2017年9月19日 星期二

珍郵庫@饒宗頤畫作及書法

係呀又係講郵票,看來基爾都要努力少少為大典發掘開拓一些新鮮題材,有乜好提議?定還是繼續享受半休blog呢?



不過,點都寫埋今次喱套先啦!這套以國學大師饒宗頤的水墨書法作品為題材的首日封,可說是今年的重點之作,看訂購單張時已覺得好靚,是今年度必訂之選(有可能全年最賣得就係喱套)。



點知原定於3月底發行的首日封竟一波三折(唔係IQ題,咪誤會有折頭),3月中時收到email通知話「印刷出錯」要重印,仲要延後到不日通知新發行日期(到底印錯乜野咁蝦碌,下面再講)!無止境的等……結果一等就大半年,在幾乎淡忘了之際……



8月中又收到電郵話終於定了9月5日會補出返喱套首日封,咁遲到都好過無到啦!基爾激愛上面喱個$10《荷花四屏》小型張,係咪靚到冇人有呀!印象中上次去美孚那間饒宗頤文化館有見過這幅美得令人心動的荷花寫真,立即翻查舊blog果然有影到(可click去:饒宗頤文化館@美孚),想睇返可以click去睇下!



話明係重點推介,又點會只買一個小全張咁少,一定要買埋其他書畫郵票先安樂啦(開動大解慳囊mode)!上面一套6款郵票幅幅都係代表作,等基爾慢慢逐一話你知係咩名堂吧(一定又要係度拖時間短話長說了)!



好啦由平到貴逐個講:$1.7《黃海虯松圖》和$2.2《九松羅漢》都是饒大師的山水花鳥畫代表作,分別繪於1984和1993年,留意連個郵戳都係饒大師手筆,特別得來又好classic。



跟住上面見到$2.9《閒中有富貴 壽外更康寧》和$3.1《澤潤四方》。開估!就係印錯了$2.9這詩句的簡介。這兩句詩係來自宋朝陸游的《自喜》,寫簡介果個要打patpat太懶唔上網confirm一下,將「壽外更康寧」寫成「壽外處康寧」。陸放翁五律原詩是:「了了復惺惺,蓍龜未是靈。閑中有富貴,壽外更康寧。身備鄉三老,家傳子一經。春回元不記,出戶四山青。」這首未必很多人會讀過,相信《示兒》就大部份人在中學時代一定有讀過吧!



溫習完宋詩之後繼續講埋餘下兩張:$3.7《摹唐人觀音》和$5《金文錄陳曼簠銘》。金文就是刻在青銅鐘鼎上的遠古中文字,饒大師除了精通詩詞文學和書畫外,也鑽研上古史、甲骨學、楚辭學甚至古樂曲等十幾項領域,故有國學大師之稱。



心水清blog友可能會留意到,上面除了兩個首日封之外,側邊好似仲有盒野唔知係乜喎!咁就開埋估啦(其實應該都無乜人想估)!就係上面喱盒野,影埋出來畀你睇知唔知係乜東東?



睇真其實佢係個passport套,唔訂開郵票首日封可能唔會知,依家訂郵票係好似去超市買野貯積分和印花咁,訂郵票係有積分貯,咁貯貯下又有好多分可以換唔同紀念品(其實好多禮品都係D唔等洗無謂野),例如年頭訂生肖郵票會送生肖利市封和生肖金牌(A貨咋);訂颱風郵票會送颱風訊號手巾仔之類……記得那時預訂喱套饒大師首日封時見到有得用積分換喱個passport套,基爾已經好心心眼,填表交錢時問郵局叔叔可唔可以換喱個套(連自己有幾多分都唔知),郵局叔叔話照填啦!夠分佢自然會畀你云云……結果等大半年等到郵票出先知有定冇,係咪辛苦過等桃花到!

饒宗頤教授畫作及書法
發行日期:2017年9月5日(原定:2017年3月23日)

97 則留言:

  1. 估唔到而家郵局都幾商業化

    回覆刪除
    回覆
    1. 係㗎佢地要自負盈虧,其實都應該嘅

      刪除
  2. 這批饒宗頤郵票好靚,我鍾意古色古香設計。

    回覆刪除
  3. 我亞仔有買,朋友又送我小全張,中國書畫作郵票題材會很豐富,相信會有很多欣賞者。

    回覆刪除
    回覆
    1. 你對書畫有興趣,我都估你會買喱套呢^^

      刪除
  4. 講吓郵票好呀,不要休Blog啦.

    回覆刪除
    回覆
    1. 多謝你^^
      讓我知道原來仲有人有興趣wakakaka....

      刪除
  5. 套郵票真係好靚!
    不過都好想八下。。。其實印錯了什麼。。
    要遲了成半年才發行!

    回覆刪除
    回覆
    1. 原來印錯字。。。乜無人做校對架? :(

      刪除
    2. 係咪成個大典blog即刻多添啲文化氣息....XXXD
      印錯咗首詩的簡介,咁一定要重印啦!!
      又係喎,奇就奇在竟然印好晒先發現咁甩轆,以前真係好少聽聞會咁,唔知係咪回歸前會比較嚴謹,回歸後就乜都事事旦旦啦(我諗應不只郵政署)....wakakakaka.....

      刪除
  6. 講食野啦,好鍾意看香港啲餐廳。

    回覆刪除
  7. 寫乜都好 , 唔好令到永樂大典浪得虛名就得喇!

    回覆刪除
    回覆
    1. 其實都浪咗好耐啦......XXD

      刪除
    2. 我比較鍾意睇人地寫果D.....尤其係夢飛翔果類XXXD

      刪除
    3. 夢飛翔會令你失望,冇壯男美女睇o架!

      刪除
    4. 不會呀,夢飛翔明顯不是sell壯男美女,單單影夜景已夠煞食XXXXXD

      刪除
  8. 有去過饒宗頤館,無想過出郵票,真係大師次作,好靚好中式

    回覆刪除
    回覆
    1. 我都係幾年前去過,那時仲未開上面果part呢

      刪除
  9. 喂喂...邊個俾你半休blog?~~~~~唔俾~
    寫都得架~~有出blog就得架喇~~~~~

    回覆刪除
    回覆
    1. wakakaka.......生日飯食開心啲^^

      刪除
    2. 點呀點呀~~做咩唔正面回應我架~~~唔準休呀~~~~~~
      寫下野食丫~我都幾鐘意睇你寫野食呀~

      刪除
    3. 咁.....其實計起來都算年中無休嘅,因為我日日都有回覆留言㗎嘛XXXD
      間中啦,依家都少出街食,就算食都好少影相啦:P

      刪除
  10. 呢套郵票設計得幾靚,好有書卷味…

    回覆刪除
    回覆
    1. 咁咪同森兄差不多....XXD

      刪除
    2. 饒大師除了精通詩詞文學和書畫外,
      也鑽研上古史、甲骨學、
      楚辭學甚至古樂曲等十幾項領域,
      故有國學大師之稱。

      刪除
    3. 肺朝百脉 输精于皮毛

      刪除
    4. 森伯邊有gael兄咁有墨水…
      或者寫吓所見所聞…比較好寫…

      刪除
    5. 咁就聽森兄話,希望發掘到啲值得寫下的見聞^^

      刪除
    6. 咁就期待gael兄的所見所聞…不過其實你寫乜我哋都照樣嚟擔凳仔捧場……

      刪除
    7. 我也很期待欣賞森兄作品,放長假要畫下啦^^

      刪除
  11. 饒宗頤教授的墨寶首日封,自然是今年的重點啦!

    回覆刪除
    回覆
    1. 係呀,而且都幾值得收藏丫......真蹟買唔起,咁郵票都係不錯選擇嘛^^

      刪除
    2. 好羡慕你可以有精神搜集這些郵票,你手中有很多經典。

      刪除
    3. 都唔係好夠位擺,明年再買少些...:P

      刪除
    4. 唔買都可以寫,介紹下郵票

      刪除
    5. 咁試過搵啲陳年郵票寫下囉^^

      刪除
  12. 新鮮題材>基爾戀愛大典。

    回覆刪除
    回覆
    1. 全部收埋床下底喇佢..

      刪除
    2. 王子:邊有王子果啲咁精彩要同人分享.......XXXD

      刪除
    3. JJ:床下底得郵票首日封咋喎,寫晒㗎啦....wakakaka

      刪除
    4. 郵玩典藏 (44)......<<
      你床下底好扁!好扁! 呵呵呵...

      刪除
  13. 成日講郵票好呀,我以前都有儲,而且都有好多人關注同回應啦!

    回覆刪除
    回覆
    1. 唯有係寫喱啲先長寫長有啦....:P

      刪除
  14. 大師級作品,值得珍藏呀!

    回覆刪除
    回覆
    1. 唔錯啊,睇下書畫令人身心平靜^^

      刪除
  15. 這套郵票好優雅,很喜歡蓮花那一款。
    做乜要休博呀? 介紹郵票咪係幾好! 可以盡情晒冷,Po 啲郵票嚟睇吓。

    回覆刪除
    回覆
    1. 蓮花很有神韻美態,屏風擺在家都會份外感到夏日清風徐來.....
      咁要多謝秋葉捧場先^^

      刪除
    2. 永樂大典四個字,加埋兩個好似愛神嘅肥仔,版頭已經好吸引。
      四幅荷花圖真係好清雅,彷彿荷香陣陣,撲面而來。
      *
      我都覺得Wien提議得好! 除了郵票,就寫些感情事,生活隨筆吧。好事淤事都寫些,網友就有眼福了。

      刪除
    3. 多謝秋葉欣賞,那兩個肥仔自這裏開blog已經係度了,陪伴我好多年wakakaka....
      喜歡荷花圖,有時間可以去美孚展館看看真蹟^^
      對,我也很期望看看他的愛情故事XXXXD

      刪除
  16. 以前有收集郵票,對郵票仍有興趣,所以你继续寫郵票我都會睇。其他题材你自己發掘啦, 唔廢 blog就得啦👀

    回覆刪除
    回覆
    1. 盡力啦不過依家都唔會訂太多,要揀過先,因為都無位擺了:P
      p.s.今時今日都依然仲寫blog的我諗不多了,留下來繼續寫的我諗都多數仲係想分享日常嘅^^

      刪除
    2. 除sharing 外,我主要係要 keep 住寫中文和留住回憶

      刪除
    3. 咁你中文都好好喎,keep住寫啦^^

      刪除
  17. 我都覺得呢套係今年最靚之一,水墨畫又靚又有特色~
    最衰冇換到passport套>.<

    回覆刪除
    回覆
    1. 咁你啲積分通常點用?求其都換啲啦費事浪費咗佢:P

      刪除
  18. 其實你都係想講''我一直在你身邊,從未離開''之嘛😏

    回覆刪除
    回覆
    1. 人哥~~~一直都係得我一個咋喎,唔好嚇我喎~~~~~XXXD

      刪除
  19. 好有中國味道的一套郵票.~唔錯!

    回覆刪除
  20. 原來你鍾意集郵。

    好耐之前我都有儲首日封的,也有儲郵票,但係這種興致好像忽然消失了般。由於好耐冇移動過郵票簿入面D郵票,有次執拾重看,發覺有D郵票黏住了個底同用嚟「夾住」果層薄膠(郵票下半部攝入去果層膠)。

    回覆刪除
    回覆
    1. 間中仲有買下,揀啲靚嘅買^^
      嘩,咁真係好耐無揭喎!有時濕度太高都會發霉呢:P

      刪除
  21. 集郵呢個美得 , 除咗你已經好少有人傠呢~!!

    回覆刪除
    回覆
    1. 我諗至少唔多人買郵票,寫出來的更加少之又少囉:P

      刪除
  22. 現在也沒有甚麼人寫書法!

    回覆刪除
    回覆
    1. 小學依家仲有冇書法堂,以前我記得有,仲依稀記起墨盒那陣味XXD

      刪除
    2. 有架,我有朋友想書法班。仲有用水既毛筆綀習,水消失后可以再寫

      刪除
    3. 用水既毛筆綀習<====唔係用墨寫呀?係咪好似大陸廣場用地拖咁大的毛筆寫地下練字果種?

      刪除
    4. 用水毛筆來練習,比較環保,但適宜初學者!

      刪除
    5. 水毛筆係咪唔駛用墨盒?

      刪除
  23. 哈哈...真喺無乜文化喎
    余大師...啲作品我就少睇,
    郵票以港小食主題我比較有印象...

    回覆刪除
    回覆
    1. 你都係偏愛歐洲文化多啲....XXD

      刪除
    2. 唔喺..我無乜文化啫...
      而且見識少,
      余大師我真喺近年先知有個咁嘅人。

      刪除
    3. 都唔係丫,睇你blog也可長知識^^

      刪除
  24. 這套郵票確是值得收藏!

    回覆刪除
    回覆
    1. 所以床下底無乜位剩囉....XXD

      刪除
  25. 唔准休, 寫乜都好, 一得閒就嚟 ^^
    嘩, 訂郵票都有積分儲, 我真係唔知呀, 長咗知識, 多謝!

    回覆刪除
    回覆
    1. Wakakakaka....咁要等下因為近排比較宅:P
      有㗎,好似去超市咁,不過啲分都唔知有乜用,最好可以用作訂郵票時作折扣減免,會實際好多XXXD

      刪除
  26. 好喜歡以書畫為題嘅郵票,我也四了《荷花四屏》

    回覆刪除
    回覆
    1. 會唔會抽空去美孚看一看荷花四屏的真蹟呢?^^

      刪除