舊金山居閑話@Westfield

睇完咁多景點係咪都有點累？又係時候去行陣街shopping一下啦喂！

吓?！又去行超市outlet果D呀？唔駛驚唔駛驚……今次係去行百貨公司而已，有冇行過Nordstrom和西田先！



有網購開的blog友可能都聽過Nordstrom個朵，基爾八卦上佢個網睇，原來係有ship to HK服務添喎！仲要係計港紙唔駛蝕匯價。唔寫blog唔知Nordstrom個headquarter原來是在Seattle，創立於1901年都有過百年歷史，係咪同英國熊仔和M&S果類差不多歷史悠久？



講返基爾去的喱間實體店，單單快逛一圈就覺得D貨算幾唔錯（至少無M&S咁老餅），衣衫款式接近H&M或優條褲路線，是可以買得落手之選；地方也好寬敞行得舒服悠閒，慢慢睇慢慢試也沒問題（fitting room不會大排長龍），亦唔會好似新城市一田果種逼到似蟻竇行多陣會精神衰弱咁！上圖是百貨公司裏的飲野食野地方，聽聞這裏的百貨公司入面係比較少喱類foodcourt形式的食肆云云。



再行過去隔籬間西田，途中會路經蘋果店和微軟店。好想知係咪全世界D蘋果店都係咁人山人海？基爾每次經過中環ifc、又一城或者新城市Apple Store，都總係見到成村人在店裏人頭湧湧咁唔知做乜！來到美國喱間都係一樣咁有人氣，反而正正對面那間微軟店就只有小貓三兩隻（似有片枯葉在門前飄落），對比實在太強烈，有點可憐feel（微軟店面設計其實已經抄足人地七八成相似了）！



在兩間龍頭科技店參觀了一陣當見識過，電話電腦產品好似都比HK略平少少（齋睇無買）。之後「抓緊時間」去行其他衫店，因為聖誕新年前後這裏都有big sale。平時基爾在老家都無去幫襯過極度乾燥，因為覺得太貴了（枯葉又再吹過活於貧窮線下的人），依家一場來到見有三折，唔入去掃一掃係咪會對唔住自己？



用來登山遮風擋雪果類羽絨混棉大褸對基爾沒有太大吸引力（HK都無乜機會著），主力去睇D月下貨短袖tee或者長袖線衫之類，結果就買左上面兩件筍野（試穿後自我感覺良好）。大家估唔估到係咩價錢先！拿拿聲開估：短袖藍果件賣USD$19.5（HKD$152）；長袖灰果件仲平，有70%off只售USD$14.85（HKD$116），係咪抵到無朋友？（仲平過優條褲貨色喎！）而且仲要無斷碼搵到合適size添！



p.s.順帶一提喱間極度乾燥個fitting room真係大到有點誇張（夠開兩台麻雀有餘），在裏面換衫很有點「空虛感」，不太習慣！唔知係咪for夫妻或者情侶可以一齊試衫用呢？