2018年12月7日 星期五

舊金山居閑話@Rose Garden

平安夜這天很多地方都已經沒開門,所以也沒有什麼特別地方好去,在家閒hea無聊大半天後,下午不如出去行一陣公園啦!



雖則話基爾向來都有鋪行公園癮,不過今次這個Rose Garden又確係幾值得逛逛,尤其係鍾意影下花花草草的就更應抽點時間到此一遊。上圖是公園入口的大噴泉,池不知為何藍得這樣迷人呢?



經過門口時,仲留意到路邊幢了個膠板告示牌,除了話唔准放狗之外(少有喎!仲以為外國公園多數畀汪星人入去玩),原來仲有宣傳下月會有個集體種花的活動。



咁又幾好喎原來佢搞這個義工活動係歡迎這社區一帶的居民參與,到時只要自備種花工具來公園就可以一齊種玫瑰,聽落好似都幾好玩。



不過睇返佢個日子原來基爾已經上了機返歸了……Anyway繼續行下個玫瑰園先吧!唔知有冇人去過行九龍公園果個?如果有去過文物探知館的話,通常都會路經過。



當然外國勝在地方夠晒大,彷彿有無窮無盡的休閒空間(完全唔需要考慮填唔填海起人工島),與香港的迷你版本也不能相提並論,連平時較少有賞花惜花閒情的基爾也按捺不住要替嬌艷欲滴的玫瑰小姐來張美人寫真。



平時基爾因為懶,一般連部封塵已久的靚仔DC都已經甚少畀佢拋頭露面帶佢出街玩(要影就求其用手機算啦咪煩人),但話晒外遊姑且就帶埋佢上機,太耐唔用分分鐘驚佢會隨時罷工!



初頭都驚冇用架相機咁耐,會唔識用那些function key,幸好DC操作不會太複雜,影花就即管試下佢個微距mode,出來的景深效果都算唔錯啦,可以收貨吧!(想知靚仔DC乜樣可click:Pentax



做了好幾次實驗之後,先叫做摸返熟少少部相機,雖然這天一直都是天陰陰,沒有什麼燦爛陽光,但即使用懶鬼auto影出來都相當精準,不太覺眼有離譜的偏色!



冬天這裏似乎都很早就日落西山,即使只係晏晝三點幾鐘已開始有暮色漸濃的跡象。外國的天空是否特別美?基爾不太肯定,但絕對是更廣闊了吧(因為不會有太多高樓大廈的壓逼感)!



寫到喱度……都開始有少少佩服自己無聊閒逛個玫瑰園都可以寫得出咁長篇大論(或許只因還有你在看)!既然有你咁賞面陪住基爾寫下去,不如襯住仲未日落就再同場加遊多個Japanese Friendship Garden,駕車去只需10分鐘左右,不用另收你導遊費。



先留意一下門口這個公園開放時間的告示牌,唔來唔知乜原來冬天係Closed at 4:00pm(咁早?!),咁要抓緊時間火速入去蕩返個圈先。



趕時間都要睇睇個公園地圖吧!哦,原來這個日本友誼公園係為了紀念San Jose與Okayama結為姊妹城市,即時醒起有冇人去過岡山果個後樂園?同埋見佢個Summer Hours原來係開到晚上8:00的。



仲講!沒時間了,仲唔快點入去看看!這公園入面有個大湖區,靚景就長這樣。不過……驟眼睇好似……又唔係真係咁有Japanese style感覺咋喎!究竟佢係咪有參考岡山後樂園起的呢?



咦,咪字先!由喱個angle影出去總算有點對辦了,咩原因呢?就係因為湖邊那座紅橋囉!唔知點解在任何風景之下,只要加座日式紅橋就即刻加添了日本味。



離遠望都見有些遊人行上去紅橋參觀影靚相,咁個view應該都唔錯,基爾唔走雞都拿拿林行過去八一八先。



行到橋邊仲見到湖裏面有好多錦鯉在游來游去,唔知係咪有人在餵麵包?另外仲見有石雕燈籠裝飾,都是日式庭園必備的裝飾擺設。



另外湖面仲有一雙鴛鴦游過,唔知係咪公園臨近關門遊人也不多,所以兩隻野都出來玩陣嬉下水先。



成個公園其實都幾大,有些內園區都來不及行落去影下相,只係離遠望下就算,費事一陣行得太入,公園管理員一個唔覺意閂了大閘,咁今晚平安夜就要在公園裏露宿一宵了。



沿路再行返出公園大門口,喱座木建的仿古大門建築都造得似模似樣喎!有冇少少似去了京都奈良那些古寺神社的感覺呢?



公園管理員伯伯可能想準時收工,不斷四圍兜圈催促遊人要走了,差不多4:00pm要閂門啦!聖誕平安夜大時大節基爾當然唔會咁唔通氣阻人收工,影埋前園這群飛來覓食的大雁就收機走人了,Merry Christmas!

Japanese Friendship Garden
The Garden was built as a symbol of everlasting friendship between the City of San Jose and its Sister City of Okayama, Japan in 1965 and is patterned after the world famous Korakuen Garden in Okayama. In every direction the eye is delighted, complete with picturesque Japanese bridges, waterfalls and golden Koi fish.

55 則留言:

  1. 玫瑰花同公園個湖都好靚。
    你寫遊記,原來寫左成年架,好快又到聖誕啦!

    回覆刪除
  2. 冬天都仲有花開,氣溫有幾多度呢?

    回覆刪除
    回覆
    1. 有呀仲有玫瑰開
      其實加州都唔係好凍,十二月一般日間都有十幾度嘅

      刪除
  3. 色彩繽紛的玫瑰花,與公園個湖都好靚。

    回覆刪除
  4. 我都覺得奇, 好少唔俾汪星人入去

    回覆刪除
  5. 平安夜都仲有閒情行公園,唔洗幫手準備聖誕節?

    回覆刪除
    回覆
    1. 咁又無乜特別煮聖誕大餐喎,好似都係食啲平常嘢咋:P

      刪除
  6. 北美夏天成8、9點至天黑,冬天就5點已黑齊,所以夏天時,我會感覺時間好洗啲,嘻嘻!

    管理員可能以為平安夜可以早收,無諗過仲有遊人有雅興賞花。XD

    回覆刪除
    回覆
    1. 都係㗎,感覺上日照長少少,時間似係見洗啲啲^^
      見佢都好心急收工囉wakakaka.....

      刪除
  7. 行公園好呀,見吓啲花花草草,暫時遠離繁忙,人都輕鬆啲.

    回覆刪除
    回覆
    1. 又可以練習下影相一舉幾得呢wakakaka....

      刪除
  8. 拍得唔錯啦,特寫都掌握得好好!

    回覆刪除
  9. 幾朵花咁大把
    自己名提幾廿次,自戀狂發作🤨

    回覆刪除
  10. 玫瑰很嬌艷,環境好美啊!

    回覆刪除
  11. 遊花園……
    Rose Rose I Love You......

    回覆刪除
  12. 玫瑰花好靚! 你好似去咗好多地方.

    回覆刪除
  13. DC仔拍出來都不錯喔~
    玫瑰小姐當然吸引到你啦...太靚啦佢~

    回覆刪除
    回覆
    1. 都ok哦,外遊途中最緊要夠輕便^^
      最好係佢地四季都有花開wakakaka

      刪除
  14. 咁大既公園梗係要去行下啦!係屋企真係浪費時間,哈哈!

    回覆刪除
    回覆
    1. 四圍行下感受一下人地慢活的生活節奏都好嘅.....
      HK就周圍都好多人了:P

      刪除
  15. 日本友誼公園都幾靚,有湖的公園始終靚過沒湖的。

    回覆刪除
    回覆
    1. 可惜唔係好夠時間行一圈,因為唔知佢原來係咁早關門:P

      刪除
  16. 此情此景基爾兄身旁該有個佳人相伴,把臂同遊花園……
    若我冇誤會錯…池中不是鴛鴦應該是綠頭鴨Mallard Duck,野鴨的一種…
    個公園好寧靜而且旁邊冇高樓大廈,香港很少機會見到…

    回覆刪除
    回覆
    1. 身邊仲有好多人㗎XXXXD
      係喎都有點似,係咪都係鴛鴦的一個品種呢??我見網上圖片佢地都興一對出沒的....
      冇乜高樓大廈,我諗除非去到SF商業區downtown果邊先有多啲高樓XD

      刪除
  17. 我上個月在羅省都有去Hungtington Botanical garden,有日本花園同中國花園,同這個差不多,拍照一流。

    回覆刪除
    回覆
    1. 係喎我上網睇過這個花園又幾靚,庭台樓閣小橋流水都似模似樣呢^^
      好似仲見有溫室和仙人掌喎

      刪除
  18. 我都幾欣賞日式既花園~都幾有美感令人睇得好舒服~
    我都同意港澳外的天空特別美~因為真係無咁多高樓大廈~特別闊既~
    同埋我有陪你逛玫瑰園架~快d繼續寫俾我地睇啦^^

    回覆刪除
    回覆
    1. 咦.......回來拿?
      幾時又出發先XXXD
      你直情可以飛日本睇,唔洗睇喱啲A貨喎wakakaka....
      唔係喎,我覺得澳門都仲有好多海闊天空靚view嘅^^
      咁早知我P埋你張玉照上去XXXXXXXD
      你都加點油喎,我等睇蘇格蘭高地\^0^/

      刪除
    2. 原來偷懶唔係我專利~~你都偷懶了幾日XXD
      呢個禮拜六~~哈哈~
      唔同既~有不同美態~~~~
      澳門邊有...全部都賭場;[
      WAKAKAKAK~咁會嚇親其他BLOG友架XXD
      我仲係一張相都未排...好驚~~~~~~

      刪除
    3. 在南半球逍遙快活緊還未有閒遐寫盛夏光年XXXD
      正呀玩開心啲聖誕快樂^^
      威尼斯人个藍天我覺得都几靚wakakaka
      其實我啲P圖技術好一般你唔洗驚XD
      咪傻!你同三老逍遙回來再算啦^^

      刪除
    4. 你去左邊度玩呀~~~唔通去左澳洲~~~~~~番黎未呀~~~
      你都應該過得好開心啦~~~~~
      威~尼~斯~人~...對~~澳門只有人造藍天~~
      我依家開始慢慢搞緊D相~

      刪除
    5. 咁等睇你啲靚相啦^^

      刪除
  19. 公園咁日本feel,唔講仲以為去左日本@@

    回覆刪除
    回覆
    1. 係呀紅木橋和大木門都几有东洋味!

      刪除
    2. 一月會唔會再去日本山系?^^

      刪除
  20. 歐美公園唔准放狗,真的好少可
    有時「詩意」大作,好難停落嚟🤪 要求不高用電話影算吧,什麼效果也模擬做到晒了~

    回覆刪除
    回覆
    1. 可能驚D汪星人玩得太創会踩爛玫瑰XD
      我都係懶多數auto,好少有閒情慢慢manuel:P

      刪除
    2. 所以電話影相有"AI"功能,比Auto更好,更加啱你。你知我都鍾意攝影啦,近兩次換咗部影相好D嘅電話,旅途上變咗用電話主力拍照

      刪除
    3. 對呀,依家啲電話真係越來越先進,銀哥周不時出遊,有部拍攝功能好的電話都好重要呢,至少不用帶咁多重裝備同行,有時輕裝出遊更能體驗旅行樂趣^^

      刪除
  21. 祝你
    冬至團團圓圓
    共渡佳節

    回覆刪除
  22. 基哥拍啲玫瑰好靚喎! 我都用慣手機,唔多識用其他相機了。

    回覆刪除
    回覆
    1. 手機都真係幾方便,唔駛帶咁多嘢XXD

      刪除
  23. 粉紫玫瑰很靚 , 湖景好日式唔似外國的景 .

    回覆刪除
    回覆
    1. 係呀我都覺得好靚^^
      佢係仿照日本的庭園設計呢

      刪除