2014年2月16日 星期日

2Q13秋見信州@立山室堂

「陽光從高大的樹木間瀉到廊前空地,到處是一根根光柱,晨靄如剛出生的魂靈在空中游移,深深吸一口氣,毫無雜質的空氣給肺腑一個驚喜……」



由凍到暈的黑部平觀景台返回車站裏取暖,見時間原來已不早,還是先在車站二樓的餐廳食個lunch才繼續上山吧!由於剛好同場有泰國和韓國兩團客來,waitress姐姐話廚房忙於做團體餐,散客只能供應兩款set lunch:黑部源流冷麵定食(¥1600)和咖喱豬扒飯定食(¥1300)。「穩陣派」基爾叫了豬定,不過後來見友人的冷定也不錯,也叫多個來試試,果然正!



食飽飽之後見還有時間(其實是剛miss了一班往大觀峰站的立山架空索道吊車),點都要到黑部平站外的這個「空中花園」逛逛,花園就建在懸崖邊,由這裏可俯覽山下的黑部湖和峽谷,景觀也不遜於車站天台的觀景台,花園裏也可賞紅葉,風勢也不似天台般凜冽。



花園閒逛一陣就要返去車站搭架空索道吊車往下一站大觀峰,索道全長1700米(上圖E至F),兩站之間完全沒有第三支柱,全程約7分鐘左右就由海拔1828米的黑部平攀升至2316米的大觀峰,耳膜也有點氣壓反應。



說是吊車,但當然與昂坪360和海馬公園的有很大分別,寬敞的車廂相信可載二三十人也沒問題,幸好基爾這次沒遇上旅行團,不僅不用受擠逼之苦,還可在車廂裏東南西北車頭車尾都走勻晒舒舒服服影靚相影到盡興!



來遊立山黑部好多人都知以「雪之大谷」的宏偉雪牆最出名,不過原來這程大觀峰吊車也相當有名氣,與「雪之大谷」並列為立山最具代表性的名勝。



不過,「雪之大谷」的雪牆每年只能在4至6月才可見到,大觀峰索道則長年開放(4-11月封山時唔知開唔開),深秋時份來搭吊車還可盡覽沿途山坡上的大片壯觀紅葉林。



話咁快就來到大觀峰站,即時被四周的半霧半雪包圍。一般香港人見雪即瘋癲,基爾當然也不例外,二話不說立即衝出去無人的觀景台影張飄雪相先。



不過由於實在太冷(估計around 3-5度),即使心情幾咁興奮,在戶外單單企5分鐘已經變雪條,頂唔住寒風拿拿林返入室內取暖。車站裏除了有手信店外,還有很多介紹立山黑部的leaflet和poster,果然當中大部份都以「雪之大谷」和大觀峰吊車作招徠。



時間無多,立即就要起程搭最後一程的隧道無軌電動車(約10分鐘),由大觀峰攀升至立山山頂、海拔逾2450米的室堂站。由於隧道採用單管雙程設計,外貌如單層巴士的電動車需要經常停在避車處,坐在車頭的基爾看著迎頭巴士擦身而過感覺幾驚險有趣。



上到室堂雖然只係3:00pm左右,但由於天色欠佳也沒什麼陽光,睇落好似將近入夜咁。室堂站比之前的黑部平和大觀峰站更大,站裏的手信店還有上圖這盒友人說非常出名的室堂限定「星之雫」果仁朱古力(¥1050)出售,既然講到咁好食當然要買返兩盒,為免翌日離開時太趕忘記買,還是先買為妙。



車站上蓋其實已經有間酒店,不過價錢比較貴,所以預定了離車站遠少少的立山室堂町池溫泉旅館Mikurigaike-onsen(¥12910)。由車站行過去雖然只約15分鐘,不過由於室堂位處山頂,寒風比黑部平和大觀峰還要強勁,唯有冒住風雪三步夾埋兩步行快D去溫泉旅館取暖。上圖右是室堂旅館附近的地獄谷步道封閉告示,原來這條散策步道自4月起由於火山趨於活躍而關閉了,基爾在旅館附近一帶都聞到幾濃的琉璜味!



立山室堂町池溫泉旅館由於位置遠離室堂站,感覺上真有點似與世隔絕的孤島!聽旅館職員說原來再過多兩三星期(每年11月最後一個星期),這間室堂旅館就會隨車站一同關閉封山,直至翌年4月中才再開放,每年春天回來,積雪都會堆至大門一樣高!上圖右是客房的6疊榻榻米,地方非常寬敞。雖然凍但仍忍不住推窗外望,外面的小山丘也披了雪。



由於海拔高,立山室堂每年9月中已開始下雪,基爾10月底來到已經有一層積雪。咁鬼凍又大風,還是不要出外玩雪了,就趁食晚飯前先去浸浸溫泉暖身吧!這旅館原來是有名的「秘湯」,是全日本海拔最高的溫泉,泉水直接引自附近的地獄谷,呈天然奶白色;溫泉池設有大窗可遙望外面的大日岳景色(非住客可購溫泉票¥600)。



嘆完溫泉後,又到晚飯時間,旅館包了一晚一早餐,毋須再費周章出去搵食。事實上往返旅館和車站的那條山路無遮無擋兼夾無街燈,在這深秋初冬風雪季節當然不太適宜出去夜遊,旅館也建議住客盡量於4:00pm前check-in,以免夜行山路會有危險。至於喱餐晚餐食乜?其實已經寫晒在小黑板上,「本日之獻立」上寫住係有麻婆茄子,另外還有牛肉海鮮等幾味菜式,由於用日文寫,基爾已經唔係好記得詳細食了什麼,不過都算是既美味又豐富的一餐!



感覺上這間「與世隔絕」的溫泉旅館很有點隱居避世味道,房間裏沒有電視也沒有wifi(僅飯堂有一部電視),只有兩層的旅館除了?泉和咖啡室外也沒甚好逛,呆在房裏除了與友人傾偈外,無聊時就只有聽電話裏的歌和翻看幾本放在房裏的書。



因為呆在房裏實在太無野做,到走廊外的廁所擦牙洗面後(房裏不設洗手間),八點就由櫃裏拖出被鋪睡覺了。滿以為四野寂靜一片,定可一覺訓到大天光之際,點知半夜突然凍到紮醒,看看手錶原來才9時多,拿拿林起身再去搬被。唔知係咪因為突然紮醒加上搬被褥動作太急,睡回被窩時頓感心跳得利害,整個心就象懸掛在IFC天台半空中跳動一樣……



總之基爾感覺渾身都不自在,整個人既籮籮孿又彷彷彿彿似的,最慘是連丁點睡意也消失無蹤,還開始有點呼吸急速……莫非是高山反應?雖然房裏都幾凍(不知為何房裏的暖氣咁微弱),但都按耐不住要起身,無論如何都要找點事做。最衰係房裏沒電視,唯有再去翻看書架上的書。雖然不懂日文,但有幾本介紹立山風景和動植物的畫冊也影得幾靚,揭揭下總算是分散了注意力。上圖是書中的立山地圖,基爾這天由左邊虛線上的黑部湖黑部平一直上到中央的立山室堂,明天就由另一邊落山……睇完書又再睇相機,delete咁D無謂手震相之後,原來已經差不多12點,心情逐漸平服後睡意又無聲無息地回來了!

59 則留言:

  1. 冇o野做又唔浸多幾次溫泉??

    回覆刪除
    回覆
    1. 王子:唔怕浸到皺皮咩kakakaka~~~~

      刪除
    2. 本身已經皺就唔怕啦. 哈哈.

      刪除
    3. 王子:都係喎,有得賴XXXXXXD

      刪除
    4. 浸到皺皮的等一陣就好事啦!基仔太貪靚喇!

      刪除
    5. JJ:咁我諗無乜人鍾意浸到皺皮嘅XXXXD

      刪除
    6. 皺皮好呀!腦係皺皮o架!越皺越聰明呀!哈哈!

      刪除
    7. JJ:你咁鍾意咁你皺多D啦吓XXXXD

      刪除
  2. 係囉 ?! 點解唔浸多回溫泉 ?!
    不過你心跳唔係咁好, 都係休息下好. 海拔真係咁高架咩 ?
    你呢個行程, 我要 mark 低, 我真係想去好耐了.

    回覆刪除
    回覆
    1. 魚:聽人講好似食完飯係不宜浸架喎,晚飯前浸一次,第二日朝早食早餐前又浸一次,其實都已經好夠啦!
      其實都唔知關唔關事架,不過就先賴咗係高山反應啦XXD
      如果睇雪牆依家差唔多要準備留意下啦喎!

      刪除
    2. 我剛去完日本番黎... 我一晚... 浸左 4 回 !
      真係... ... 差點甩皮! =P

      刪除
    3. 魚:嘩~~~~一晚四次@@ 你都好博喎kakakaka
      會唔會浸到頭暈架?^^

      刪除
  3. 回覆
    1. Samwei:我部相機已經係影得麻麻地,友人果D部顏色靚好多!!!

      刪除
  4. 除了景靚,空氣亦一樣咁靚!

    回覆刪除
    回覆
    1. Wan:同香港比就一定係超班啦hahahaha~~~

      刪除
  5. 煙霧迷迷…搭吊車會好刺激~~~

    回覆刪除
    回覆
    1. 森:沿住山坡一路吊上山,望落都幾刺激,不過由於車廂大,在吊車裏又唔係太驚,可以四圍走影晒四面車窗外的風景!

      刪除
    2. 天氣清朗應該會影得好,但是車窗外景矇矇就......

      刪除
    3. 森:放心啦森兄,斷估應該唔會突然有個聶小倩或白素貞出來攬住森兄嘅kakakakaka

      刪除
    4. (擰晒頭)我指矇矇…即係話外面的景乜都影唔到呀!!
      你又無端端扯到被人攬…你覺得森兄似攬枕咩?!!!(再擰頭…)

      刪除
  6. 吊車有啲驚驚地,但係個onsen hotel 真係一流

    回覆刪除
    回覆
    1. MD:如果畏高都有少少驚㗎:D
      個溫泉池都幾正,可惜間房無廁所,天寒地凍要出去用公眾廁所就麻煩少少囉

      刪除
  7. 渾身不自在,可是懷疑房中有「另類」朋友?你夜媽媽騰來騰去,友人不complain嗎?

    回覆刪除
    回覆
    1. Desa:當其時又無諗過喱D嘢喎!剩係驚高山反應XXXD
      見佢好似無醒,依然係深層睡眠狀態!

      刪除
  8. 幾凍都係值得嘅,純自然景色,洗滌心靈,羨慕!

    回覆刪除
    回覆
    1. BIM:當時就覺得好凍,最好快D落山囉><
      依家睇返D相就覺得幾靚嘅
      唔駛羨慕啦,今年就去一趟^0^

      刪除
    2. 乜Gael媽無勸你小心輻射咩?我算去了幾次,其實仲有好多國家真係想去,始終人一世

      刪除
    3. BIM:梗係有,每次我都話佢知距離災區好遠^^
      我都係,仲有好多其他地方想去!
      下一站諗住去邊?

      刪除
    4. Gael媽擔心個仔係好正常嘅。日本嘅吸引在於你去唔同城市俾到你唔同玩樂感受。我未計畫下一站,不過將來好想去一次巴西及其他南美地方。

      刪除
    5. BIM:同埋治安相對上無問題囉!公共交通也方便,很完善!
      正呀巴西,南美好想去一次,不過唔識西葡文可能有點難度><

      刪除
  9. 買兩盒手信咁少咋!八點就瞓覺o拿!無聊你唔寫你個d短篇小說?

    回覆刪除
    回覆
    1. JJ:都幾大盒,我只帶了細篋無乜空位架咋!
      D短篇小說通常係要好用心寫,唔係無聊時寫架喎XXXD

      刪除
    2. 仲唔不打自招,原來你不嬲都係寫自傳!

      刪除
    3. JJ:係用心寫故仔,同自傳無關的XXD

      刪除
  10. It is natural that you could not go asleep at 8pm which is not the normal sleeping time for HK people!

    回覆刪除
    回覆
    1. Ray:果日因為日間行咗唔少路所以本來都幾累架!不過後來紮醒咗就訓唔著:D

      刪除
  11. 咁鬼凍竟然唔夠暖氣,出去斬d柴入黎燒嘛.

    回覆刪除
    回覆
    1. 毛:嘩!~~~天寒地凍冰天雪地仲要出去斬柴?!!!你估拍阿信的故事續集咩XXXD

      刪除
  12. 真係未見過咁大霧呀!~但相信又幾好玩咁喎!~
    美麗的楓葉+雪景!

    回覆刪除
    回覆
    1. Andy:嚟緊香港應該都會開始有大霧的日子了

      刪除
  13. "莫非是高山反應?"...會唔會起身去搬被時,因從暖烘烘被窩裏到冰冷處,
    身體一下子適應唔到呢?

    回覆刪除
    回覆
    1. 卡:近排在屋企都係咁從暖烘烘被窩裏到冰冷處,但又無事喎:D

      刪除
    2. 香港凍極都唔及日本(你話around 3-5度)凍喇!
      加上人在陌生環境下(尤其夜晚),會產生恐懼,突然要做粗重嘢(搬被褥),心跳和呼吸可能比平日快和急也有可能!

      刪除
    3. 卡:應該都係喱個原因(在陌生環境下(尤其夜晚),會產生恐懼)XXD

      刪除
  14. 天氣唔好真係可惜!! 我上次住室堂山莊, 一出去就四面環山, 感覺好正!!

    回覆刪除
    回覆
    1. 蜻:室堂有好多條步道,如果夏天去真係可以慢慢行下,風景幾靚的

      刪除
  15. 日本的暖氣不是好勁架咩?你又會凍醒都有。。。。可能有另類朋友經過,所以一陣寒意,特別是這種日式酒店,我都有過靈異經歷呀!

    回覆刪除
    回覆
    1. Lucamom:就係唔知點解訓訓吓好似無晒暖氣,不過其實喱間可能因為要節約能源所以暖氣都特別弱少少
      應該不會吧~~~~咁恐怖?!!!!!想知有乜靈異事件發生喎XXD

      刪除
  16. 個溫泉好正,俾我一定浸到唔捨得起身...XDDD

    回覆刪除
    回覆
    1. Momo:不過唔浸得太耐喎,會有少少暈XXXD

      刪除
  17. 立山黑部好值得去,當年去1 day trip,因為大雨delay 1日,就算兜路都要等好天先上去。

    (我用開張頭像係大觀峰影。)

    回覆刪除
    回覆
    1. Koosan:好天氣影出來係靚好多架,睇你張相就知XXXD
      如果玩晒前後山我諗兩日一夜就最爽

      刪除
  18. Gael,我好怕去好凍的地方玩.

    回覆刪除
    回覆
    1. Andrew:我都怕怕地架,below10度我會長流鼻水!

      刪除
  19. 基爾, 立山室堂町池溫泉旅館Mikurigaike-onsen,
    可以在那裡BOOK房?? 有沒有1 人房間??
    有沒有BOOKING LINK??
    THANK YOU!!

    回覆刪除
    回覆
    1. CHECK 樂天, 7 月中後無房??

      刪除
    2. 看看這個網址幫不幫到你:http://www.japanican.com/en/hotel/detail/5313554/

      刪除