2015年2月8日 星期日

2014古都瀟瀟@千姬物語

姬路城外圍的三之丸和其餘不少後花園其實都不用收入場費,如果主要是來賞櫻或賞紅葉又時間不多的話,大可只在外圍離遠影張到此一遊即可。



不過基爾山長水遠來到姬路城,當然不會慳那¥400門券,一定要入去天守閣建築群裏參觀一下吧!喱日唔見太多強國遊客來訪,反而比較多韓國遊客(還幫他們拍照),但整體而言遊人也不太多,如果落雪應該更多人來影雪景。上圖是位於三國堀和菱之門旁的售票處。



穿過菱之門後有條長長的石板街,一路走上去就來到西之丸外的小花園。上圖左可以見到一幅江戶時代描繪當時姬路城景觀的復製古畫,唔知古人係咪坐孔明燈上天取景畫架呢?



入城參觀時才剛過了中午時份,但西之丸花園裏已經有點昏昏暗暗的日暮景緻。要注意的是,入冬後姬路城大約下午4點就停售門券,5時正關門!



據統計整座姬路城堡有多達74座建築物,除了大天守閣建築群外,西之丸建築群也是主要建築之一。上圖是準備走進西之丸渡櫓參觀的玄關,由於渡櫓裏全部以幾百年歷史的木板鋪砌地面,所有遊人必須先除鞋,每人會派個白膠袋然後全程一面挽住鞋一面參觀,畫面其實都幾好笑。



櫓,是日本古代城堡常見的建築,多用作存放箭矢的倉庫,也有防禦和瞭望功能,單層稱為聞櫓;兩端築有城樓的稱渡櫓;三層高的稱隅櫓,通常設有投石口。上圖是擺設在渡櫓內的歷史展板,另外還有一些古時修建姬路城所用的筒瓦軒瓦和瓦當之類。



西之丸渡櫓裏有不少隱閉的地下道進出口,相信是古時用來伏擊入侵的敵人,聽聞城裏還設有忍者體驗課程,應該會幾好玩。上圖是展出的古書《玄武日記》,記載了18世紀酒井家入主姬路城的歷史。



渡櫓內的走廊木地板和樑柱都保存完好。基爾最近看明珠台介紹英國古堡的紀錄片才知,原來16-17世紀以前歐洲的古堡和皇宮大多都沒有走廊,很多時要穿過一間又一間房間非常不方便,若其中一間房門上了鎖就無法通過……這樣看來姬路城的走廊設計就先進多了,長長的渡櫓走廊連接了西之丸內幾十間侍僕的小房間,又稱為「百間廊」,走廊牆上還有木窗採光通風,當時已是不少民居設計的典範。



由渡櫓的木窗往外望景觀非常開揚,城樓下的西之丸花園有不少禿樹,其實那些都是櫻花樹,3-4月來到一定會好靚好熱鬧逼滿賞花拍照的遊人吧!不過基爾初冬時節來到,也另有一份寥落荒涼蕭瑟的凄美。



整座西之丸建築群中,基爾覺得最靚的就是位於渡櫓盡頭的「化妝櫓」。由於百間廊兩旁的小房間多是僕役的居所,陳設都非常簡單,只有化妝櫓比較華麗,因為它是昔日姬路城最出名的女主人「千姬」的起居室,就連房間的坐向景觀也是全幢西之丸中最靚的。



上圖是化妝櫓內穿戴華麗和服的千姬與侍婢閒來捉棋的蠟像。千姬係乜水?姬路城有不少地方也以她命名,例如剛才路經售票處外的三之丸旁邊就有個千姬牡丹園……喱個時候又要講返少少歷史故仔!



話說17世紀初1600年代,德川家康在著名的關原之戰中取得關鍵勝利後掌握了軍政大權,並犒賞麾下將領功臣以鞏固幕府政權,他將養女嫁予池田輝政並賜封為52萬石的姬路藩大名,有「西國將軍」和「姬路宰相」稱號。而千姬就是池田的女兒和德川的外孫女,地位顯赫猶如公主。上圖是化妝櫓的外貌,與姬路城大天守閣一樣髹上雪白的白漆外牆,本身已是一座很雅緻的別墅。



站在化妝櫓外的石樓梯可盡覽對面大天守閣建築群靚景。宏偉的姬路城本丸由樓高6層(外觀5層+1層地庫)的大天守閣和東、西、乾3座小天守閣組成,若連同座落的姬山計算,整座姬路城高達92米,遠看巍峨白晰的外牆,配上層層疊起氣勢十足的唐破風和千鳥破風式屋簷,再加上簷頂閃閃生輝的金鯱裝飾,本身就是一幅最浮世繪味十足的「日本風情畫」。

58 則留言:

  1. 有靚景還有故仔講 , 謝謝你呀 !

    回覆刪除
    回覆
    1. Ak:也多謝你咁耐心聽我講故仔kakakaka

      刪除
  2. 古城,值得一遊!
    橙色外衣,幾搶鏡!

    回覆刪除
    回覆
    1. 摩:風景不錯,幾靚,可惜上唔到天守閣望風景.
      是件古老羽絨而已,買了十年才穿了3次

      刪除
  3. 展出的古書釘裝同中國的一樣。

    回覆刪除
    回覆
    1. Stella:係呀,其實九成日本傳統文化都是來自中國隋唐時代

      刪除
  4. 古代城池來到必定要一遊,400¥低呀!

    回覆刪除
    回覆
    1. Wan:真係可以行大半日都唔悶架對我來說kakakaka

      刪除
  5. 呢D影點唔啱強國遊客,佢哋去晒搶奶粉啦...XDDD

    回覆刪除
    回覆
    1. Momomom:姬路城和火車站一帶真係好少強國人,佢地無咩興趣睇古蹟(可能大陸乜古蹟都有kakaka),不如慳返啲時間聚集在大阪D百貨公司掃化妝品和名牌野!!!!

      刪除
  6. 你講開日本風情畫真係陪伴我長大既童年回憶⋯

    回覆刪除
  7. 「16-17世紀以前歐洲的古堡和皇宮大多都沒有走廊」––––嘩,照計唔使 rocket scientist 都諗到呢個安排唔惦啦!

    回覆刪除
    回覆
    1. Desa:咪就係,如果個伯爵男爵夫人在房裏同人依泣偷情緊嘅時候,突然有個侍婢撞入來咪大件事?!!!都係有條走廊方便D,更加有私隱好多啦kakakakakaka

      刪除
  8. 學左魚仔d pose喎...kaka........
    又要上歷史堂喇!good evening阿基sir!

    回覆刪除
    回覆
    1. JJ:邊忽似呢又?
      Good~~~Bye~~~Miss~~~JJ!!!XXD

      刪除
  9. 日本歷史課
    佢地派膠袋俾你自己挽鞋, 好過係出面除, 有機會搵唔番 XD

    回覆刪除
    回覆
    1. Ahmo:以前History最鬼憎讀日本史,D羅馬拼音人名又長又難記,好想就咁寫日文漢字就算數XXXD
      咁都係嘅,如果旺季遊人太多真係隨時搵唔得返,到時真係要赤腳走kakakaka.....以前可能有遊人投訴過,所以索性派袋自己挽鞋囉!!!
      不過唯一唔方便係如果要影相,又要挽鞋就有點狼狽唔太方便,如果有個專員幫手挽就sweet好多囉XXD

      刪除
  10. 其實姬路城又真係幾靚既~外觀夠哂宏偉~~~
    我同爸爸媽媽之前去俄羅斯d皇宮參觀係俾個套你就咁笠住對鞋行囉~都幾方便~

    回覆刪除
    回覆
    1. Tiffany:係呀,其實姬路本身個小城市就無乜特別野睇,人人去到主要都係睇座古城!!!
      係呀,我都記得入去夏宮係派鞋套,不過如果著尖高㬹鞋,個鞋套就無乜用啦咁薄,隨時鑿爛D古董木地板就大件事:P

      刪除
    2. 咁佢有無d小攤檔賣野食架(我淨係掛住食~~)
      係呀~~~其實我覺得俄羅斯d皇宮真係幾靚~睇下佢地當時幾有錢~~其他歐洲國家真係好多都比唔上佢d皇宮~

      刪除
    3. Tiffany:可能3月底果個重開祭典會有,我去果陣就無啦,不過唔駛驚,古城外圍和大街果邊係勁多食肆嘅,可以行完再去食!!
      咁話晒俄國由17-19世紀都係強國吧!皇帝有錢自然要住好D乜宮都金碧輝煌D^^

      刪除
    4. hehe~本身諗住今年3月尾去東京睇櫻花的~但係....4月頭又去新加坡~太近...所以揀左3月頭去~無得睇櫻花了~
      咁又係~~~~我覺得俄羅斯哥d仲靚過法國哥d~~~~

      刪除
    5. Tiffany:咁留返下年囉反正櫻花年年有hahaha.....
      不過俄羅斯夏宮係抄凡爾賽架喎,but夏宮果個金像噴泉花園真係超級勁靚^^

      刪除
  11. 日本的德川家族很有名氣,來到又聽到一些文化歷史了。謝謝分享啦。

    回覆刪除
    回覆
    1. 秋:好出名,日本統一都係靠佢,地位就如中國的秦始皇^^

      刪除
  12. 基爾都很喜歡各地歷史,秋得遇名師了。

    回覆刪除
    回覆
    1. 秋:實在太客氣了,只是純粹分享而已,希望blog友喜歡看^^

      刪除
  13. ¥400門券,都值得啦!
    忍者體驗課程,實好玩!
    千姬與侍婢閒來捉棋的蠟像,做得好真!

    回覆刪除
    回覆
    1. 說:有蠟像睇唔駛齋睇D房咁悶囉^^

      刪除
  14. 可以觀賞日本古時的建築都唔錯, 香港好少機會親身見到~~

    回覆刪除
    回覆
    1. 森:最衰日本城無得睇啦,剩係得D家居用品賣!!!!kakakakaka....

      刪除
  15. 著橙色衫個個邊個黎架?咁型既 :D
    姬路城建築真係靚,配埋櫻花就不得了啦 XD
    ps. 我見到你既網址變左http://gaelhk.blogspot.tw?今日突然變晒.tw >.<

    回覆刪除
    回覆
    1. Matthew:係啦啲路人甲成日喺度阻鬼住晒,破壞晒D靚景kakakakaka....
      我上網睇見人地影果啲櫻花相都勁靚,好恨去^^(但一定超多人)!!!
      我都唔知點解,但我自己睇就只有.hk或者.com,唔知點解其他人睇會變咗做外國網域?可能知我鍾意周遊列國吧XXXD

      刪除
  16. 有不少隱閉的地下道進出口...好似D戰壕陣地,軍事堡壘咁...可以玩捉迷藏喎!
    你有冇同千姬合照呢?
    "忍者體驗課程"...咁你有冇去玩呀?
    咁你鍾意開滿櫻花樹的美,定喺那一份寥落荒涼蕭瑟的凄美呢?

    回覆刪除
    回覆
    1. Kaka:我諗以前係用來突襲擊退啲入侵敵人嘅,捉迷藏可能多數去花園啦,順便去撲吓蝶kakakaka....
      千姬捉棋蠟像果度係有圍欄圍住咗,唔入得去只可以離遠影張相架咋:P
      印象記得好似只有周末或公眾假期才有忍者show,我閒日去遊人不多就無得睇了!!
      我未睇過櫻花呀,我諗有唔同感覺吧!!不過用相機影出來一定係櫻花季節更colourful更繽紛多一點,但遊人也一定勁多囉!!

      刪除
  17. 感覺大阪城更美, 可能因為有櫻花襯托...

    回覆刪除
    回覆
    1. 蜻:大阪城係戰後重建架喎,喱度係真古蹟呢^^

      刪除
  18. 蠟像有冇其他造型,例如千姬出浴?

    回覆刪除
    回覆
    1. BIM:long~~~time~~~no~~~see~~~^^
      無呀佢只有一個捉棋造型架咋,入面無浴室一定唔會有得出浴啦kakakakakaka.....

      刪除
  19. 可能睇得太多日本鬼片同恐怖漫畫,我覺得有啲心寒!XDXDXD~

    回覆刪除
    回覆
    1. Teddy:Kakakakaka~~~~好多人架喎入面,唔駛驚會心寒啦^^

      刪除
  20. 祝情人節快樂!羊年快樂!

    回覆刪除
  21. 好似去名古屋城時都有要除鞋挽鞋周圍行呀,其實都幾細心呀!冬天好啲人人着住襪,感覺衛生D,夏天好易惹到HK腳。。。。
    400yen入場都唔算太貴呀,咁大個城,行成日啊!

    回覆刪除
    回覆
    1. Lucamom:遊客多我諗自己挽鞋都好嘅,至少出返來時唔駛驚搵唔返對鞋,不過拎住鞋就唔方便影相囉^^
      冬天其實只著襪踩在木板地上都幾凍冰冰,至於夏天我都唔會赤腳,一定著襪先,做好預防措施好D!!!
      相比起大陸D旅遊景點依家下下要成百蚊人民幣入場,日本的收費係超乎想像咁合理:P

      刪除
  22. 忍者體驗課程 ... 好想玩呀 !!

    回覆刪除
    回覆
    1. 應該會幾盞鬼,之前睇日語大放送見過類似的節目

      刪除