2017年4月20日 星期四

春日重遊鹽田梓:下@西貢

在澄波學校簡單行一圈後,見開始有一日遊團陸續湧到,寧靜小島也頓時熱鬧起來。事不宜遲,繼續拾級而上去山頂的小教堂逛逛吧!



這間聖若瑟小教堂上次基爾也有來過,今次因為突然來了幾團遊人(而且大部份講煲冬瓜的呢),咁就無謂再逼入去教堂湊熱鬧了,只圍繞小教堂走一圈看看外面風景已夠愜意!(如有興趣看看教堂內部陳設,可click入舊網誌:鹽田梓分享遺產:上@西貢



小教堂正門外擺放了一座西式大銅鐘,上面有ROMA字樣唔知係咪代表是意大利鑄造?上次記得人有會敲鐘,今次在大鐘旁邊貼了「嚴禁敲鐘」的標貼,或許因為驚太多遊人敲鐘,打擾了教堂寧靜的環境……



教堂外面向海的一邊景致開揚,可遠眺西貢一帶海岸諸島,另一邊則是田園美景,完全是五星豪宅級景觀。最近看選舉論壇經常話房屋問題係目前重中之重的熱話,但這個荒蕪小島就有好多廢棄村屋無人住,忽發奇想將來如果起返條大橋連接起市區,唔知會唔會成為另一個馬灣呢!



重中之重的問題,都係留返畀年薪幾百萬的人去慢慢思考吧!基爾樂得逍遙,繼續遊島去。由小教堂落山繼續向前走,就來到陳志明副主教故居。之前講過今次重遊舊地正好是復活節前數周,所以都見有唔少由神父帶領的朝聖團來鹽田梓朝聖。



有別於一般慣常奉拜天后等中國傳統神明的漁村小島,鹽田梓特別之處在於古老的天主教文化色彩,究其淵源可追溯到19世紀1879年,來自奧地利Tyrol的聖福若瑟神父(St Joseph Freinademetz SVD)遠隔重洋選擇來到鹽田梓傳教,並籌建聖若瑟小教堂。上圖是19世紀教堂遺址,由於日久失修大部份建築物已崩塌,後來才於小山上重修新教堂。



殘存的古老大石牆上掛了一些舊教堂的老照片,還有昔日的間隔陳設,看著這片頹垣敗瓦似乎仍殘留不少司祭壇、十字架甚至彩花玻璃窗的舊貌。



上圖的聖福若瑟神父石像應是新擺放在祭壇旁邊,現時新教堂裏也有一尊類似的神父雕像;左圖是毗鄰的副主教故居,屋頂同樣也崩塌了,只剩下四面牆屹立不倒。



攀車邊隨神父的朝聖團繼續往前走,原來是來看古井,之前基爾也來過,目前井口已加圍欄不作打水用,但往井裏細看依然有水。昔日島民都靠這口井過活,後來人口增加不敷應用,就到旁邊的滘西洲加建水塘取水。



看完古井之後再上小山,主要是去涼亭稍休。島上有兩座涼亭都修築在小山丘上,鹽田梓面積不大行山徑也不長,如果有去過長洲南丫島東龍島蒲台島行山經驗的話,再來hea行鹽田梓應屬「BB級別」而已,不過從島上遠眺西貢海一帶的風景就絕不輸蝕,上次初夏來是一片藍天白雲碧海;今次則換上濛濛春雨靚海景。



鹽田梓與鄰近的滘西洲只相隔了一個小海峽,由上圖這條玉帶橋連接,上次由於太曬太熱沒有行來橋上影相,今次點都要補影返。以前可以一直走上去滘西洲,不過近年可能為免太多閒雜遊人進入滘西洲上的高爾夫球場,所以山路被封了(如果有興趣看滘西洲高球場可click入舊網誌:遊滘西洲扮上等人@西貢)。



由玉帶橋折返,沿海邊小徑再行返去鹽田,以前不少村民就是靠這些鹽田引入海水再曬成海鹽出售賺取收入維生,鹽田梓(又稱鹽田仔)之名就是由此而來。依家大部份鹽田早已荒廢,只保留小部份作生態旅遊景點。



上次來時記得有睇過導賞員示範引海水曬海鹽的工序,不過今次要待下午兩點幾才有示範表演,咁就無等啦!只係去睇睇D粗海鹽製成品就走了,之後同旅行腳行返出去鄉公所對面個茶水檔坐多一陣,等2:20pm回程船期間友人買了茶粿和魚蛋試試,茶粿有3款口味:黑色雞屎籐、橙色南瓜、白色杏仁,記憶中好似比西貢市集出名果間貴兩三蚊左右。



茶水檔對面間村屋有隻肥貓出來在窗前悠閒hea坐,唔少遊人行過都逗牠玩又同佢影相,後來肥貓可能見太煩就無奈返入屋裏避靜了,似乎連佢都唔太慣人來人往的鹽田梓……



環島走一圈短短幾個鐘已很足夠,差唔多兩點要提早去碼頭搭回程船,因為通常都幾多人排隊,如果上滿人就要等下一班(好似要成個幾鐘先有一班船)。街渡本身也是由漁艇改裝而成,內部陳設都很有水上人的家居feel,只加裝了救生衣架。

p.s.建議盡量選擇早一點來遊島,中午前後可能會比較多一日遊團到訪,人來人往始終會少了幾分荒島閒情,如揀下午遊就要注意回程尾班船(唔記得係咪5:00pm,上船前要先問船家check下),以免留落荒島,到時要玩Survivor!

60 則留言:

  1. 你的分享詳盡,我曾到此一遊,對殘破的舊屋感覺最有印象!

    回覆刪除
    回覆
    1. 我諗都幾多攝影團鍾意來影喱類荒廢舊居....

      刪除
  2. 鹽田梓環島週圍景觀應該好正!

    回覆刪除
  3. 其實一個景點,多人去才會有它的保留價值…若然太少人到訪,就會變得荒廢無價值…
    我諗而家香港都應該冇乜地方再生產鹽?!!…咁你有冇買番包天然生曬海鹽呢??

    回覆刪除
    回覆
    1. 所以都希望森兄多啲來這裏留言,以免這裏荒廢太耐變得無價值....XXXXD
      真係唔知喎,唔知大澳果啲會唔會有?不過HK海水污染都幾嚴重,唔係度度地方都可取海水製鹽呢!
      又唔見佢有得賣,亦唔見有紀念品攤檔有得買喎,只係見有示範表演(不過這次沒看,因等太久),森兄下次如果去就提議下佢地賣海鹽手信賺取少少營運收入都好,也可補貼下啲船費唔駛咁鬼貴啦^^

      刪除
    2. 有森Blog荒蕪都未到gael兄呢度啦…咁多擁躉~~~
      怕到時森伯嚟得多, 又話老人家煩啫~~哈哈哈

      刪除
    3. 都唔係㗎,多啲人講下嘢熱鬧啲,總好過自說自話啦:P
      一定唔會啦,歡迎你多啲來留言大家互相煩下wakakaka....

      刪除
  4. 竟然有煲冬瓜人~?真係估唔到喎!

    回覆刪除
    回覆
    1. 我都估唔到呀,還以為佢地活動範圍只限於廣東道和上水....XXXD

      刪除
  5. 我之前也剛去,很喜歡這小島,已去了兩次,第一次在下船後的第一個檔口吃茶粿很好吃,第二次在小坡上那家吃,凍冰冰又硬好難吃,很失望!

    回覆刪除
    回覆
    1. 原來你也去了兩次,你覺唔覺船費貴咗好多?!!@@
      餐廳個view係幾唔錯,咁有冇食佢推介果隻土窯雞?

      刪除
  6. 鹽田梓好多嘢睇又有特式﹗

    回覆刪除
    回覆
    1. 比較似真正的離島,唔係長洲果種喧鬧多嘢食果種

      刪除
  7. 好羨慕香港比澳門多既地方可以周末逛逛~我覺得咁樣幾好幾開心~~
    我見到有魚蛋~我鐘意~

    回覆刪除
    回覆
    1. 澳門依家都好多地方行下喎,又有8字摩天輪和巴黎鐵塔我都未去過^^!!唯一係食嘢消費就貴咗,懷念以前多平抵嘢食wakakaka...
      咖喱魚蛋我多數自己整好少在街篤:P

      刪除
    2. 巴黎鐵塔我不會上~8字玩過兩次~永利哥個都玩過~呢d都係玩一次唔會再玩既野黎....我地多d自然地方行....過度發展就會搞成咁....得番d建築物行.....依家食野又貴喎...唉....迫人去香港同埋去旅行既~~~~~
      華!!!新好男人呀~~~~自己整咖哩魚蛋~~~~

      刪除
    3. icic~~~~其實我都搞唔清邊個賭場打邊個賭場,依家真係好多賭場啊....:P
      你地經常去冰島都知你地係鍾情啲自然地方多啲啦!
      係呀澳門食野依家真係貴過HK,地道抵食的唔易搵!
      唔難喎,通常撈埋咖喱薯仔一齊燜之嘛^^

      刪除
    4. 賭場仲多過步行徑....我諗遲d要組隊過香港行山~
      都係架...以前就會鐘意去下城市...但依家反而唔鐘意去旅行係睇建築物~
      咪囉...所以我有時同朋友們黎香港食野會覺得好食又抵~
      下次要整時要放上黎俾我望下啦~無得食都望下啦~

      刪除
    5. 賭場多都好嘅,至少賺到龐大收益...XXD
      港島區都好多短線行山徑啱半日遊
      睇建築睇風景我都like,有得去外遊都好開心^^
      間中發掘到啲抵食好食嘅食肆其實都幾興奮wakaka...
      之前都有煮過類似,咖喱薯仔炆雞翼,唔落雞翼改落魚蛋仲方便:P
      http://gaelhk.blogspot.hk/2011/01/blog-post.html

      刪除
  8. 希望多人去了之後,沒有破壞生態環境!

    回覆刪除
    回覆
    1. 應該都ok,因為無乜露營地方又無燒烤爐,我諗無乜垃圾要掉

      刪除
  9. 我上次都係襯沒那麼人多, 急急腳搭船走人去橋咀島.
    不過一樣都係好多有煲冬瓜人~~~~

    回覆刪除
    回覆
    1. 係呀如果人人都係諗住尾班船走,咁可能會無位,因為隻船本身唔太大,差不多時間要先去碼頭排隊好一點!
      係喎這令我有點意想不到,還以為他們對這類郊遊活動完全沒興趣呢!!

      刪除
  10. 其實鹽田梓可行地方不多。

    回覆刪除
    回覆
    1. 某程度上同東龍島蒲台島差不多,可以行一個圈兩三個鐘乜都睇晒!!!!

      刪除
  11. 回覆
    1. 下次回來可以同老dad去行下,山路很短應該不難行

      刪除
  12. 茶粿,好想食添!
    現在工作忙,有一段時間不能寫小說了。

    回覆刪除
    回覆
    1. 西貢都幾多地方有得買....
      原來如此~~~~不過近排短篇果啲「真有其事」都幾好睇,短短地易睇易消化^^

      刪除
  13. 第一次聽有人會專程去到咁偏遠既天主教堂朝聖~
    鹽田梓好正,有自然風景又有舊建築睇,行足一日都得~

    回覆刪除
    回覆
    1. 唔知果度算唔算係HK開埠後其中一個天主教發源地呢?
      如果想睇埋曬海鹽的示範表演,我諗都要花點時間㗎

      刪除
  14. 教堂好正呀!
    煲冬瓜都來,總好過去尖沙咀逛名店吧

    回覆刪除
    回覆
    1. 各有所好啦,如果唔去尖沙嘴又唔得喎,要靠晒佢地帶動旅遊業㗎嘛,一陣啲零售又話寒冬...XXXD

      刪除
    2. 旅業政策都係留返畀啲年薪幾百萬啲政府高官去慢慢諗下XXXD

      刪除
  15. 好少去郊遊,但有時行開下都幾好,
    鹽田梓巳經好旺,逢假日人頭湧湧...,
    其實香港四圍都喺咁...

    回覆刪除
    回覆
    1. HK除了商場無乜特別地方好逛啦XXD
      佢只有周六周日有船來往,平日沒有....

      刪除
  16. 小教堂都幾多嘢睇喎.
    小島有種好輕鬆又舒適既感覺.

    回覆刪除
    回覆
    1. 環境其實都幾靚幾輕鬆,唯一係張船飛貴咗少少囉:P

      刪除
  17. 呢排成日天陰落雨又潮濕, 想行山都無mood呢!!
    無諗過呢度都有旅行團嚟喎!

    回覆刪除
    回覆
    1. 係喎,今年有冇趁春天去日本賞櫻?
      我都無諗過有大陸團,不過平時應該都有本地一日遊果類,包埋去西貢附近幾個地質公園果D

      刪除
  18. 教堂一定要去 , 特式嚟呢~!!

    回覆刪除
    回覆
    1. 係呀好多一日遊的團都係主要去教堂睇

      刪除
  19. 逛商場或者遊郊外,都是各有所好。個人還是比較喜歡去郊外。
    這間荒廢了的教堂,都幾值得去行吓睇吓。

    回覆刪除
    回覆
    1. 商場又行下郊外又去下就最好^^
      古蹟幾值得一看

      刪除
    2. 行商場可以見到現在流行些什麼東西,也是一種常識與樂趣。

      刪除
    3. 非常同意,我都不時會去window shopping....

      刪除
  20. 我番左黎啦 !!!!
    一黎就見到我都幾鍾意去的鹽田梓, 希望唔會好似塔門咁令我失望 !

    回覆刪除
    回覆
    1. Welcome home^^
      嘩~~~你去咗好耐旅行喎,南美係咪好正?
      鹽田梓我諗相對係少人啲,因為佢只有周六日先有船來往,我諗就唔係咁多遊人去露營吧.....好似都唔見有營地呢

      刪除
    2. 係呀 ! 半年去左好多地方, 眼界又大開了 !
      咁又係, 不過呢度 day trip 都可以好多人架 ~

      刪除
    3. 咁如果有時間就寫少少精彩旅途經歷來分享下啦^^
      通常一日遊團都係去教堂睇下就撤退,因為仲要坐船去埋其他幾處海岸公園睇石,食午飯又多數不會選擇在鹽田梓....

      刪除