2015年3月16日 星期一

扶輪園賞櫻:上@大帽山

日本一年一度的櫻花季節快將展開,相信唔少人早已book好晒機票準備飛赴東瀛賞花襯熱鬧吧!至於香港2月開始的賞櫻熱就快到尾聲,基爾拿拿林趕上尾班車,今年選了去大帽山睇。



年前試過去長洲關公亭睇山櫻花(又稱緋寒櫻)盛開,由於長洲四面環海較濕暖,所以一般花期於2月初已展開。來到3月初其實唯一的選擇就是到氣候較涼的大帽山!為免人潮太勁,這朝大清早就來到荃灣西站等51號巴士上山,果然好多人排隊!



行走荃錦公路上大帽山的51號由於只是單層巴士,而且班次不算太密(約15分鐘一班),所以架車都幾爆,中途站未必上到車,加上周末假日有不少人上川龍飲茶,所以還是在荃灣西總站等車比較穩妥。



巴士來到「郊野公園」站就可下車了(即川龍之後兩個站),其實都唔駛怕唔識落車,一來川龍站已經相當多人落車去飲茶,二來3月去大帽山郊野公園賞櫻的人也頗多,落車後跟住人潮一直走就來到扶輪公園茶水亭外的櫻花林。



離遠已經見到大棚人拎住大機細機手機不停圍住D櫻花樹係咁影呀影,所以唔駛擔心會搵唔到個櫻花林。不過好明顯今年確實回暖得比往年更快,如果2月底來櫻花應該會開得較燦爛,基爾3月第一個周末來到見櫻花樹已長出嫩葉,花期眨眼已快到尾聲,僅餘一兩株仍見有幾簇遲來的艷紅。



雖然櫻花已不多,但也無減一場來到的遊人興致。純粹來襯熱鬧的基爾影下花又影下影花的人也是一種樂趣,可能早有心理準備櫻花不多,所以也不會有大太失望吧!影飽櫻花之後,基爾都要拿拿林起錨了,當然山長水遠來到大帽山郊野公園,不會咁快就落山散band回家……



之前上網約略睇過櫻花園這裏附近有兩條「零難度」的行山徑,反正過年大感冒病了很久,就趁這次良機hea行個靚山啦!看地圖見大帽山家樂徑和遠足研習徑呈「8」字形,起點和終點其實都是在扶輪公園的櫻花園,路上指示也很清晰所以不用太擔心會迷路。



途中路經camp site見有唔少大陸自由行來紮營,其實附近配套設施也不錯,有洗手間也有燒烤爐,而且3月未算太熱,蚊蟲也不多,也是不錯的露營季節吧!比較意外係友人竟帶了野食來picnic,雖然只係簡單零食,不過在楓樹林下食住傾偈一hea又大半個鐘,如果12月來唔知又睇唔睇到紅葉靚景呢?



齋食零食當然不可以當lunch,正猶疑好唔好落山返去荃灣或汀九那邊食晏,商議過後結果還是決定沿荃錦公路落山方向步行兩個巴士站返去川龍飲茶。雖然已來過不下5-6次,但始終覺得端記二樓露台有個無敵田園靚景最正,所以印象中幾乎次次來都係幫趁佢。



之前通常係大清早來川龍飲茶,之後再去行山(甲龍徑);今次是第一次來飲晏晝茶,茶客感覺上好似無朝早咁墟陷,但依然有不少點心選擇,仲見到好耐無食過的糯米卷和蠟腸卷、大包之類,這類懷舊點心今時今日在外面一般茶樓應不常見了。



至於脹卜卜大大隻蝦餃一籠有4隻之多,大中小點一籠幾錢其實基爾次次來也不太清楚(今次埋單計人均也不過$50);不能不試的還有外面菜田即摘即煮的西洋菜,平時在家慣用西洋菜煲湯,炒西洋菜則比較少食,聽基爾媽講西洋菜在春節過後會帶一點甘澀味道。



第一次來飲晏茶才知原來這裏沒有下午茶時段,伙計大約2:30pm就會自動來埋單及收拾台面作簡單清理就收工(留下了茶壺茶杯讓客人慢慢嘆),結果基爾與友人在露台位hea到3:30pm才願走,整間茶樓就只剩基爾一台客(店門也沒人落閘),四周靜蠅蠅的感覺很特別,只餘簷廊裏籠中的相思鳥間中發出幾下叫聲,似乎在問基爾為何遲遲還未離去呢?同相思say goodbye之後見暮色漸濃,都係時候要繼續起行,穿過川龍菜田往城門水塘引水道進發!

81 則留言:

  1. 西洋菜是在川龍飲茶必選啊!

    回覆刪除
  2. 我都有去過川龍飲茶呀~~~我記得哥時親戚哥時仲攞d山水去沖茶飲~

    回覆刪除
    回覆
    1. 你真係好熟路喎連川龍都有去過
      其實香港好多你去過的地方我也沒去過呢:P
      我都係睇你blog先知原來有咁嘅地方^^

      刪除
    2. 我有親戚住哥頭...行完山就朝早去飲茶咋~
      點會~~我次次黎都係行街咋~
      可能有時自己住既地方反而會去番相熟既地點...反而去到其他地方先會不停試新野...卦~~~~~~~~~~~~~~~

      刪除
    3. 原來如此~~~~住果頭環境真係幾唔錯架,空氣好!
      所以你去啲shopping地方一定熟過我啦kakaka...
      我見你在你地頭,依然可以不停發掘到啲新食肆,咁先至勁丫嘛^^

      刪除
    4. 我都係去過一次咁大把~我仲記得哥次上山呢..差d俾狗咬~~~
      wakakakak~我去黎去去都係幾個地方~~~~~唔會熟得過你既~
      我都係成日睇我有d朋友好鐘意搵新野試~~~通常睇過佢地話ok我先去試~~以免中伏~~~(但係我都係成日中伏的~~)

      刪除
    5. 係呀川龍果邊多狗,村民養來看屋,一般民居唔好走太近,會有狗吠!!
      我連迪迪尼也沒去過呢:P
      係呀參考人地可減少中伏kakakaka......

      刪除
  3. 好多人都話個度飲茶正呀

    回覆刪除
    回覆
    1. 環境幾特別的,香港依家少喱類老式茶樓吧

      刪除
  4. 我都去過川龍飲茶,最吸引是新鮮菜,白灼最正!

    回覆刪除
    回覆
    1. 係呀通常都會食菜
      仲有幾味外面已經唔多見的古老點心^^

      刪除
  5. 我次次都係由川龍行落山,無行過呢段路添

    回覆刪除
    回覆
    1. 其實果度一面可以行去荃灣和城門水塘,另一面可以行去石崗,兩條都幾好行架唔太辛苦

      刪除
  6. 回覆
    1. 好題好題,不嬲都話JJ才思敏捷kakakakaka..
      咁係咪時候要加大運動量?

      刪除
  7. 畫眉?!!.....相中的是相思鳥(綠繡眼)
    幸好山長水遠去到仲有一兩棵艷紅...

    回覆刪除
    回覆
    1. 畫眉相思我其實唔係太識分,咁我信森兄啦,至少你畫雀應有深入研究過,比我在行得多hahaha....
      其實正常花期也是大約3月頭,今年特別暖吧

      刪除
    2. 唔係因為畫雀有研究,係因為以前養過雀(包括相中的相思)咋~~
      可清楚看看牠們分別
      畫眉鳥:
      http://www.hkwildlife.net/Forum/viewthread.php?tid=24865

      綠繡眼:
      http://fortraveler.blogspot.hk/2008/06/blog-post_05.html

      刪除
    3. OIC~~~@@原來森兄仲係玩雀專家果然多材多藝,之前好似好少聽你提起過呢!我以前鄰居都養好多雀,但我始終不懂分:P
      anyway~~~~多謝你的資訊!

      刪除
  8. 飲晏晝茶仲好,人少少,hea 多多,仲有特價~ 哈哈
    香港唔錯喇,除佐市區周不時有展覧/ 藝術活動,連郊野都甘多野睇 :)

    回覆刪除
    回覆
    1. 係呀喱間特別啲,因為啲人通常晨咁早上山來飲茶,之後就行落山當運動,所以一般都係大清早已好多人反而中午少人一點.
      但喱間我都唔太清楚係咪有下午特價喎,我諗多數無喇!!
      係呀,外地遊客來香港其實都覺得方便,shopping又方便,想去郊外行下又方便,可能只係我地生在福中不知福啫hahahaha...

      刪除
    2. 但其實個大帽山郊野公園距離個山頂 (Radar Tower) 遠唔遠?路程辛苦嗎?全程 (來回) 大約要幾耐時間?我考慮緊下次到香港時可以去行一次山 :D

      刪除
    3. 我代答:大約5公里,路程唔辛苦的,行車路的,全程 (來回) 大約要3個鐘頭。

      刪除
    4. 多謝JJ喎咁幫得手kakakaka....
      btw,上到Radar Tower還可以由另一邊落山去沙田

      刪除
    5. 多謝 JaneJane ;D
      認真可以考慮!睇下到時捉唔捉到人陪我行先 :P

      刪除
    6. 唔洗客氣。有人數手指數得慢呢,我咪搶答囉!kaka...

      刪除
    7. JJ見多識廣靠得住嘅^^

      刪除
  9. 呢到真係未去過。為左食,你都好早起身喎。

    回覆刪除
    回覆
    1. 老dad可能有冇同friend去過飲茶?
      都唔係純粹為咗食嘅,係想去睇櫻花㗎嘛kakakakaka...

      刪除
  10. 櫻花樹未算太多,但係郊遊賞景心情應該不受影响吧!

    回覆刪除
    回覆
    1. 當然不能與日本繁花似錦的盛況相比,如果不抱太大期望就不會失望啦^^
      不過之前睇新聞話,香港政府好似正考慮種多啲,未嘗不是一件好事吧!

      刪除
  11. 大帽山野餐的主意唔錯喎!去川龍飲茶都是一大享受!

    回覆刪除
    回覆
    1. 唔錯架,我諗秋冬天會多啲人來燒野食,配套設施充足,如果有車更方便kakaka...
      如果行開山去喱度飲茶都唔錯嘅,但我唔係住喱頭就好少特登上山來飲茶囉:P

      刪除
    2. 川龍飲茶,我都是試過一次,有時間要再去。

      刪除
    3. 肥人最忙行山,哈哈哈

      刪除
    4. 咁就更加要keep下囉^^

      刪除
  12. 唔,那些櫻花,也少得太可憐了吧。難怪圖中那位仁兄要用長鏡才能影到。

    回覆刪除
    回覆
    1. S市附近會唔會有類似的櫻花園?10-11月時影啲來看看^^
      咁仁兄影花之餘又可以show下技術、心得同埋啲攝影器材丫嘛XXD

      刪除
  13. 大帽山睇櫻花,又靚,又熱鬧喎!
    跟住去飲茶,節目唔錯!
    ~我都多數去端記飲,(平靚正).

    回覆刪除
    回覆
    1. 其實係得茶水亭出面喱撻小小花園咋,不過都有幾十棵嘅,如果全部盛開我諗係幾壯觀的吧!明年再來看囉^^
      係呀,我覺得佢個view好似正啲,hea坐傾偈最啱XXD

      刪除
  14. 呢的咁樣先係有質素的生活。

    回覆刪除
    回覆
    1. 我覺得你果啲仲有質素喎,可惜你依家好少影畀我睇:P

      刪除
  15. 喺香港未睇過櫻花,反而喺廣州睇過,好彩你去到都仲有櫻花睇吓 。
    大帽山同川龍都未去過呀!

    回覆刪除
    回覆
    1. 你講開我又醒起幾年前都有去廣州塘西路雕塑公園睇過一次櫻花:http://gaelhk.blogspot.hk/2008/03/blog-post_25.html
      川龍一年四季都啱行架,不過引水道那邊就比較多monkey,盡量唔好拎超市膠袋囉^^

      刪除
  16. 常常聽blog 友說川龍,又講有西洋菜賣,其實我只知荃灣有條叫川龍街(好似有好多鞋店),其它就真不知是甚麼地方,而且點解那麼多人都話會去那裏飲茶?
    基爾兄報導真詳實,謝謝你的分享啊!

    回覆刪除
    回覆
    1. Hello你好!!^^
      係呀有條川龍街,搭小巴可以上城門水塘果度呢!
      山上飲茶果度朝早都幾多人去架,不妨去一試

      刪除
  17. 早排我都有去大帽山睇櫻花~
    不過櫻花得幾粒,但人就成堆,感覺有啲可憐>.<
    講左好多次,但到而家都宗去過川龍飲茶>.< 想試西洋菜 >.<

    回覆刪除
    回覆
    1. 所以香港應該四周圍都種多啲啦,既然咁多人鍾意去賞花hahaha...
      好近櫻花園果度咋喎,下次去試下帶埋媽和妹去飲茶囉^^

      刪除
  18. 其實唔知幾時開始香港咁多人去賞櫻花,
    仲四圍搵密景花蹤.....,
    哈哈....大帽山都可以行下賞花,
    維園又花展....

    回覆刪除
    回覆
    1. 依家日円平相信今年更多人去,京都一定旺過旺角kakakaka...
      我間中都有參考人地D密景花踪㗎^^
      維園花展開了,好似仲有夜場喎

      刪除
  19. 係呀, 川龍咁上下就收, 有次我地去行山, 因為遲左就食唔到了.
    咁鬼多人, 我就真係唔想迫了.

    回覆刪除
    回覆
    1. 閒日我諗佢地收更早
      我都係離遠影咋,因為唔想阻住D重裝備人士kakakaka.....

      刪除
  20. 想不到川龍飲茶的点心 ! 都這么豐富和及引喎^^

    回覆刪除
    回覆
    1. 有幾款點心都幾有懷舊味道,外面茶樓已經唔多食到!!!!
      有空咪同四朵金花去下囉^^

      刪除
    2. 依家天氣不錯呢,不熱也不冷

      刪除
  21. 其實香港好靚, 但好多人(包括我)成日諗住外遊, 忽略左香港o既美景

    回覆刪除
    回覆
    1. me too!!:P
      其實最好係外地去吓,香港四圍又去吓囉^^

      刪除
  22. 今次行程唔錯喎 , 有茶睇又有茶飲 , 見到你的大大隻蝦餃好吸引呀 !

    回覆刪除
    回覆
    1. 係呀而且一籠有四隻,依家出面多數只有三隻咋

      刪除
  23. 賞櫻,影相,行山,點心,好友傾偈,精神喚發的一天,留在香港也可以很好。

    回覆刪除
    回覆
    1. 係呀喱條線短短地幾好行唔辛苦.
      台灣的櫻花聽聞也很美^^

      刪除
  24. 小徑兩旁佈滿一地既櫻葉,好靚呀!
    甲龍? 會唔會去個農場食燉奶? 好正!

    回覆刪除
  25. 我以為川龍只有早茶, 原來開到兩三點.

    回覆刪除
    回覆
    1. 我去果日係星期六,下午2:30左右最後埋單囉
      閒日我唔知有冇午市?

      刪除
  26. 行完山去川龍飲茶很好的選擇呢!

    回覆刪除
    回覆
    1. 不過多數人係飲完茶先去行山的呢^^

      刪除