2020年3月27日 星期五

蕉坑獅子會:上@西貢

早前某個weekend趁住風和日麗的好天氣,就去了一趟西貢走走。其實假日的西貢一早預了會人頭湧湧又四圍都咁熱鬧(搭巴士也滿座)但都照去,來到巴士總站下車時已差不多過了正午!



1:12pm │ 來到西貢先去碼頭邊走走,順便再去個廁所。見公廁外面大廣場的紙船水池搭建了間簡化版的小教堂,是宣傳鹽田梓的文化旅遊活動吧!晚上如果亮了燈應該會更靚。



1:25pm │ 基爾之前都去過兩次鹽田梓(重溫),島上的大教堂是其中一處必去的景點,這次宣傳活動還特別製作了大教堂一帶的山景模型,做得好細緻好靚呢!



2:11pm │ 由於還未吃lunch,所以在碼頭邊看了一陣海鮮艇的熱鬧後就返入去市集入面食碗粥先。這間金山粥店之前也來吃過(重溫),家人特別喜歡所以每次來西貢幾乎都會來幫趁。今次沒吃皮蛋瘦肉粥改了試試艇仔粥平了兩蚊($22),另外炸兩($16)也要encore。



2:45pm │ 吃飽又在市集入面D店舖八一陣,除了看看海味舖(沒收穫),依家還有不少特色士多小店和食肆;之後再行返出大街,每次行過許姑娘茶粿檔口例必買幾個吃,不過買來的咸茶粿基爾不太like。



3:07pm │ 之後四圍行又路過勝記,依家才知原來佢有米車人星星。Anyway,覺得佢果座建築物都幾古雅,唔知又係咪D古蹟活化項目呢?



3:18pm │ 來到翠塘花園海邊避風塘時稍歇歇腳,單單無聊地看看藍天看看海看看船艇舢舨看看遊人享受一下假日的悠閒,其實也不錯啊!



3:35pm │ 醒起之前看blog友網誌經常會提到的「後花園」獅子會,反正還不太晚就沿路走過去看看。基爾其實也是第一次去,幸而也不太難找,沿途問過路人再跟住手機地圖,經過消防局不久就見到大門口路牌。



3:53pm │ 大門口有地圖簡介,可能由於地方夠大,遊人雖然也算多但明顯沒有西貢市集那邊咁喧鬧,除了不少人帶小朋友來「放電」之外,也見有帶同大大細細隻汪星毛孩來蹓躂。



3:58pm │ 入面最主要的平房建築物就是上圖這間獅子會自然教育中心。基爾沒有先入去參觀,反而更有興趣去逛逛外面的菜田……



4:00pm │ Field Crops這邊有不少菜田可看,例如上圖右開滿紫色花的Basil(泰越菜係咪常用這種香料),基爾大鄉里沒見過,最初遠看還以為是薰衣草,它的葉聽說也有驅蟲作用。左圖地上長得矮矮的是薄荷葉,同羅勒九疊塔那類原來也是同科植物。



4:06pm │ 再行過去瓜棚那邊(不少人來擺甫士影相甚至畢業相,又幾有創意喎),上圖右見到棚上吊住圓圓的果實印象中好似係百香果熱情果之類,旁邊的小水池還種了睡蓮菱角等水種植物。



4:11pm │ 等影相人潮散咁少少之後,就拿拿林行入瓜棚內睇睇仲有咩特別的農作物。上圖這些長長的水瓜平時很少在街市見到,大多只在家品店看到製成的洗澡用品。



4:12pm │ 冬瓜咁重咁大個還以為一定是碌在地上生長,原來還會吊在瓜棚上真有點不可思議;另外仲見有一大堆矛草……呀唔係應是竹茅,隔籬仲有幾棵強壯的蘆薈。



4:16pm │ 萵荀平時間中在街市都會見到,但種在田上的也是第一次見,原來都幾大棵。睇完菜田再迤行過去翠竹林和蜻蜓池,這天來可能不是繁殖旺季,好似不太多蜻蜓見到。



4:20pm │ 如果對昆蟲有興趣,記得要入去昆蟲館參觀,聽聞入面也有很多蝴蝶蜻蜓甲蟲之類的標本可看。不過基爾時間不太夠(也有點怕蟲蟲蟻蟻之類),所以姑且就skip了這處景點了。



4:22pm │ 獅子會園區內其實仲有好幾間展館,不過如果有心來參觀就最好早一點吧!因為大部份下午五點左右就關館了。(待續)

67 則留言:

  1. 我只係去過市中心
    話時話, 而家仲有無釣墨魚?

    回覆刪除
    回覆
    1. 市中心果邊確實係人山人海
      應該仲有,係咪租船出海果隻?

      刪除
    2. 毛:通常都要夜晚出海
      下次你俩回來不妨帶專員去試下^^

      刪除
    3. EE:原來如此!
      我还以為成年都有😅

      刪除
  2. 咁好天真係好啱郊遊。

    回覆刪除
  3. 正常時期,西貢的週末都係好多人,食店要排隊。

    回覆刪除
  4. 以前經常去獅子會,不過冇鐡路到,小去咗.

    回覆刪除
    回覆
    1. 巴士都方便,去到西貢再坐的士小巴或者索性自己行上去

      刪除
  5. 西貢現在太多人啦。
    獅子會好似唔錯喎,期待下集。但唔知點去,離西貢市中心有幾遠?!

    回覆刪除
    回覆
    1. 唔知依家會唔會少返啲人
      因為其實都驚太多人聚集
      不太遠,由西貢市中心慢慢行過去都好近

      刪除
    2. 其實由九龍入西貢墟,北港站下車對面就是入口。

      刪除
    3. 對!如果由九龍入西貢就在北港站ok

      刪除
  6. 好充實的一天, 現在去郊外都好多人, 我也少外出了,只在家附近後花園行下, 又或公園行下, 因為不用坐車。

    回覆刪除
    回覆
    1. 都係盡量少坐公共交通穩陣少少.....
      如在家太悶,去屋企附近的公園行下舒展身心也是好的

      刪除
  7. 感覺上基爾已經喺市內避開人群拍照,但依然感受到人山人海,都係去到“郊外”舒服啲。:)

    回覆刪除
    回覆
    1. Weekend去係多人呢
      唔知閒日會唔會好啲?!

      刪除
  8. 獅子會園區都唔錯,我到過幾次,可以買埋有機菜,又可以嘆埋下午茶,幫趁、支持社企的茶座。

    回覆刪除
    回覆
    1. 我覺得幾有郊遊feel地方大可以hea又不算太多人
      我去果日太晏冇賣菜但有開茶座

      刪除
  9. 我地想搭船西貢去荔枝莊個邊, 要等疫情過後友人肯出門
    相信西貢相對仍是人多.

    回覆刪除
    回覆
    1. 等疫情消失先啦
      依家船的班次不知有冇減少
      要check咗先去以免掃興吧
      其實如遠離市中心碼頭果邊
      其他地方都ok

      刪除
  10. 回覆
    1. Weekend就唔去啦太多人😅

      刪除
    2. 而家真係盡量留喺屋企或者去啲空嚝少人啲嘅地方比較好……

      刪除
    3. 对!
      希望疫情早點消退咁大家都可回復正常生活就好了

      刪除
  11. 假日我都盡量不出西貢墟,就是怕人多。

    回覆刪除
    回覆
    1. 你梗係一定揀閒日啦
      費事同外來人逼
      你估貪熱鬧咩😆

      刪除
  12. 疫情下,出去逛下都幾好,但人潮咁多,又喺高危

    回覆刪除
    回覆
    1. 絕對係!
      這幾周高峰期就請盡量留在家當幫忙唔好無聊周街去

      刪除
  13. 金山粥店大名聽過好多次,但係始終都係未食過。

    回覆刪除
    回覆
    1. 我唔知原來佢咁出名😅
      不過佢門口成日有條龍

      刪除
    2. 依家唔知佢仲有冇开或者只做外賣吧

      刪除
  14. 獅子會幾唔錯~~~~~
    不過又真係幾多人~~~~~~~~~~
    講到咁正我都想試下碗粥~~~

    回覆刪除
    回覆
    1. 如果去開西貢都可不妨去逛逛
      依家可能少人D以免人群聚集😅
      可以一試同三元果类但平少少^^

      刪除
    2. 依家你地果邊係咪都唔敢約D朋友聚餐睇戲之類?

      刪除
    3. 依家咩地方都無得去可能反而多人去左~
      平過三元呀~~咁又可以一試喎~

      刪除
    4. 係呀....乜都無做呀~

      刪除
    5. 依家都係盡量留家算了
      你新居裝修好後希望可有多点旅行新鮮感^^

      刪除
  15. 獅子會多年沒有去過了😥

    回覆刪除
    回覆
    1. 依家疫情期間都唔知有冇开呢😅

      刪除
    2. 其實如果嫌市中心果邊太多人
      這裡也不失是个避靜好去處吧

      刪除
  16. 金山粥店?我下次都試吓先!不過而家疫情嚴重,唔知幾時會去了⋯⋯
    你都係疫情期間去?

    回覆刪除
    回覆
    1. 應該不難找就在橫街內
      依家疫情其間都唔知佢有冇開喎
      佢店面較窄可能只做外賣生意吧
      我在年頭時去依家才寫而已😅

      刪除
  17. 西貢真係好多年沒有去了。以前在一家街前的店舖吃過一頓飯,小菜煮得很好吃,給人的印象頗佳。
    看到圖片池上那隻紙船,相信都是上了膠的,否則都給浸壞了。

    回覆刪除
    回覆
    1. 其實如果不是疫情也不妨閒日入西貢走走
      夏天都幾多人乘街渡往外島一遊很愜意
      紙船其實是石雕所以長期浸水也不會壞
      就在巴士總站旁的小廣場很易找到

      刪除
  18. 獅未會未去過,一路以為唔係公開開放@@
    好耐冇去過西貢啦,下次去要試試金山粥店先得:D

    回覆刪除
    回覆
    1. 是公開開放的
      裏面還有不少有趣的展館
      啱一家大細去遊逛下
      不過疫情期間唔知有否開放
      粥店也可能只做外買吧😅

      刪除
  19. 西貢我好耐都無去啦,現在疫情嚴峻,太迼的地方都吾會去。

    回覆刪除
    回覆
    1. 西貢依家假日唔知仲多唔多人
      食肆可能限入座都或者會冇咁旺
      安全起見都係盡量少去人多地方

      刪除
  20. Gael兄的觸角真敏銳,如個廁都發現美景……哈哈
    現在多人去郊區透透氣!!

    回覆刪除
    回覆
    1. 廁所外面啫!😅
      果度在巴士總站旁唔洗發現都一定見到😆
      Lazy Lion話人多地方盡量唔好去喎...

      刪除
  21. 在瓜棚影畢業相,感覺怪怪地,可能我諗多左啦!😁

    回覆刪除
    回覆
    1. 唔知係咪有特別原因呢^^
      可能純粹覺得夠特別吧!

      刪除
    2. 有時也会見有畢業生在公園影相呢

      刪除
  22. 獅子會有無幫襯【聰鳴茶座】,唔知仲係唔係度呢

    回覆刪除
    回覆
    1. 果日去無呀因為都四五点都冇乜人了可能準備收檔吧

      刪除