2016年2月14日 星期日

煎魚肉蓮藕餅

某個周末晚上閒來看電視正在播《神廚遇上女主播》,這集是由高師傅教新聞主播曾美華煎蓮藕餅,望落雖然工序多但應該handle到,於是向基爾媽申請重開親子P牌型廚教室!



睇完個電視節目,其實心中已有個譜,加上有基爾媽傍住應問題不大吧……先去街市買來一小截蓮藕,揀蓮藕都有學問,基爾媽傳授秘訣係長身係較爽用來炒菜較佳,圓身的較易煮林多數用來燜或煲湯云云;魚肉就去魚檔買$10-15蚊已經好夠食。



平時喱個刨一年都只係會用兩三次,而且多數用來刨蘿蔔絲整蘿蔔糕(整蘿蔔糕請click:蒸蘿蔔糕 ),喱次第一次拎來刨蓮藕絲,不過方法同刨蘿蔔絲會有些少分別,蒸蘿蔔糕的絲要刨得較長身,整蓮藕餅的絲就要盡量短而細,接近蓮藕蓉狀會好食D。



其實高師傅在節目中係用蓮藕絲拌豬肉蒸肉餅,不過基爾覺得用魚肉會健康D無咁「三高」,所以就改了食譜。其實煮野食好多時都可以自由執生,下次又可以試試玩下煎芋頭餅,不過煎芋餅要多幾個steps,就係要先去皮切片和完全蒸熟蒸林晒個芋頭,才能與魚肉混成一體。



魚肉和蓮藕絲大約係half-half啦!口味因人而異,不過如果蓮藕絲太多可能會散吧!魚肉方面基爾媽提議可加上蔥花和切粒加瘦臘腸(節目中高師傅加了蔥花和蝦米粒冬菇粒,口味也是因人而異),基爾平時完全唔食蔥,但肉餅加少量蔥花可以接受。



幾乎忘了蓮藕絲拌魚肉之前仲有一個非…常…重…要的step,就係要先盡量搾乾蓮藕絲的水份,蓮藕絲若大多水份原來會令肉餅整出來不夠結實。蓮藕絲搾乾水後再與魚肉拌勻,其間可以加入少量雞粉、胡椒粉、麻油和豉油調味。



搞勻晒蓮藕絲和魚肉之後就可以落鑊煎了。用平底易潔鑊煎野可以用少D油,睇電視的高師傅因為手藝熟練就用唧魚蛋方式,基爾唔識控制咁就用搓湯丸方式啦!不過手上要先拍上粟粉以免魚肉黐手。



一個個大魚肉丸放在煎pan上之後再輕輕壓平成為肉餅狀,先煎熟煎香一面,才反轉煎另一邊。如果想煎薄D易熟D可以再用鑊剷壓平一點,不過基爾鍾意厚身D似burger的肉餅狀,食落覺得好味D。



由於還有一點魚肉剩下來,咁同場加映埋魚肉煎釀茄子吧!(整煎釀三寶請click:煎釀青椒矮瓜)可先將茄子斜切片狀,中間界幾刀挖個小凹位,再搽少少粟粉,魚肉釀上去會穩陣一點。



剩下的魚肉不太多,所以盡量塗薄薄的一層已足夠,煎的時候魚肉也無咁容易甩出來,會靚仔D!基爾慳家,挖出來的小粒茄子肉也可重新混入魚肉中搓勻再釀。



好喇唔講咁多馬上落鑊煎一煎,煎釀茄子時也有個小秘訣,就是要先煎熟釀了魚肉的一面,落鑊後先不要亂動……



等一會魚肉煎熟了穩陣了之後才再反轉煎熟另一面,咁樣魚肉同茄子就打風都打唔甩。



最後上碟當然要影下製成品玉照,基爾媽話鍾意煎釀茄子再與椰菜散花和甘筍煮,加蠔油生粉水煮成獻汁上碟即可,當然若直接上碟基爾也覺得完全沒問題。



至於魚肉蓮藕餅也煎得相當靚仔,平時一向「謙厚」的基爾咬一啖試味發現確實係…極…度…好…味呀(全力開動自吹自擂mode),很喜歡軟軟的魚餅又有爽爽的藕絲口感,幾乎要好似味皇和食神中的家燕姐咁要睡在藕餅上面轆幾轆不斷翻滾!聽高師傅話整蓮藕餅其實食材用料不貴,但由於工序繁多(是幾花心機的傳統菜式),依家好多食肆都已經不再整了,即使menu有提供都會賣得好貴,一碟只6-7塊已經要成$60-70蚊云云,今次基爾仲唔發大達!

63 則留言:

  1. E依,我又學到了!一於照辦煑碗啦!

    回覆刪除
    回覆
    1. 你又開返個親子烹飪班啦hahaha....

      刪除
  2. 回覆
    1. 你可以整啲畀專員試下啦,唔知佢食唔食喱類嘢呢?

      刪除
  3. 掂喎﹗又吾係咁難,等我都試整先﹗

    回覆刪除
  4. 如果你整濕對手,啲魚肉就唔會黐手,可以比你玩弄於股掌之中。。。

    回覆刪除
  5. 回覆
    1. 又係喎,下次又試下,多謝王子提點

      刪除
  6. 回覆
    1. 都係㗎,要放假先有時間搞下囉:P

      刪除
  7. 基爾兄直情加晒分啦!
    要藕餅煎得好食,唔容易~~

    回覆刪除
    回覆
    1. 情人節煎藕餅俾情人食..基爾兄直情一定加晒分啦!:P

      刪除
    2. 森兄識畫畫又識養生咪仲加分^^
      都係嘅又要刨絲又要撈又要整餅煎,要花一點心機和時間

      刪除
    3. Kaka同你啲honey兵團玩煮飯仔也不妨玩下喱味啦XXXD

      刪除
    4. 開唔開班呢?
      叫D兵團去你度實習吓先...都好喎!.....XXXD

      刪除
    5. Kaka啲兵團陣容咁強大有啲驚喎XXXD

      刪除
    6. 真的是拍馬也追不上基爾兄果啲...強大陣容喇!

      刪除
  8. 我都鍾意食藕餅...
    但...我好懶惰,我只會去超市或吉x島買現成的來煎...:P

    回覆刪除
    回覆
    1. 其實可以有好多變化,藕餅蝦餅芋餅大同小異.....
      係喎我都試過去超市買現成的,係方便好多但好似無自己整咁足料咁好食.....(自我感覺良好)XXXD

      刪除
  9. 好日唔廚,一廚就咁正
    哩兩味我都鐘意食

    回覆刪除
    回覆
    1. 周末間中都有廚㗎不過冇寫blog而已:P
      咁你下次同大爺玩煮飯仔時又可以試下啦^^

      刪除
  10. 回覆
    1. 等我實習多啲先.....怕醜XXXD

      刪除
    2. 都煮咗出嚟啦~~仲要實習多啲?!!!
      係咪聽者有份先?!!!

      刪除
    3. 咁都要學多幾樣似樣啲嘅先得嘅~~~~:P

      刪除
  11. 原來 HK Gael 也是廚神,何時開一桌私房菜給大家試菜呢?(見到製成品,流口水,哈哈哈)

    回覆刪除
    回覆
    1. 私房菜又誇張咗啲喎:P

      刪除
    2. 一點也不誇張,而且一桌是太少,因為您實在有太多網友。

      刪除
    3. 你想我去會展擺咩~~~~XXXXD

      刪除
  12. 基爾果然多才多藝! 我只能煮D簡單餸菜咋~

    回覆刪除
    回覆
    1. 咁銀哥有冇試過顯身手煮啲畀銀嫂食下?^^

      刪除
    2. 我成日都顯身手的hehe~
      如你將來睇到我中後段嘅非洲之旅,我玩露營車時日日都顯返幾手添,呵呵~

      刪除
    3. 可惜依家要清左D短線遊先~

      刪除
    4. 咁我畀心機等下,期待看你的廚神look~~~~kakaka...

      刪除
  13. 蓮藕我又鍾意食!幾時搞 home-cook party?

    回覆刪除
  14. 可惜基爾唔用英文寫, 否則要叫我的菲傭睇睇呢篇囉.

    回覆刪除
  15. 難道甘高都整到, 抵你發達

    回覆刪除
    回覆
    1. 難都唔算太難但要少少心機和時間囉^^

      刪除
  16. 我早幾晚都整左, 不過係用豬肉...haha!
    蓮藕我切粒仔, 好似有咬口d -- 好似..hahahaaa

    回覆刪除
    回覆
    1. 節目中原本都係用豬肉呀,豬肉就要煎耐少少先熟透...
      如果鍾意食爽口啲都可以切粒㗎

      刪除
  17. 我都幾鍾意食蓮藕架.
    煎魚肉蓮藕餅,睇落唔錯喎!~正呀!

    回覆刪除
  18. 叻叻 ! 我從未煎過藕餅 , 哈哈因為唔識整 .

    回覆刪除
  19. 要学吓至、得谢謝你的分享啊!

    回覆刪除
  20. 回覆
    1. 蓮藕爽爽地配合魚肉幾好味

      刪除