2015年4月28日 星期二

2014古都瀟瀟@清水舞台

來到Day3天氣似乎有點不穩定,大清早起來時已一直下著綿綿細雨,而且感覺上都幾凍,唔知會唔會見到落雪呢?



由於落雨所以都唔打算去太多地方了,喱日主要諗住留在京都四圍閒蕩吧!不過出發前先去酒店大堂check-out並寄存好大件行李篋,只需帶備一套換洗底衫褲、背囊和跟身物品已足夠今晚在嵐山睡一晚。搞掂晒即在京都驛巴士總站搭車先出發去清水寺,上圖右是清水寺山門內不遠的隨求堂。



好多人應該都去過清水寺,它聳立於京都東山區音羽山山麓,與北山的鹿苑寺(金閣寺)和西面嵐山的天龍寺並稱為京都三大世遺古剎。上圖是清水寺裏的經堂,自1995年關西大地震開始,寺院每年都會選出一個「今年之漢字」,2014年獲選的是「稅」字。



上圖是三重塔旁的開山堂,這時雨越落越大了,路經的三重塔披上了布幔正在維修就沒有影了,只影了遠山遍霧遍雨的紅葉景。其實一面撐傘一面影相難度都幾高,為免淋濕相機所以也沒拎出來,全靠手機搞掂!



12月中寺內雖然只餘下少量金黃的銀杏葉,但依然覺得景觀幾靚,可以想像若早大半個月來一定好壯觀,遊人也墟陷十倍吧!網上search見清水寺秋祭時還有夜景可影,紅葉夜景非常靚,很值得一遊。



來到清水舞台主殿發覺原來遊人也頗多,可能大家都進來避雨了,也順道小休一會。清水舞台是清水寺的主建築群,一般相信始建於公元778年(約中國中唐時代),現存建築為1633年(約中國明末時代)重建。



修築在山麓上的主殿舞台結構巧妙雄偉,總共由410支高幾十米的圓木巨柱支撐,採用了技術高超的懸空楝樑式設計,不使用一根釘子,在日本古代木建築中極為罕見。上圖是由舞台往下望,見到不少人在音羽之瀧前排隊「輪水」。



由於落雨關係,大殿裏更見幽暗,裏面見有不少善信在祈福祝禱,基爾為免打擾只留在殿外參觀算了。大殿外還擺了不少「護摩木」和祈福木牌出售,遊人可在護摩木上寫上祈禱文祈求神明保佑。



由上圖可以見到遊清水寺當天雨勢有幾勁,很難想像深秋時份仍然會落這種滂沱大雨……雖然如此卻沒有令基爾打退堂鼓,主殿北側長長的石階上還有一座「地主神社」,上面大大的掛了一個「緣」字,莫非是求姻緣的神社?



大雨中依然有不少善信拾級而上,地主神社以「戀愛成就」和「良緣達成」聞名,是著名的日本月老,唔知有冇blog友來過求姻緣呢?

65 則留言:

  1. 我都去過, 記得好似話起時一顆釘都無用過

    回覆刪除
    回覆
    1. 係呀,以前古代建築用的入榫技術相當高超呢....

      刪除
  2. 我有呀~~~我之前有去過地主神社~~
    我仲買左好多戀愛既御守~~~~~
    不過你哥日又真係落好大雨喎~

    回覆刪除
    回覆
    1. 咁你覺得靈唔靈先hahahaha.....
      由朝早已開始落,仲越落越大,不過我係第一次去,所以都照得啦,一場去到嘛!!!!
      聽聞第二日已開始下雪了,可惜我看不到呢

      刪除
  3. 愛煞京都!
    清水舞台,建築高明。

    回覆刪除
    回覆
    1. 我也愛,希望有機會再去!!!
      建在山崖上,而且係千多年前,技術高超

      刪除
  4. 我都有去過, 其實我鍾意京都多過大阪 !
    不過, 我最想去四國 !

    回覆刪除
    回覆
    1. 不過大阪可以去shopping喎kakakakaka...
      喱排都好多人去四國,可以去睇漩渦^^

      刪除
    2. Hehe ... 我已經安排好了.
      就係想太多人去前, 快點去 ~

      刪除
    3. 如果有人駕車可以去環島遊啦^^

      刪除
    4. 駕車的 ... 自然 ... 是我啦 !

      刪除
    5. 所以識駕車真係有著數,可以去多好多「秘景」^^

      刪除
  5. 回覆
    1. 我喱日咁大雨其實已經算少人了,友人話如果係櫻花和紅葉旺季,完全多人到插針唔落呢

      刪除
  6. 清水寺我N年前第一次去日本時去過咋.

    回覆刪除
    回覆
    1. 我就n年前去過,n係整數,N可能係分數,kaka...

      刪除
    2. 王子:咁下次回來,咪順便過去逛逛回味下囉^^

      刪除
    3. JJ:咁你快D約埋阿王子去把臂同遊下啦XXD

      刪除
    4. 日本唔去喇!已經去過4,5次,去其他地方先。

      刪除
    5. 咁貴嘅地方,等你去埋我個份。

      刪除
    6. JJ:有啲嘢係無價嘅~~~~~^^

      刪除
  7. 唔知日本政府怎樣去保存古式建築, 睇落仍很新淨...
    一磚一瓦都有歷史陳跡,剩睇當中的建築已經值回票價~~

    回覆刪除
    回覆
    1. 我諗每幾年就要維修,今次我去時,三重塔和奧之院都圍封了,應該係重修,之前提過的姬路城也是每五十年大修一次;歐洲好多教堂也是隔幾年就要洗牆做清潔.....
      而且日本的名勝古蹟的入場費一般收費不高,唔似大陸果D,無嘢睇都收人舊幾水......

      刪除
  8. 上面大大的掛了一個「緣」字,莫非是求姻緣的神社? Yes, If you close your close and find the right way to walk towards the stone, you will have a good marriage.

    回覆刪除
    回覆
    1. 無錯呀,那裏的地主神社是京都很著名的求姻緣的寺廟,要繞住石走對方向,你咁熟悉一定係去繞個圈了吧^^
      有成果未先?!!!

      刪除
  9. 回覆
    1. Kakakakakakakaka~~~~~日本啲稅都幾重嘅

      刪除
  10. 跟團去過幾次……
    每次都好多人,
    而且商店叫買試食都好熱鬧,
    哈……土地廟求姻緣,你呢?
    乜嘢天氣都咁覟,雨中另一種浪漫,
    清水寺、東大寺,都喺用上唐代木建築技巧,
    由高僧將建寺技術連同佛經帶回日本,保留至今,
    但中國已失傳咗,中國近代再派木匠去日本學習失傳的唐代木建築,成功承傳!

    回覆刪除
    回覆
    1. 一定多人啦,話晒係京都名勝,依家應該仲會多好多大陸團,遲啲可能要人潮管制:P
      手信店也勁多人,不過我無幫襯只去避了一陣雨
      係呀我都覺得落雨也有落雨的味道吧
      之前去過志蓮淨院已經覺得幾靚㗎啦,去到京都就更覺得宏偉壯觀呢
      好多唐宋時代的建築技藝,都能在日本找到,而且全部都保存得好好;其實好多日本漢字也沿用自唐宋古文,現代漢語中好多時已經不再通用,有些已被淘汰,來到日本反而有點似坐時光機返回中國古代^^

      刪除
  11. 基太郎食飽飽去散步喇!冬天都落雨咩!條路跣唔跣o架?

    回覆刪除
    回覆
    1. 冬天唔止落雨,仲落雪架,第二日已經開始落雪了
      都有少少跣,老人家要特別小心D
      XXXXD

      刪除
    2. 講親老人家就大笑!你儍架?

      刪除
  12. 咁...你有冇求日本月老,比支好嘅姻緣籤你呀!^^

    回覆刪除
  13. 基爾哥,你有冇順便求番支姻緣籤呀?

    回覆刪除
    回覆
    1. 似乎好多人關心喱個問題喎XXD

      刪除
    2. 証明基爾哥人緣好,咁多人關心你。

      刪除
    3. 可能係擔心我做孤獨老人吧XXD

      刪除
  14. 有銀杏既清水寺靚好多,金黃色:D
    地主神社真係求姻緣架,基爾大大有冇順路求求?
    可能係日本有異地情緣都唔定架 XD

    回覆刪除
    回覆
    1. 其實我諗櫻花季節去都好靚,寺裏有好多櫻花樹,我去到時見到好多光禿禿的應該都是櫻花樹來的....
      又係喎,可能又會遇到D靚女民宿職員吧kakakakakaka......

      刪除
  15. < 寺院每年都會選出一個漢字 > 請問作用係乜呢 ?

    回覆刪除
    回覆
    1. 個漢字通常係當年最熱門的新聞話題,已經選了好多年,成為傳統了吧

      刪除
  16. 回覆
    1. 你有冇同大小姐和大佬去下水禮先?!!^^

      刪除
  17. 去旅行遇上落雨,真無癮!
    金黃的銀杏葉,可觀!
    著名的日本月老,一定好多香港人去!哈哈哈 ......

    回覆刪除
    回覆
    1. 仲要係勁大果隻:P
      如果多D仲會靚D,可惜12月中去到時已差不多落晒....
      下次派你去調查下kakakakakaka....

      刪除
  18. 下雨天雖有點掃興……但卻另有一番清新氣息!忽然記得這句話,不知是誰兗的:雨點打在你身,落在我心!

    回覆刪除
    回覆
    1. 我覺得四周圍的空氣好似都特別清新晒,但如果要影相就比較狼狽吧!!!
      幾有詩意,你可以再伸延寫成一首詩喎^^

      刪除
  19. 金黃嘅銀杏葉和紅葉一樣咁奪目, 雖然落雨一樣咁靚.

    回覆刪除
    回覆
    1. 我諗如果11月最紅那段日子去會更壯觀更靚呢^^

      刪除
  20. 最有味道嗰張唔係紅葉, 係最尾嗰張水珠啊!!

    回覆刪除
    回覆
    1. 我都覺得幾近似你的風格kakakakaka......^^

      刪除
  21. 而家D出名景點都唔係幾敢去,怕咗D陸客!

    回覆刪除
    回覆
    1. 揀冷門秘景去好好多~~~!!
      不過佢地通常留一陣就走,因為要趕去shopppingXXD

      刪除
  22. Gael,清水寺我去了兩次,是到京都必遊的地方.

    回覆刪除