2016年3月21日 星期一

散策郵誌@米拉貝爾

唔知仲有冇人會有興趣睇基爾D陳年老照片,上次歐遊冇記錯無十年都有八載,有少少身痕但又冇錢(雖然依家歐元好平)……Anyway,睇返舊相簿止下痕先!



唔係好記得去喱度果陣係第一次定第二次去歐洲,不過果陣無直航(依家有冇直飛呢),記得好似係搭瑞航在Zurich轉機。



另一樣好記得係,當年要山長水遠專登去中環匯豐總行兌換Schilling,紙幣肯定早已洗晒,只洗剩幾個coins依家仍貯在豬仔錢罌裏留念。至於郵票就仲有留返好多!基爾覺得奧國郵票一般都幾靚喎,好多都係因為有特別紀念價值而發行,有些是偉人,又或者地標建築之類……



例如上圖紅白國旗旁邊藍色那一張面值4先令、印有花式滑冰運動員的郵票,基爾咁多年來一直以為是紀念舉辦冬季奧運會(Innsbruck先後在1964及1976年舉行過兩屆冬奧),不過寫blog前查一查德文,才知其實是為1979年維也納舉行的世界盃花式滑冰賽而發行。



在芸芸blog友當中,相信都無乜邊個會好似基爾咁無聊逐張郵票去查根究柢吧!有時仲未夠癲,仲要去查埋拍賣網到底張郵票依家值幾多錢(到底喱個人係咪有強逼症,有點驚)?又以上面喱張維也納新城大教堂落成700周年的紀念郵票為例,1979年發行時面值只不過係4先令,目前聲稱就話值15蚊人仔(約HKD$18)。



其實咁多年來基爾都無check過喱類郵票到底值唔值錢,更加無諗過拎去廟街或者旺角夜市擺檔去賣,只係純粹收入床下底個文物囊裏。上圖那些奧國偉人到底又認識幾多個呢?



上圖喱個基爾就唔多識,是名字叫做Johann Florian Heller的臨床醫療化學家,生於1813-1871年,這枚6先令郵票發行於1981年8月31日,紀念當時維也納召開的國際臨床化學協會大會,目前值2英鎊(約HKD$23)。



唔怕悶親就繼續睇落去啦!上圖喱張就一定唔會唔識,這枚發行於1959年5月30日的是Joseph Haydn逝世150周年紀念郵票,海頓(1732-1809)與莫札特及貝多芬被譽為維也納古典樂派三大翹楚,也有「交響樂之父」之稱,而郵票面值是1.5先令,近40年後的今天會否值錢?



上面喱張都有點特別,既非偉人也非風景和建築物,究竟係乜東東?見到Sportttoto字樣值計係同運動競賽方面有關,check過之後應該是當地一項幾熱門的運動比賽博彩活動,1974年發行時是紀念開賭25周年吧!現時估計約值1歐元(約HKD$8.5)。



嫌悶都繼續講多幾張……上圖左果張幾得意,很有點現代抽象派的畫風,中間穿越的好似係一條河流,八卦上網check完才知是紀念Villach建城1100周年而行發的郵票(878-1978),基爾當年沒去過菲拉克這城市,查過google map它位於奧國南部鄰近斯洛文尼亞邊境,而流經該市的就是德拉瓦河,是多瑙河其中一條支流。至於圖右是紀念1979年維也納舉行的世界道路協會會議,唔睇郵票都唔知世界上原來真係乜野協會都有。



基爾成日都好想試試坐上圖左這類歐洲古董火車,這枚發行於1977年的仿古郵票面值2.5先令,是紀念奧地利鐵路建設140周年,原來奧國早於1837年開始建造火車鐵路,比香港開埠還要早幾年呢!右圖面值4先令那張見到國際獅子會徽號,是紀念該會於1979年在維也納召開的歐洲論壇會議。



好喇睇完晒D悶野之後,點都要睇返D「醒神」野平衡返係咪?其實當年基爾都只係去左幾處「例牌」旅行景點咋!唔駛囉唆多講應該大部份人也認得出左邊兩張係Schloss Schönbrunn,基爾覺得遜布倫宮(也譯美泉宮/麗泉宮)真係幾正,有機會再去睇雪景;右圖係多仔女皇Queen Maria-Theresia雕像,應該唔少人都留低過腳毛。



資深一輩的電影迷好多時對奧地利有唔少憧憬,主要原因係睇過Sound of Music,基爾當然都有睇過這齣60年代音樂劇名片,一早mark定去到Salzburg點都要去Schloss Mirabell睇下,其實米拉貝爾花園又唔算好大喎,當然係相對遜布倫宮而言。



唔知依家果度附近有冇民族衫租,如果有下次都可以租件來影張相,應該會幾好玩!平心而論,睇返基爾當年個薯嘜樣都真係好有high school feel(自我感覺良好mode)。

41 則留言:

  1. 依家有冇直飛呢>> 今年9會有直飛維也納。
    奧地利郵票唔多升值。我有條癮買番我出世嗰年嘅奧國郵票,都唔係太貴。

    回覆刪除
    回覆
    1. 咁應該多好多大陸團經HK去喎.......
      出世果年咁近應該不會太貴嘅XXXD
      不過如果要特登搵我又未試過喎

      刪除
  2. 你冇強逼症,是熱愛和認真罷!十年八年前,不是很久的事,只不過時間真的過得很快!

    回覆刪除
    回覆
    1. 也可能係無聊kakakakaka....
      時間真的過得很快呢

      刪除
  3. 邏輯唔啱…十年八載前可以去?!!
    相對咁多年嚟都儲落唔少啦~~~哈哈哈
    呢啲郵票幾有收藏價值!!....
    人生苦短,日後有假期再去多次歐遊囉~~

    回覆刪除
    回覆
    1. 以前平丫嘛,依家貴好多....對我而言
      儲落唔少====>你講郵票?近排好少買
      無乜實際價值,但就有少少回憶囉
      諗下先啦,唔急嘅

      刪除
    2. 我意思係, 你十年八年裡都儲落唔少錢啦…何解以前去到依家難去?!!
      唔急嘅……真羡慕Gael兄仲有大把青春時光可以慢慢諗~~哈哈

      刪除
    3. 哦哦哦......原來如此!!!
      其實個最主要原因係.....以前間公司係會周不時有啲平嘢益啲員工嘅,所以果陣咪成日去囉,不過自從轉咗工之後依家喱間係無嘅,要自己真金白銀畀丫嘛,會肉尺啲XXXD
      大把青春就一定唔係啦,只係諗住慢慢諗到退休,到時咪大把時間去囉kakakakakaka.....

      刪除
  4. 基爾D陳年老照片...「鬆郁朦」,睇咗等於無睇!:P
    那羅馬式凱旋門(Gloriette)觀景亭好正!

    回覆刪除
    回覆
    1. 話明係陳年一定係咁架啦XXXD
      行上去都值呀,果陣係coffee shop,唔知依家仲係咪?!!

      刪除
  5. 係呀係呀, 歐元平去得過呀! 咁我有遊記睇嘛, 去啦去啦 \(^0^)/
    唔無聊喎, 乜都要查根究底先學到嘢架嘛, 好令人欣賞呀!
    The Sound of Music睇咗好多好多次, 永遠唔會覺得厭嘅一套經典!
    我都有超過十年冇去奧地利, 想當年蜜月係奧地利+瑞士, 好想再去, 因為當年係搭火車, 有啲景點嫌麻煩冇去, 如果自駕就可以去番想去嘅景點喇

    回覆刪除
    回覆
    1. 如果相對以前1歐兌11-12蚊,依家差不多有七折呢
      多謝你唔嫌煩hahahaha....
      以前明珠台成日有得播,近年少了.....
      咁你哋係時候去重度蜜月啦^^一來可以去返啲老地方,二來又有啲新景點去睇下

      刪除
  6. 嘩你好多珍藏喎 , 假以時日一定會值錢 .

    回覆刪除
    回覆
    1. 我諗至少等一個世紀先得喎XXXD

      刪除
  7. 集郵都要好有心機架, 我自問就無喇
    有無諗住歐元低, 去歐洲玩下?

    回覆刪除
    回覆
    1. 都唔駛嘅,只要搵個乾爽地方擺就ok㗎啦^^
      係呀咪就係貪佢平先諗啫:P

      刪除
  8. 好羨慕您囉,我還未去過。您下次真的要穿民族衫影相,我覺得效果會好好。

    回覆刪除
    回覆
    1. 未試過著民族衫,我諗應該會幾好玩XXXD

      刪除
  9. 嘩~好珍貴的回憶!一想起音樂,自然就會想起奥地利……

    回覆刪除
    回覆
    1. 如果單以旅行而言確實係值得一遊呀

      刪除
  10. 華~好勁呀~你咁都可以查到d郵票依家值幾錢呀~~~~~~
    我哥時都有去哥個花園呀~~我覺得幾靚呀~~~~~

    回覆刪除
    回覆
    1. 證明我係咪好無聊呢kakakakakaka....
      果個花園如果係去薩爾斯堡我諗都係必去的呢

      刪除
    2. 唔係喎~我反而覺得好勁!!唔知你係點搵既呢~~係咪全世界既郵票都搵到架???(因為我都想知我d郵票值幾錢~~~~~LoL)
      係啦~~~我都覺得奧地利幾靚同埋氣息唔錯~

      刪除
    3. 其實我都係求其在google打返個郵票個名search㗎咋,有時會在ebay或大陸啲拍賣網睇到個參考價.....
      而且感覺上好似治安唔錯,安全少少

      刪除
  11. 回覆
    1. 老人家通常都愛想當年,所以無得唔認老啦:P

      刪除
    2. 時間真的過得飛快呢^^

      刪除
  12. Gael大大點收集到咁多靚郵票架>.<
    而家想搵郵票都難>.<

    回覆刪除
    回覆
    1. 大部份都係N年以前貯落㗎啦,依家好少人寄信,好難會有郵票XXXD
      或許有朝一日郵票會成為博物館的文物都未定....

      刪除
  13. 這款郵票及地方真係未聽過也未見過!

    回覆刪除
    回覆
    1. 同你一樣啦你介紹啲漫畫我好多都未睇過,獲益良多^^

      刪除
  14. 講郵票基爾認第二無人敢認第一~
    基爾陳年相,果然好醒神喎! 哈哈~ 我D陳年相都一像⋯

    回覆刪除
    回覆
    1. 豈敢豈敢,網上應該大把專才,我只係間唔中班門弄下斧而已XXXD
      我覺得銀哥應該更加英明神武X10...kakakaka....

      刪除
  15. 我睇你對集郵幾有滿足感喎!

    回覆刪除