2016年6月12日 星期日

後現代阿伯生活之賞莫奈:上

炎炎夏日三十幾度除了浸在水中之外,去逛商場或到茶樓、圖書館打躉都係唔錯的消暑活動,如果覺得無新意,咁去巡巡博物館既有冷氣嘆又有各式展覽睇,亦係唔錯的選擇。



今年暑假最hit的展覽都莫過於這個以法國印象派大師莫奈(Claude Monet, 1840-1926)為主題的畫展,反正預計日日都會好多人去睇,咁就索性揀周三有半價先去。



博物館平時周三係免費日,不過今次莫奈真蹟名畫遠自法國多間藝術館空運而來,可能運輸成本保險都貴所以要收$10,但其實都係勁抵,只要去過法國D藝術館就知佢地入場費有幾貴!上圖係文化博物館大堂長樓梯豎立的莫奈展廣告板,要影多幾張因為佢會變色,有藍有紅有綠好靚。



買左飛咁就拿拿林入場上一樓展廳。先睇上圖喱間個展廳設計都幾特別,一入去就好黑漆漆又掛了好幾塊白布圍成一圈,投射了莫奈居於法國小鎮Giverny時建造的水榭花園,就如巨型的curved tv一樣像真度很高,令人感覺恍如置身水園之內。



這個Giverny水榭花園之所以咁出名,主要原因係莫奈一系列著名的睡蓮代表作品都是在這裏取景。展廳裏特別之處係修築了一條小木橋,橫跨在地面投射的蓮花池塘上……



身處橋上看風景,霎眼間真有點以為來到法國Giverny這個莫奈精心建造的小花園裏一樣,又有點似化身進名畫裏成為其中一個「路人甲」!唯一比較後悔偷懶無帶相機去,剩係靠手機影就一定唔夠光。



除了投射映像版的小花園外,展廳還復刻了莫奈故居裏的起居室、飯廳和畫室,都是非常值得參觀的場景佈置,其中還展出故居建築的照片作對比。下次如有機會重遊巴黎,真的要抽一天去逛逛這個西北邊的小鎮。



先睇睇佢個飯廳,今次莫奈展基爾真係覺得佢搞得幾有心思,這飯廳不只單純復刻了莫奈故居的餐桌餐椅壁爐和布簾門窗等陳設,餐桌上還有一些「別出心裁」的餐具……



餐桌上有部ipad可以「點菜」,menu上主要係莫奈早午晚餐以至雪糕甜品等常吃的東西,這樣就比慣常單純看展板的圖片文字介紹生動得多了,對莫奈的生活環境細節也有更完整的認識。



不說不知莫奈除了畫畫出色之外,原來仲係「識食之人」,愛各式美食之餘也會下廚,可能因為在法國小鎮深居簡出,平時除了畫畫之外,閒來就愛煮返兩味作消遺吧!



單看這dining room的佈置也很美,原來莫奈喜歡飯廳以黃色作主調,因為貪佢夠warm,有家的感覺。不過照片中似乎人人都好專注細看「莫奈menu」,反而無暇欣賞這間小黃廳的細緻陳設。



由於Giverny故居附近有近2英畝蘋果園,所以蘋果批、蘋果酒都經常出現在莫奈的餐桌和畫中,另外諾曼第著名的Camembert及Neufchatel芝士都是早餐慣常菜式。



午餐晚餐方面,莫奈原來極愛吃Yorkshire Pudding,有時會配燒牛肉、羊肉或火雞肉蘸上肉汁吃,也會摘取花園種的沙律菜作side dish;魚方面,諾曼第龍利魚做的傳統菜式Sole a la Normande也是他的心頭愛。上圖是飯餐壁爐上掛的幾幅日本畫,有段時期莫奈瘋狂愛上了東洋畫,還買了不少珍藏家中,就連花園裏的小橋也採用了東洋風建築設計。



「食飽飽」之後,再行過去隔籬以紅色作主調的起居室休息一陣。這間充滿情調的living room除了有雅緻的布梳化、貴妃椅、台燈擺設和桌椅之外,仲掛了不少印象派的復刻名畫……



不過最吸引基爾眼球的反而是上面這扇大玻璃窗,望出窗外滿眼就是樹影婆娑的迷人鄉郊靚景。由於這片園林美景實在太靚太逼真,很有理由相信當年莫奈買下這間屋都係為了這個靚景。



不過這「迷人玻璃窗」最勁之處,原來佢仲會每隔1分鐘左右就由朝早晨曦變成午後再慢慢變成黃昏和入夜,全日的早午晚風景盡收眼底實在太amazing了!基爾覺得D豪宅樓盤示範單位設計師都好應該來「取經」。



睇睇下突然有成群人湧入來起居室,應該是導賞團煞到,全個living room即時擠得水洩不通,咁基爾唯有退出去隔籬另一間「莫奈畫室」吧!



莫奈畫室最主要係一張超大型的白色工作台,聞說個別日子這裏會有沙畫表演,不過基爾這天來就沒有這個節目。至於畫室隔籬特設的塗鴉室(左上圖),就有不少人來留下到此一遊的「大作」。



睇完畫室見導賞團的人潮散退了不少,於是又行返去花園那邊,反正一場來到又無謂咁快走啦!而且之前因為人太多,有些場景圍滿人排隊影相跟本都無辦法逼到埋去睇真,咁趁人少D又走去再仔細睇多一遍。



人潮散了之後,仲可以有充裕時間輕輕鬆鬆上橋影下相添!其實好多人都係想影相多過去睇畫,基爾覺得將場景和名畫分開展出都不失為一個幾好的處理手法,既可滿足遊人的拍照慾望又不妨礙別人賞畫。



行完一圈咁又出返去,順便又逛埋隔籬的趙少昂藝術館,其實之前來時都有逛這間常設展廳,不過佢會定期更新廳內的展品,今次換上的主題是「丹青四季」,之前好似沒看過。



趙氏與莫奈一樣,畫家詩人可能對四季變化的觀察特別細緻,所謂「丹青四季」是他取材自四季萬物生態變化的畫作,不論盛夏蟬鳴荔熟垂柳依依還是冬雪夜月賞梅花,都可從中領悟人生,感受與大自然共處的和諧……



這次展出以春夏秋冬為主題的畫作有40幾幅,畫中有詩詩中有畫,這就是國畫最大的特色,不論池塘邊一躍入水的青蛙,還是點點海棠紅,神韻皆活現紙上栩栩如生,與印象派的光影流轉風格相比,又是另一種的美。



上圖是同場展出的趙氏印鑑。咁睇完一輪國畫之後,仲未去到睇莫奈真蹟間展廳喎!由於篇幅太長,為免悶親blog友都係留返下回分解吧!



p.s.寫這篇blog時赫然發現基爾大典自從搬來blogger這裏之後,累計瀏覽量原來已接近10萬人次了(之前在yahoo時反而沒有留意有幾多),當然10萬這數字與好多其他人氣blogger而言實在是小巫見大巫,不過對於大典而言也是個里程碑。至於對基爾來說,click數有幾多就沒太大意義(反正都係hea寫),反而繼續同blog友們chitchat才是最大動力吧!另一樣最希望係blogger這裏可以長命百歲,試過一次搬blog已經煩到震,實在不想再經歷多一次了!

60 則留言:

  1. 下星期我已約了老師和同學同行主要賞真跡,會使用導賞服務,花絮可能不夠時間細看,還好,可以分享你的介紹!

    回覆刪除
    回覆
    1. 成班同學老師一齊去一定開心好多可以分享下寫生心得^^
      我果次去見果位導賞員個咪就好似唔係好夠大聲,一米以外幾乎已聽唔到佢講乜有點失望,其實可以再調校大聲少少丫,否則就有點浪費了她的講解.......

      刪除
  2. 莫奈花園固然值得一看,但係這裡趙氏印鑑的藝術雕工會更吸引我!

    回覆刪除
    回覆
    1. 係呀,我都覺得個印鑑陣容好宏偉^^所以影埋畀你睇下hahahaha....

      刪除
  3. 係囉﹗搬BLOG真係好煩,一次已足夠﹗

    回覆刪除
    回覆
    1. 對呀,如果有經歷過就知有幾煩.....
      唔知依家yahoo冇咗blog係咪會少咗人click上去?

      刪除
  4. 回覆
    1. 個idea真係幾唔錯,又夠生動!!

      刪除
  5. 去巡巡博物館既有冷氣嘆又有各式展覽睇?奧地利王子?睇嚟基爾準備做香港王子~ 哈哈~

    回覆刪除
    回覆
    1. 有銀哥在前,我點敢自封喱個雅號XXXXD
      極其量都係只敢做侍衛或者書僮而已wakakakakaka....

      刪除
  6. 星期三都咁多人?!
    你有無去過佢 Givenchy 佢故居?

    回覆刪除
    回覆
    1. 我諗平時日日都多人去,閒日應該都好多老師帶學生去睇嘅,因為個展期都唔算長,去到7月中㗎咋....
      冇去過呀,所以如果有機會重遊巴黎,都諗住抽一日去行個圈

      刪除
  7. 呢個我想去睇呀, 多謝介紹, 睇嚟應該去走番轉!
    恭喜基爾先, 您唔hea寫架, 次次我都學到嘢架! 完全同意, 真係唔好再搬blog喇!

    回覆刪除
    回覆
    1. 我諗都幾人頭湧湧,希望唔會掃你興.....或者盡量揀一早去可能會少人D,通常係下午會比較人多嘅!!!
      多謝你鼓勵,雖然依家我都無乜旅行嘢寫但你仍來捧場,希望唔會悶親你:P
      對呀,我地試過一次搬blog噩夢已經夠晒,真係好驚!!

      刪除
  8. 除了浸在水中之外....仲有裸跑都好消暑架.

    回覆刪除
    回覆
    1. 如果你有興趣的話我都唔怕做觀眾捧下你場嘅,話晒一場blog友嘛XXXXXXXXD

      刪除
  9. 正,我都打算去看,有無去參加繪沙畫??

    回覆刪除
    回覆
    1. 無呀我去果日剛好係無沙畫表演,如果想睇要先上網check下邊日有,我諗多數係weekend日子啩?!!

      刪除
  10. 周3都好多人睇,可能個個都係見半價先去^^

    回覆刪除
    回覆
    1. 今次喱個莫奈畫展期較短,我諗weekend都應該一樣多人,所以我費事等囉

      刪除
  11. $10真係勁抵,我度$10分分鐘只係一次廁所價

    回覆刪除
    回覆
    1. HK依家乜都貴,生活水平追得上歐洲,唯一係博物館仲算係好抵的娛樂^^
      要啦歐洲平常去個公廁百貨公司或者乜景點都收一兩歐,所以我鍾意去日本多D,好多景點都係任屙唔嬲kakakakakakakaka......

      刪除
  12. 非常生動有趣的展覽會。 如果再執 blog , 我會收山架。

    回覆刪除
    回覆
    1. 我覺得都幾有聲有色,至少一定唔會悶,大人小朋友都啱睇....
      我諗我都會,至少唔再寫,可能齋睇人地果D

      刪除
  13. 其實十元入場費都好抵睇, 因為名畫唔係時時睇到…水榭花園整得唔錯喎!!!
    Gael兄一連睇兩個畫展, 有冇增添到你的藝術思維呢?!!
    如果唔係有個舊Blog加上某些Blog友…森伯伯一早退咗休……哈哈哈

    回覆刪除
    回覆
    1. 抵㗎,咁遠運來好難得,即使飛去法國都未必睇到,因為有時會閉館.....
      花園個景係整得唔錯,不過都好期待將來有機會去睇下個實景^^
      都會嘅,不過平時睇你個blog已經增添不少了@@
      Absolutely~~~~我同你一樣hahahaha...

      刪除
  14. 回覆
    1. 山長水遠運咁多名畫來,真係好值得去睇睇....
      如果在法國會分散開好幾間博物館

      刪除
  15. 我好衰,只對沙田文化博物館間cafe有興趣...^0^

    回覆刪除
    回覆
    1. Really~~~~~佢啲咖啡掂㗎咩?!
      我見其實都幾多人幫襯,咁我下次都去試下先^^

      刪除
  16. 非展畫部份的安排是很有心思。至於,主菜的畫,我覺得擺放得不夠好,予人很擠的感覺。

    回覆刪除
    回覆
    1. 畫比較少但人太多,要耐心欣賞不容易呢

      刪除
  17. 莫奈的畫展,很想去看,不過又慢您一步,哈哈哈

    回覆刪除
    回覆
    1. 都仲有一個月時間左右嘅^^

      刪除
    2. 幸好您提醒要帶照相機,差點白去,哈哈哈

      刪除
    3. 其實去齋睇畫都ok嘅,不一定要影相:P

      刪除
  18. 我都想想地去,不過太有藝術氣息我驚會訓著@@
    香港呢啲展覽好多時都有好多互動,係好正~

    回覆刪除
    回覆
    1. 如果有時間咪去行下囉,當嘆下冷氣XXXD
      今次喱個幾生動活潑,帶小朋友去睇都ok

      刪除
  19. 法國印象派大師莫奈的畫展真的是豈容錯過!
    但....又錯過了與基爾大師相遇的機會添!kakakaka....

    回覆刪除
    回覆
    1. @@又玩偶遇呀?我見到都認唔到你架喎XXXD

      刪除
    2. Gael:我終於去咗睇莫奈的畫展喇!:P

      刪除
  20. 我都覺得個菜單好吸引,哈哈哈。
    好開心在blogs中認識基爾你<3!

    回覆刪除
  21. 看了你的介紹,真想親自去睇!

    回覆刪除
    回覆
    1. 如可以我諗上晝去會少人D,下晝通常都較人頭湧湧

      刪除
  22. 莫奈個展覽都幾有趣喎~~~~~~如果澳門有我都會有想去睇既衝動~~~$10都ok~
    我地反而文化中心係星期日係免費日喎~幾好~

    回覆刪除
    回覆
    1. 唔知會唔會順便去埋澳門展出呢?反正咁遠都運到來東亞.....
      如果有心搞免費日我諗揀星期日會好D,至少可以多D人參與吧

      刪除
  23. YEAH 好野, 到11月7日, 我有機會回來香港看了

    回覆刪除
    回覆
    1. 如無記錯應該只係展到7月11日,希望不會令你空歡喜一場:P

      刪除
  24. 人頭湧湧, 莫奈個展覽好多人!!!
    老老實實,我現在比你更HEA
    HEA HEA HEA 寫BLOG, 如果要再搬,
    我退休啦~~~~

    回覆刪除
    回覆
    1. 幾年前果次印象派都係好多人....
      以自己步伐去寫就無問題啦,自己寫得開心,人地又睇得過癮就ok,寫blog就係咁囉^^
      搬blog實在是噩夢,畢竟blog已經唔再係乜嘢潮流活動,只會越來越少人寫吧:P

      刪除
  25. 你講啲人影相多過睇畫,我諗呢啲至係佢哋嚟參觀嘅原意…
    咁咪又係叫hea住扮有文化咯!

    回覆刪除
    回覆
    1. 自從有了智能手機,多數人都係忙於打卡XXXD

      刪除
  26. 你咁耐唔update,我要摷舊野睇。莫耐畫展好有心思,尤其飯廳點菜,似乎香港人連睇畫展都要揾D野玩下。

    回覆刪除
    回覆
    1. 剛剛update咗不過你未必有興趣睇啦:P
      如果外國博物館搞喱類綽頭嘢可能會有啲怪,只有HK會搞這類東西,可以吸引到平時無乜入場看畫的人也會有興趣入場吧!
      如果係在外國舉辦這類畫展,外國人欣賞西方藝術可能早已經有基礎知識,咁就唔駛靠喱類綽頭去吸引人參觀.....

      刪除