2013年12月11日 星期三

遺忘的唱盤時光@情歌雜錦

好似又好耐冇寫下床下底啲CD,暫時又擺低啲旅行野唔寫住,聽聽「經典歌」解下悶先!



90年代香港的唱片市場開始受到老翻打擊逐漸萎縮,唱片公司要搞盡腦汁諗計刺激市道,出雜錦精選碟就是其中一種靈丹妙方。其實以前80-90年代除了一線歌星之外,其餘二三線歌手都幾難夠歌出精選碟,唱片公司有時會出喱類雜錦精選都係其中一條財路,上面這張1996年推出的《唱情歌的女人》是舊寶麗金的出品。



單看唱片封面其實真有點粗製濫造feel,只是求其將湯寶如、陳慧嫻、周慧敏、王馨平和黎瑞恩等5位當時寶記最紅的女歌手並排一起就了事,霎眼看還真有點似老翻。不過碟裏選輯的歌,今時今日聽返卻有點驚喜,除了湯寶如的感冒和緣份的天空算是當年大熱外,其餘幾個選的都是較sidecut的滄海遺珠,當中基爾就非常喜歡Linda的原來如此和寒冰,若以音色而論,王馨平肯定是當年寶記「5小花」之首。



至於剛復出開了慈善演唱會的黎瑞恩,碟中也有她比較少聽到的覺悟(《盞鬼老豆》主題曲,這劇是誰做的呢?)就連唱歌麻麻地的周慧敏,選來的紅顏知己和情迷心竅在CD中的演唱水準也絕對可收貨。至於碟中基爾最感驚喜的是,竟有收錄陳慧嫻的我心不死,當年喱齣廣播劇都幾hit,但主題曲就唔算大熱,原本收錄在陳慧嫻哪張大碟也不太清楚。



拉雜成軍的《唱情歌的女人》當年推出後應該幾好賣,翌年還出過《唱情歌的女人2》,加入了關淑怡和陳秀雯,不過基爾就無再買了,喱類無喱頭情歌雜錦碟反而還有一張1992年推出的《華納浪漫心曲精選2》。



唱片的封面設計比寶記那張還要求其(甚至可說以用核突來形容),但原來這樣「行貨」的華納精選系列由1991-93也還曾出過3張。當年的華納又有咩歌手呢?掛頭牌的當然是葉倩文和林子祥,碟中收錄了憑千個心、情深再別提和他們合唱的何時何地。



歌詞只簡簡單單印在唱片封面背後,基乎沒有什麼設計可言,卻反而有點昔日黑膠唱片的味道。除了林葉伉儷外,還有兩個幾乎遺忘了的名字:劉錫明(無根草)和曾航生(永遠幸福)。



此外「搭單」的還有林憶蓮(你令我性感)、陳百強(當我想起你)、呂方(不捨得你)、王傑(可能、酒醉酒醒)和陳潔靈(風是冷),選曲似乎都沒什麼章法,順手拈來就塞進去。唯一較有驚喜是收錄了夏韶聲和蘇芮合唱的車站,還有久遺了的馬怡靜,她這首真愛今時今日應該不容易找到吧!

48 則留言:

  1. 當年好喜歡林葉伉儷的歌曲,但現在反而連歌手名字也說不出來。

    回覆刪除
    回覆
    1. Choa:依家啲新人多成咁,真係一個都嗡唔出名

      刪除
  2. 如果唔係樂仔翻唱王馨平舊歌,我都唔知佢識唱歌。時代不同了,以前的歌手,點都有D實力。

    回覆刪除
    回覆
    1. Samwei:依家佢hit返,仲開演唱會和有唱片公司搵佢簽新約添呀,咁都好嘅,無謂浪漫咗唱歌潛質
      最記得佢唱過美少女戰士^^

      刪除
  3. 舊歌有一種說不出的韵味 :)

    回覆刪除
    回覆
    1. Joice:仲諗住你實話我老餅XXD

      刪除
  4. 這類雜錦碟,當年基乎所有唱片公司都有出版!

    回覆刪除
    回覆
    1. 摩﹕係呀,唱片公司的主要財路^^

      刪除
  5. 唔講凈睇封面,真係以為係老翻 !

    回覆刪除
    回覆
    1. Galaxy: HI, longtimenosee^^
      都係架,個封面實在太粗製濫造了~~~~

      刪除
    2. 一直都有睇你的blog, 只不過好多時候都插唔到咀。

      刪除
    3. Galaxy:咁第時至少留個哈哈笑畀我等我知你來過^^

      刪除
  6. 90年代起好興呢一種雜錦碟,不過又真係好抵買!

    回覆刪除
    回覆
    1. Lam:我都唔係好記得當年點解會買,不過應該都係因為好平XXD

      刪除
  7. 回覆
    1. JJ:駛唔駛咁誇張呀XXXXD

      刪除
    2. 係你諗得誇張之嘛!高左2mm好嚴重咩?kaka...

      刪除
    3. JJ:2mm都好呀!過多一年半載就高過姚明XD

      刪除
    4. 乜長頸鹿唔係高過姚明咩!

      刪除
  8. 雜錦牒個封面多數好求其.

    回覆刪除
    回覆
    1. 王子﹕可能唱片公司人都唔係太想花錢在這類唱片的封面設計

      刪除
  9. 90’S 最多翻版碟,所以唱片公司都要出一些精選歌同平賣,希望吸引大眾買正版碟!當時我又未買過呢類碟…

    回覆刪除
    回覆
    1. 森﹕都有可能喎,同老翻爭生意^^

      刪除
  10. I also like this kind of mixed song CD with good songs in one single album.

    回覆刪除
    回覆
    1. Ray:對,好多時都會發現滄海遺珠好歌

      刪除
  11. 我比較抗拒買雜錦碟,覺得冇誠意,曾經較喜歡小恩子,佢把聲有D似陳慧嫻。那個九十年代寶記,對造新人真係有貢獻!

    回覆刪除
    回覆
    1. BIM:我以前都覺得佢兩個把聲好似,不過依家反而可以分得清,可能聽耐就察覺到分別之處吧

      刪除
    2. 對呀,聽尾音唱法陳慧嫻細緻一D。
      我較貪心,除咗聽碟,仲會留意封套及設計,所以除非我好鍾意D歌,否則就較少幫襯雜錦碟。

      刪除
    3. BIM:me too^^概念碟通常做得比較認真和細緻啲;喱類炒雜錦就多數係搵錢居多

      刪除
  12. 全部都聽過,但全部都冇印象.
    比較鐘意王傑, 陳百強,蘇芮.

    回覆刪除
    回覆
    1. 毛﹕失憶發作呀?!!!XXXD
      王傑聽得多會悶

      刪除
  13. 小時候有人說我似王馨平,亦有人說我似黎瑞恩…… 何解無人說我似李嘉欣?至於那封面,的確核凸––––那些唇印,攞膽!

    Btw, the wait is over - 印度 take 3 歷險記剛剛出爐。

    回覆刪除
    回覆
    1. Desa:似王馨平黎瑞恩都好丫嫁到金龜婿
      實在係畫公仔畫出腸的感覺
      又有新野睇,好^^

      刪除
  14. Several months ago, I heard 王馨平 sing in a live show. Her performance was a bit disappointing. She sang off-key at times.

    回覆刪除
    回覆
    1. Kenji:我諗佢始終無在港唱咁耐,可能會影響唱live水準會有啲跌watt吧

      刪除
  15. 以前啲歌好聽好多, 而且粒粒巨聲, 而家有咩野歌手我都講唔出, 連樣子都諗唔起!! 本地樂聲比較著重樣靚多過唱功, 一唱live嚇死人, 所以我而家聽台灣歌多啲!!

    回覆刪除
    回覆
    1. 蜻:以前啲歌手可能出一兩張碟唔掂唔賣得已經被叮走,依家果啲可以磨好耐,好多半紅不黑的都可以磨十幾年XXD
      近年好似都少咗台灣歌手肯長時間來香港做宣傳所以我依家都唔太知hit啲咩人了

      刪除
  16. 啲精選雜錦碟有時都有驚喜架!!

    回覆刪除
    回覆
    1. Wan:間中會有啲早已遺忘了的好歌在其中

      刪除
  17. 周慧敏肯定是唱得最差!

    回覆刪除
    回覆
    1. Teddy:佢重點唔係sell唱功嘛^^

      刪除
  18. Gael,現在的歌手真係好唔掂,唱得好的所餘無幾.

    回覆刪除
    回覆
    1. Andrew:好似都無乜邊個能令人留下深刻印象

      刪除
  19. 得呢班人係識唱歌架咋。所以點解衣家不斷出返佢地啲雜錦碟!

    回覆刪除
    回覆
    1. Dennis:我諗都係以前一輩的歌手出精選碟會較好賣,依家年輕人好少會買碟了

      刪除