快閃新界東@沙田+西貢

寫得太多巡館記和日本遊記，都係時候要寫返D「快閃速遊」間下場先。

今年無去花展，不過其實春天真係度度都有花睇，例如喱個屋村的公園花圃就有棵開得好靚的蘭花，唔知佢係乜品種呢？睇完花再睇埋龜，屋村商場裏有個爬蟲類展覽，除左龜之外仲有蛇和蜥蜴，喱隻龜外表睇落幾惡，很有殺氣似的。



睇完龜之後坐順風車上去獅子亭，話時話基爾咁耐以來都係第一次來喱度，聽聞唔少人鍾意來拍拖，不過喱日就唔見有野鴛鴦。好彩由涼亭外望個view都唔錯的，成個沙田和城門河景盡收眼底。



之後再坐車入西貢，第一站先去食個許姑娘茶粿，其實基爾向來不太愛食鹹茶粿，總覺有點怪怪的，不過原來新鮮熱辣食，味道也不錯，粿皮也不韌。食完再過對面食甜品，基爾本來幾怕杏仁露陣味，不過喱個配搭海底椰和芋頭又幾夾喎！



食完之後在西貢市集的橫街窄巷裏蹓躂，在迂迴曲折的小巷裏就似走進迷宮一樣，又有點似去了長洲或大澳，行來行去兜了幾個圈，終於出返去比較熟悉的海鮮街牌坊那邊的海傍。



記得好多年前也來過天后廟和關帝廟這邊，舊地重遊見到間廟又修葺得幾新幾靚，廟外有好多遊人來影相，反而廟裏就比較清靜。行返出碼頭邊，見到小販拎了一隻鱟畀小朋友玩，聽說那是史前活化石生物，賣成幾百蚊一隻，唔知點煮點食架呢？



沿碼頭海傍一直往前走，無幾耐又來到熱門的「狗展場地」，雖然傍晚時份唔少已經打道回府，不過依然有好多大中小狗在這裏嬉戲。海邊對出仲有好多停泊的龍舟，再過多兩個月又係爬龍船季節，到時再來看吧！



最後食埋晚餐先走，這次又係幫襯旺泰特食，不過喱間泰菜水準真係越來越一般，加上由於係周日非常旺場，連招呼都非常欠佳，甚至清水也欠奉，然而價錢好像越來越貴，下次都係唔來幫襯了。食完辣野之後本來諗住去金馬車買返件藍莓cheese cake解下辣，點知去到竟然賣晒！無辦法，唯有減下肥啦！