2019年4月15日 星期一

雪梨盛夏光年@The Rocks

雖然來到Circular Quay,但基爾無錢又無時間坐郵輪,都係唔好咁八卦,繼續在碼頭區附近四圍行下當係個精華版city tour吧!



反正有時間就四周圍行多陣先,對面公園有條古老樓梯,行上去就係Royal Botanic Gardens和Government House,唔知點解感覺上又有少少似九龍公園或者兵頭花園,可能同樣是昔日大英帝國的殖民地吧!



由於實在太過烈日當空,就無謂去逛公園以免曬到燶(日頭正正冇落雨如果擔遮遊公園又驚有點異相),咁繼續去逛埋另一個check point,好多遊客都會去的雪梨發源地The Rocks。



The Rocks據聞是澳洲移民來到Sydney最早定居的地方,也可說是雪梨的老城區,街口有座好出名的First Impressions三面雕塑是紀念早期移民、士兵和囚犯的石雕,這天來到好似不太多人,如果是周六日來喬治街那邊會有weekend market,一定墟陷好多。



逛不到市集也沒所謂,其實基爾上次來澳也逛過,感覺亦幾熱鬧有趣,檔攤除了賣地道食品之外,大多都是遊客會有興趣的souvenir手作工藝品,有空都不妨周末再來趁墟……咦!行行下點解會聽到有陣咕咕聲的怪聲?聽真少少原來係自己個肚在打鼓!鬼咩都成點幾鐘仲未去食野,朝早就剩係食了個包咋喎!拿拿林返去China Town搵食醫下肚先得。



由The Rocks返去China Town其實都好近,禧街和湯馬士街交界有座古老的Paddy's Market,感覺似上環那座西港城,入面又係賣遊客紀念品(基爾也有點收穫)。水稻市場對面街仲有棵Golden Tree,好多大媽大叔都來摸摸影影要添點運氣云云……



唔係話去醫肚咩做乜又走去shopping?主要因為基爾媽話想買條眼鏡繩而market入面又竟然有,就先去買吧!買到心頭好就立馬去飲個靚茶,基爾第一次來這間叫Zilver同樂軒的茶樓,這裏仲有煎腸粉車仔,童年回憶即刻返晒黎,唔知會唔會有遮仔啫喱呢?



可能實在太肚餓太集中精神狼吞虎嚥關係,全程竟然都忘了影張相,記憶中點心也真不錯,比好多老家茶樓保留更多傳統港式風味,例如有大隻糯米雞、芋角和鵪鶉蛋燒賣等早已不常見的點心車。食飽飽又穿過Harbour Bridge去下一景點,途中路經微軟在雪梨的headquarter大樓。



由於雪梨天氣也真個有點熱,下午傍晚時份經常都會像東南亞星馬一樣下起大驟雨來,咁都係先入去商場避一陣過雲雨是常識吧!來到Macquarie University這個大學區正好有個大型商場,入去嘆陣冷氣就最好不過了。唔去由自可,一入去就見到非常熟悉的Cotton On、Giordano和貢茶,全球化果然會令人有點時空轉移回到老家逛商場的錯覺!



反正一場來到,就主力去行一行Myer這間澳洲地道品牌的百貨公司吧!門面設計其實有點似以前的八佰伴,幸好煲冬瓜遊客似乎對這類百貨公司興趣不大,店裏也沒有新城市一田大減價那種壓逼兼窒息感,這正合基爾杯茶了,結果在Industrie的檔攤逛了好一會,印象中老家好似仍未有Industrie的實體店!



初來甫到費事咁快解慳囊住,都係睇定D先掃貨!見外面好似終於落完雨又出去商場外走走吧!與之前去金山的Stanford相比,Macquarie大學區這邊明顯車多人多旺得多,路邊也不可隨意泊車,基爾覺得上圖設置的這種「Kiss and Ride」上落客點幾可愛,係咪真係要畀個kiss先!



上次來時有人在這裏讀書,所以都跟人逛了一圈校園;今次就無謂再花太多時間,只在宿舍外圍逛逛就算了吧!其實校園範圍環境都幾清幽閒適,眼見遊人也不太多,相信大學飯堂應不會被煲冬瓜遊學團佔據……



轉下眼又到最重要的食飯時間,不過放心不是在大學飯堂開餐,而係去了另一處吃自助餐的地方。掛住食也忘了這店叫乜名,只記得人均消費約港紙百幾蚊(飲品另計)幾抵食,一般冷熱盤、海鮮和甜品也不俗,唯一係環境比較嘈雜。最難忘是食食下竟然聽到屋頂不斷發出卜卜聲,原來外面落雹!好多人即刻湧去窗邊觀望,冰雹有乒乓球和高爾夫球咁大粒,可能D食客驚會擊碎或打凹泊在外面的私家車呢!

78 則留言:

  1. Giordano都有? 好港式喎。好少聽到你只係掛著食。

    回覆刪除
    回覆
    1. 係呀,我都有入去快速行個圈看看有冇HK無賣的款式,但完全一樣貨XXD
      不過話時話依家HK係咪都唔太多佢啲舖??

      刪除
    2. Giordano 香港少咗,但都多過其他牌子baleno,u2 ....

      刪除
    3. 幾乎唔記得有U2喱間,係咪執咗??
      依家Apple Shop和Cotton On都好少見了....

      刪除
    4. U2 同g2000 同一集團,u2 消失了。 apple shop 都無咗好多間。 cotton on 執咗outlet, 店應該有幾間。

      刪除
    5. 我記得我仲有件U2背心,還未穿爛,夏天也經常穿XXD
      蘋記其實品質不錯,很久以前買過件乾濕褸外套足足可穿十年也不爛!
      CO記憶中年前去雅蘭仲見有間門市,不知依家仲有冇??

      刪除
    6. btw,CO其實款式也不錯,重點是價錢不貴,大部份門市關了有點可惜:P

      刪除
  2. 每次聽到落雹都心慌慌, 唔知會打中D咩

    回覆刪除
    回覆
    1. 尤其係遇啱在highway時更要小心,要減速驚會扑爛車頭玻璃

      刪除
  3. 我覺得Sydney中餐水準真係幾得,感覺上好味過多倫多嘅中餐,所以女你話掛住食,可能都係因為實在太享受啦!:D

    回覆刪除
    回覆
    1. 可能多華人廚師移民過去,水準也不錯!!
      咁溫哥華會唔會好少少,因為多華人幫襯....
      都唔關事嘅,因為旅行途中行街多咗,會比平時快點肚餓吧XXXD

      刪除
  4. 大百貨公司我老婆最鐘意.

    回覆刪除
    回覆
    1. 應該唔會令佢失望吧!咁菲臘哥要帶定多點彈藥先得XXD
      最好揀big sale時段啦wakakaka...

      刪除
  5. 中國遊客無處不在,我旅遊更加要選擇淡季。

    回覆刪除
    回覆
    1. 尤其要盡量避開中式長假囉....XXXD

      刪除
  6. 回覆
    1. 可惜我唔係好食牛...:P

      刪除
    2. 咁啲龍蝦,蠔同蟹都唔差。

      刪除
    3. 上回去時有去Fish Market食龍蝦真係幾正,又平呢^^
      今次都有去買魚回resort煮,不錯吃:P

      刪除
  7. 你就好啦, 四維去, 羨慕呢!
    中國人有錢四維遊,無得避!哈哈~

    回覆刪除
    回覆
    1. 四維遊其實幾好㗎,至少唔駛集中塞晒去HK丫嘛....XXD

      刪除
  8. 乒乓球和高爾夫球咁大粒冰雹!

    回覆刪除
  9. 華~~~第一日到就去左咁多地方~~~~
    基爾媽怕唔怕太攰呀~~~~~~~XXD
    煎腸粉車仔係真經典~~~

    回覆刪除
    回覆
    1. 忙過返工wakakakaka.....
      又唔會喎,有得去玩一定好精神,同埋佢坐飛機可以瞓到!
      澳門會唔會有啲老舊茶樓仍然有推點心車??

      刪除
    2. 有時我都覺得旅行忙過番工~
      下~咁基爾媽又幾叻喎係機上面訓到~~~
      可能有~但我無去~~~~XXXD

      刪除
    3. 但一定忙得好開心wakakakaka.....
      可能佢唔係太愛睇戲...不過今次發掘到原來佢愛打機XXXD
      HK啲茶樓一般啲枱都擺得太密,不可能推到點心車了:P

      刪除
  10. 雖然多了個S,但見到THE ROCKS,反而想起美國,因為有套戲叫石破天驚。

    回覆刪除
    回覆
    1. 石破天驚有印象,在英文台睇過,有Sean Connery和Nicolas Cage

      刪除
  11. 我估喺澳洲係唔會思鄉,乜都有.

    回覆刪除
    回覆
    1. 話明係此澳不是此奧丫嘛......XXXXD

      刪除
  12. 去到外地點解唔試下外國嘢食呢?

    回覆刪除
    回覆
    1. 你係咪指鴕鳥肉袋鼠肉鱷魚肉果啲??
      上次去試過了,今次無謂再試了吧:P

      刪除
  13. 個公園真係有昔日大英帝國的殖民地感覺...

    回覆刪除
  14. 其實我突然都想試吓郵輪
    飲茶貴唔貴先,外國食中餐又貴又怪怪的

    回覆刪除
    回覆
    1. 我朋友上次飛台北,基隆去沖繩新落海xx 公主号才hk$2千幾,睇下有無平

      刪除
    2. 銀仔哥:想試就搞個family trip,應該都幾啱一家大細去,不過要留意打風季節,有可能會停航會有點掃興....
      佢應該係翠園那類級數價錢,我飲慣cheapcheap稻記富記果啲就感覺略貴一點,但幸好味道是ok的,而且有些HK茶樓已不多見的傳統點心,例如大隻糯米雞春蛋燒賣芋角和大包之類!

      刪除
    3. 小月姐:$2XXX係咪玩三四日?敢都幾抵玩喎^^
      船上係咪都有些自費餐飲?

      刪除
    4. 小月:幾抵玩噃,仲任飲添😆
      基爾:你講得啱,香港D連鎖酒樓,D點心全部都係成批買嘅,現今自製同傳統點心真係買少見少

      刪除
    5. 係呀集團式經營的酒樓大部份點心都係工場製作吧,可減省人手成本,餘下的師傅可能只負責包腸粉之類必須即場製作的點心

      刪除
  15. 珍珠奶茶真係好勁,去到邊都有連鎖店

    回覆刪除
    回覆
    1. 我真係唔知連南半球都有....
      唔知日本韓國有冇??

      刪除
    2. 果然係世界cup肥仔水wakakakaka....

      刪除
  16. 好似乒乓球咁,都真係幾大粒,俾佢打到都唔講得笑。

    回覆刪除
    回覆
    1. 一定要找有蓋遮頭位置避一避,駕車都要盡量駛埋一二邊先:P

      刪除
  17. 去到外國都可以有茶樓食野真係好幸福!

    回覆刪除
  18. PandaJoice:
    超好天吖!
    中餐無所不在 ~ 哈哈哈

    回覆刪除
    回覆
    1. 好彩你有署名返,否則唔知你係邊個呢XXD
      係呀大部份日子其實都幾陽光普照藍天白雲空氣也好
      有中人就有中餐囉wakakaka....

      刪除
    2. PandaJoice:
      係吖 ~ 都唔知 Blogger 搞咩...

      刪除
    3. 仲寫到blog算係咁啦:P

      刪除
  19. 放假飛赴澳洲周圍遊,睇嚟基哥好似番咗娘家咁優悠。

    回覆刪除
    回覆
    1. 秋葉姨壓晒韻好文采wakakakaka....

      刪除
    2. 謝謝讚賞! wahahahaha....

      刪除
    3. 看秋葉姨的網誌也經常學到很多文學作品,謝謝^^

      刪除
    4. 這是我所樂意寫的,不用客氣。
      我不寫這類舊文學的網誌很久了,因為怕會悶倒各位網友。而且在校訂和下筆都比較花時間。不過今次又見到有人以《論語》壓人,又見近日娛圈湧來熱浪緋聞,才寫下了這一篇。可能將來會以《論語》的探討作為主題。

      刪除
    5. 唔會悶喎我也愛看這類文學網誌,比較少人寫這一類呢^^
      我都估到你係語帶相關,同近期娛圈緋聞有處.....
      先秦文學博大精深,有很多學問

      刪除
    6. 這個全城熱話,連美加海外都知道了,真的是震撼! 雖然娛圈藝人是公眾人物,人人都可以批評,但是也不想在人家的傷口灑鹽。
      其實自古以來都有越軌的男女,所以周公製禮作樂,一切以禮教為依歸,以規範越軌的行為。
      古文學真是中國的瑰寶,我自小己經熱愛古文學。但因為我是現代人,故此不會隨便拋書包去嚇人。 見到基哥的「永樂大典」四個字,就覺得很有氣派。

      刪除
    7. 公眾人物多多少少都要承受公眾輿論的壓力,可能做明星的人工已包埋被人指指點點:P
      普羅大眾看娛樂新聞都係抱住睇過笑過的心態就算,又不涉及公眾利益就不用太深究,始終是別人家事,他們自有解決方法吧!
      周公制禮確是古人累積社會經驗的智慧,不會因時代不同而有改變,公眾地方還是守禮為佳,否則就移居荒島了XXD
      秋葉姨見笑了,此大典不同於彼大典,不能與古人巨著相提並論,這裏只是希望寫多點可帶來開心的生活點滴閒情逸事而已^^
      分享文學藝術體驗為何會變成了拋書包?愛看的自然會看開心share,秋葉姨不用過慮太多,只要自己愛寫而且又寫得精警好看有啟發性就ok了^^

      刪除
    8. 今次「安心事件」真是掀起很多的議論和對壘。網上和fb的留評如排山倒海而來。做得明星藝人,成為公眾人物,一有行差踏錯,就要受到公審,這就是名成利就換來的代價。 不依規距,不守禮數,誠信就會盡失了。
      *
      雖然基哥的大典是以喜樂作主題,但都看到各個博物館的消息,和郵票的展示,是一個愛好文化的表示。

      刪除
    9. 所以有時做明星都好茅盾,做得明星當然不會想唔紅無乜人識無乜人理啦;但人越紅自然一舉一動多人關注多人談論多狗仔隊去跟蹤再沒有自由了......
      我都係揀自己有興趣的才寫,也希望有相同嗜好的blog友可開心share,這也是寫blog的樂趣吧^^

      刪除
    10. 我所說的拋書包,不是指寫網誌文章。是說~見到有些人自命不凡,在網友的留言欄上抄些名人名言來自鳴清高,以顯示學問,自以為高人一等吧。
      至於我少寫介紹古老文學的原因,除了比較花時間,也是怕悶倒網友。但只要有人喜歡看,那怕只有一兩個,也是值得我去寫的。謝謝你的鼓勵喔 !

      刪除
  20. 哦.....原來如此....名人名言都係有活學活用的價值,單單抄錄就意義不大了:P
    那麼秋葉姨間中就搜尋一些心頭好文學作品分享下,讓我獲益更多^^

    回覆刪除
    回覆
    1. 世上就是有這種專門以抄錄別人宇句的低手,抄來省時省力,以留時間擴大地盤。
      *
      難得有知音,不才小女子唯有盡力而為,當有靈感,就寫些出來,以期拋磚引玉。

      刪除
    2. 咁我就期待秋葉的文學分享網誌了^^

      刪除
    3. 難得有知音,不負伯牙琴。

      刪除
    4. 若有出錯或打錯字,請指正就真。^0^

      刪除
    5. 今天查證資料,新篇的開端增加了主角的生平簡歷,務求使內容準確和充實。

      刪除
    6. 不用客氣,我都係來跟秋葉姨學習下而已^^
      好喎,我來看看!

      刪除
  21. 世界上所有唐人街, 大多好近舊城區, 主要因為, 唐人在上世紀50-60年去到時, 舊城區被人遺棄, 唐人見平, 就住入去, 之後90年代D西人開始將舊城區活化, 之後, 唐人街的地段, 就好值水了.

    回覆刪除
    回覆
    1. 原來如此.....
      我估係昔日交通工具和網絡都不算發達,唐人住近市區不論上班搵食或者生活配套設施都會較方便吧

      刪除