2017年10月10日 星期二

歲月兒歌@流行經典50年

好多人就話廣東歌已沒落,基爾都覺得今時今日已經無乜人會再睇勁歌或季選之類的音樂節目了吧!不過近期一個周末的懷舊老餅歌節目卻製造了不少令人眼前一亮的奇蹟,至少基爾都有睇!



美少女戰士    王馨平/湯寶如
真係唔講唔知喎!喱個流行經典歌節目在周末已成為皇牌,長期有成20幾點收視,比現今大台唔少無謂老土劇集都要勁,難怪長做長有。早前播出的兒歌特集就非常吸晴,其中Linda和湯記唱的美少女戰士可謂將基爾的青蔥歲月回憶完整重現了(無謂呃人啦基爾想當年都已經唔係小學雞了)!王馨平夠高大很有天后級的壓台感,唱歌水準依然keep得好,基爾覺得是當年寶記小花中keep得最好的一個;湯記就好似多年來歌藝都無乜特別精進,但她扮水野亞美可說是絕配的經典!




美少女戰士S    陳琪
美少女系列卡通片的主題曲確實係堅好聽,翻查資料原來大台首播已經係1994年(一轉眼成23年了問你驚未!)之後續播的美少女戰士S延續了經典,仲有冇人記得陳琪係乜水?(畀少少貼士:胡諾言老婆係咪會有少少印象?)S喱首主題曲好有80's日本流行曲風味,當年也是卡通經典hit歌之一。Btw,陳琪好似有份演《宮心計2》,遲下播出時不妨留意下。




寵物小精靈    陳浩民
近排因為手機遊戲關係令Pokemon翻生,至於來自「遠古」的這首卡通片主題曲基爾翻查返原來是1999年作品,東瀛味濃的曲式初頭以為係日版原曲改編,原來竟是不折不扣的本地作品,當年除了陳奕迅的超人迪加之外,這首也是基爾的心頭愛(依家不論兒歌或流行曲好像都不覺有這類高水準之作),特別喜歡最後唱出的那個「Get」簡直是神來之筆!至於陳生近年多在大陸搵食絕少在港曝光了,對他的印象只停留在段譽和馬騮精,甚至幾乎忘了他有出唱片!老實講,基爾真係覺得佢唱歌進步左好多喎(要畀讚),可能在大陸登台搵真銀練歌練得多吧!




我係小忌廉    戴蘊慧
同陳琪一樣,可能好多人已經唔知戴蘊慧係邊個?(知都要扮唔知......咔咔咔咔咔)咁等基爾話你知佢係第3屆新秀亞軍(冠軍張衛健果屆),至於小忌廉可說是80's當中最多好歌的一部卡通片,因為故事女主角本身也是歌星關係吧!日版原裝的主題曲已經非常好聽,戴蘊慧翻唱的廣東版當年也爆紅,成為她的一首金曲代表作。當年曾經有人話佢似中森明菜,Akina那種「型格鵝公喉」風格向來唔算係基爾杯茶,除了《禁區》(張國榮翻唱《第一次》)之外,比較喜歡的就是《Close Your Eyes》(蔡立皃翻唱《Close Your Eyes》)。最後要讚一讚戴蘊慧的live水準,實在比當年出道時升了幾個grade,再次證明唱歌都係要講歷煉!




夢中天使    唐韋琪
講親兒歌的話,真係無可能唔提Vicky姐姐!事關佢果首長腿叔叔主題曲堪稱為百大卡通片主題曲之首,幾乎每次出場都唱(一時想唔起佢仲有冇其他代表作)。其實喱首兒歌金曲真名叫夢中天使,至於長腿叔叔都係基爾當年很喜歡的一套卡通片,話時話點解依家D卡通片變晒質,似乎都唔再興這類名著改編的經典了,實在可惜!




仙樂處處飄    袁鳳瑛
基爾堅鍾意日本富士電視台製作的這類「世界名作劇場」系列卡通片,繼1991年的長腿叔叔之後,92年再推出仙樂飄飄處處聞,話晒係Sound of Music喎!卡通版的主題曲一定唔可以失禮,當年就找來羅大佑作曲林夕填詞,卡士真係超級強勁!至於唔見好耐的袁鳳瑛依然唱得,live是一貫的發燒碟級水平(連基爾媽都話:咦,喱個唱得唔錯喎),可惜在這個兒歌懷舊節目上她只唱了阿花,我寧願佢唱返仙樂處處飄啦!




相聚一刻    陳松齡
提起兒歌除了Vicky姐姐之外,另一位唔講會畀人打的就梗係松松姐姐啦!除了烏卒卒之外,松松姐姐在節目上仲唱過相聚一刻(1989年的歌……時光飛逝到得人驚)!這齣改編自日本漫畫壇天后高橋留美子名作的卡通片,主要是講響子小姐和裕作在一刻館發生的一段愛情故事,印象中故事節奏係超級慢(有很多定鏡分鏡位),相信唔係畀小朋友睇而係畀大人睇,當年這類情情塔塔的卡通也不太是基爾杯茶,同期唔記得係咪轉了去睇亞記的橙路或者筋肉人之類?




天界小神仙    郭小霖
最後想講埋上面喱首「大冷門」,估計大台應該都好難再邀請到這位媲美關正傑的「超級隱世歌星」重現舞台了吧(如果佢再開騷,唔係講笑真係要仆去撲飛)!其實天界小神仙本身也是由日本富士電視台製作的一套神級卡通片,大台於80年代中首播時也非大熱之作,不過後來每當與同年代人談起陳年卡通,相信有90%都話有睇過,奇哉!這齣卡通主要係以希臘羅馬神話作為藍本,故事主人翁寶倫是太陽神阿波羅的女兒,佢仲有個成日咸咸濕濕到處留情畀老婆扭耳仔的爺爺宙斯,這種「三級邊緣」的卡通在當年來說算是非常前衛。故事講小仙女寶倫為了成為真正的希臘女神必須要四出行善,每次做完好事之後會得到一枚「淑女勳章」,貯夠勳章就可以成為真正的神仙云云
(係咪有D似超市貯印花咁),然而每次出動都搞出唔少笑話,又成日要個friend丘比特出手相助(好多時係越幫越忙)。不過話說回來,基爾第一次認識希臘神話就是靠睇這套卡通,當中印象最深是Orpheus和Eurydice的經典悲劇,故事講寶倫陪同Orpheus彈住七弦琴千辛萬苦去到冥界拯救太太Eurydice還陽,可惜最後按耐不住回頭一瞥功虧一簣(完完全全跟晒原著),寶倫最後喊晒咁返去搵爺爺宙斯,後者為了安慰孫女都照頒個勳章畀佢以示鼓勵……(基爾係咪記憶力驚人)!

90 則留言:

  1. 咁多首, 最記得小忌廉
    當晚有無唱阿花的故事?

    回覆刪除
    回覆
    1. 小忌廉可能係最多主題曲和插曲的日系卡通片了,當年仲有出過sound track添㗎!!
      就係因為唱左阿花,所以無唱仙樂處處飄囉:P

      刪除
  2. 你真係好記性,啲名我都記得,但冇乜睇過。我家宅男細時都冇睇呢啲咁嘅。

    回覆刪除
    回覆
    1. 係咪通常睇超人迪加或者帝拿或者星矢果啲....^^

      刪除
    2. 佢有睇超人嘅,但你估唔到佢鍾意睇教育電視。

      刪除
    3. 教育電視都唔錯㗎,以前我都會睇!!

      刪除
  3. 美少女戰士S首中文我居然唔識。日文我又識喎.記唔起嗰時我係咪睇日文版!?
    另外以前有個同學係小忌廉迷.所有日本細碟都買齋。仲dup畀我,所以卡通中嘅歌我都識唱.

    回覆刪除
    回覆
    1. S果首我覺得都幾好聽,有日版,我都記得當年睇係播日版歌,好似後來才加了廣東版.......
      小忌廉有出過碟添㗎,都係日文版

      刪除
    2. 小忌廉o既碟
      https://www.amazon.co.jp/s/ref=nb_sb_noss?__mk_ja_JP=%E3%82%AB%E3%82%BF%E3%82%AB%E3%83%8A&url=search-alias%3Dpopular&field-keywords=%E9%AD%94%E6%B3%95%E3%81%AE%E5%A4%A9%E4%BD%BF%E3%82%AF%E3%83%AA%E3%82%A3%E3%83%9F%E3%83%BC%E3%83%9E%E3%83%9F

      刪除
    3. 長知識了,原來係叫做島津冴子.....@@

      刪除
    4. 唱主體曲嗰個叫太田貴子.
      https://www.youtube.com/watch?v=uQvzYnHW7bg

      刪除
    5. 我仲以為係一個人唱晒......
      喱個太田貴子依家係咪已經係婆婆?XXD

      刪除
    6. 上面個video應該係近代一啲。
      呢個係佢15歲時.
      https://www.youtube.com/watch?v=EJC7VnUxe_M

      刪除
    7. 嘩~~~~王子果然係日本通資料好詳盡@@
      昭和42年生,15歲夏休咁計落係咪1982年暑假?
      把聲真係好神奇,不論任何年齡似乎也沒變過,唔怪得有人聲識別技術出現!!!
      佢細個時個樣係幾標緻喎,但大個咗就.......佢志願話希望好似山口百惠咁紅咁成功,咁我諗喱個願望應該都有啲難度XXXD

      刪除
    8. 明顯佢喺樂壇只係曇花一現。One hit wonder.

      刪除
    9. 咁同Vicky姐姐都有啲似喎:P

      刪除
  4. 連故仔都記得,好犀利。我兒時鍾意食睇銀河鐵路999,飄零燕,叮噹。最新應該係IQ博士。其實我細時唔鍾意睇卡通片。

    回覆刪除
    回覆
    1. Orpheus果個故仔在希臘神話中都好經典,好記得㗎^^
      松本零士我都like,999好似係亞記播,無記就播千年女王,仲記唔記得彌生姐姐?XXD
      IQ博士好笑,草菇和占美山田超正....XXXXD

      刪除
  5. 當年我都唔係小學雞,是陪伴家中的小學雞觀看!

    回覆刪除
    回覆
    1. 有家長陪同觀看好好多wakakaka....

      刪除
  6. 上個星期的星期日檔案都好似係講兒歌!
    話現在的小朋友都無兒歌唱喇,
    還訪問第一代兒童節目主持人:Sunny哥哥!
    “跳飛機”果個喇!
    可能你太年輕唔識他喇。。。哈哈!

    回覆刪除
    回覆
    1. 係呀依家唔覺有乜hit的兒歌,卡通片都唔再興主題曲....
      咁有冇訪問張國強哥哥和譚玉瑛姐姐?^^

      刪除
  7. 不如你轉行啦,去電台講故喇。kakaka........

    回覆刪除
    回覆
    1. 睇長腿叔叔時,阿婆已經唔係小學雞啦..

      刪除
    2. 我如果去做電台你係咪聽先,不過你唔係旅行就係去影中環夜色,斷估無乜時間聽電台啦XXXD
      況且依家啲電台都無乜講故節目了吧!!
      阿婆可以陪乖孫仔乖孫女一齊睇㗎嘛^^

      刪除
    3. 阿婆有樹孫草孫花孫陪啦..kaka...

      刪除
    4. 都幾驚喎,趁萬聖節講鬼古啊?!!@@
      JJ一定係想做路芙接班人...XXXXD

      刪除
    5. 最驚咪比個藍色基孫嚇囉!﹏﹏﹏

      刪除
    6. 藍精靈,十分勁......XXD

      刪除
  8. 回覆
    1. 我諗依家電視節目都多數係中年以上嘅人比較多睇,年輕人我諗無乜時間睇電視吧!!

      刪除
  9. 咁多首歌,最BUY係夢中天使。

    回覆刪除
    回覆
    1. 旋律和歌詞俱佳,易上口,是很有水準的流行主題曲,同套卡通都好夾呢!!

      刪除
  10. 從來都唔會追睇, 但又套套都知下
    小忌廉果d公仔得意首歌都好聽

    回覆刪除
    回覆
    1. 形住你細個時會扮下......XXXD

      刪除
  11. 宜家既小朋友都少聽兒歌,聽既都係大人既歌.

    回覆刪除
    回覆
    1. 依家小朋友多數聽晒啲BIGBANG少時啦,仲邊會聽兒歌咁鬼娘!XXD

      刪除
  12. 回覆
    1. 當年你知唔知係梅姐唱?
      不過,我都係依家先知神奇大帝主宰太空係張國榮唱......@@

      刪除
    2. 梅姐唱我當然知,佢不都知現場唱過多少次~
      但神奇大帝主宰太空係哥哥唱我又真係唔知噃!

      刪除
    3. 依家方便好多,上網可以睇返唔少兒歌和卡通片主題曲^^

      刪除
  13. 慘啦, 肥人都係呢個年代架, HAHAHAA
    細個無咩錢買玩具, 多數都係睇電視聽兒歌, 個個都會記得又識唱~!

    回覆刪除
    回覆
    1. 唔駛慘喎!!其實我覺得以前做細路係開心好多,有真正的童年^^
      又係喎,至少無得玩手機又無平板,通常都係睇電視430....XXD

      刪除
  14. 回覆
    1. 以前SD和BD細個時有冇唱過畀佢地聽....XXD

      刪除
    2. 佢地只係識迪士尼歌仔咋,到現在都記得,考試又唔見咁好記性XDDD

      刪除
  15. 其實.....我都有睇..
    有時仲睇到尖叫...尤其東東出現哥陣~

    回覆刪除
    回覆
    1. 如果你個SunnyBB出場咁會點?XXXD

      刪除
    2. 我~回~來~了~
      唔係下話...佢地都上到流行經典???我會覺得佢地好勁!!唔係個個都上到架..你估咁易個磨~XD
      梗係直頭想係現場尖叫啦~~~~~~~~~~S-U-N-N-YYYYYYYY

      刪除
    3. 今次四國咁有冇開心搞笑野發生先,快啲劇透DD來聽下^^

      刪除
  16. 我以為可以長做長有請更多老歌手出山,但原來昨日己係最後一集....

    回覆刪除
    回覆
    1. 唔係搬咗去星期六晚做咩?我估佢至少做到台慶吧???

      刪除
  17. 我以前工作比較忙,很少有時間聽歌看電視,對他們比較陌生。

    回覆刪除
    回覆
    1. 都唔只以前啦,你依家都好忙呢....XXD

      刪除
    2. 哈哈哈,職級低便要勤力些。

      刪除
  18. 基爾的記憶力真係驚人!
    亞嬸我睇長腿叔叔時都忘了幾多對,
    我都係喜歡叮噹,IQ博士, 超人多D!!wahkaka.....

    回覆刪除
    回覆
    1. LB我諗都係十零對㗎啫....XXD
      叮噹IQ博士果啲係長青㗎喎,依家睇返都好睇

      刪除
  19. 好多位仲KEEP得好好
    小忌廉簡直是兒時的模仿對像^^
    星空裡萬物......

    回覆刪除
    回覆
    1. 咁依家仲會唔會扮畀大爺睇.....wakakakaka

      刪除
  20. 提及的動畫,沒怎麼看過,談不上有甚麼印象,但歌曲倒認識不少!
    眾多兒歌,我喜歡《相聚一刻》及《星仔走天涯》。

    回覆刪除
    回覆
    1. 這些兒歌可能以往間中都有在電視播,咁間唔中聽到都會可能有啲印象....^^
      落雨不怕落雪也不怕.......

      刪除
  21. 點算, 應該要迴避呢篇, 呵呵!
    一睇到你話美少女戰士嗰陣已經唔係小學雞, 我都深有同感地笑了

    回覆刪除
    回覆
    1. 唔駛迴避啦通常1822果啲依家都只會用IG或者索性拍Vlog,極少仲會有興緻去寫blog咁麻煩.......咁我估Ven最多都係2324歲左右啫!!!!XXXXD

      刪除
  22. 點解唔聽見有“千年女王”嗰首歌嘅? 當時我同小女都一齊唱架噃。
    「飄零燕」「長腿叔叔」「叮噹」「小忌廉」仲有「一休僧」......好多都好好睇。

    回覆刪除
    回覆
    1. 露雲娜在節目中都有唱呀,傳說和千年女王都有唱....
      依家可能都唔興喱類卡通片了:P

      刪除
    2. 原來阿基哥都重記得「千年女王」,我只係話:點解唔見你提起「千年女王」啫。冇話而家要興番呢d卡通片。^0^

      刪除
    3. OIC~~~~不過我覺得露雲娜果晚唱得麻麻地囉,所以唔post了!!

      刪除
  23. 最記得美少女戰士, 月野兔的哈哈笑聲取深刻!
    小忌廉都係大熱, 故事性强!

    回覆刪除
    回覆
    1. 咁有冇睇過華美子,好鬼搞笑XXXD

      刪除
    2. 係咪短曲髮的, 印象糢糊了 ...

      刪除
  24. 我認為有很多卡通兒歌都好商業化,反而細個學校唱的兒歌又好少人提…
    例如…twinkle twinkle little star, london bridge falling down,
    一支竹會二折彎,幾支竹會斷折難……太陽像個大南瓜,在那高高天空掛…

    回覆刪除
    回覆
    1. 嘩嘩嘩~~~~~森兄喱啲都好「經典」喎!!!@@
      以前小學無教過喱啲㗎喎,印象最深都係聖詩為主,因為日日集會都要唱好幾首!

      刪除
  25. 又是那些年的回憶,有好多我都無睇過^_^但聽落又好似有點熟識^_^寵物小精靈我就最記得,這輯流行經典50年我錯過了,等我睇番先﹗

    回覆刪除
    回覆
    1. pokemon首歌我聽返又有少少印象:P

      刪除
  26. 全部啲經典兒歌~
    以前暑假必睇兒歌金曲頒獎典禮~
    而家冇得睇啦>.<

    回覆刪除
    回覆
    1. 依家好似都無乜流行的兒歌,無搞頒獎禮都唔奇嘅:P
      Matthew至愛果套登山少女依家仲有冇得播?

      刪除
  27. 好耐無探你啦基爾!美少女戰士,我記得梅小惠响樂壇插班生唱嗰一幕,笑Q死。

    回覆刪除
    回覆
    1. Wow~~~~~真的很久不見了,有沒有一年?@@
      你連fb似乎也失踪呢XXXD
      係咩梅小惠有扮過sailormoon咩?以前佢地那一輩藝員都是扮嘢高手啦!!

      刪除
  28. 祝一切安好,少了寫作題材衝動,近大本年工作時間長左。少了用fb,可以嘅話可到我IG: ryandreamin

    回覆刪除
    回覆
    1. 也祝你身體健康萬事如意.....突然有點似拜年了XXXXD
      工作有進展也不錯呢,最緊要順順利利升職加薪^^
      你個IG名幾正,我鍾意wakakakaka.....不過我無開IG喎!唯有用老方法閒聊吧:P

      刪除
  29. 細個最鍾意草蜢唱高智能方程式嘅主題曲!

    回覆刪除