2016年3月23日 星期三

賞花@青衣公園

近日乍暖還寒經常霧沉沉雨紛紛,四周圍都出晒水濕立立一片,充滿春天的味道。周末原計劃東涌走到大澳,但為免中途濕晒還是作罷!最後轉戰比較短線又穩陣一點的青衣走一轉,即使中途落雨也可方便折返。



基爾特登比預定集合時間早到近1小時,主要目的就是去走一轉青衣公園賞花。第一次來這裏發覺原來都幾方便,因為青衣城有天橋直接連到公園大門外,落雨都唔駛擔遮,再次肯定這次變陣是明智之舉。



清明前後總是這種煙雨濛濛的梅雨天氣,好多人會覺得甚討厭,不過如果係去賞花又幾適合,只要睇每年3月維園花展年年逼滿人就知,基爾怕人多近年就少去花展,反而會嘗試去發掘一些清幽秘境賞花……



鏡頭下這處湖景其實真係唔會比部份外國名園失禮吧!有樹有水有亭台樓閣,本身就是一幅充滿大自然氣息的油畫了。



以前有所謂「3月杜鵑紅」,讀書時代每逢到了考公開試前夕的3月,見到滿園杜鵑盛放就會開始頭痛,事隔多年依家當然可以抱住輕鬆心態去賞花,3月原來也可以很美好!



這天雖然天色陰陰沉沉沒有太多陽光,不過依然有不少龍友來到湖邊set晒一整排腳架長鏡來拍水鳥。如果係好天日子唔知會唔會更加熱鬧?



除了湖邊之外,公園其餘地方真係人影唔多隻,如果係專程來影相消閒靜靜逛一個下午的話,也覺得甚愜意。



園裏有不少歐陸風味十足的小噴泉和塑像,鏡頭下都有少少歐洲皇宮後花園的味道。唯一有少少煞風景係背景遠處的住宅高樓大廈,要唔「穿崩」會有少少難度。



Anyway,如果單以賞花影花而言,愛花之人應該可以過足癮,不過基爾這天怕落雨天潮濕就索性唔帶相機同行,只用手機影幾張滿足一下走馬看花式snapshot就夠了。



值得一提係其中一處山坡竟然有一整幅盛開的簕杜鵑,非常壯觀,很有點花海的氣勢。另外上圖這處人工小瀑布也不錯,再過多個零月蓮池上可能仲欣賞到蓮花盛放的初夏景緻。



雖然手機鏡頭始終比相機差少少,但只要發掘到一些絕色角度其實也不難影到影相。除了上面這張「自我感覺良好」之外,基爾在園裏也影了不少全景照,大可以日後慢慢拿來作為裝飾blog頂招牌之用。



再想深一層,其實這天揀著霧濕天氣來遊園都唔錯,至少蚊蟲仲未算太多,如果再過多兩三星期可能惹蚊的人就要搽定多D蚊膏貼多幾張蚊貼才來會比較穩妥。

63 則留言:

  1. 我就住喺對面,真喺太方便,
    但我從來無去過青衣公園,
    不少網友都提供這公園的靚相,
    好多時都喺捨近途遠。

    回覆刪除
    回覆
    1. 搵個weekend去行下囉^^
      係呀好多時都係近果D反而無去,因為成日諗住隨時可以去

      刪除
  2. 杜娟花開得好靚,我家左近的公園都有大量新鮮的杜娟花,還吸引一批畫家到來寫生﹗

    回覆刪除
    回覆
    1. 係呀其實依家正值係杜鵑花盛開季節,好多地方都開得好燦爛

      刪除
  3. 我都好鍾意杜鵑花呀...仲要係一大埋杜鵑花, 好靚架~

    回覆刪除
    回覆
    1. 係呀開得好密果陣都幾靚㗎^^

      刪除
  4. 去過青衣城N次, 都行過呢個公園呢

    回覆刪除
    回覆
    1. 係咪專員都留咗好多腳毛在這裏XXXXD

      刪除
  5. 呢個公園幾靚喎~~~
    我地澳門都有個盧九~唔知你有無黎過呢~

    回覆刪除
    回覆
    1. 梗係有啦喱D老地方我實有去^0^
      http://gaelhk.blogspot.hk/2007/04/blog-post_7.html

      刪除
  6. 回覆
    1. 阿伯們的熱門好去處kakakakakaka......

      刪除
  7. 特登早到都唔知係咪同人拍拖行公園啫.

    回覆刪除
    回覆
    1. 你以前成日去果度拍拖㗎咩?!@@

      刪除
  8. 青衣城去過好多次,反而未去過青衣公園,見啲blog友影啲羽松及水松景好靚,
    你Blog頂張全景照相好正!:D

    回覆刪除
    回覆
    1. 哦哦哦~~~~~原來係去影羽松和水松.....唔怪得咁多長鏡頭在水池邊......
      都ok收貨吧:D 不過有啲大霧,濛濛地咁囉:P

      刪除
    2. 我記得12月1月果陣係好多人來影羽松黃葉

      刪除
  9. 青衣公園最靚嘅係紅葉景,现時還未有。

    回覆刪除
    回覆
    1. 之前幾個月啦,12月同1月果陣係睇紅黃葉景的旺季,湖邊啲松樹一整排變晒黃色好靚好壯觀的....我都係見人地影果啲相,我自己無去到:P

      刪除
  10. 青衣公園都幾靚,雨中賞花更有一番味道!

    回覆刪除
    回覆
    1. 對呀,不過落住雨影就有少少論盡囉:P
      你拍的也很美呢^^

      刪除
  11. 我見到個景,有點澳門的感覺。

    回覆刪除
  12. 呢個公園我有一段時間成日都經過,可惜無一次留步觀賞⋯

    回覆刪除
    回覆
    1. 青衣我諗都係區內人比較多入去,區外人應該唔太多會專登到訪吧

      刪除
  13. 這公園遊人唔太多 , 我都好鍾意到這裡遊逛 .

    回覆刪除
    回覆
    1. 靜靜地唔算太多人呀,hea行個幾鐘也是不錯之選,唔駛成日行商場咁悶囉XXD

      刪除
  14. 好驚喜呀, 基爾兄今次咁快發文嘅, 支持支持 ^^
    咦, 原來青衣有個咁靚嘅公園, 好過山長水遠去大澳呀

    回覆刪除
    回覆
    1. 就憑你喱一句咁我就勤力返少少盡量寫返多啲報答你支持啦XXXD
      近排天氣濕立立又常下雨,長線行山好似唔太適合,留返好定天先去啦......
      同埋依家大澳在周末假日真係旺過旺角,多人到嚇親人,搭巴士都經常要排長龍hahahaha.....

      刪除
    2. 係咪架, 多謝先^.* 但千萬唔好有壓力喎, 你寫得開心, 我哋先會睇得開心架嘛 :)
      郊遊都係諗住relax吓, 多人又真係會搞到冇乜mood

      刪除
    3. 今日天氣好好多啦,復活節快樂^^
      我其實比較期待睇你地南美之行多一點hahahaha....

      刪除
    4. 唔好意思, 有排都未寫到 >.<
      年尾應該唔會去旅行, 所以我冇迫自己寫快啲, 免得之後冇嘢寫 :p

      刪除
    5. 咁都好嘅,慢慢寫可以慢慢睇,反正不急^^

      刪除
  15. The photo of the blog heading is very nice.
    I haven't been to this park!!
    It looks quite nice from your photos!!
    (Can't type in Chinese ><)

    回覆刪除
    回覆
    1. 多謝你~~~~全景相好似擺在heading大張啲,放在blog裏好似太細張了......
      交通方便,不妨去逛逛^^冬天也多人去看紅葉!
      去了外遊所以打不到中文字?

      刪除
  16. 同意.....點影都好,好難被開高樓大廈

    回覆刪除
    回覆
    1. 你最有經驗啦經常去拍拖XXXD

      刪除
  17. 基爾好識走位, 竟然可以影到只見花不見人, 好似成個地方俾你包起咁。
    我嘅blog30幾個blog友留言全部失蹤(包括你的留言), 只可以在Gmail見到通知(只有人名, 沒有內容), 而且不能作覆。你這裡似乎冇事發生, 希望我這留言逃過“被失蹤”厄運啦。

    回覆刪除
    回覆
    1. 有時都會想學你咁影下D人㗎^^
      你試下入去設計===>留言=====>垃圾留言,啲留言可能全部跌晒入垃圾留言果度,可以逐個手動搬返出來

      刪除
  18. ♥•.♫.¸.✫¨´`'*°☆.--•╬•
    (\~~/)♥•.♫.♥•.♫.♥•.♫.
    .(='.'=)祝復活節愉快!
    .(")~(").✫¨´`'°☆.-•╬•
    ♥•.♫.¸.✫¨´`'*°♥•.♫.¸.✫¨

    回覆刪除
  19. 青衣公園 Sky 十年前去過一次^^
    天气是夏天 @ 感覺好 ^^

    回覆刪除
  20. 回覆
    1. 依然保養得唔錯,幾新淨呢^^

      刪除
  21. 今年春天好似遲左少少~上年呢個時間我已經落水玩喇!

    回覆刪除
    回覆
    1. 舊年11月仲好熱呀,好似冬天漸漸移到去年頭

      刪除
  22. 回覆
    1. 濕立天氣實難頂,要常開抽濕機先掂

      刪除
  23. 很多年前去過青衣公園,那時的花草樹木沒有現在那麼多。
    見到照片上的建設都多了很多。去年的落羽松很多人去拍照哩。

    回覆刪除
    回覆
    1. 依家個園林湖邊造景都唔錯,地方小小但五臟俱全,HK寸金尺土算係咁.....
      賞落羽松係那裏的名勝XXXD年底好多人來影秋葉^^

      刪除