2015年7月17日 星期五

2014古都瀟瀟@西本願寺

「一人闖蕩」有個好處係可以行到邊睇到邊,遇到乜睇到乜都可以好隨意……上回講到由東行到西,離開東本願寺之後行了幾個街口就來到西本願寺。



西本願寺雖然沒有東本願寺咁大,但歷史就更悠久,始建於1272年,原建於東山區,直至16世紀末才搬到現址的下京區。上圖是西本願寺旁邊的興正寺,兩寺毗鄰而建,若沒留意還以為是同一間寺院。



正如之前看過的東本願寺一樣,日本16世紀桃山時代的寺院一般都修築有阿彌陀堂和御影堂(分別供奉阿彌陀如來和淨土真宗開山祖師親鸞聖人),建築裝飾都以黑色和金色為主。上圖是興正寺的御影堂門,興正寺雖然寺院細細,這道正門卻甚具氣勢。



從御影堂門垂吊下來的這盞金蓮花燈非常金碧輝煌,是平成十三年(2001年)重新鑄造的,唔怪得咁金光閃閃咁新淨啦!



興正寺規模不大,站在庭園的角落裏,幾乎已經可以一個鏡頭影晒!上圖左就是剛才進入寺院經過的御影堂門。



由於寺內的阿彌陀堂和御影堂都是用了逾百年的木板鋪砌,木樓梯上當眼位已擺了「土足嚴禁」的告示牌,想入內參觀就要先除鞋。



在興正寺簡單逛了一圈後,就要繼續移玉步過去隔籬的西本願寺。穿過上圖右的古老大木門後,在庭園裏環視一圈感覺上與東本願寺的格局如出一轍。左上圖是轉輪藏經閣,裏面據聞有座回轉式書架,存放了古時從中國運來的大藏經,可惜藏經閣沒有開放入唔到去睇,單看外牆上見到的鐘形窗飾就覺得頗特別;左下圖是雙層的安隱殿,殿右邊是古樸的太鼓樓。比較矚目是殿前的一棵百歲老銀杏樹,樹冠非常大,去到時已落滿一地金葉,僅剩禿枝。



阿彌陀堂和御影堂之間有條木砌長廊連接,驟眼睇係咪有點似唐朝宮廷戲的場景……如果是在大陸的乜乜物物影城一定又會提供各式各樣皇帝大臣妃嬪宮女戲服畀遊人穿上影相啦!



單單長廊已經咁有古裝味,阿彌陀堂入面就更不在話下,金碧輝煌的裝飾佈置加上莊嚴的氣氛,彷彿真的以為發夢置身在皇宮中。



行完阿彌陀堂和御影堂終於可以著返對鞋準備離開。西本願寺地方雖然不及東本願寺大,但勝在歷史更悠久,平成六年(1994年)更獲列入世界文化遺產。穿過上圖左的御影堂門,出返去面向堀川通那邊的大街,依然保留了古老的護城河。



走出了寺院後,見對面街好似仲有D野睇,於是行埋過去八下啦!行入橫街裏原來成條街都係售賣佛具法器之類的店舖,另外仲有上圖左喱幢中西fusion味濃厚的建築物,初頭遠看它的大圓穹頂和雕花裝飾還以為是西域的回教清真寺,翻看地圖才知原來是「淨土真宗本願寺派傳道院」。



為免越行越蕩失路,都係先返出去堀川通大街,街上這幢非常宏偉的現代建築原來是「龍谷博物館」,基爾勁like它這幅遠看像竹簾隨風輕拂的外牆裝飾,與下京區這一帶的古老寺院和民居可說是襯到絕,完全唔會同四周古樸的環境格格不入,而且相信這道「竹簾」也有實際阻隔烈日暴曬的作用,香港真係要好好向人學習下。



可惜時間不太夠,最後也沒有入去博物館參觀,後來翻查其網頁才知原來有唔少佛教壁畫和佛像展出……Anyway,繞過博物館返去西本願寺那邊,發現與興正寺之間有條窄長小巷,八卦走入去終於見到西本願寺側邊的「唐門」,剛才在寺裏反而看不到。它同樣以黑、金兩色為主,唐式山形牆和人字板以及精巧的吉祥花鳥瑞獸雕塑,皆屬桃山時代典型的建築藝術風格。由於唐門在日光照耀下色彩奪目金光燦爛,途人路過總會駐足欣賞流連忘返直到日落西山,所以又有「日暮門」之稱。



走到小巷盡頭豁然開朗,還見到一幢很有歐陸味道的古建築,走近看看原來是龍谷大學的大宮學舍。這間龍谷大學的歷史可追溯到1639年,前身是西本願寺附屬的學堂,到了十九世紀明治時期才擴建為大學。



現時龍谷大學共有3處主要的校園,下京區這一part最古老的屬於文學院地頭,身處這種優雅古典味十足的校園,又真係特別有文學氣息啊!不說不知,文學院裏不少鐵鑄欄柵窗花和石材,都是十九世紀時由英國倫敦鑄造及遠渡重洋運來京都組裝,目前已列為日本國家重要文化財產!

70 則留言:

  1. Yeah ^^ 好耐未試過 !? 第一位留言回應你了~

    回覆刪除
  2. 古樸建築,別具韻味!

    回覆刪除
  3. 都係個句, 點解人地嘅可以咁幽雅, 鄰近地區就只有低俗二字

    回覆刪除
    回覆
    1. 都唔一定嘅~~~~~我仲未有機會去啫!!!!!~~~~~如果我去鄰近地區幫佢地影吓相又寫幾篇blog宣傳吓,即使係庸脂俗粉都會變貂蟬西施kakakakakakakaka.....

      刪除
  4. 人影唔多個,係咪你除咗鞋臭暈咗啲人??

    回覆刪除
    回覆
    1. 東西本願寺無清水寺金閣寺果D咁出名丫嘛,至少係一定唔會有同胞大媽大叔團肯花時間去參觀,眼見多數係日本人和韓國人散客,大殿入面真係跌針落地都聽到,要放輕腳步行唔好滋擾其他人。
      我去果陣12月中天寒地凍,著襪踩在木地板上都覺如履薄冰,我諗一定無人地大熱天時企街4粒鐘㷫烚烚睇CSD果D咁臭囉kakakakakakakakaka,,,,,,,,,

      刪除
    2. 互送矮帽呀!香香公主的腳就會香啫!

      刪除
    3. 原來JJ有喱D特殊僻好:P

      刪除
    4. 有人就有扭橫折曲的僻好!

      刪除
    5. 冬天淡季好處喺少人麻♡♡

      刪除
    6. JJ:你講乜我聽乜咋喎~~~!!???

      刪除
    7. 路霸:可能因為紅葉季節完咗就少D人

      刪除
  5. 回覆
    1. 可能生活在香港人多車多日日都人逼人嘈怨巴閉,難得有機會去外地旅行我都係鍾意揀D靜靜地無乜人嘅地方行吓,當係避靜洗滌心靈也好^^

      刪除
  6. 很有歷史的古建築,要好好保育!

    回覆刪除
    回覆
    1. 日本人對自己歷史文化的保育係百二分重視呢

      刪除
  7. 西本願寺感覺靚過東本願寺。京都實在太多野睇, 你上面嗰啲地方我都未去過!! ><

    回覆刪除
    回覆
    1. 西本願寺歷史悠久D,而且係世遺名錄內,東寺就規模大D,兩間其實都好近,步行約15分鐘距離而已......
      無錯呀,京都真係三步一禪寺十步一神社,古蹟實在多到行極行唔晒,就正如愛shopping的在大阪東京真係shop極都shop唔晒一樣XXXD......
      熊野古道我都覺得正,不過唔係好敢一條友去行:P

      刪除
  8. 日本的古寺特别多、規模也不小!

    回覆刪除
    回覆
    1. 而且我覺得保養維修方面比中國內地果D做得好好多,所以現存大部份有千年以上歷史的古老木建築,九成都是在京都奈良,而不是在大陸....

      刪除
  9. 上面有張相好似西門紅樓

    回覆刪除
  10. 龍谷大學好像拍過青春學生日劇 ...
    有寺好像外圍裝了鐵籠 ...

    回覆刪除
    回覆
    1. Really~~~!!我又無留意喎,邊套?
      好似係啲裝飾

      刪除
    2. 個名唔記得, 講啲學生有個專有僕人的 ...

      刪除
    3. 個景拍出來應該都幾靚吧?!!

      刪除
  11. 繼續一人遊,正!
    個寺真係好金碧輝煌噃~
    最後有無沾滿文學氣息呀? 扮下偽文青,wakaka~

    回覆刪除
    回覆
    1. 都ok喎^^
      京都真係好多喱類古寺神社睇
      唔駛扮偽文青啦kakakakakaka....

      刪除
  12. 唔識點形容有幾靚啦...
    只係知道真係好靚...
    日本啲古建築就係保護得好好:)

    回覆刪除
    回覆
    1. 無理由喎你應該都見唔少啦^^
      佢地維修都好講究唔駛亂來㗎

      刪除
  13. 金蓮花燈真係好有氣勢!

    回覆刪除
  14. 對寺廟無咩興趣,不過好靚幾宏偉

    回覆刪除
  15. 環境清幽古雅很舒服 , 相信這裡冇咩賣 , 哈哈因為唔見拉車客 .

    回覆刪除
    回覆
    1. 附近唔會有咩大型商場,冇乜人拉篋,同埋阿彌陀堂和御影堂入面果D千年木地板連鞋都唔畀踩入去,一定唔可以拖篋入去啦

      刪除
  16. 又係喎~好似冇咩人?!! 大媽大叔類多數去購物區, 佢地好少睇名勝...
    一個人去先可以影咁多相, 與人同行又掛住影相, 好似唔係太好意思...

    回覆刪除
    回覆
    1. 都有嘅,佢地主要去金閣寺清水時,果邊係好多旅行團去,大陸團韓國團台灣團都多.....
      都唔會唔好意思喎,我會同佢地影埋㗎嘛,多謝我都嚟唔切啦kakakakakaka....

      刪除
    2. 幾時都話gael兄份人抵得諗~~一齊同行都要幫埋大家影相…
      我講嘅係兩個同行嗰種! 一個掛住影, 另一個就好冷場......

      刪除
    3. it's my pleasure~~~~^^
      又唔會好冷場喎,我掛住影果陣,佢咪睇我影囉XXXD

      刪除
  17. 第1句已經好同意,我都好鍾意1個人周圍食,周圍行,不過唔敢喺外地,只限熟悉嘅香港。
    長廊張相好有味道
    旅遊好少入博物館,除非名氣爆晒燈嗰啲,因為要睇好長時間,但旅行啲行程通常好貪心好趕。與其hea睇,不如喺外面影張相就算,仲慳番入場費,呵呵(cheap mode)

    回覆刪除
    回覆
    1. 去旅行都係安全最重要,不過日本就相對上係安全嘅,而且公共交通好完善比較方便D....
      一個人就可以隨意D,同朋友或家人就熱鬧開心同埋有得分享,食嘢可以試多幾味餸菜^^
      係呀我都覺幾靚,有D似大陸古裝劇果D影城場景吧!!!
      我都係,有時有D特別嘅同埋好出名嘅才會花點時間入去睇,日本有D動物園海洋館或者美術館有時如果show本passport係有discount,買飛入場時不妨問下佢先!

      刪除
  18. 興正寺道正門和竹簾很有氣勢!

    回覆刪除
  19. 一個人行有一個人既好處~
    不過我都係鐘意兩個人一齊行多d~~~有傾有講嘛~
    但其實我都未試過一個人去旅行既~搵次試下先~

    回覆刪除
    回覆
    1. 都係㗎,尤其係你地鍾意食嘢,咁就一定係三四人同行有著數,至少食嘢都可以叫多幾樣丫^^
      不過女仔始終都要安全為上!!!!

      刪除
    2. 係呀係呀~~~~我地真係好為食架~~~~~~而且食量不少~多人叫野食真係著數~
      知道~係呢~你覺得最適合一個女仔去旅行既地點在那?

      刪除
    3. 直情係勁啦kakakakaka....
      我都無你去得咁多地方喎,應該你仲熟啦係咪:P
      日韓台星喱類你覺得會唔會相對上治安穩陣D?

      刪除
    4. 哈哈~~~點會~~~~
      覺呀~不過我有一樣野驚............我好驚住中d.......恐怖酒店..................................
      呢個先係我一個人去旅行最驚既地方.........................

      刪除
    5. 喱家嘢我都驚喎~~~~~~!!@@
      上次去北京做嘢就係自己一個人住一間大房(夠三四人住),不過當時無乜諗恐怖嘢(可能在office做足十幾個鐘實在太累了,返酒店沖完涼即瞓),依家諗返都好佩服自己咁大膽kakakakakaka.....

      刪除
  20. 我有時都喜歡一人遊, 同朋友出門也可以分散黎行, 各自各精彩.
    不過我身邊的朋友們, 大都很清楚我很怕 shopping, 1 小時左右我便會失去耐性 ... ...

    回覆刪除
    回覆
    1. 我有睇呀,你去台南的網誌都好精彩^^
      咁如果佢地去shopping,你要先自行安排好節目啦hahahaha....

      刪除
    2. 還好, 我的節目, 總會另佢地自動放棄 shopping 跟左我去玩 ~

      刪除
    3. 勁喎~~~~^^好有號召力!!

      刪除
  21. 一個人旅行喺隨心寫意,
    好多攝景友都喺單身上路,有伴在身旁總會分心,
    京都真喺古都,
    佢寺院䙺模亦全日本之冠,
    東本寺喺第一次見到,唔喺人氣景點,但好有尋幽之感,可以保存咁好亦喺日本人的認真執著情操,
    亦喺好運,無喺二戰被美軍炸平,
    我最近睇咗J2台的謝謝款待,
    以19世紀初日本煮食為題,反影日本近代史,似呀信輕鬆版。

    回覆刪除
    回覆
    1. 對呀一個人隨意行都無妨吧
      都唔會嘅我諗,各有各好最緊要係志同道合啦....
      愛看古蹟的,真要去一去京都,精華所在!!
      東西本願寺我諗唔係咁多人會留意,因為多數去了比較出名的清水寺金閣銀閣八坂神社之類,比較人頭湧湧
      係呀京都無乜點炸,所以可以保留咁多古蹟
      咦,等我又留意下喱個節目先,星期幾做㗎呢?

      刪除
    2. 星期六 J2,
      星期日早上 J2 都好似有重播。

      刪除
  22. 阿彌陀堂和御影堂之間果條木砌長廊都幾有氣勢咁喎....^^
    去到外地...我好多時都寧願去睇多幾個景點而唔去shopping架!

    回覆刪除
    回覆
    1. 係咪可以想像到皇后妃嬪會在這裏行過hahahaha....
      shop住去睇景都得嘅XXD

      刪除