2014年2月5日 星期三

新年自由蕩:上@北角+土瓜灣

新年難得有幾日假放,雖然無外遊但都諗下留港四圍蕩吧!喱晚與友人就來到北角特登搭船過土瓜灣。



基爾雖然經常路過北角碼頭,不過真正來搭船已經係廿幾年前了。原來依家搭船過海仲幾抵,只係五個幾,一於去享受一下悠閒吧!



不說不知原來依家北角碼頭已經「活化」成市政街市大廈模樣,除了有海鮮檔菜檔肉檔外仲有便利店和小食檔,搭船放工的人在這裏買菜返屋企都幾方便。



穿過碼頭街市後終於來到入閘口,才知自己無來錯地方。北角碼頭幾十年前是東區的主要碼頭,建築規模算是幾大。



單看上圖左入閘後的候船廳已可見一斑,在這裏輕輕鬆鬆等船比同人逼地鐵和塞紅隧真係舒適自在得多,如果只來往紅磡區真是不錯之選;反而渡輪就比天星細,同去南丫島坪洲之類的離島街渡差不多。



說享受悠閒一點沒誇張,現在由尖沙嘴乘天星來往中環核突點說真係放個屁就到,反而北角來往紅磡和九龍城碼頭至少可以搭三四個字,欣賞到仲比較寬廣開揚的維港景色。



搭船除了可欣賞維港兩岸靚景外,依家原來都幾多郵輪和賭船停泊在海上,可能是因為自由行多的關係吧!Anyway,閃閃生輝的維港夜色又真係幾有東方之珠的魅力……



遊了一陣船河後在九龍城碼頭登岸,基爾記憶中好似從未來過喱一區,友人帶路穿過這一帶舊區,路經海心公園,還有上圖右這處曾是變形金剛的拍攝場地。咁山長水遠其實係為了來幫襯喱間星馬菜餐廳「檳城小屋」。



友人之前話畀基爾知,開飯網對喱間餐廳的食評非常有「娛樂性」,反正佢好快執笠,一於去探險。去到果然老闆娘非常「有個性」,似乎不愁生意的樣子;若單以菜式論,又似乎比預期中好(可能是因事先看過O.R.而自動down grade了期望吧)!話明是以蝦麵出名,當然先叫了一碗,可能由於等得太耐比較肚餓,味道算是水準之上;再叫了上圖右的三味菜式:特色墨魚卷、炒貴刁和牛肉雞肉沙嗲串燒,平心而論味真算不俗喎!意外驚喜還有上圖左的肉骨茶,其實基爾向來幾怕它的藥材味,不過喱窩明顯是港式「改良版」肉味比藥味濃得多。本來已經相當飽,依然叫了鎮店的斑蘭架央多士做甜品,甜甜地且食得出斑蘭味,最後再加一杯薄荷味濃的凍啡,埋單人均$120,只要唔計較老闆娘的性格巨星本色,其實都不妨一試!



檳城小屋 Little Penang House
紅磡崇潔街20號地下

61 則留言:

  1. 我都唔知道原來北角有個碼頭,下次去睇下先

    回覆刪除
  2. 真的大鄉里,我都未去這北角碼頭呢。。。。

    回覆刪除
    回覆
    1. lucamom:下次回來帶大小豆去搭下船囉^^

      刪除
  3. 有d人做生意真係唔憂做咁,俾面色客人睇架。

    回覆刪除
    回覆
    1. manman:所以咪話佢係性格巨星囉kakakaka

      刪除
  4. 回覆
    1. 王子:係呀~~~XX都要抖下氣嘛XXXXD

      刪除
    2. 基仔食飯要唔要抖氣?

      刪除
    3. JJ:梗係要啦唔通你係閉氣食飯㗎咩XXD

      刪除
    4. 個日我諗尼諗去究竟XX係咩野呢!衣家記得返喇!哈哈!
      所以個日我問吓你,刺激吓我的記憶啫!呵呵!

      刪除
  5. 去北角碼頭,已經係上個世紀嘅事!

    回覆刪除
    回覆
    1. 摩:咁得閒要來搭下船唱返首昨夜的渡輪上來聽下啦XXXD

      刪除
  6. 咯講真係唔知可以由北到土那邊

    回覆刪除
    回覆
    1. Yan:北角碼頭仲有渡輪服務往返紅磡同九龍城碼頭架!

      刪除
  7. 以前有汽車渡輪由九龍城去北角

    回覆刪除
    回覆
    1. King:依家汽車渡輪好似只來往北角和觀塘,有機會不妨去回味下~~~

      刪除
    2. 現在香港已經無汽車渡輪,D船賣晒去東南亞如馬來西亞

      刪除
    3. 基哥乜觀塘有汽車渡輪去北角咩??以前觀塘有去西灣河嘅汽車渡輪,上面果層坐人下面果層係車,以前係常客,唔知仲有冇,有嘅話下次去懷緬下:)

      刪除
    4. King:北角至觀塘好似仲有呀,用來運載危險品車輛,因為佢地唔可以行海隧的!
      係呀之前都見有blog友在泰國柬埔寨影到前香港汽車渡輪好有親切感^^

      刪除
    5. BK:西灣河應該無汽車渡輪了,但仲有去東龍島的渡輪!
      之前睇其他Blog友話好多汽車渡輪都賣咗去東南亞國家,下次去星馬泰柬要留意下^^

      刪除
  8. 北角碼頭仲有船搭架咩?真喺唔知喎!
    揾日搭船去吓紅磡先!

    回覆刪除
    回覆
    1. 卡:梗係有啦!西灣河碼頭仲有船去東龍島和鯉魚門架!

      刪除
  9. 基仔你搭天星小輪時會放屁咩?.......kaka......

    回覆刪除
    回覆
    1. JJ:只係一個比喻來啫,你唔係睇唔出呀~~~~~XXXD

      刪除
    2. 揾d咁野來比喻!你潛意識反映日常習慣。kaka..

      刪除
    3. JJ:你原來係心理學家XXXD

      刪除
    4. JJ:鄭子誠咩!!!咁多陰謀?

      刪除
  10. 我返親香港都會坐天星過海,欣賞維港夜景。

    回覆刪除
    回覆
    1. Samwei:其實香港政府真係要重新計劃過渡輪發展,咁紅隧又唔駛咁塞,金鐘過海地鐵又唔駛超逼人啦!

      刪除
  11. 就算在香港, 都有很多地道的菜式要迎合港人的口味, 都會改變少少…

    回覆刪除
    回覆
    1. 森:係呀,因為要做香港人生意,始終都要迎合大眾顧客口味,如果想食最地道的就去外國當地食囉,反正香港人咁鍾意旅行~~~:D

      刪除
    2. 乜gael兄畀老闆娘吋咩??!畀著森伯都唔會再去幫襯啦!唔怪得就黎執笠~
      食物質素固然重要,但服務態度都同樣重要~

      刪除
    3. 森:你去openrice search下就知間野有幾利害架啦kakakakaka

      刪除
  12. 有時係...有本事先串得起...老闆娘應該係幾本事嘅人...XDD

    回覆刪除
    回覆
    1. momo:平心而論味道真的不算差,佢「語氣」係重啲,但都係直接講明你知一定要等好耐先有得食XXXD

      刪除
  13. 有機會過來吉隆坡,我带你哋去食正宗大馬菜喇~ Whoahahahahaha!

    回覆刪除
    回覆
    1. joice:睇過殷生殷太個trip非常正^^雖然暫未有機會來但先多謝定你先kakakaka

      刪除
  14. 咁樣坐船都幾箋,坐成幾個字,你咪要放好多氣至到^^

    回覆刪除
    回覆
    1. 以前在北角返學,都會經過碼頭,但返黎香港多年都唔知碼頭仲响度,好在你介紹下

      刪除
    2. BIM:唔駛擔心,食多啲高纖蔬果就唔會架啦kakakakakakaka
      Really~~~原來你更是北角地膽!!!!!一定比我更熟悉吧

      刪除
    3. 邊係地膽呀,宜家去得最多都係英皇道新光華豐嗰頭,對新界人嚟講太遠啦

      刪除
    4. BIM:係呀其實我都覺得好遠XXXD

      刪除
  15. 真係一向好少去土瓜灣,因為冇地鐵。

    回覆刪除
  16. Gael,通常好食的餐廳老闆一般郡好有性格.

    回覆刪除
    回覆
    1. Gael:依家生意難做,但佢仍保持到有性格的待客服務先勁呢kakakakaka

      刪除
  17. 下次我都搭吓先,我怕好快停航!

    回覆刪除
    回覆
    1. Silver:我諗仲有幾年,如果土瓜灣紅磡的沙中線地鐵開通就多數停航了!

      刪除
  18. 有時都會係北角坐船去觀塘,5蚊就搞掂,唔迫之餘仲平靚正~

    回覆刪除
    回覆
    1. Matthew:依家無去觀塘啦,剩返九龍城和紅磡碼頭線咋!

      刪除
  19. < 天星來往中環核突點說 ....... > kakaka 好攪笑呀 !
    我仲以為北角碼頭已停用咗了 .
    老闆娘可能諗住就快結業 , 所以態度差 .

    回覆刪除
    回覆
    1. ak:真係椅都未坐暖就落船架啦,你唔覺咩XXXD
      北角我諗可以維持多兩三年嘅~~~~
      都未必關結業事,我睇OR好多人話幾年前佢地已經係咁有性格:D

      刪除
  20. 你呢條路線, 都幾冷門喎 ! =)

    回覆刪除
  21. 北角碼頭也是買海鮮的地方。 以為沒有渡輪添。

    回覆刪除
    回覆
    1. 樂:仲有船去九龍城碼頭和紅磡碼頭的呢:D

      刪除