2014年1月18日 星期六

人山人海睇紅葉:下@大棠

本來諗住行完楓香林就折返元朗食大榮華,不過友人見元朗方向人潮多,遂改往深井方向的燒鵝進發!



來到check point 3是全程最多人聚集的休憩林地,這裏種了十多棵楓香樹……



不少龍友團還請來「靚模」隨團拍照,見那些小妹妹又要爬梯又要上樹擺甫士絕非易事,基爾在旁看也感滴汗,額角不其然要加藍間!



楓香樹由於有防風抗燃的特性,近年在各區郊野公園都有大規模植林,希望將來唔駛一窩蜂湧到大棠賞紅葉啦!



影影下連基爾都掌握到少少秘訣,原來開了閃光燈閃上去就比較容易拍到樹上紅葉的色彩!



離開「人煙稠密」的楓香林後,繼續向田夫仔方向出發,這邊人潮明顯疏落得多,終於重拾郊遊徑本來應有的清幽環境。



下午2:30左右就來到清快塘,上次行元荃古道沒有經過這裏,之前也聽聞過這裏有個喜香農莊,反正之前只吃了個冷冰冰麵包而已,索性入去農莊歎返個熱辣辣餐蛋麵吧!



由於老闆煮麵需時,基爾趁等候時四圍逛逛,原來農莊裏有個非常靚的蓮池,當然要去走一圈欣賞下。



基爾一直以為蓮花通常是夏天最盛放,不過香港可能氣候較獨特,冬天也不算太冷,所以賞紅葉的同時還可以賞荷,若果不是因為身上穿了厚外套,看著這些睡蓮還真以為自己發了個「仲夏夜之夢」……



除了蓮池外,農莊裏還有很多靚花可賞,例如上圖艷紅的簕杜鵑和鮮黃的雛菊,就連旁邊汲取山泉的小水池也散發著靜態美,與剛才的賞楓人潮恍似兩個世界。



臨近過農曆年,莊園裏這棵橙樹(還是桔呢?)已經結了果;另外還有棵楊桃樹,雖也結了小楊桃不過全都包了保護袋,老闆說是要提防果蠅云云……



從另一角度賞蓮池,這邊可以見到池塘裏開了很多株蓮花,絕非只有一兩株的殘荷景象,以冬天來說確是奇景!(定還是這是秋冬開花的特別品種?)



近鏡再影多張「冬日荷塘」靚相,這天來到天氣確實不錯,比去年要冒雨行元荃古道好得多!



吃了麵後又要出發上路,農莊後面有片大草原(若在市區一定會起幾幢樓),老闆說每天午後黃牛群都會來到草原上吃草,原來除了大嶼山和塔門外,清快塘這裏也有黃牛群呢!草原邊還有幾株梅花,不知是昔日清快塘村民栽種的還是野生,但見枝上已結了很多花蕾。由於賞楓旺季後緊接又到賞梅旺季,相信到時這裏或許又會逼滿龍友了。



行行下見到遠處山邊傳來瀑布聲,zoom盡傻瓜機果真有條不知名小瀑布,落差有十多米以上,氣勢比日本的「乜乜之瀧」也絕不輸蝕呢!難怪咁多日本人愛來香港行山。過了小瀑布後不久,眼前就見到山下深井一帶的「屏風樓」和遠處的青馬大橋了,不過這天煙霞較濃,影出來不算很美。



約4:15pm左右落到山腳的深井村,這次賞楓之行也終於來到尾聲,行了一整天點都要食返隻燒鵝作慰勞宴。深井一帶以裕記比較老字號,陳記就較多人幫趁,不過聽友人說原來能記也不錯……



最後還是選了裕記,率先當然要叫燒鵝,不過一隻太多,就叫半隻吧!雖然有點肚餓,不過味道仍只屬average而已,沒太大驚喜!



另外還點了魚頭煲和上面喱個一品海鮮煲等幾味小菜,水準都緊是一般(部份甚至欠佳)而已!以人均約HKD$130計,並不算理想的一餐,下次有機會再去試試吃能記!

58 則留言:

  1. 基爾在旁看也感滴汗>> 咁有冇流埋鼻血??

    回覆刪除
    回覆
    1. 有都唔講你聽喇!kaka...

      刪除
    2. 王子:你會架咩?!咁可能近排食太多燥熱野,要飲返多啲番鬼佬涼茶先得XXD

      刪除
    3. JJ:私底下講唔話你知XXXD

      刪除
    4. 矛盾!既然唔話人知喇!何來私底下呢?你兩個就有私,我在明不在暗嘅!

      刪除
    5. JJ:你「明」就OK啦~~~~XXXD

      刪除
    6. 基仔吓!扮睇漏眼呀你!未o節就笑!

      刪除
  2. 大棠紅葉真係人山人海... 我都想去凑熱閙!

    回覆刪除
  3. 燒鵝我食兩件咋!寧願留肚食雪糕。呵呵呵!

    回覆刪除
    回覆
    1. JJ:深井有燒鵝味雪糕架咩XXXD

      刪除
    2. 鍾意食就肥都抵嘅!即係你鍾意嘅女朋友你唔介意佢肥嘅!kaka..

      刪除
    3. JJ:乜你咁注重外表架咩?!

      刪除
    4. 係呀!最緊要乾淨o架!咁!聰明嘅呢就會覺得靚左,蠢呢就醜樣左o架喇!所以細個時覺得蘇格拉底好肉酸,但後來知道佢好有智慧,即刻就變靚左啦!哈!

      刪除
  4. 大潭水塘都有楓香樹,前幾年影過啦!今年就未去睇。

    回覆刪除
    回覆
    1. JJ:有呀我之前在人地blog都有見過@@

      刪除
  5. 以前曾經路過清快塘,但冇留意到有個咁靚既地方><

    回覆刪除
    回覆
    1. Matthew:如果係行去深井一定會經喱個農莊的呢^^

      刪除
  6. 人哋請得起靚模, 難免要爬來爬去影相…皆因搵食艱難…
    點解Gael兄又唔請位靚模同行呢??!!

    回覆刪除
    回覆
    1. 森:係呀因為要個model企到好高先可以同紅葉合照,難度都幾高!
      果日我已經有成班美女同行啦kakakakaka

      刪除
    2. 聽你咁講, 當日gael兄真係「艷」福無邊嘞…….XXXD

      刪除
    3. 森:直情係一街都係美女kakakakaka

      刪除
    4. Gael兄:睇「靚模」小妹妹爬梯、爬樹、擺甫士,又有成街美女同行...正所謂 "秀色可餐" ...Gael兄睇「靚模」都睇飽喇!
      當然覺得燒鵝味道沒有太大驚喜喇!XXXD.....

      刪除
    5. 卡:車~~~你咪當我係咸濕伯虎先得㗎~~~~

      刪除
    6. Gael:車~~~同你講吓笑之嘛!
      咪自我對號入座先得啩XXXD
      btw...D文字都是參考你的,不是我作出來的 :P

      刪除
  7. Delicious Shum Zheng roasted duck!

    回覆刪除
    回覆
    1. Ray:好出名,不過喱間一般,下次要試第二間:P

      刪除
  8. "唔使一窩風去", 少你一個都好好多啦!
    香港地既花開都唔以時節出牌, 我樓下公園既桂花都開哂 , 經過慢跑徑兩旁陣陣香味,超正又怪異 !
    你發既應該係"綺麗蓮花夢"!

    回覆刪除
    回覆
    1. 毛:我已經行過兩次大棠,我諗下次我都會去第二啲哋方好一點!
      桂花和白蘭都好香的!不過你唔好吸咁多以免變咗香精人XXD
      你成日發喱啲夢架咩?!!!!

      刪除
    2. 首先多謝閣下光臨清快塘喜香農莊,如果你早一個月到訪,從田夫仔走過接近本村的水泥小徑旁也有一列約十多棵楓香樹,當時也紅得很美,但如今已枯榭了;農莊的老人家是我的父母,當日我也在農莊內,可能正在放狗或拍照,我是騎單車來探父母的,打理農莊是我的兄弟,多謝你對這兒的讚賞,歡迎你再次光臨!

      刪除
    3. 無名先生:那裏確是個好地方,恍似是世外桃園,你的父母一定生活得很開心,身體也很健壯呢!

      刪除
  9. 燒鵝燒鵝燒鵝, 行多啲都值得

    回覆刪除
    回覆
    1. MD:其實由荃灣坐車入深井都方便,唔駛行添架^^

      刪除
  10. 深井燒鵝,好耐未試過喇....

    回覆刪除
    回覆
    1. Wan:搵日入去行下啦,其實由荃灣入都好方便的

      刪除
  11. 行完再擦餐勁,正!!裕記D鵝其實一般oK,印象中小菜仲滋味。

    回覆刪除
    回覆
    1. BIM:我諗係普遍都跌左watt~~~我見隔籬台有向部長投訴㖭呀!

      刪除
    2. 可能加陣只有冰鮮家禽,有些風味真是一去不返的了>_<

      刪除
  12. Gael,我都覺得深圳D燒鵝味道差了,我上星期日再到北角街市你介紹過的日本餐廳,它們已取消那些抵食套餐了.

    回覆刪除
    回覆
    1. Andrew:所以都未必會山長水遠入去食,其實外面都有好多不錯之選!
      係呀老闆話依家周六周日都不供應套餐了,全都要散叫,所以食套餐就限定周一至五才有!

      刪除
  13. 大榮華啲燒鵝都好好味,
    同深井的可相比。

    回覆刪除
    回覆
    1. 博樂:Really~~~~~咁早知去大榮華唔去深井啦><

      刪除
  14. 回覆
    1. Amour:似世外桃園,基爾老咗都想住下喱啲地方

      刪除
  15. 我上次係行城門,經清快塘……再去深井食燒鵝!

    回覆刪除
    回覆
    1. 小妹:係呀大欖果邊係有好多條線路選擇的~~~~
      城門那條路線的風景應該也不錯吧^^

      刪除
  16. 我們多數幫趁能記,不過好耐無去,總覺得他們是高級餐廳價錢但大排檔格局,陳記係唔好食。。。。

    回覆刪除
    回覆
    1. Lucamom:係架真係唔平架,但貴得來又唔好食就差啲:P
      咁我下次如果有機會再去,就試下能記^^thx

      刪除
  17. 回覆
    1. 喔原來用閃燈影紅葉會靚啲0架 ,o_O
      我前日去青衣公園太陽落咗山 , 影出來的紅葉唔靚0既 , 如果早點睇你這篇網誌就好喇 .

      刪除
    2. ak:係呀因為向天影的話好多時都唔夠光,一定要開動閃燈先影到樹上的紅葉,效果會好一點^^

      刪除