2014年6月26日 星期四

香港大學校友會@中環

之前聽友人講喱間HKUAA會所飯堂唔錯,但由於是members only,要先入紙申請個alumni會籍。結果搞來搞去又要補交資料,等了成個月先搞掂,喱晚約齊腳終於可以去試下。



HKUAA位於中環心臟地帶,見到Coach大招牌沿德己立街行上去不遠見到隱沒在鬧市裏的小招牌。



上到會所飯堂由於係位於商業大廈內,地方沒有一般酒樓大,感覺介乎傳統酒樓與私房菜格局之間,由於台數不多,之前試過早一個月預訂紅字日子也爆滿,閒日可能會好一點。



除了要訂台之外,部份菜式也要先預訂,上圖兩款是毋須預訂的金銀蛋莧菜($100)和粟米班塊。其實看menu見價錢一點不便宜,幸而味道算是ok。



由於事先已看了網上食評做定功課,上圖喱味菜膽杏汁白肺湯($120)說是這裏必點菜式之選,味道也是中規中矩沒想像中咁大驚喜,也可能由於冷氣勁關係,湯稍嫌不夠熱令它打了折扣!



訂台時要先預訂三味菜式,包括上圖的喱味鳳尾蝦多士,雖然份量稍嫌少但夠香脆新鮮熱辣又不覺油膩,難怪網評說是必點「招牌菜」,果然沒令人失望。



這次沒叫白飯,因為之前已預訂了上面喱個貌似糯米雞的荷葉飯,份量非常夠,足6個人食。由於是用荷葉包飯蒸所以飯裏也充滿了荷葉香味。可能基爾食慣清淡,若荷葉飯的調味輕手少少更佳。



再來就是上面這味菠蘿咕嚕肉($100),基爾其實向來出街食飯都極少點喱味,因為家裏的基爾媽煮得太好味,街外吃的咕嚕肉一般都唔好食又多色素。不過HKUAA喱度又煮得唔錯喎,拍得住屋企的味道。



本來想預訂古法鹽焗雞但訂台部阿姐話冇(冇解釋原因),話炸子雞其實都一樣(真係?!!),咁求其啦訂半隻炸子雞,雖然「鹽焗」變了「炸子」但雞本身的味道和肉質都唔錯。埋單計人均$190又唔係想像中咁貴,而且唔駛限時限刻交台,想雞啄唔斷傾足成晚兼嘆冷氣也不用怕被趕走,如果是搞gathering也是個不錯的落腳地。

香港大學校友會 Hong Kong University Alumni Association
中環德己立街2號業豐大廈101室

34 則留言:

  1. 金銀蛋莧菜收一佰,白肺湯百二,緊係叫白肺湯啦。

    基爾媽煮的咕嚕肉,我都想試喎。XD

    回覆刪除
    回覆
    1. Koosan:不過今時今日物價飛漲,去一般茶樓酒家食餐晚飯叫一個普通炒菜都要成七八十蚊了,我覺得其實都幾唔抵架!不過有時成台肉如果唔叫個菜又好似好唔健康^^
      白肺湯由於工序繁複,自家整比較麻煩,都係出街食算,喱間則是招牌菜,我見好多人去親都點喱味!
      其實依家屋企都已經比較少整咕嚕肉,一來因為屋企人唔多食唔晒,二來炸完之後成大鑊油唔知點樣安置,倒了似乎太浪費又唔環保,留下來又擺唔得太耐~~~~不過大時大節間中仲會整下,基爾都會幫手做二廚兼偷師,下次如果整就試下post上blog^^

      刪除
  2. 係喎,我有荷葉可以整荷葉飯.

    回覆刪除
    回覆
    1. 王子:如果有剩仲可以整埋糯米雞添架^^

      刪除
  3. 如果坐得舒服食物大致又OK,都係一個舊生聚腳好地方。價錢ok可接受。

    回覆刪除
    回覆
    1. BIM:咦,咁耐唔見現身,工作很忙吧^^
      果日六點去到唔多人,但後來七點幾已經坐滿晒,都算旺場嘅!價錢就中上啦,唔算特別抵食!加上其實比較遠離基爾屋企,暫時都唔再去幫襯啦!

      刪除
  4. 我都黎過一次,覺得個湯幾好!

    回覆刪除
    回覆
    1. 摩:阿摩原來係小師弟^^

      刪除
    2. 我是拉車邊去的!我不學無術,香港最高學府,豈容我高攀!

      刪除
    3. 摩:阿摩又怎會是不學無術,未免太謙了吧

      刪除
  5. 金銀蛋莧菜收($100)太貴喇 (食材好平夾不難煮喎)!
    菜膽杏汁白肺湯($120)抵D (起碼難煮D)

    回覆刪除
  6. 見唔到Coach大招牌,只見到翠華。樣樣都要訂,是私房菜啦。

    回覆刪除
    回覆
    1. Samwei:街口一出地鐵站就見到,不過我無影啫^^
      有兩三味工序比較煩的菜式要先預訂架
      我諗又唔算係私房菜,因為顧客都仲有點菜權力,唔算係廚師煮乜就食乜果隻

      刪除
  7. 幾款小菜唔錯, 個杏汁白肺湯好似忌廉濃雞湯...你地校友有冇優惠??!!

    回覆刪除
    回覆
    1. 森:但又唔算太濃太杰果隻喎!~~~~味道係唔錯嘅,不過如果可以再熱啲更好味!
      無架,不過要入咗會先可以訂台,同埋好似東亞卡係有折但我無!

      刪除
  8. 炸子雞同鹽焗雞是兩種做法,炸子雞不能當鹽焗雞吧!

    回覆刪除
    回覆
    1. Wan:當然不可,不過佢話係用同一種雞做,信不信由你^^

      刪除
  9. This restaurant is quite good especially the pork lung soup.

    回覆刪除
  10. 金銀蛋莧菜制作簡單要$100 , 我情願食工序多而麻煩的菜膽杏汁白肺湯 .

    回覆刪除
    回覆
    1. ak:係呀如果自家要整豬肺湯實在太煩,都係出街食算

      刪除
  11. I like the lotus leaf with rice, can almost smell the fragrance from your photo XD !

    回覆刪除
  12. 菜膽杏汁白肺湯/味菠蘿咕嚕肉,睇落唔錯,+好味道!~不果價錢貴左少少!

    回覆刪除
    回覆
    1. Andy:係呀,個別菜式都幾貴,好彩味道仲算係ok嘅

      刪除
  13. 想食呢間野, 睇黎要動用到朋友網絡了 =)

    回覆刪除
    回覆
    1. 魚:你應該都識唔少校友吧^^
      唔知lunch抵唔抵?晚飯就一般啦!

      刪除