舊金山居閑話@Sacramento:下

上回講到去逛完州議會大樓，這趟去Sacramento的day trip仲未完，睇睇個map由State Capitol Museum開車過去Old Town果邊其實都好近，咁先趕快過去食個靚lunch先啦！

Sacramento舊城這邊相信也是個很熱門的旅遊區，因為有好多古蹟睇應該都吸引唔少遊客來逛逛，單睇地圖就有好幾間博物館和一整條商店街，唔駛問阿貴一定會有很多食肆吧！



泊好車之後就行過去Old Town商店街，全條街大部分都只係一兩層的古老小屋，感覺係幾有十九世紀美國西部小鎮風味。



其中上圖這間Schoolhouse Museum就位於Front Street的街口，非常搶眼，雖則話係有點肚餓，不過都係唔理咁多，先入去行一轉吧（費事一陣食飽飯之後又忘了返轉頭去行）！



這間古老學校的校園其實不太大，現時只保留了一幢舊課室作展覽而已，不過個後園小息遊樂場就幾大，這天來到可能因為聖誕前夕關係，似乎不太多遊人，遊樂場空蕩蕩的韆鞦感覺好似有點詭異色彩（睇得太多美國恐怖片了，應該唔會有幪面人失驚無神拎住把電鋸衝出來吧）……



參觀完個後園小操場之後真有點大風和寒意，咁就行返入去課室取一陣暖先。美國的課室就長這樣，同電視劇和電影見到果D都幾似樣喎！不過唯一係有樣好特別的設備以前從未見過，都幾有趣。



心水清的應該已發現到，就係課室中間寧寧舍舍擺了一座古董大暖爐，仲有條大煙囪一直伸出去外牆，所以即使在室內燒柴取暖都無問題。



同埋在十九世紀的年代，紙和筆等書寫文具應該都係比較矜貴，小朋友上課就只能用粉筆和小黑板做練習。上圖是課室側邊的小書櫃，擺放了陶瓷薑餅屋做展覽，又幾有聖誕氣氛喎！



現代版的課室應該不會再有這種手工精巧雅緻的木桌椅了吧！另一樣「此情不再」的會唔會係黑板和天花頂上吹到人頭都暈的大牛角風扇？依家係咪都用晒PowerPoint和開冷氣？



參觀完學校博物館之後，再行返出小鎮大街上覓食去，這時迎面而來竟有輛仿古馬車走過，應該是做遊客生意了吧（不過車上冇人，生意淡薄）！趕快拎返手機出來幫佢影張靚相先，襯埋個美國小鎮背景又幾有Somewhere in Time的味道喎！



細看之下條街左邊不難發現有一整排餐廳食肆，可能因為是旅遊區關係，中西餐廳以至fast food三文治熱狗都有售，就揀上面這間Bali Kitchen。



餐廳出面有一整排戶外雅座，就好似food court咁任坐唔嬲，如果夏天可能都會幾多遊人來打躉，但冬天寒風颯颯都係揀返坐餐廳入面好一點。



喱間sell的所謂Indonesian & Chinese fusion cuisine即係到底有咩野好食呢？睇佢counter上面個menu原來有Sweet & Sour Chickens同埋Seafood Curry Soup，仲有Egg Fu Yong芙蓉蛋飯和炒貴刁添喎！不過驚佢太複雜會整得唔係咁好食，都係叫簡簡單單的咖喱雞飯同埋豬牛羊沙嗲串燒夠穩陣（以往經驗告知通常咖喱飯和串燒難食極都有個譜）！



睇收錢的老闆娘同佢個廚（貌似係老公同個仔）有可能係印尼華僑的移民吧！聽懂他們說一點國語和少少外傭姐姐那類口音。Anyway，煮出來的飯菜ok幾好味（也可能是因為肚餓）！吃飽飽之後，就行返出去逛逛個Old Town，佢有個古老火車站活化的鐵道博物館，就似大埔墟那個模樣，但當然至少大十倍以上啦！



唔知係咪臨近聖誕，博物館都早D收檔，睇人地影D相係有幾架古董蒸氣火車頭睇下果類，上圖是舊火車站月台建築物，古董火車就泊在入面。



幸好火車站外圍沒有關閉，仲可以畀基爾影下行火車軌的偽文青打卡相，而且這裏明顯無大埔墟咁叉多人，喜歡的話大可以打橫瞓在火車軌上面影selfie，應該都絕對無人會理你！



雖然睇唔到火車頭，但依然可以八卦行去睇睇泊在戶外的這些火車車卡，有冇人以前坐過這類古老的列車車廂？好似七十年代香港火車仲未曾電氣化之前，都係用這類火車車廂行走新界，好有懷舊feel！



順帶一提其實這個古老火車站就位處於Sacramento River旁邊，與客貨運碼頭相連，十九世紀時有好多來自太平洋的遠洋輪船會停泊在這碼頭上落客和運送貨物，之後就靠鐵路通往美國中部甚至東岸城市，所以唔好見依家這裏人影唔多隻，以前卻是個繁忙的港口。



今時今日依家仲有架仿古蒸氣輪船泊在碼頭邊，唔知係咪由石碑上面果艘Antelope羚羊號改裝而成呢？依家船名變了做Delta King，成了海上酒店和餐廳，仲有經營娛樂場所（唔知係咪澳門果隻娛樂場呢）！



雖然基爾習慣運吉，不過今次都係無謂去白撞費事畀人趕落船就無謂喇！就求其在岸上離遠望下影下相算數了，之後繼續行返入去Old Town入面，睇下仲有乜野有趣東西發掘到。



見你咁有耐性睇blog睇到喱度，喱個時候不如就講個小秘密你知，唔好話畀其他人知喎！基爾咁大個仔（或佬）其實從來都無去過米老鼠公園，不論東京上海巴黎美國甚至香港果個全部都未去過，聽聞裏面有條美國小鎮大街成日有巡遊表演睇，係咪望落有點似喱條街呢？



咁基爾既然都來過真實版的美國小鎮大街，係咪迪迪尼果D老翻山寨版都唔駛再去了吧！Old Town這裏鎮上的兩三層高舊屋多數係昔日郵船貨運公司的office，依家大部份變了做souvenir shop、餐廳酒吧或者糖果店之類，例如掛了Steamers紅招牌那間是咖啡茶餐廳，有好多三文治熱狗和burger選擇，喜歡的話去坐坐嘆杯啡也相當chill……



上圖喱間糖果店聽聞也很出名，因為佢「期間限定」會有即場製糖表演，可惜這天來到不是時候，可能來光顧的客人根本也不多，就連店員好似都唔多覺眼，唔知去晒邊度蛇王呢？



如果聖誕節期間去酒店食buffet的話，可能都經常會見過這類薑餅屋裝飾吧！不過大鄉里基爾還是第一次見咁大間的薑餅屋，仲有三層高咁架勢喎，真係唔食得都睇得啦！仔細再睇佢大門口的小花園和窗邊的聖誕裝飾，仲有penthouse小窗全部都做得好靚好精緻。



至於隔籬間玩具店就仲誇張，好似反斗城咁大間之餘，店裏仲有喱座幾層高的大火山（有閃燈有煙同有聲音發出），感覺上好似幾有侏羅紀探險feel，小朋友見到應該會幾興奮兼唔捨得走！



行近少少再睇真D，原來仲有小火車在火山的山洞之間穿梭來往，係咪好盞鬼！火車除了會繞住個火山周圍走之外，仲有路軌連接全間店的假天花，即係小火車會自動環繞成間玩具店走一圈，之後再回來火山不斷巡遊不息來來往往……雖然不知道玩具店老闆是什麼年紀人士，但諗得出這樣好玩的裝修佈置都肯定係個童心未泯的大細路了吧！睇睇上圖有一列火車仲運載了隻恐龍公仔，好搶鏡下喎！



另一樣搶鏡公仔就係喱一堆長頸鹿，望落手工幾靚做得幾真幾可愛。基爾記得細個時都有一大袋動物公仔搞到成個動物園咁，長頸鹿大笨象獅子老虎袋鼠熊貓北極熊甚至食蟻獸都有。咁計落依家小朋友幸福好多，唔駛成日扭計買咁多玩具，一部手機搞掂晒啦！



除了賣野玩之外，店裏仲有個corner係賣零食的，果然係好一條龍服務，商機無限！上圖喱種pretzel類似番鬼蝴蝶酥的脆餅，應該好多人都會食過，喱度個貨架上有好多唔同口味選擇，不過基爾形住始終都係買新鮮熱辣出爐果隻會好食好多吧！



至於各種色彩繽紛的糖果和朱古力肯定是主力賣點，見佢牆上仲掛了一幅介紹美國經典糖果生產商的海報做宣傳添喎！唔知間店係咪同朱古力掌門人Willy Wonka都有少少歷史淵源呢？



店裏賣的幾乎都係歐洲和美國本土品牌的糖果和朱古力……咦？！基爾有冇睇錯？竟然發現仲有上面喱幾包非常熟悉又親切的白兔糖喎，新年全盒的常客原來早已經蜚聲國際了……



再望望佢個價錢牌先，嘩！乜原來都係飛升了好幾倍，終於唔駛睇熊貓博士都知道「物離鄉貴」這句成語係點解。想問問依家普通超市係咪十幾蚊都有一包？美國喱間售價圍起上來兌換返港紙差不多要成四五十蚊包喎，原來係矜貴來路貨真係失覺晒（即刻放返低）！



唔知係因為天氣關係（加州冬天是雨季），定還是因為近冬至所以日照特別短，在舊城旅遊區閒蕩到下晝三四點開始有些日落西山的跡象，咁都係時候要歸家了！