2014年9月13日 星期六

札幌拉麵@尖沙嘴

喱排唔係太得閒積存唔少野要補寫返,例如上個月就去了趟紅館睇女排,現場睇雖然無旁述而且距離遠幸好氣氛唔錯,六點幾打完頒埋獎就返出尖東醫肚。



由於要等埋友人收工,就在加連威老道行陣,好耐無行喱條街但其實都無乜野好買,純粹齋行kill time而已。之前聽人講話嘉蘭圍有間老牌日本拉麵店不錯,反正就在這附近姑且去一試吧!



雖然是周日晚但店裏不多人,門口簡單揭過menu價錢不算貴,反正逛街逛得累了先入去坐坐。在卡位坐低後店員推介2人set dinner,真係沙律前菜餃子串燒粉麵飯大包圍乜都有,懶諗就叫喱個set吧!



套餐裏的拉麵預了不會太大碗,不過來到上台時發現也不算太蚊型,是標準的中型size,賣相雖然有點「行」但味道不算差,有叉燒有紫菜有菇,且湯底也不俗比味千的高一班!



前菜有蟹籽和薯仔沙律選擇,另外還有煎餃、牛油炒草菇和蒜片雪花牛柳,每樣份量都不算多但味道俱佳。可能由於人客不多,師傅似乎只serve基爾一台客而已,即叫即整味道自然加了分。



之前聽聞友人說這店的師傅確來自日本,已在港住了十幾年。由於基爾坐的卡位就在開房式廚桌旁,果真很有點在日本小店吃爐端燒的感覺,一面吃一面欣賞師傅在廚房裏熟練地煮野食原來也是一種享受。主菜除了拉麵和炒飯之外仲有中碗的饅魚飯,開始有少少懷疑如果是男女情侶拍拖撐台腳的話是否食得晒?!幸好饅魚飯本身也幾好味,即使已經飽飽地都一樣食得落。



講開喱類日式拉麵小店似乎多數唔興甜品,即使有都係雪米滋三兩粒之類,喱間的set dinner也無甜品,但仍有啤酒、果汁酒和汽水3款飲品供應,店員話果汁酒只有4度比啤酒還低,就信佢啦!果汁酒有三種口味:白桃、荔枝和巨峰提,基爾3種都想試所以全都叫晒!初頭都驚會太甜又或者似藥水,但飲落完全唔會過甜,就如加了淡味啤酒的果汁,基爾偏好白桃味的一罐,初初飲由於易入口幾乎當了是果汁咁飲,但大半罐後竟然開始有點暈暈地……懷疑酒精係咪真係只得4度咁少呢!



p.s.順帶搭單講埋喱排在759買的朱古力,睇包裝背後才知原來是奧地利的朱古力廠出品(無睇錯的話生產線是在波蘭),由於只係幾蚊貨仔初頭只是抱住姑且一試的心態,但食落cappuccino的味道確實幾香濃幼滑,絕對是物超所值之選,隔幾日想再去買已經無貨!

札幌拉麵 Sapporo Ramen Miso No.1
尖沙嘴加連威老道嘉蘭圍22號地下

81 則留言:

  1. 睇人地打排球就當運動完擦大餐喇!你張相頭有用喇用尼激勵自己減肥囉!kaka...

    回覆刪除
  2. JJ:喱餐好細架咋,少食多滋味!!
    都係咁上下啦無乜激勵作用kakakaka......

    回覆刪除
    回覆
    1. 你落左樓下答話呀!kaka..

      刪除
    2. JJ:搞錯咗落咗樓下XXXD

      刪除
    3. 唔個拉麵,又食成個禮拜喇!阿食探sir!kaka...

      刪除
    4. JJ:咁等我又諗下寫啲咩慳水慳力野先kakakakaka.....

      刪除
    5. 你一早公告天下喇!你的粉絲個個都知。

      刪除
    6. 有靚嘅又有唔靚嘅!呵呵!

      刪除
    7. JJ:連靚唔靚你都知咁勁?!!XXD

      刪除
  3. 獨食二人餐?唔知你原來都幾大胃 :D

    回覆刪除
    回覆
    1. Joice:梗係唔係啦一人邊食得晒XXD

      刪除
  4. 以前去個頭, 多數都係食韓國野

    回覆刪除
    回覆
    1. mo:依家果頭都仲有好多韓菜架

      刪除
  5. 我都恨去睇女排,現場睇一定嘭嘭聲~
    白桃味通常都好飲^^

    回覆刪除
    回覆
    1. 殷:係呀現場睇聽到嘭嘭聲特別high啲架XXD
      白桃通常比較穩陣,唔會太難入口

      刪除
  6. 套餐不錯!果子酒,我不會噶巨峰,感覺上味道很怪!

    回覆刪除
    回覆
    1. 摩:好似乜都有,所有野都試晒XXD
      初時都驚似藥水味,但飲落清清地,提子味不會太濃太甜,比想像中好味

      刪除
  7. 日式拉麵重湯底,如果湯底真材實料,咁貴的都抵!

    回覆刪除
    回覆
    1. stella:係呀其實依家味千都唔算平啦

      刪除
  8. 咁多嘢我一定食唔哂!
    果酒4度都咁勁,要試下~~

    回覆刪除
    回覆
    1. 路霸:叫多幾個friend去撐台腳咪食得晒囉^^
      可能我酒量太淺,你應該完全無問題啦XXD

      刪除
  9. 不算太蚊型: 係咪你用咗美色呢??
    Maître Truffout呢個品牌唔係好識

    回覆刪除
    回覆
    1. 王子:如果係咁王子去到一定畀個king size你kakakakaka....
      之後仲買咗espresso同薄荷兩種味,espresso真係濃到有少少苦澀,如果愛飲espresso的人應該都會鍾意

      刪除
  10. 路過都可以試試,埋單要幾銀呢?!

    回覆刪除
    回覆
    1. wan:記憶中應該係四百幾.....
      係喎原來我上面唔記得寫:P

      刪除
  11. 回覆
    1. mandu:梗係唔係啦你估我係小林尊咩XXXD

      刪除
  12. 回覆
    1. samwei:睇架,如果不是返工忙的話通常都去睇!

      刪除
  13. 我總覺得咩味咩味的包裝食品...會落人工添加味...

    回覆刪除
    回覆
    1. 森:通常多多少少都有,我就唔信佢真係用巨峰或者桃加入去釀啤酒XXD
      不過我諗如果唔係長期日日當水飲應該都無乜大問題嘅~~~

      刪除
  14. 十幾年前都去過紅館現場睇排球,氣氛好好,但可惜打得太快,好多時候都未睇到點打已落地,所以都係覺得睇電視好D.哈哈!

    回覆刪除
    回覆
    1. ai:現場睇其實坐得好遠睇唔真邊個打邊個,電視closeup啲又有旁述就清楚好多
      不過現場睇有氣氛,又可以睇到啲球員走位和戰術,都幾得意嘅

      刪除
  15. 我好少出街食, 拉麵我都喺自己煮的多, 看來又真喺唔錯, 謝謝介紹呀!

    回覆刪除
    回覆
    1. candy:今時今日屋企自己煮有健康保證啲XXXD

      刪除
  16. 2人set dinner 好似都幾多嘢食喎!

    回覆刪除
    回覆
    1. Kaka:如果係兩位細食女士我諗未必食得晒架XXD

      刪除
  17. 呢間我都食過, 佢個二人餐真係好鬼豐富, 而且以尖沙咀黎講, 價格真係相宜.

    回覆刪除
    回覆
    1. 魚:佢轉咗入橫巷可能比較隱閉啲,舖租無咁貴啦^^

      刪除
  18. 那排朱古力好似勁吸引!
    您酒不醉人,人自醉!哈哈哈

    回覆刪除
    回覆
    1. 說:cappuccino喱隻最好食^^
      咁都畀你估到~~~XXD

      刪除
  19. 好似好正咁bor XD
    我都好想係香港食到呢啲咁正既拉麵,自從係味千食過難食到暈既拉麵之後都好少食...

    回覆刪除
    回覆
    1. matthew:味千唔好食呀有坑渠油><

      刪除
  20. 呢間拉麵唔錯㗎,食咗好多年(不過食得好疏)。。。多謝你提我再去食,哈哈~

    回覆刪除
    回覆
    1. bugs:係呀聽人講過係老字號,以前同橫綱一樣出名的呢
      可能舖位較隱閉所以都唔算太旺場,唔駛排長龍等位^^

      刪除
  21. 呢幾款(果汁酒)我都有飲過~味道確實唔錯~
    荔枝味道特別好飲!

    回覆刪除
    回覆
    1. andy:係呀飲落都幾fresh,清清地唔係太似酒,所以會唔覺飲多咗會醉XXD

      刪除
  22. 大半罐後竟然開始有點暈暈地 :P 看到这个我偷笑...
    每次看你的文我的广东话又进步一点点:P

    回覆刪除
    回覆
    1. siawlife:咁就要睇多啲練習一下XXD

      刪除
    2. 这是真的...
      看多点越看越顺, 不过要我打字出来回复你还是难度重重 :P

      刪除
    3. siawlife:咁打得多就熟得生巧啦^^
      其實打英文也懂看,但當然寫中文傳神一點吧

      刪除
    4. 雖然廣東話和繁體中文的字一樣... 但是要打出來廣東話真的好難... = =

      "唔色"啊... :P 哈哈... 我要表達"不會"但是我知道那個"唔色"的"色"應該是錯的! haha​​ha

      刪除
    5. siawlife:星馬不少華人的廣東話也蠻不錯的呢^^
      看得多就懂了XXD
      應是「唔識」,快交學費kakakakaka!!!!

      刪除
    6. 必須看是什麼籍貫, 有客家人,福建人,廣東人,潮洲人...
      各有自家方言...
      我會聽會看, 會說但不流利, 這都是小學中學時期看港劇學會的...
      不過寫就真的 "唔識" :P

      刪除
    7. siawlife:所以說馬來西亞真是個特別的國家,似乎很多中國方言都通行似的^^
      相信現在看港劇係咪比以前已經方便好多?!!不用經常去租錄影帶,可以在網上看了吧

      刪除
    8. 真係方便好多 :P

      用個"hk TV shows" 的apps 就可以快速線上看! 最近臥底熱, 在猛追使徒行者...上星期五凌晨看第25集, 哭慘我!

      刪除
    9. siawlife:反而我無乜點追使徒,但有間中看大藥坊:P

      刪除
  23. 看來奧地利的朱古力 !? 吸引 Sky 多 D 吖^^

    回覆刪除
    回覆
    1. sky:真係幾好味架,下次行過759不妨買來試下^^

      刪除
  24. 係香港拉麵既份量係咁上下了⋯
    朱古力!!! 一定要試試先~ 但你話物超所值無講幾錢噃!

    回覆刪除
    回覆
    1. 銀:依家我見味千果啲都唔係太大碗,多數都將貨就價><
      係喎,漏咗講!!! 我果日去買有七折,大約只係五個幾一排,一排好似有七、八條嘅!

      刪除
    2. 嘩! 朱古力咁抵!
      你講味精拉麵不嬲都唔大碗啦⋯ 我早前去台灣食一碗拉麵真係好大碗,D料足到呢! 我咁大食都食到好鬼飽呀! 但舖名就唔記得⋯
      你成日去日本都覺得人地D料足D啦,係咪? 我既記憶只停留於14年前既日本⋯

      刪除
    3. 銀:係呀有七折好抵,都超多人去買的
      台灣我諗至少份量足,下次叫埋港女去share食咪得囉^^
      嘩~~~~~成十四年無去過?!!!一於渡蜜月時去下啦!!

      刪除
  25. 全部都想食。。。。可惜這樣小店都唔鍾意招呼有小朋友的家庭。。。。

    回覆刪除
    回覆
    1. lucamom:佢啲卡位都幾闊偌,我諗有小朋友應該都無大問題吧

      刪除
  26. 759有隻芝士朱古力好好味, 不過又係成日無貨!!

    回覆刪除
    回覆
    1. 蜻:芝士朱古力?!!@@咁係咪咸架呢?

      刪除
  27. 我最有興趣係包朱古力 , 等我都去買包試試先 , 唔該哂 !

    回覆刪除
    回覆
    1. ak:不過佢都唔係成日有貨架,都係間中先得見

      刪除
  28. 很難差得過味千,哈哈。

    回覆刪除
    回覆
    1. teddy:只係用一個比較多人食過的去做比較標準而已kakakaka

      刪除