2014年12月2日 星期二

俄羅斯皇村瑰寶@歷史博物館

一年容易又來到十二月,翻查網誌才發現原來今年「巡館」似乎有點懶,看的5個展覽其實也不算太特別令人有深刻印象,幸而來到年底有這個俄羅斯皇村瑰寶展覽「標尾會」,基爾當然不會錯過。



去過歐洲那些乜宮物宮博物院藝術館之類都知,佢地入場費通常都幾貴,但咁遠水路一場去到當然都無奈地甘願被宰。故此喱類「來路貨」每次有機會來港展出,基爾都盡可能抽空去見識下(反正有時親身去到外國都未必一定睇到,因為可能會撞正閉館閉宮維修)。



今次展出的皇村珍寶來自聖彼德堡的Tsarskoye Selo State Museum,應該唔少人都有去過,這次歷史博物館搞展覽就連大門口都裝修成皇村裏充滿巴洛克氣派、呈藍白色的葉卡捷琳娜宮,既重本又有心思!



皇村Tsarskoye Selo的歷史可追溯至18世紀初,自從沙俄彼德大帝遷都聖彼德堡後,皇村就成為歷任沙皇主要居住的皇宮,展覽中介紹得比較詳細的是最後三任沙皇:亞歷山大二世→亞歷山大三世→尼古拉二世,展覽中不少珍品都是他們所有。



在眾多展品中,首推擺在展廳門口的黃金大馬車最矚目,雖然馬車的木質已經有點陳舊,但反而很有歷史味道,就連馬車前的黃金馬韁馬飾都好華麗,盡顯19世紀歐洲皇室的氣派。還要一提是這本設計頗見心思的場刊,一打開就是皇村金碧輝煌的正門和藍白外牆的葉卡捷琳娜宮。



不說不知原來這座位於聖彼德堡南郊的葉卡捷琳娜宮在二戰時曾遭粹德軍猛烈炮擊,展覽中不少黑白老照片見證了當年的頹垣慘況,到了50年代蘇聯政府才展開全面復修,成為現今規模……講咁耐點解仲未見有咩展品睇下?咪就因為唔畀影囉,所以如果想睇下葉卡捷琳娜宮琥珀廳的馬賽克鑲嵌畫有幾靚、溥儀送贈尼古拉二世的中國漆製花瓶有幾精巧,同埋各式宮廷服飾以及黃金時鐘燭台餐飲器具有幾奢華……就要親身去睇了!



p.s.由於知道皇村展覽邀得香港管弦樂團同場演出3場「壯麗的俄國旋律系列」音樂會,基爾反正有入場證所以再去睇多一次,這天演出的是由5位樂師合奏的「銅管五重奏」,選奏的5小節樂章分別來自林姆斯基的《姆拉達‧貴族進行曲》、鮑羅丁的《伊果王子‧韃靼舞曲》等,每首都好有俄國風情。



這個迷你演奏會是在歷史博物館正門大堂舉行,座位好似係要預早輪飛,但原來專程來聽音樂會的人也頗多,所以未開始前連側邊企位都已經相當逼。值得一讚的是,大堂迷你演奏廳的葉卡捷琳娜宮虛擬投射佈景效果真係做得好靚好逼真,感覺猶如置身在皇宮裏聽古典音樂會一樣咁有味道。



演奏會散場時同樣人頭湧湧,見不少人襯機會同擺放旁邊的沙皇古董大馬車影相留念,管理員基本上都無乜扮法阻止咁多人影,其實基爾覺得只要不開閃光燈應該不會損害馬車上的金漆吧!所以都襯這人山人海的良機快快手手咁求其影了兩三幅相就速離現場。



近看大馬車的雕花工藝真的相當精巧細緻,而且保存了百幾年經歷戰火洗禮後也無太大損傷毀爛,依然氣派十足,本身就是一件藝術精品。翻查場刊資料才知這輛6馬駒馳的華麗金馬車建造於1856年,是亞歷山大二世出席加冕典禮時的座駕,最後一次使用則是在1913年尼古拉二世出席羅曼諾夫王朝三百周年慶典上,由於沙俄皇朝在1917年的革命浪潮下告終,所以這輛皇室馬車也見證了沙俄盛衰的歷史。



這次重遊還再看了幾樣重點文物,包括法貝熱的玻璃蛋和琥珀廳的鑲嵌畫框,還有幾幅描繪了沙皇登基大典的巨型複製油畫,以及末代沙皇尼古拉二世一家人在葉卡捷琳娜宮拍攝的合照,聞說他們被流放西伯利亞前就是住在這裏,所以這座富麗堂皇的宮殿也是他們最後的一個家。

「皇村瑰寶:俄羅斯宮廷文物展」
展期︰29.10.2014 - 16.3.2015

44 則留言:

  1. 英國人通常會講一年容易又來到12月。
    展期咁長?那裡是歷史博物館?

    回覆刪除
    回覆
    1. Samwei:時間真係過得快,轉下眼2014年又完了^^
      喱類大型展覽通常都搞成4-5個月架,反正用咗咁多錢運文化過來丫嘛!!
      在尖東,近Poly,有冇印象?

      刪除
  2. 雕工細緻嘅黃金馬車夠晒氣派,唔怪得咁多人影相^^

    回覆刪除
    回覆
    1. Wan:唔畀影架,襯散場人多靜雞雞影下架咋XXD

      刪除
  3. 點解頭嗰幾張相, 好似樓盤廣告?!哈哈哈
    有音樂聽...又有馬車睇~~唔錯!!

    回覆刪除
    回覆
    1. 森:我又唔知喎,我唔似得森兄成日可以去睇豪宅樓盤丫嘛XXXD
      演奏會得3場咋,有興趣可以先上網check日子!!

      刪除
    2. ....成日睇有軌用咩,成日買先至威丫嘛.........XXXXXXXXXD
      得3場咁少,聽的觀眾層同森伯伯年紀相若...一定要人生閱歷豐富先識欣賞?!!

      刪除
    3. 森:買都唔威,真正住先最威kakakaka
      咁又唔一定只有長者去聽,都好多唔同年齡階層嘅,同森兄一類風華正茂嘅都唔少XXXD
      不過由於坐位唔多,就多數讓畀啲小朋友同長者坐下啦,因為演出都有成個鐘,如果企都幾累㗎^^

      刪除
  4. 又有來路貨來香港,仲有音樂聽,睇來我都要去一去啦 :D

    回覆刪除
    回覆
    1. Matt:看來都幾啱你口味喎^^

      刪除
    2. 我咩都岩架,哈哈 :D
      12月28日有音樂會,準備呢日去先~

      刪除
    3. Matt:唔知到時會唔會演奏啲聖誕新年樂曲搞下氣氛呢^^

      刪除
  5. 又冇相睇喎!靠你嘅描述去想象展品,真係諗爆頭喇!頭痛添!!

    回覆刪除
    回覆
    1. JJ:唔駛頭痛啦,咁咪親身去睇下囉,如果有興趣的話~~!!

      刪除
  6. 我去博物館, 好怕D人影古畫古物, 點都會有影響呀

    回覆刪除
    回覆
    1. AhMo:同意,如果係人多的話係會阻住其他人睇架,況且其實係無乜必要去影,親身去睇下最有實感吧^^

      刪除
  7. 不要偷偷拍照,雖然你沒有開閃光燈,沒有損壞文物,可是借展品的單位是有權禁止展品被拍照,這是版權的問題,希望大家明白,為香港人留下信譽及名聲。

    回覆刪除
    回覆
    1. Coffee:同意,其實都無乜必要影,反正親身去睇其實最真實,影出來效果也不會好,外國不少博物館也有場刊或出書等專輯介紹文物,索性買書好過自己影吧!
      今次份場刊其實都已刊出好多種展出的重點文物,睇場刊已經好足夠了,而且還是不另收費的呢!

      刪除
  8. 金碧輝煌來形容吧!朋友去咗參觀送了幾張明信片給我!

    回覆刪除
    回覆
    1. Stella:係呀,果幾張明信片都印得幾精美,主要係影返皇村入面的琥珀廳,藍廳,鏡廳等幾個房間的華麗裝飾,不過其實歐洲的皇宮裝飾大多都是大同小異,而且齋睇小小的明信片不太看得到這些大廳到底有幾豪華,都係要置身其中先可以真正感受到!

      刪除
  9. 回覆
    1. MD:唔知會唔會運去你果邊展出呢?

      刪除
    2. 到現在都未聽到啲宣傳呢, soooo

      刪除
    3. MD:香港都展到明年3月,可能要3月以後了.....

      刪除
  10. "俄羅斯皇村瑰寶"個展覽都幾吸引我!

    回覆刪除
    回覆
    1. Kaka:有空就去睇下啦,記得唔畀影相XXD

      刪除
  11. 我都有去過呢個皇宮~真係幾靚~~~~
    基爾好鐘睇展覽架?

    回覆刪除
    回覆
    1. Tiffany:皇宮入面應該幾正吧?!!
      都鍾意去逛下嘅,反正都無乜特別野做and特別野寫XXXD

      刪除
  12. 回覆
    1. 摩:就返有演奏會日子去睇下囉^^

      刪除
  13. 馬車有o野罩住冇咁好睇.

    回覆刪除
    回覆
    1. 王子:無罩馬車可能成日形住驚會畀人放暗箭行刺喎:P

      刪除
  14. 馬車夠氣派喎...............

    回覆刪除
  15. 記得在莫斯科的博物館睇過馬車,在俄羅斯的博物館職員係勁惡,唔好話想偷影,相信你想拿個電話出來都難。。。。。

    回覆刪除
    回覆
    1. Lucamom:我記得去夏宮時也是要另外付錢買張影相票的

      刪除
  16. 我都打算去看這個及沙田的敦煌展

    回覆刪除
    回覆
    1. 小妹:敦煌仲精彩,行到唔捨得走^^

      刪除
  17. 早幾日經過,想去看一看,可惜當時關了門。

    回覆刪除
    回覆
    1. 說:平日好似早D收,周六周日好似開長時間少少

      刪除
  18. 最特別部馬車,好華麗既感覺,

    回覆刪除
    回覆
    1. Andy:實物展品之中,喱架馬車都算最大架啦

      刪除