2017年4月8日 星期六

春日重遊鹽田梓:上@西貢

初春時節通常都係細雨綿綿乍暖還寒,喱個weekend天氣都係麻麻,不過旅行腳話去西貢走一轉,雖然出發時下起細雨來,依然奉陪一遊吧!



是次目的地是要搭艇出海的鹽田梓,翻查舊網誌基爾記得6年前去過一趟,船飛已由昔日的$35升至現今的$50(如果人工加得咁快就發喇)!



由西貢大約坐15分鐘艇仔來到鹽田梓碼頭,天氣依然不太「出色」,一陣陣夾雜微雨的海風吹來,鏡頭下似另有一種春雨仙氣味道。



雖然只是相隔十幾分鐘船程,但寧靜的鹽田梓小島與喧鬧的西貢市集似有天壤之別,一幕幕煙雨濛濛的景象由海上瀰漫到島岸,基本上就是瓊瑤名著的場景,加多對劉雪華和秦漢紙版人就perfect!



唔好講笑,都係拿拿林行入村先算。買船票時,船家其實都有派發島上行山路線地圖、一張貼紙(入學校展館用)和回程船飛,不過一來基爾已來過,二來也為了環保就無拎地圖了。來到村口時亦有個地圖指示牌,如擔心不熟悉路線也可先用手機拍下,之後可再翻查也無妨。



碼頭邊有幢舊屋正在翻新裝修,屋外還有個小園圃,初初離遠見上面的紅黃菊開得好靚,還誤以為是假花,行近睇真才發現是如假包換的堅野!唔知係咪因為這世外小島空氣好又水土豐足,連花都開得特別美?



沿路行上鄉公所附近,極目望出去小山丘下就是一片雜草叢生的荒廢田野,再遠一點有些簡單田舍建築物的地方就是鹽田所在地了。



另一邊仲有棵可能逾百歲高齡的老龍眼樹屹立在山坡上(話時話基爾都係依家先知龍眼樹英文就叫Longan),見證了這一帶滄海桑田的變遷。買船飛時聽船家講,五六十年代鹽田梓最繁盛時代估計有幾千人在島上居住,逾半世紀後的今天基本上已沒有常住居民,成為了荒島(除了包船或私家艇外,只有假日才有街渡來往西貢)。



由於不是恆常有遊客到訪,所以島上食肆也不多選擇(相比長洲南丫島坪洲),除了鄉公所對面那間迷你茶水檔賣下茶粿豆腐花汽水餐蛋麵之類的小食外,就只有上圖這間小餐廳,聽旅行腳講這味「柴火土窯雞」也很出名,但好似要先預訂。



不過可能臨近復活節假期,來訪島上的「朝聖團」似乎頗多,小餐廳可能人手不夠暫時只招待團餐,散客只有無奈向隅了!無野食咁繼續行上去另一處景點「澄波學校」。



澄波學校是以前島上唯一的村校,高峰期有幾百學生,現時校舍仍保養良好,裏面重新裝修成鹽田梓的文物展覽館。課室裏除了擺滿昔日村民用的各式古董杯盤碗碟罐酲筲箕籐籃之,仲有ETV教育電視機和麒麟……



記得上次基爾都有在這扇課室的大窗前憑欄影了張「窗外」照,今次就無再影了,不過單單站在這裏欣賞窗外田園春色也令人著迷,如果基爾小時候在這裏讀書一定成日望窗發白日夢。



再影返課室內其實都保留了幾多舊時的木製書台桌椅黑板,唔知點解覺得幾有台灣那些年的味道,黑板和牆上還貼了不少以前學生的作品和校園生活的老照片,相中的小孩子依家估計都變晒婆婆伯伯了吧!

76 則留言:

  1. 遲幾個月去咪有龍眼摘?

    回覆刪除
    回覆
    1. 唔知喎....龍眼通常係咩季節有得食?

      刪除
  2. 我入西貢時知道有船入鹽田㭙,都想去架,那裡有原始風味

    回覆刪除
    回覆
    1. 都係呀,如果嫌長洲南丫島果啲多人,去下喱度似乎更有離島的感覺呢

      刪除
  3. 回覆
    1. 唔通大夫去過喱度拍拖?.....XXD

      刪除
  4. 唔知從幾時開始,好多人慕名而嚟,
    成為旅遊景點,令哩度可以重生,都喺㚥事
    我都覺得舊校舍課室好有台灣feel,
    可能喺夠殘啩。

    回覆刪除
    回覆
    1. 我都唔知係從何時開始....:P
      西貢碼頭喱度附近都仲有好多外島可以去逛逛呢
      係呀,你都覺有台灣feel,可能係佢啲木枱很有點懷舊味道吧

      刪除
  5. 我2月平日去環西貢小島遊船河, 重遊鹽田梓時非常多「朝聖團」BUT 當天學校無開~~

    回覆刪除
    回覆
    1. 係呀我都估唔到有咁多朝聖團,可能唔少宗教團體會來這裏一日遊或靈修之類吧
      正喎小島遊船河!!!仲有冇去其他地方,例如東壩地質公園果啲?

      刪除
    2. 東壩地質公園沒有去.
      去SEE 珊瑚同橋咀島看連島沙洲.^^

      刪除
    3. 之前睇人地blog都見唔少人夏天會去橋嘴島,個連島沙洲都好特別好多人特登搭船入去行下

      刪除
    4. wahkaka, 真的是大鄉里, 原來是橋咀島也地質公園和珊瑚保護區.....

      刪除
    5. 係呀好多人去睇果度啲菠蘿包石丫嘛

      刪除
  6. 所以政府啲通脹都唔知點計既 @@

    回覆刪除
    回覆
    1. 我諗剩係計佢地公務員要加幾多人工囉......XXXD

      刪除
  7. 我都5年前去過1次,買團購一天遊,好抵玩,但冇入澄波學校參觀,現在幸好有你分享。

    回覆刪除
    回覆
    1. 對,我都聽聞唔少一日遊團會來,同埋都幾多大陸團喎!
      上次來學校好似無咁多展品,今次去就多咗好多,證明係有好多遊客來參觀吧

      刪除
  8. 好有原始味道~
    想像唔到以前島上住幾千人有幾熱鬧~
    有冇食豆腐花餐蛋麵?係郊外食特別開心架~

    回覆刪除
    回覆
    1. 我估係似以前鯉魚門之類的小漁村吧,一定唔會似依家長洲咁人頭湧湧囉XXD
      我無食呀,佢果日連餐蛋麵都無,只有魚蛋茶粿咋,同埋我自己有帶少少嘢食去嘅

      刪除
  9. 鹽田梓現在做保育,多了遊人。

    回覆刪除
    回覆
    1. 都幾多人入去,不過依家船飛就稍嫌貴咗啲,同埋如果夏天去會比較熱,要帶定驅蚊膏先掂!

      刪除
  10. 唔知而家仲要唔要睇ETV? XD
    劉雪莘+泰漢, 好耐世紀啦, 佢地都一把年紀仲做後生, 我睇到反哂眼

    回覆刪除
    回覆
    1. 我真係唔知喎,應該仲有吧,以前值日生一到ETV堂就去推電視機好興奮wakakakakaka....
      好似成個世紀以前的台灣電視劇XXXD~~~~~不過我真係無乜印象個故仔係講乜,只係記得劉雪華陳德蓉果啲通常係唔知做乜由頭喊到落尾嘅!!

      刪除
  11. Have to find time to visit this small and tranquil island.

    回覆刪除
    回覆
    1. 都幾值得去一次,行去玉帶橋果邊係幾靚幾特別嘅

      刪除
  12. 乜野情深深雨朦朦呀🤣
    這學校保養得好好呀,令我回憶到剛回鄉看到的荒廢學校。

    回覆刪除
    回覆
    1. 你問下銀嫂應該知....XXD
      係呀喱間算係保養得唔錯,比對起附近好多村屋已經日久失修屋頂都塌晒

      刪除
    2. 可能佢唔知而我知呢,wakaka~

      刪除
    3. 後生得滯未必有睇過啦!!
      亞視執咗連重播都無乜機會wakakakaka....

      刪除
    4. 當年趙薇隻CD我有買架,不過搬屋時掉晒

      刪除
    5. 原來佢有出過碟??!!@@

      刪除
  13. 如果唔係滴濕身, 我反而鍾意陰陰天外出…因為一有太陽就好熱…
    個牌有冇講棵老龍眼樹係野生或是以前村民種呢??!!
    點解唔影張窗外照, 畀大家對比下gael兄同之前有冇咩歲月的改變嘛…

    回覆刪除
    回覆
    1. 唔似喎,我仲以為森兄係beach boy....XXD
      無留意到呀,不過我諗多數係幾十年前村民種落吧,亦可能食完龍眼隨手將粒核丟出街外,就長成依家咁大棵!!
      你係咪想睇下我點樣歲月催人先~~~~wakakakakakaka
      咁其實都只係差幾年啫,我諗又無咁誇張有明顯對比掛@@

      刪除
  14. 咁好興緻去春遊呀~~~正丫~~~
    不過澳門呢排天氣都唔知點....好鬼熱~~~
    呢幾日又好似會落雨~~好難搞~~
    搞到想行山都唔得~

    回覆刪除
    回覆
    1. 係呀襯果陣都未係太熱咁就去行一轉囉
      今年算係熱得好快,已經有夏天的感覺了....
      帶定件薄風褸啦,有時出入冷氣地方都要,你就黎出發旅行要好好保重身體先得!
      疊埋心水去完旅行先啦XXXD

      刪除
  15. 天氣麻麻但係冇太陽唔曬都好好,鹽田梓走一轉大概幾耐?你坐的是中艇還是細艇啊?

    回覆刪除
    回覆
    1. 果日好似係坐11點船入去,兩點幾船走,速度算係好快,可能因為之前我都有去過,基本上大部份嘢都睇過,所以可以行得好快,如果食埋嘢都可以遊四粒鐘我諗都好足夠!!
      我諗算叫做中艇,下集會有影到隻艇你到時留意睇下,我諗大過一般舢舨仔,可以叫中艇啩?!!

      刪除
  16. 回覆
    1. 下次回來去開西貢不妨去走一轉啦^^

      刪除
    2. 我啲時間表好緊湊下,哈哈哈

      刪除
    3. 全部都係食與聊天,食同聊天,哈哈哈。

      刪除
    4. 已經好忙又夠豐富啦XXXD

      刪除
    5. 復活節快樂~~~~有冇長假放?!

      刪除
    6. 冇,這裡只有三日咋,星期一都要上班啦。

      刪除
    7. oic~~~~~咁HK算係長了....

      刪除
  17. 同大澳有少少似呀我覺得~

    回覆刪除
    回覆
    1. 無大澳咁多人咁冚墟,又無乜嘢食囉^^!

      刪除
  18. 幾值得去喎!
    唉 ~~~~ 有人無屋住,有屋無人住 ~~~~

    回覆刪除
    回覆
    1. 會唔會入去住下,搵啲寫作靈感^^

      刪除
    2. 我想入去住上一個星期添,哈哈哈

      刪除
    3. 足夠寫返本荒島小說XXD

      刪除
  19. 回覆
    1. 都幾值得一行,人比較少,似東龍島蒲台島果類

      刪除
  20. 鹽田梓 !? Sky 都未去過的 >.<

    回覆刪除
  21. 這地方我連名都未聽過呀 , 哈哈少遊人來少些破壞環境 .

    回覆刪除
    回覆
    1. 近西貢碼頭果邊有艇去,不過遊人少,船的班次也比較少一點

      刪除
  22. 想去鹽田梓,遲遲都未去~~~哈
    夏天又怕熱.....

    回覆刪除
    回覆
    1. 夏天都幾熱,一定要帶定防蚊膏XXD

      刪除
  23. 我2號都剛去,天氣好好,好靚!呢度都唔錯!

    回覆刪除
    回覆
    1. 咁啱嘅?!!你去果日多唔多朝聖團?

      刪除
  24. 鹽田相信比較少人到既地方.因為我未去過.

    回覆刪除
  25. 基爾晚上好,
    我都好耐冇去鹽田梓喇,原因之一係交通費都幾貴,

    回覆刪除
    回覆
    1. 你好華哥,係呀我都覺得來回船費$50真有點貴,因為船程才不過15分鐘左右吧!!

      刪除
  26. 呢度我都去過兩次 , 超正呢~!!

    回覆刪除
    回覆
    1. 係咪同圓咕碌去?
      環境真係幾清靜幾靚嘅

      刪除
  27. 柴火土窯雞 我年幾前食過, 真係唔錯架 !
    要訂, 我好似仲有佢電話 !

    回覆刪除
    回覆
    1. 原來你有食過,我見果日佢只做團體餐,所以都無問佢地了,佢門口有個牌係寫住要預訂先有得食土窯雞

      刪除
    2. 我個時去, 佢剛開始賣之嘛, 冇咩人識 !

      刪除
    3. OIC~~~~你地飲咗頭啖湯^^

      刪除