有其他社會意義和責任吧!!!
      麗豪周不時有五折自助午餐,幾抵食,經常會去幫襯呢:P
      大家咁話,新一年大家最緊要身體安康大吉大利出入平安添福添壽^^

      刪除
  5. 我有一次喺皇后大道東經過,見到一番太原街喜帖街重建後景象都想去睇下。

    回覆刪除
    回覆
    1. 依家個市面經營好差,今年聖誕期間仲靜,我見由其食肆,有人話好多人攞長假,出外旅遊之故,若非有大陸人撐下,仲死得...

      刪除
    2. 灣仔好多重建舊街都幾值得一遊,可惜對於我來說都幾遠,好多時都係去開先會順道一逛好少特登出灣仔:P
      最重要問題係依家旺區啲店舖好多都係以serve遊客為本,本地人跟本都無乜需要和興趣去逛這類街啦,誰會老遠跑去旺角尖沙咀去逛藥房和金舖???HK跟本都無街行,咁唯有去外國逛街仲多心水野買.......久而久之港人都失去在本地行街的意欲,無謂浪費車費時間,留返彈藥去外遊時才掃貨好過!!

      刪除
  6. 灣仔夜晚係好靜架...肥人都估唔到~
    岩岩搬去灣仔夜遊時就覺得...原來灣仔可以咁靜~
    同幾街之隔既銅鑼灣差好遠呢~
    利東街同春園街, 肥人覺得好得意...隔一街之嘛, 新舊強烈對比得好勁呢~

    回覆刪除
    回覆
    1. 係呀我仲以為會好似銅鑼灣咁旺,點知原來都幾靜(尤其內街),咁其實都幾好住丫,旺中帶靜交通又方便呢!
      對,好似穿越時空咁,一街之隔相差好遠!

      刪除
  7. 嘉道理農場既小食亭亦是由新生精神康復會經營

    回覆刪除
    回覆
    1. 原來如此,嘉道理我也有去過一次呢

      刪除
  8. 最鍾意睇啲食物嘅posts㗎,你識做啦,哈哈哈。
    我舊年回香港時有去過那街,好多人排隊入Calbee shop XD !

    回覆刪除
    回覆
    1. wakakakakakaka......即係要寫多啲喱類網誌係咪?^^
      第時同BD回來叫佢帶你去食下!
      係喎有間卡樂B,都幾多人去食薯條,我都有入去睇,不過因為食飽咗飯就無幫襯,齋睇XXXD

      刪除
    2. 希望有值得寫的食肆,近排都好少出街食了:P

      刪除
  9. 兩個鐘食完要交枱之外, 仲要對住一班晚娘面孔嘅服務員, 先至最難頂

    回覆刪除
    回覆
    1. 辛苦搵來自在食,如果要限時限刻要走就多數唔考慮了....
      晚娘面孔都好怕,服務行業首要係EQ高又要有笑容,唔係人人都可以勝任的呢:P

      刪除
  10. 社企餐廳不知是否一般不在太旺的地點, 所以人流不是太多??
    我去年中跟朋友去一間在LAICHIKOK工廠大廈的社企餐廳晚飯, 也是門堪羅雀!!!

    回覆刪除
    回覆
    1. 我諗都係啦,太旺的地段舖租都好貴,應該未必畀得起吧!!!

      刪除
  11. 夜晚都無客,真幾慘,可以維持幾耐?

    回覆刪除
    回覆
    1. 希望佢lunch旺場啲,可以拉上補下圍得起皮

      刪除
  12. 吃得是福,基爾媽有口福!生日快樂喔!

    回覆刪除
    回覆
    1. 大家咁話,新年大家都要身體安康萬事如意....^^

      刪除
  13. 兩間都未試過,生生生意清淡,可能係太隱敞。

    回覆刪除
    回覆
    1. 旺場的地段可能舖租貴,做唔到社企

      刪除
  14. 哈哈,其實我都鍾意呢啲大紅燈籠高高掛的「中國風」,反而啲「龍鳳呈祥風」就麻麻

    回覆刪除
  15. 夜晚灣仔比起銅鑼灣係靜好多,搵野食就容易D!

    回覆刪除
    回覆
    1. 我都係依家先知銅鑼灣旺咁多

      刪除
  16. HK Gael又出動囉喎!
    現在的灣仔有點兒陌生。

    回覆刪除
    回覆
    1. 依家真係好少出動喎,長居深山XXD
      好多新樓盤豪宅,景觀也完全改變了

      刪除
  17. Gael,多謝介紹,揾日去生生社企餐廳試吓.

    回覆刪除
    回覆
    1. 呵呵....好像是給他們賣了廣告:P

      刪除
  18. 社企店,要支持。
    喜帖街,不如舊!

    回覆刪除
    回覆
    1. 如果喜歡清靜清靜咁食餐飯,這裏確是不錯之選....
      我都唔係太記得舊時有冇去過喜帖街了,但新的就一定沒去過:P

      刪除
  19. 嘩,呢排咁勤力,頻頻有新稿?元蹄,反而我好細個仲未戒肉嗰陣食過播。

    回覆刪除
    回覆
    1. 係咪好唔話得呢.....XXD
      仲記得那味道,你都好犀利喎

      刪除
  20. 乖仔呀下~同媽媽慶祝生日~我祝基爾媽生日快樂身體健康~~
    條街係幾靚~搞到我都想去睇下~~~
    我都寧願俾多d錢食貴少少唔想嘈嘈貢...一係就遠離旺區食..費事煩~
    幫襯社企幾好丫!不過澳門好似無

    回覆刪除
    回覆
    1. 對,最緊要大家都身體健康大吉大利開心過新年^^
      農曆新年唔知又有冇新佈置呢?

      刪除
    2. 依家HK好多旺區book台食飯都好麻煩,有啲甚至不設book台要在門口排隊,我都不會幫襯這些了.....
      社企之餘水準也不俗,所以都值得支持下^^

      刪除
  21. 遲來的祝褔 : 祝基爾媽身體健康 ! 青春常駐 !

    回覆刪除
    回覆
    1. 大家咁話,也祝你與相公新年快樂萬事如意身體健康^^

      刪除
  22. 好野通常先係橫街窄巷搵到架!
    係咩?會有漂雪出現!
    恭喜基爾媽福如東海~

    回覆刪除
    回覆
    1. 都要靠少少運氣,唔一定咁啱搵到呢:P
      報紙上介紹話聖誕期間有,不過我去只匆匆行了半個鐘就沒有遇到.....
      大家咁話,新一年大家都身體健康萬事如意,銀哥銀嫂出入平安繼續向世界出發,發掘多啲秘景我地欣賞^^

      刪除