2017年1月22日 星期日

歲晚煎堆之蘿蔔糕

話咁快又就來到送猴迎雞的農曆新年了,係時候每個周末放假都要抽時間逐少逐少大掃除(驚留到年廿八先一次過做會勁辛苦)。其餘時間就做D過年必備人有我有的手作仔,整蘿蔔糕就是當中的首要重任。



翻查大典,其實幾年前基爾早已寫過整蘿蔔糕的網誌(仲好有心機好詳細咁寫晒每個步驟,真佩服自己),所以今次都唔再逐個step寫咁煩了,有興趣翻看跟住整可click入舊網誌「蒸蘿蔔糕」。



不過如果完全唔寫齋post相片又好似唔係幾好,咁都簡單寫少少當作caption。按照慣例(基爾媽秘傳口述食譜),做一底糕約莫都係用3支大白蘿蔔(重約6斤左右),通常用上面這款三象牌的粘米粉較好,一整包600克,約用三分之二包已足夠蒸一底糕有餘。



照辦煮碗依舊先將白蘿蔔刨成絲再蒸熟,另外再炒熟蝦米臘腸小元貝和蔥花作餡料(更傳統的會加埋臘肉乾瑤柱等)。基爾媽口述秘訣係粘米粉混入蘿蔔時要分段逐少咁加,搞勻循才再加粉和餡料,務求不會結成粉團。



最後同底糕扮靚少少,預留返少量餡料鋪在糕面就大功告成,係咪好有專業水準呢!之後再拎去隔水蒸大約1粒鐘已OK。其實平時去飲茶時,基爾都間中會叫蘿蔔糕食(因為平時懶整,只有新年才會的起心肝去整),不過總覺得茶樓食果D唔太好食……



一來可能因為自己整始終比較真材實料,二來落雞粉和鹽、胡椒粉調味可按個人喜好完全是tailor-made,一定無得輸!幾乎忘了告訴大家,基爾其實係典型的「蘿蔔糕控」,飯唔識煮都唔緊要最緊要學識整蘿蔔糕,即使過年前後每朝早食蘿蔔糕做早餐都不會食厭,可配碗粥、磨菇海鮮湯咸麥皮,甚或來一杯鐵觀音清茶,對基爾來說已勝過任何珍饈百味了。

60 則留言:

  1. 我自己無整蘿蔔糕架
    朋友整埋俾我,又有親友送,太多...食唔哂。

    回覆刪除
    回覆
    1. 都係,依家好多時酒樓買都好方便,好多時都食唔晒啲年糕呢:P

      刪除
  2. 蒸蘿蔔糕
    將白蘿蔔刨成絲再蒸熟,
    另外再炒熟蝦米臘腸小元貝和蔥花作餡料
    (更傳統的會加埋臘肉乾瑤柱等)
    做一底糕大白蘿蔔6斤,
    三象牌的粘米粉一包600克,
    一底糕用400克隔水蒸1粒鐘。

    回覆刪除
    回覆
    1. 順帶一提烚蘿蔔時要加少少糖^^

      刪除
  3. 我都係去飲茶都會食蘿蔔糕
    我好想學整, 不過買唔到料 T-T

    回覆刪除
  4. 你地仲有用米通碗碟。我在英國都有架,已經廿年歷史了,匙已經掉爛左好多,剩返兩隻咋。

    回覆刪除
    回覆
    1. 仲有用呀,以前80-90年代係好興米通碗碟(另外仲有萬壽無疆),依家反而已經好少見有得賣,變咗古董XXXXD

      刪除
  5. 你係蘿蔔糕控,我就相反,唔多好.識整都冇乜動力去整,怕整咗有排先食得晒。

    回覆刪除
    回覆
    1. 可以請D鬼鬼朋友試下喱類中式糕點丫嘛^^

      刪除
  6. 自己整足料,蘿蔔多就好食,酒樓嗰啲通常好多粉

    回覆刪除
    回覆
    1. 多粉就係結實D硬身D,同埋好多時酒樓食果D蘿蔔係切粒唔係刨絲,可能為了慳功夫時間吧!!

      刪除
  7. 蘿蔔糕蒸煎也美味,酒樓嗰啲通常好多粉不好吃居多!

    回覆刪除
    回覆
    1. 同埋自己整就可以少鹽少油美味一定啱自己口味囉^^

      刪除
  8. 其實,香港人過年過節要吃蘿蔔糕嘅傳統係家家户户對於應景/ 討個吉利嘅習慣?抑或籍貫原因?
    大馬反而係廣東人、客家人先會有過年食蘿蔔糕嘅習俗。

    回覆刪除
    回覆
    1. 應該係呀,步步高(糕)升丫嘛,一定要有個年糕陪住過年先得嘅^^
      原來如此,我仲以為你地果邊華僑都興?!!@@
      除了蘿蔔糕和芋頭糕仲會有甜的年糕(啡色果隻),你有冇食過?

      刪除
    2. 年糕有,亦都係最普遍嘅過年應節食品,相反蘿蔔糕和芋頭糕就少d...
      過年整托來俾我哋品嚐下喇!我、殷師奶同咕碌媽年初三相約一聚(係~ 我又過來香港喇 :P),你都一齊出來吖!

      刪除
    3. oic~~~原來蘿蔔糕和芋頭糕少人整d,不過依家平時去飲茶都會有得食,唔限於新年了,反而年糕真係新年先比較多機會食到呢!!
      我份工年中無休新年都要返,都係你地食得開心D啦,記得影相share下喎^^

      刪除
  9. 回覆
    1. 在MD面前實在太班門弄斧,見笑見笑...:P

      刪除
    2. 點會呀,我實話實說咋。

      刪除
    3. wakakakaka....咁我要繼續努力啲,多謝你鼓勵^^

      刪除
  10. 今年無廚房, 肥人什麼都不用做啦~~~~
    做大懶蟲~

    回覆刪除
    回覆
    1. wakakakaka....咁都唔錯喎可以慳返啲功夫呢^^
      依家唔少茶樓都可以買到,味道都ok

      刪除
  11. 底糕整得好靚呀,蘿蔔糕我都好鍾意食架。

    回覆刪除
  12. 哇,你都識整,我好中意食,不過就唔識整!自己整既好食好多!

    回覆刪除
    回覆
    1. 如果有時間都不妨試下整^^

      刪除
  13. 回覆
    1. 我都有次試過在齋舖食素蘿白糕,味道其實都ok喎

      刪除
  14. 基爾是新好男人!!!識整蘿蔔糕!!正~~~
    我都勁鐘意食~~~~~~~~~~~~~~~~~~~
    不論是蒸的煎的~~~~~~都愛~~~~~
    今次整左一底咋?????

    回覆刪除
    回覆
    1. 你都識煎牛扒㗎喎新好女人wakakakaka....
      蘿蔔糕有它的獨特魔力呢!!
      對,蒸和煎的食法也不同,同樣好味...
      係呀只整左一底,因為基爾媽在茶樓也買了3底糕(做人情)所以真係食唔晒咁多,暫時不會再自己又整啦!

      刪除
  15. 厲害,不知可有機會一試大作?

    回覆刪除
    回覆
    1. 基爾媽已經買咗3底茶樓糕點,實在驚食唔晒所以陣時都未必再自己整住啦:P

      刪除
  16. 實在太花功夫,注定冇口福 :(

    回覆刪除
  17. 自己整,可以選擇落足料,正!

    回覆刪除
  18. 識食呀你,又咁勁識得整
    識食一定食自家製,買返嚟總係覺得差少少

    回覆刪除
  19. 一定要逐少逐少清潔架,唔係做C...
    咦!係大典裡我對幾年前有篇整野食無印象嘅?因為基爾極少整野食,我應該會記得噃!

    回覆刪除
    回覆
    1. 絕對係啦,一次過搞實在太攞命了XXXD
      上面個link可以click返去舊blog
      http://gaelhk.blogspot.hk/2010/02/blog-post_17.html
      真係好少寫整野食呀,嫌麻煩丫嘛wakakakaka....睇返喱篇原來都已經係2010年2月了!!!!@@

      刪除
    2. 嘩! 2010年,我未識你呀!
      去睇左啦,見你7年前嘅卜仲有照片,你應該一直都是blogger用戶噃~ 我幾年前先從Yblog搬過嚟,起初搬過嚟D相都有顯示的,現在睇返乜相都無法顯示,除非是我重新upload 過。。。

      刪除
    3. 眨下眼都成七年,好快呀~~~~!!@@當然好多blog友依家都無再寫blog啦.....
      唔係呀我都係由yahoo執笠之後搬過來,當其時係逐篇逐張相再重新在blogger這裏upload,可以想像真係好大工程,當時主力係搬旅行網誌(因為最值得留念),好多其他瑣碎生活記趣就無搬,放棄算了,因為實在太多也太累:P

      刪除
  20. 我對大部分賀年食品都麻麻地……😕

    回覆刪除
    回覆
    1. 有啲都幾好食,一年食一次都ok嘅^^

      刪除
  21. 恭喜發財~利士逗來~
    祝Gael大大新年快樂,今件玩多啲食多啲儲多啲郵票~

    回覆刪除
    回覆
    1. 恭喜發財利事逗來wakakakakaka....祝Matthew哥抱得有情人快啲派利事^0^
      大家咁話,也祝你繼續happy向世界出發^^

      刪除
  22. 祝你~年年有餘 ~吉祥如意 ~萬事大吉 ~花開富貴 ~雞年行好運!

    回覆刪除
    回覆
    1. 祝大佬細佬大小姐萬事如意龍馬精神出入平安,大佬學業進步^^

      刪除
  23. 遲來的拜年,祝廚神雞年行大運!

    回覆刪除
    回覆
    1. 也祝你萬事如意寫作靈感如泉,身體健康^^

      刪除
  24. 可惜...可惜...
    冇緣試到gael兄的廚藝
    第二可惜白蘿蔔係戒口食物~~><

    回覆刪除
    回覆
    1. 咦?!!唔食得白蘿蔔係因為驚太寒涼定其他原因?

      刪除
    2. 中醫話白蘿蔔破氣,對我唔啱!!所以冇食!
      漏咗講:你整得底蘿蔔糕好靚~

      刪除
    3. 原來如此,咁又唔知原來係破氣喎.....:P
      至少個樣睇得吧wakakaka!!

      刪除