2013年4月7日 星期日

2Q12瀛遊東北@大沼公園

「空氣新鮮得讓人吃驚,周圍充溢著深深的靜寂,靜寂到要重新調節聽覺才能適應的程度。天空彷彿穿透了一般高遠,裸露的肌膚可以無礙地感受陽光柔柔的暖意。不時傳來未曾聽慣的高亢的鳥鳴聲,卻看不見鳥兒的蹤影……」



雖然不是第一次睡榻榻米,不過在十和田莊這一夜感覺依然新鮮,尤其喜歡草蓆隱隱散發的青草味道。唔知係咪因為咁而更熟睡,大清早起來已精神奕奕,往窗外一望這片迷人的晨曦田園景色,更令人格外醒神。



老實說基爾平時在家點會晨咁早就起身,然而每次去旅行就好多時6點幾已起來了,不知為何總想感受一下異國清晨的美好寧靜時光。如果在香港的家裏一打開窗就見到這片無際的山林美景,肯定都會有晨運的衝動吧!



在十和田湖住了兩晚來到尾聲,拎齊行李於溫泉旅館check-out後,又拎住個JR Pass去搭免費巴士出返新青森火車站,途中當然又要翻越八甲田山。這朝早的天氣比昨日好多了,基爾拿拿林從背囊裏拿出相機來補影返多D紅葉靚相,整個山頭紅卜卜夾雜黃色的銀杏和其他尚未轉色的綠葉,簡直就是個「彩色世界」,照片的色彩明顯比之前用手機影的鮮艷百倍,個天都總算無待薄基爾……



來到山腰上的酸之湯溫泉休息站,基爾趁機落車四圍睇下,唔落由自可,一落車即時零度寒風刮面,拎住相機的手也凍僵了,不過當然不會咁快竄返上車,點都頂多陣啦!點知行行下仲有意外驚喜,竟然下起雪來了,真估不到10月底來青森已遇上下雪,這也是基爾咁大個仔第2次見到落雪。



來到這個岩木山展望台時已經搭了兩個幾鐘巴士,由這裏望落山可以睇到成個青森市的skyline,比較可惜巴士沒有在這裏停休息站,否則可以在這裏睇下風景也不錯,景觀確實比太平山頂開闊,無咁多大杉高樓遮擋,有好多日本人都特登駕車上來睇靚景。



晨咁早出返新青森站,主要係趕搭11:34am開出的白鳥號往函館……沒錯是去北海道!如果要去北海道就要買¥28300的全日本JR Pass,雖然比¥20000的東日本Pass稍貴,但就包埋搭JR Bus的車費,圍起上來都抵買。昔日由青森往函館一定要搭八甲田丸渡輪,遇上惡劣天氣還不時會停航,不過自津輕海峽隧道開通後,就可搭火車由本州北部穿越海底往北海道,全程只需兩個鐘,期間還會經過一個「海底車站」,感覺既神秘又特別。



來到函館又要馬不停蹄立即轉北海道JR線火車,搭多大約45分鐘去到北面的大沼公園站。不過如果拖住成篋行李去行公園實在太傻,還是先在站旁的觀光案內所寄存了行李(每件¥200),再往大沼公園進發。由火車站行去公園,沿途會穿過一些小町,在這間路邊的雪糕店還遇上了「牛奶妹」。



友人話大沼公園風景靚,又係鄰近函館賞紅葉的勝地,所以要專程來看。果然成個公園大得難以想象,翻查資料原來面積達到9083公頃(維園只有19公頃),當然係無可能行得晒的!



所以基爾早就疊埋心水,只打算集中行幾處必遊的靚景位。不過成個公園咁大,到底邊度先至叫最具代表性呢?其實好易搵,通常有人擺檔幫遊人影相的,又或者見到當地的龍友大叔去邊影,果度九成都係喇!例如上圖喱個靚湖景,仲有電視台來拍片添,一定係全公園風景最靚的地方啦!



基爾拎住條燒粟米,一路咬住一路行埋去裝下幾個大叔到底在湖邊拍乜先?!咦!睇真,原來佢地正影緊對面遠處的「駒之岳」,那是一座高1131米的活火山,尖削的山峰頂形態非常獨特,比西貢的蚺蛇尖還要尖,基爾當然唔執輸zoom盡部靚仔相機埋去,影埋一份啦!



除左睇活火山之外,大沼公園喱日同場仲加影埋「單車少女秋日遊」!唔知係咪適逢當地學校的旅行日,勁多著校服的中小學生來公園玩,令到周圍都幾熱鬧。如果踩單車遊公園可以去遠少少的地方,而且唔駛行得咁辛苦,不過基爾就唔見附近有得租單車,結果都係費事浪費時間四圍搵,繼續行下算了!



湖邊喱間遊船的lake house幾正,仲有賣小食的餐廳在裏面,加上風和日麗的天氣實在perfect,不過基爾無諗住搭船出去遊湖,還是在湖邊行多陣睇下紅葉吧!



大沼湖雖然大,但原來已經係北海道最小的「國定公園」了,其他那些有幾大可想而知。不過公園裏的大沼湖就相當出名,被譽為「新日本三景」之一,其餘兩處分別是靜岡的三保松原和大分的耶馬溪,希望將來有機會去齊晒啦!上圖是欣賞大沼湖和活火山駒之岳必到的湖月橋。



由湖月橋可以盡覽遠處的駒之岳,近處有好多學生去影相的小島就是大沼湖邊的日出島,沿島邊附近有很多紅葉可以欣賞到,情侶還可以踩下鵝仔船遊湖,唔知有無人有興趣去享受這份浪漫呢?

沒有留言:

張貼留言