2014年9月29日 星期一

興記@屯門

記憶中都有4-5年無去過屯門了,三聖村更是從來無去過。喱個周未友人話去開餐,雖然基爾碰正長周要返工但都一於奉陪,索性早少少收工蛇出去。



基爾的mental map裏對三聖村是一片空白,也不知搭乜車去,原本check過諗住金鐘轉962最唔駛搵路,不過友人話搭東涌線到青衣城再轉140M綠van更快……平時久居深山的基爾其實連青衣城都N年無去過!



結果由公司收工到正式抵達三聖村都用了成個半鐘,主要係等140M都幾耐……Anyway,總結途上的3個發現:1.青山公路沿途日落景真係幾靚;2.黃金海岸真係有錢人的家;3.上圖的青山灣海岸風景都唔錯喎!



三聖村其實都幾有八十年代公共屋村的味道,基爾曾住過喱類屋村好多年,其中地標設施就是這類冬菇亭式的大排檔,以前多數係粥檔或賣粉麵飯的小食亭,而且多數無冷氣吹大牛角扇,依家就多數組合改建成冷氣開放式小酒家,喱間興記就以食海鮮出名。



由於友人早到已經去了街市買晒海鮮,「來料加工」都按斤計算,醬料茶芥當然又另計。最先上台的是白灼蝦和花螺,驚問友人D蝦係咪好貴,竟然買咁細隻蝦毛?!



對比起來,這碟椒鹽瀨尿蝦就好巨型好對辦,每隻都足有10寸咁長,非常好肉地,不過搣起殼來有少少論盡!



店員話驚order太多食唔晒只提議叫半隻燒鵝,上到台其實份量都唔少,而且味道好過之前去深井食的。另外還有基爾最愛的扇貝和蟶子,全部都大大碟,味道俱佳。



最後還要一提是這味鹽焗蟹,為了小食多滋味就兩人一隻,由於已預先剪開非常方便,裏面金黃色蟹膏食落似蛋黃,味道好正但當然膽固醇也勁高,所以還是淺嘗半隻為佳吧!



整體而言這餐以人均$350計不算平也不算太貴,菜式則是average水平,不過由於對基爾來說實在太山長水遠,暫未有機會再encore了。食完後大伙兒再坐61M出葵芳……



唔搭過都唔知61M真係似架「觀光巴士」,由三聖村搭出葵芳連等車足足成個鐘,真係耐過飛台灣!特登出新都會係因為友人請食甜品,不過由於已近打烊時段似乎無乜選擇,最後只揀了Delifrance,原來佢個雪糕心太軟和香蕉士多啤梨雪糕crepe都唔錯呢!

興記 Hing Kee
屯門三聖村熟食亭地下2號舖

60 則留言:

  1. 屯門有幾個海灘欣賞日落都唔錯架!

    回覆刪除
    回覆
    1. wan:風景靚但水質差,這是最可惜的呢

      刪除
  2. 森伯真係恨唔到咁多...公司放早一兩分鐘都畀人問長問短~~Gael兄一話蛇出去就即刻可以蛇出去~~相信Gael兄一定身居要職!!

    回覆刪除
    回覆
    1. 森:就係因為係可有可無的small potato先得啫~~~~高層分分鐘影響大局反而唔可以架

      刪除
  3. 只要有靚海鮮食,搭耐D車都值。其實三聖嗰頭D海鮮都好正,唔駛下下入西貢或鯉魚門嘅

    回覆刪除
    回覆
    1. BIM:不過對我來說西貢那邊近D喎 XXD

      刪除
    2. I see. 但總覺西貢近年食海鮮好貴!不過環境的確幾唔錯

      刪除
    3. BIM:兩三年前去布袋澳我覺得都ok嘅,西貢碼頭果邊就一定貴啦,賺遊客生意吧

      刪除
  4. 好想吃那盤鹽焗蟹, 我最愛吃螃蟹!

    回覆刪除
    回覆
    1. siawlife:連我本身唔太愛食蟹,都覺得喱隻蟹唔錯呢^^

      刪除
  5. 回覆
    1. md:直情over晒,之後幾餐要食少啲XXD

      刪除
  6. 要去個度食, 都要好有耐性

    回覆刪除
    回覆
    1. ahmo:你講搭車?係呀都幾遠水路架我覺得^^

      刪除
  7. 屯門,都好多世紀沒有去過。
    靚燒鵝難遇,有機會要去試下先。

    回覆刪除
    回覆
    1. 說:唔係住果邊真係覺得幾遠!!
      可能之前去深井食名氣大又期望過高了吧^^

      刪除
  8. 哈哈,呢個我地頭呀!可能已經習慣了,所以每次外出都會預定坐車時間。
    其實交通都幾方便架,你少入來唔知,現在有轉車站,好多時我坐車去轉車站轉車去老尖都不用一個鐘!
    住得TM,兩個鐘來回真係預左:)

    回覆刪除
    回覆
    1. lucamom:係呀依家有轉車站已經好好多,反而坐西鐵要兜大圈
      回來時有冇帶大小豆去沙灘玩下?佢地在外國係咪好少機會去沙灘游水玩沙?

      刪除
  9. 果然高層話閃就閃
    青衣橋黃昏景相當唔錯
    黃金海岸住入去出入都似旅行咁-_-#
    鹽焗蟹之麻,使乜行咁遠去食呀ˊ_>ˋ

    回覆刪除
    回覆
    1. 毛:掃地先可以話閃就閃先真,高層如你下下幾億上落周身唔得閒邊會咁易閃kakakaka
      青衣橋車來車往喎,荃灣碼頭果邊會唔會好D
      如果有私家車和司機車出車入我就覺得完全無問題嘅XXXD
      對於連食蟹都嫌麻煩的人來說,好難自己整喎:P

      刪除
  10. 久居深山>> 唔好用d四字詞扮高深,其實咪即係 宅男二字. kakakaka

    回覆刪除
    回覆
    1. 王子:相對起你咁outgoing成日周圍去來說,我直情係超級無敵宅果隻啦kakakakakaka

      刪除
    2. 兩位澤男唔好互讚啦!
      呵!而且又係食家添喎!kaka..

      刪除
    3. JJ:如果同你比較,你簡直係超級蒲精添啦XXXD

      刪除
    4. 誤導自己有益咩!或者係另類整容法,你想口大食四方,你得左喇!

      刪除
  11. 我今次返香港先第一次去屯門,由沙田去,沿途海景好靚。

    回覆刪除
    回覆
    1. samwei:搭263入去都方便嘅
      係呀青山公路和屯門公路風景都不錯,日落也很美^^

      刪除
  12. 我都少到屯門、天水圍一帶,深井燒鵝吃得到靚,要撞運氣啊!

    回覆刪除
    回覆
    1. stella:依家有西鐵其實已經方便咗好多了^^
      係呀我覺得唔駛一定要慕名入去食囉,一來又山長水遠呢

      刪除
  13. 其實我未坐過輕鐵,屯門真喺好耐未去過。
    上次屋企人外賣返嚟嘅深井燒鵝都仲熱熱哋,幾好食喎!
    椒鹽瀨尿蝦好味,扇貝和蟶子好少食 !

    回覆刪除
    回覆
    1. kaka:反正有兩天紅字假,就入去試下坐輕鐵吧!還可以順道遊濕地公園^^
      可能我本身都唔係特別愛食燒鵝所以就唔覺特別好食囉
      扇貝蟶子啖啖肉都幾好食架,用鼓椒和蒜蓉䒱好好味

      刪除
    2. 濕地公園去過兩次喇!

      刪除
    3. kaka:秋天去多雀睇嘛^^

      刪除
  14. I also want to try seafood there but afraid of long travel.

    回覆刪除
    回覆
    1. ray:有空就去試一次啦!當係去郊遊也無不可^^

      刪除
  15. 之前都跟友人去過食海鮮……都唔知路線怎樣!?但原來海鮮檔後面就係沙灘,仲可以bbq添……

    回覆刪除
    回覆
    1. 小妹:你友人識路就得啦hahaha^^
      有呀其實三聖村個海景幾靚架,如果依家才起樓,一定係超級豪宅區地段XXD

      刪除
  16. 椒鹽瀨尿蝦好大隻呀 , 引 C 人 .

    回覆刪除
    回覆
    1. ak:我都係第一次食咁大隻瀨尿蝦,食完已經好飽XXD

      刪除
  17. 哈哈~ 我住屯門,其實962係最方便的

    回覆刪除
    回覆
    1. 銀:absolutely~~~~!!!
      我本來都係諗住搭962最方便,唔駛轉車轉來轉去,不過友人又話青衣搭140M快,點知等車等好鬼耐><

      刪除
  18. Hi Gael,

    終於比我搵到你喇!原來好耐之前你有留過言比我,我今日先至見到。:P 今次仲比我見到毛豆同BIM都有係你個卜到留言,等我陣間去探埋佢地先!唔知佢地仲記唔記得我呢…哈哈…

    雖然我住元朗,但屯門真係好少去。耳聞三聖村已久,等我有機會就過去試下呢間興記先。

    回覆刪除
    回覆
    1. stewart:hey~~!longtimenosee^^
      我仲以為yahoo之後你已經唔再寫,anyway等我都bookmark返你先啦!搬blog真係令好多人失散了^^
      係呀你都可以去搵下毛豆BIM喱啲老blog友,仲有聯絡嘅

      刪除
  19. 估唔到咁遠嘅地方,你地都黎呀!個半鐘已經算係OK快喇。一般出港島,都預兩個鐘,怕塞車之類……

    回覆刪除
    回覆
    1. 米:屯門依家算係好咗好多,仲有火車到,十幾廿年前仲慘,屯門公路一大塞車就無掟走添呀><

      刪除
    2. 我都係隱居此區幾年啫……

      刪除
    3. 我住果區係喺貧窮區……可惜……

      刪除
    4. 米:但個view靚咪得囉^^

      刪除
  20. 我從來無去哩度,雖然我好近個度,
    食海鮮我麻麻~

    回覆刪除
    回覆
    1. 路霸:我覺得果度居住環境真係好正,只要唔係日日都要出市區返工返學就好理想了kakakaka

      刪除
  21. 回覆
    1. 摩:連本來麻麻地鍾意食蟹的,都覺得幾唔錯架^^

      刪除
  22. 好早期前去食海鮮邊到有(來料加工費)呢會事架~!~
    宜加個個都要(來料加工費),同養緊佢啲伙記無分別!
    啲海鮮好正下喎~掂!

    回覆刪除
    回覆
    1. andy:來料加工有個好處係可以真正自己想食邊樣揀邊樣囉,在街市見到新鮮的才買
      下次你地去開青山灣那邊落水,不妨也去試試吧

      刪除
  23. Gael,我也很久沒有到這裏食海鮮.

    回覆刪除
    回覆
    1. Andrew:環境其實幾唔錯,不過對我來說就遠少少啦^^

      刪除