2018年11月7日 星期三

中區警署建築群@中環

金山網誌又係時候要歇一歇,再寫返少少本地料先……大館早前開放後好多人去參觀,基爾都無走雞某個秋日周末也走去趁一趁這個新墟。



之前見好多人不論日場和夜場都有去過大館影相,所以基爾都唔會長篇大論,求其揀幾處特別地方打下卡就算(其實係人太多,也懶了影相)!到訪當天由中環街市沿自動電梯一路上山,好快就到了大館。以前半山的Hollywood Road同Old Bailey Street交界喱度,係無上圖喱條天橋,因為活化大館之後才新建的,現在就成了主要的出入口。



入到去就係Parade Ground這個大大的檢閱廣場,係咪以前D警察操兵集隊的所在地?上圖右的紅磚牆建築物是Police Headquarters Block,即係面向荷李活道經常搭車會經過的那幢灰色的警察總部大樓;至於對面就係昔日的Barrack Block,這幢營房大樓高四層,外面有好幽雅的拱廊(遮太陽隔熱兼通風),是常見的殖民地建築style。



Parade Ground上仲樹立了一幅超級大地圖,真係大近視都唔驚睇唔清楚,成間大館古蹟建築群就長這樣,要行勻一圈其實也不太花時間,當然如果閒日來會chill一點,唔駛周圍都咁人來人往!



近距離再影一影Barrack Block,經修葺後係咪新淨好多?基爾覺得有少少似赤柱美利樓那類風格,但這幢營房大樓就望落好似高少少。由於要趕住六點前Prison Yard果邊閂門前要入去參觀,所以Barrack Block就暫時唔花時間上去閒逛了。



上圖右是Prison Yard的入口,入面其實都頗大,有好多一幢幢監倉,建築物感覺上還帶一點英倫城堡的風味,也可能這種殖民地遺風有一定吸引力,仲見有攝影師帶同model來取景。上圖左這幢紅磚牆建築是昔日的Central Magistracy,可惜這天好像休館,大門口擺了不開放的告示牌。



穿過這度拱門長廊就入到去Prison Yard,途中見有外籍維修工匠正在修補牆上維多利亞時代的壁畫油漆,真係好認真喎!基爾記得以往外遊時,間中見有些大教堂或者修道院之類,都會有很多維修工匠即席表演文物修復工作,有時是修補壁畫瓷磚,也有維修雕花裝飾之類;至於香港的古蹟還是第一次現場見到!



Prison Yard周邊有幾間刑房可參觀,到訪這天是周末要排長龍,結果排了大約二十分鐘才入到去睇,不過因為太多人又有點焗所以無花時間影相,快閃巡一圈簡單看看狹小的監房就走了。上圖是Prison Yard廣場上的面貌,可以見到兩幢新建的賽馬會藝方和立方,前衛的鋼鐵建築風格別具現代感,同四周的古雅風貌又明顯別樹一幟。



近看上圖這幢叫做JC Cube,基爾沒太多時間所以都沒有入去睇,只在外圍參觀而已!右邊紅磚牆那一幢昔日是另一座監房,依家可能改作博物館的員工office了吧。



上圖右是JC Contemporary藝方,鋼鐵外牆離遠望都有點磚牆風格,但同時也有濃濃的當代建築的摩登感覺。至於左圖是法院的入口,這天去到不見有開放參觀,只能在大門口影這張相。



行了一圈見無乜野好行,就出返去Parade Ground那邊,去補返睇睇上圖紅色的這幢警察總部大樓和營房大樓先。



近睇這幢Barrack Block係咪果然有少少美利樓的影子,地下長廊一樣吸引好多人來取景影幾張靚相喎!小朋友很多時都成了客串模特兒……



Barrack Block樓上的間隔有點似HKU的Main Building,麻石樓梯和花磚地同樣是古典風味十足(不過入面當然就沒有Lecture Room),最特別之處係部份展廳有出租畀時裝名店,裝修設計配襯埋古式古香的門窗,感覺上又好似幾型幾有格調咁款。



除了時裝名店之外,另一邊仲有間茶室,上圖右是茶室門口的盆景,真係好有日本風的花道feel,成件事變得好東洋味又好閒適幽雅;上圖左是「大館一百面」的展覽廳。



最搞笑係其中一間展廳仲寫明係「蛇竇」,基爾以為警署入面竟然咁明目張膽有間蛇竇房咁堅?睇真先知其實佢係介紹駐守中區警署的差人以前巡邏時,經常會去附近的茶餐廳或大排檔打躉,久而久之就成了蛇竇。



繼續四周圍行下八卦下,行到喱間展廳又幾特別,見到好多大館昔日面貌的復刻版模型,手工都做得好精細好靚,除了營房大樓外泊滿了警車和衝鋒車,連好細細架的交通警電單車都有,基本上將昔日的Parade Ground立體地重現眼前了,感覺上比單睇老照片更好更有趣味。



上圖喱個報案室的模型係咪都好盞鬼!除了有警察和報案counter之外,仲有來報案的人,成個設計都很有官威高高在上的感覺;不要錯過牆上還掛了昔日政府部門一定會掛的女皇玉照。



行到成六點都差不多夠晒皮,係時候轉移陣地搭地鐵過返九龍,因為仲有下半場的「必備節目」,就係去開餐!友人介紹的這間日式燒肉放題店基爾還是第一次來,地點也算方便,從油麻地站A出口向右一直走就見到。



店舖不大一眼睇晒,話明係放題,點餐紙選擇都算幾多,如果加$40可以upgrade去貴價菜單,多了帶子刺身、馬刀貝、虎蝦、帆立貝、牛肋肉、羊架羊鞍等選擇。埋單計連加一差不多要三舊水(限時90分鐘),整體而言略貴同埋基爾向來不太愛限時限刻,所以評價只係「一試無妨」!

鳴橋燒肉料理 Naru Kyou Yakiniku
旺角砵蘭街104號

39 則留言:

  1. 遲D會唔會又變左影婚照場地?

    回覆刪除
    回覆
    1. 我諗可能本身做紀律部隊的,都可能會想去影,但一般人就無乜必要啦:P

      刪除
  2. 熱潮未過?大館仍然咁多人.

    回覆刪除
  3. 這間大館,在FB洗版,證明是大熱地方。

    回覆刪除
    回覆
    1. 原來有FB洗版......之前都有好多blog友寫㗎

      刪除
  4. 鳴橋燒肉料理真係好正,我吃過兩次了。

    回覆刪除
  5. 大館九月開張初期搭扶梯時經過,實在多人,唔想同人逼

    回覆刪除
    回覆
    1. 係呀周末周日係多人㗎,下次你預約可以考慮閒日上午,就一定會比較少人,入去參觀昔日舊牢房時唔駛排隊相信會方便好多^^

      刪除
  6. 上個星期日仲封路攪嘉年華會添!
    https://hk.news.appledaily.com/local/daily/article/20181104/20537962

    回覆刪除
    回覆
    1. 佢周不時有啲表演function搞下都幾正,可惜我去果日無:P
      成日咁水泄不通人山人海,會唔會搞到你出入交通都唔方便呢又^^

      刪除
    2. 交通係有D唔方便,
      但有節目可以大家都開心下,都係唔錯的安排...
      大館有不少藝術文化的節目都值得去睇架!
      :)

      刪除
    3. 都ok喎,自動電梯上去都好方便呢....
      啲酒吧會有多啲生意囉一定^^
      對呀上次去都無完全行晒室內好似都有啲展覽

      刪除
  7. d差佬蛇王攞正牌啦,又一村有d屋苑看更位就係蛇竇

    回覆刪除
  8. 係咪免費入場架?!好想去行下!

    回覆刪除
    回覆
    1. 唔駛錢,不過要網上預約,可能遲啲無咁多人可以walk-in都未定呢^^

      刪除
  9. 有展覽館,又有很多節目可以睇,消閒好去處!
    遲些會再去,想看看那個有關「關公」的展覽!

    回覆刪除
    回覆
    1. 都係㗎,佢好似間中有function搞下,吸引人流,裏有都有啲食肆酒吧之類,都要做生意嘅^^
      原來有關公展覽,差館與關公又幾有密切關係呢

      刪除
  10. 真係啱,我哋好多地方冇行。

    回覆刪除
    回覆
    1. 馬會果两幢室內有D展覽我都唔夠時間去逐一睇呢:P

      刪除
  11. 睇番gael兄呢類網誌,當堂永樂大典的風格番晒嚟!!!
    乜時下呢間警署好大熱架??!!...又真係唔知
    現在舊的外國式建築物真係賣少見少,難得可以參觀去打吓卡都唔錯~~
    有90分鐘食野都應該夠…一般自助餐都係2個鐘上下~~

    回覆刪除
    回覆
    1. 點解呀點解呀??.....之前果啲金山寫得唔好睇咩?XXD
      都幾多人去打卡㗎,叫做係新開無耐:P
      都叫做花了好多公帑去保育,森兄有交稅都有份畀過錢呢wakakaka...
      但我唔夠呀,因為我向來食得慢,如果有朋友同枱都一定會食下又傾下計,無理由個個只顧住埋首係咁食食食㗎啫XXXXXD

      刪除
  12. 我~回~來~了~~~
    大館真係好多人去~見到超多人頭~
    去完旅行..我都好想食烤肉!!

    回覆刪除
    回覆
    1. 返來囉磨.....蘇格蘭正唔正呀?Sunny個騷送唔送到嘢畀佢XXD
      閒日應該會少人啲嘅,周末就一定人多啦
      即刻去食啦,澳門應該有好多選擇

      刪除
    2. 蘇格蘭有冇買返D威士忌返來^^

      刪除
  13. EE最近都去過大館呀。我見寫大館遊記的博客,D相影出嚟都係人迫迫咁。

    回覆刪除
    回覆
    1. 係囉咁啱嘅XXD
      閒日去就無咁多人囉

      刪除
  14. 大館的感覺是好多人,個監獄都幾好睇,拍犯人照個QR Code都幾得意

    回覆刪除
    回覆
    1. 係囉好多人排隊去影背景有高度果張,好搞笑XXD

      刪除
  15. 人頭多過乜wor, 肥人都係唔好去住lu~

    回覆刪除
    回覆
    1. 可能過多一年半載就無乜人,連網上預約都唔駛,方便好多呢:P

      刪除