2016年2月12日 星期五

京饌@觀塘

話咁快又到了大年初五,好多人應該仍在逍遙外遊中吧!基爾就比較少大時大節紅字長假期外遊了,多數都係要返工睇住檔口……Playback返今年農曆年前與舊同事吃了頓團年飯,第一次來apm幫襯這間京饌。



舊同事提返先記起原來舊年團年飯都係食類似的京滬菜館,不過上次係去銅鑼灣食通天的鍾廚……話時話其實都好耐無來apm(多數門口經過),赫然發現原來個food court都唔同晒,細左好多之餘仲少左選擇,名店亦多左,底層仲有個迷你花市(期間限定),氣氛都幾熱鬧。



成班舊同事夠鐘都未見現身全部都姍姍來遲,咁基爾入座先以免被cancel訂位啦!入到去發現係坐卡位仲要係三人一排其實都幾逼幾唔方便出入,下次如再來都係坐返出面的窗邊台比較理想。



一個人無聊間先揭下個menu睇睇有乜好野食先,驟眼睇本menu都幾靚喎!唔講可能會以為係食日式理料,唔知其餘春夏秋又會唔會有不同菜單供應呢?



裏面有好多常見的京川滬菜式,包括有鴨舌牛舌、醉雞醉鴿醉豬手、五香烤魚、麻辣炸鳳尾魚、醋汁海蜇頭、蒜泥白肉陳醋餚肉之類……仲有甜品如棗泥糕、高力豆沙和豆沙鍋餅(賣飛佛),可惜最後太飽冇叫到!



終於等齊人可以order了,最搞笑係原本各人已諗好晒想食乜,但落order時waitress姐姐不斷提供大量「具建設性」的反建議,到最後差不多九成都不是我們最初原意想點的菜式,包括上面這味香醋汁海蜇頭($88),waitress姐姐強調一定要叫黑醋汁喱款,又真係好食D咁喎!



見waitress姐姐推介的幾款都甚對辦,咁一於依佢意見叫埋喱味大龍躉兩食($288),佢強力推介好抵食,同埋好多台客都會叫……



事實證明侍應的待客態度真係好影響食客心情,聽得出這位waitress姐姐唔hard sell之餘,仲好處處為食客著想,盡量以最抵價錢食到最好的菜式。例如本來基爾想叫埋上面喱碟手撕雞絲粉皮($68),waitress姐姐就直截了當話唔駛另外叫了,因為只要order夠$300就會送這味菜式。



同雞絲粉皮一樣,食京川滬菜好似例必要食埋上面喱個麻辣牛舌($68),雖然基爾唔太食得辣也不太食牛,不過見價錢咁平就試試叫一碟share食應該不會有幾多,來到才知原來係大大碟有成十幾廿片咁多,如果愛麻辣的川菜迷一定要食啦咁抵!



另外仲叫了唔辣的蔥油淋雞(半隻$130)和上面喱味鐵板譚府蝦子鍋鎉豆腐($98),都係味道ok之選。有人想食小籠包咁又叫了一籠4件的貝勒爺灌湯小籠包($45),不過唔夠分,若叫多籠又好似太多而且都幾貴,喱個時候waitress姐姐又再出動話其實可以只加點1個小籠包(加$12),咁就可以人人有得試啦!



其實平時基爾都好少出外食小籠包因為通常都幾貴又唔好食,但喱個又幾ok喎,食得出係師傅手工包唔係雪藏貨色。最後仲有叫埋上面喱味京蔥肉絲薄餅($98),用餅皮包來食,醬汁甜甜地似上海粗炒,平時唔食蔥的基爾都覺得不錯。最後埋單計人均兩舊水有找,感覺抵食(歸功於waitress姐姐精打細算),睇單才知茶錢只$8位(不錯的鐵觀音茶),是平時下午茶價錢吧!

京饌 Kingduck
觀塘觀塘道418號創紀之城五期(apm)3樓1號舖

44 則留言:

  1. 回覆
    1. 係呀通常我都好少揀喱類high season去呀,除非係同放紅字假啲朋友或者家人去囉^^

      刪除
  2. 個food court我好多時都去架!

    回覆刪除
    回覆
    1. 我覺得以前好似多檔口啲,依家搬上咗一層,細好多

      刪除
  3. 同事全部都姍姍來遲,如果限時交枱就大劑了!

    waitress姐姐真係值得一讚,有超卓服務!

    回覆刪除
    回覆
    1. 就係貪佢唔限時囉,依家我都盡量揀啲唔限時的,可以慢慢食慢慢坐傾下偈丫嘛,一年都係見兩三次咋......
      對,服務性行業真係好重視係咪有殷勤服務,係咪有帶個心返工其實顧客係好容易感受到的!!

      刪除
  4. 我每次去香港都會去APM , food food food <3 !

    回覆刪除
    回覆
    1. 都唔錯㗎,而且交通都好方便^^

      刪除
  5. 好似幾好WO!
    一年都仲有見一兩次見..已經好好啦!
    我既舊同事...都唔知有無兩年見一次呀...哈哈!

    回覆刪除
    回覆
    1. 可能由於大部份都係一畢業就做到依家,所以特別多那些年的回憶分享下,佢地講好多舊公司的人與事其實我都識嘅,有共同(八卦)話題丫嘛hahahaha....

      刪除
  6. 未齊人都比你入去坐都算幾好,因好多食店,講明吾齊人吾比入去坐,重要限時個半小時交枱﹗

    回覆刪除
    回覆
    1. 係呀,尤其係日式放題果啲,我都理解佢要做多幾輪客先圍得起舖租嘅,所以如果係想慢慢吹水果隻就盡量唔好揀喱類囉^^
      新年快樂~~~~!!!

      刪除
  7. food court應該多D選擇才好。

    回覆刪除
    回覆
    1. 都啱㗎,如果係唔記得咗打電話book台,又或者只有一兩個人的聚會,食food court都係不錯選擇吧!!
      新年快樂^^

      刪除
    2. 祝Gael身體健康!心想事成!

      刪除
    3. 大家咁話^^萬事如意....

      刪除
  8. 其實我唔係好鐘意行 apm, 以前試過日日都經過, 都唔想行
    Food court 而家仲有無 pepper lunch? 果陣味九里遠都聞到XD

    回覆刪除
    回覆
    1. 其實都無乜特別野買,通常係食野,交通比較方便,近地鐵.....
      我諗應該冇咗啦,依家個food court縮咗水

      刪除
  9. 觀塘越來越旺,有好多選擇。

    回覆刪除
  10. 大龍躉兩食($288)好好食咁喎, 滑滑吧!

    一班人吃東西試多幾款又熱閙!

    年初五快樂!

    回覆刪除
    回覆
    1. 都ok喎唔太搵笨XXD
      人多可以試多幾味囉^^
      預祝你人日情人節也快樂~~~!!

      刪除
  11. 祝你新年快樂~心想事成~
    呢間野都幾抵食喎~~~~~~

    回覆刪除
    回覆
    1. 祝你有個順利又愉快的旅程^^
      唔錯㗎,價錢味道也ok

      刪除
  12. 恭喜發財)))))
    哩間d野食好唔錯喎

    回覆刪除
    回覆
    1. 祝萬事勝意龍馬精神!!
      感覺幾抵食呀

      刪除
  13. 觀塘我都經常去,真係越來越多食肆~
    祝新年快樂!

    回覆刪除
    回覆
    1. 係呀,依家多咗幢鱷魚恤更加多.....
      祝如意吉祥happy new year~~~!!

      刪除
  14. apm好多人,食飯時間唔易揾位....

    回覆刪除
    回覆
    1. 我估都係啦果邊多咗好多office

      刪除
  15. 我無外遊喎,我同基爾你一樣大時大節都唔會外遊架~
    大龍躉兩食好似好吸引。
    祝初七人日生日快樂

    回覆刪除
    回覆
    1. 貯返啲假第時off-season去抵啲^^
      如果愛食魚都可以一試呢
      大家咁話,生日快樂^^

      刪除
  16. 祝Gael 先生 : 心想事成 Vs 事事如意 ~

    回覆刪除
    回覆
    1. 也祝sky萬事如意明撈秘撈都賺多啲^^

      刪除
  17. 你唔講聚舊,仲以為係情人節套餐~~~
    我可能唔太高要求,外邊的小籠包都鍾意食...

    回覆刪除
    回覆
    1. 情人節套餐食咁多嘢咁個情人都幾大食下喎kakakakakakaka....
      外邊食小籠包一般都幾貴,可能係人工貴吧

      刪除
  18. 有時都會去apm,但好少幫襯啲菜館,這間京饌的套餐看來不錯!

    回覆刪除
    回覆
    1. 第時行過咪去試下囉,不過最好book定台先好D

      刪除
  19. 早幾日去food court食過,啲嘢真係唔多掂!
    大龍躉兩食,如果夠新鮮~味道應該唔錯.

    回覆刪除
    回覆
    1. 少咗選擇囉
      我覺得都唔錯喎味道

      刪除