2016年6月6日 星期一

後現代阿伯生活之遊坪洲

今年入夏後天氣好似時晴時陰,看天氣預報這天又說會有雷雨,本來有意取消行程,不過大清早醒來天氣又不算太差,而且都無乜雨喎!咁一於按原定計劃拿拿林出發……



閒日去街其實心情都幾興奮,眼見身邊好多上班族穿戴整齊卻又舂住眼訓搭車返工,自己就可以精神十足咁去hea遊,感覺真係特別逍遙疏乎!晨早出發仲有個好處就係可以搭到返工時段才有的特快巴士,原來早D獅隧又無咁塞,彌敦道也算暢通,結果比預定時間早了很多出到尖沙嘴。



既然咁早,索性在鐘樓下睇住成班uncle auntie耍一陣太極吧!同場還有幾個老外在學耍太極扇,仲耍得頭頭是道有板有眼幾過癮!睇完一輪之後,才施施然行過去天星碼頭搭渡輪,朝早空氣特別好,唔搭地鐵選擇搭船絕對係明智之舉(又要讚自己)。



另一個揀搭船的原因係中環天星碼頭就在港外線碼頭隔籬,如果搭地鐵反而會貴左又行遠左,反正是愜意遊唔駛睇錶趕時間,就來一天「長者慢活」調校慢一點生活節奏吧!看到上圖的坪洲碼頭就知基爾這天hea遊的目的地,weekday去離島除了人少D之外,原來船錢也比周末假日平了一大截,感覺上又賺了一筆!



不過要留意閒日船期班次會較疏,如果唔想搭比較貴的快船最好是先上網check check。基爾這天由中環去到坪洲大約只半個鐘,除了港內較大浪外,一出外海反而風平浪靜,搭船的人也不太多,肯定無去長洲咁墟陷。上圖是坪洲公眾碼頭,有街渡來往對岸的愉景灣。



翻查大典網誌幾年前都去過一次坪洲,那次有去東灣和大利島,今次就主要去行Finger Hill。不過嚴格來講這個實在不能叫做hill,只算是小山丘而已!坪洲有名你叫成個島幾乎係平的,全島最高的這座手指山才不過海拔95米,比市區好多高樓大廈仲要矮……Anyway,起步行山前先去街市買海鮮準備個豐富的seafood lunch!



香港行山有個好處就係一般熱門路線的指示牌都幾清晰,離島也不例外,由坪洲碼頭一直沿住海濱長堤往前走,行到中段就見到往手指山的路牌,由這裏再轉入村就見到上山的大斜路。上圖是海邊遙望對岸的愉景灣,唔知喱度夜晚睇唔睇到迪士尼煙花呢?



入村後見到這條登山大斜道(感覺上超過30度),有幾個同行團友已即時打退堂鼓,寧願返去海邊hea蕩。不過基爾見一場來到而且天氣又唔錯喎,有點陰涼不太曬,咁一於照撐上山去。上圖可以見到山路兩旁民居栽種的紅玫瑰和牽牛花,好少見開得咁燦爛,忍不住幫佢地影張寫真先。



沿路上山其實都無乜大樹遮蔭,如果盛夏暑假來行山可能真係會曬得幾金,幸好喱日初夏來到依然微涼,相當perfect。而且半山沿途有唔少新裝修的靚屋參觀,漫步hea走也有點加勒比或者南歐希臘的小島風情(雖然兩處基爾其實都無去過)……



上山路程都唔算太長,大約同上次行青衣自然徑差不多,以基爾的「長者慢速」上落山來回也不過個半鐘左右吧!山頂有個鳳萍亭可以稍歇一會,由這裏望出去風景都幾靚。這天雖然有點煙霞,但仍可見到對面海的長洲、有三支大煙囪的南丫島,隱約仲見到遠處的香港仔。



在山頂涼亭抖一陣就落山會合返其他團友。途中見到有鐵鑄的殖民時代坪洲地圖路牌,留意到原來坪洲的英文拼音是Peng而不是Ping。另一樣開心大發現係原來手指山上可以說是「離島中的鳳園」,唔知初夏係咪正值蝴蝶的繁殖季節,沿路樹林都有極多色彩繽紛的蝴蝶和蜻蜓在飛舞,有些寶藍色、紫色和黃斑紋的,大鄉里基爾都未見過。可惜隨行的手機捕捉不到翩躚蝶影(飛得太快),咁唯有影欄杆上這條好似結了蛹的毛蟲吧!



返到入村,時間已過了中午1點,開始有點烈日當空的熱力了,好彩已完成行山的行程。順便路經議員辦事處外睇睇貼出來的船期表,諗定大約搭4點船出返中環,仲有成3個鐘想點樣hea飲hea食都絕對卓卓有餘啦!



怎知來到預約好的食店時,卻發現出了小岔子。這種離島小店向來舖面細小,一般只能同時招呼5圍台左右,這天閒日來到竟然有「一日遊團」來包了場。老闆娘本來想在店外加開大台畀基爾一行人,但因為未食已經有點熱加上有D蚊,咁唯有等佢地D團體餐用膳完畢先再返去食尾圍啦!



基爾唔想在店外hea等齋傾計,又行返出去碼頭附近市政街市大廈那邊無聊遊蕩。原來坪洲喱座市政大樓麻雀雖小但又幾五臟俱全喎!除了街市之外仲有間蚊型圖書館,樓上仲有體育館,裏面個gym room仲幾新淨而且設備齊全呢!健身室門外還有個榜,上一上榜竟然又有D驚喜,比年頭驗身時輕左6-7磅咁多?開始懷疑果間驗身診所個榜唔準!



開心完之後,再去八卦下喱張比較新的坪洲地圖,發現原來坪洲都有個迷你版的居屋和公共屋村(就在剛才食店旁一直往前走),另外除了天后廟之外仲有好多唔同的廟宇古蹟和教堂,若要行埋東灣和大利島恐怕真的要花大半天才夠時間巡勻晒。



見差不多兩點鐘開始行到有少少口渴肚餓兼且對腳有點累,索性就在碼頭旁這間cafe坐一陣,背後果幅壁畫影出來真係幾靚,可以扮下去了南法康城都唔錯喎!不過見店面正門交叉纏了封舖的膠帶,似乎這間cafe已沒有營業了,店外有個乘涼伯伯見基爾一臉疑惑就同基爾搭訕,原來這間cafe因為欠租兩個多月,前日已被封舖了。



既然連間cafe都閂埋檔,唯有無奈地moonwalk返去食店先算啦!返到去發現「一日遊團」已經埋單走人了,拿拿林叫廚師開工啦仲諗。早上買來的海鮮其實早就自動運送到食店的廚房裏(這間食店同街市間魚檔係姐妹聯營),老闆娘的老公就是大廚,好勁喎兩三下手腳已經煮好晒熱辣辣拎出來有得食啦!



雖然由午餐變了下午茶餐但份量依然好強勁,有魚有蝦有蟹有蚌有雞有菜非常豐富真係唔知食得邊樣,難得係樣樣都煮得唔錯,有點住家菜風味之餘,油鹽糖份量都比較少,總括而言相當清淡健康,埋單計人均才$170,以海鮮餐計是相當便宜了(記得上次去屯門三聖村食要三百幾蚊)。



食到飽一飽都係時候出碼頭搭船返歸了,結果4:30pm已返到中環。咁早又唔想返屋企住,突然醒起之前睇過blog友寫的網誌,話IFC有個觀景台可以上去參觀,而且係完全免費的,既然一場來到一於又蕩過去八卦下。



問過info counter原來觀景台是在55樓,雖然無ICC個Sky100咁高,但唔駛錢喎(ICC果個要收成舊水門票),唔駛諗一於上去。不過上去之前要先在低層個counter證記身份證(唔知係咪驚恐襲呢),佢會閃電出個pass畀你,才可以去閘口嘟個pass再入去搭。



記憶中架係直上55樓,時間只需大半分鐘左右,隻耳仔會因為氣壓問題聾聾地,打返個呵欠就冇事了。上到來有專人招呼帶路,感覺有少少似去了五星級酒店,一般人來到會當了喱度係免費觀景台(類似外國城市的觀光塔),但實質上這裏其實是金管局的展覽廳。



不過由於展覽廳四周圍都用了全落地的大玻璃窗,所以好多人甚至外國遊客都會當了這裏是「香港觀光塔」。事實上由這裏望出去中西區海岸和太平山風景都好有香港代表性,如果來香港沒有來過這裏就等如沒去過山頂一樣可惜,而且最重要最重要最重要係……喱度連一蚊入場費都唔駛!



既然上到覽展廳,除了影外面個靚view之外,點都要花少少時間睇睇D展品,尊重返人地主人家先合禮儀吧!老實說個展覽雖然規模唔算好大,但都幾值得一看,除了有展板介紹香港百幾年金融業發展歷史之外,仲有好多古董錢幣睇(係人都知基爾最鍾意D老餅野),有D舊十蚊紙、5仙斗零和50年代「事頭婆」的1分錢紙幣基爾屋企都仲有喎,唔知依家值唔值錢呢?

77 則留言:

  1. 開心健康一天遊,慢活也算是養生之道吧!

    回覆刪除
    回覆
    1. HK生活有時真係大急速了,間中要慢返DD^^

      刪除
  2. 金管局果景幾正喎!
    古董錢幣展係文化博物館睇過,都幾值得睇架!

    回覆刪除
    回覆
    1. 靚㗎,如果黃昏去仲可以睇埋個日落維港景....
      金管局喱個就主要係介紹港幣歷史

      刪除
    2. Btw...題目應該改為 "基爾的現現代阿伯生活之坪洲半天遊":P

      刪除
    3. 有次平日去外遊,拖住個喼好悠閒咁喺中環搭機場快線,
      搭緊長長的平地自動電梯時,對面電梯突然有一大班上班族蜂擁而至,
      有啲人用羨慕嘅眼光望吓我哋...
      我同同伴相視而笑,果一刻真喺好有優越感呀!kakakaka……

      刪除
    4. 我個blog本身都已經咁悶,條題仲要水蛇春咁長係咪更加會趕走晒啲blog友XXXXXD
      嘩~~~~~我諗唔單只係羨慕眼光,佢地仲會覺得你好有闊太風範添啦wakakakakaka.....

      刪除
  3. 多謝你分享...咁健康嘅生活
    ifc有咁so嘅嘢,真好唔知,我有時間去行下
    好配合我呀伯行冷氣商場習慣喎♡♡

    回覆刪除
    回覆
    1. 越來越覺得健康生活比賺錢重要:P
      我都係睇人地blog介紹㗎咋,咁去開果頭又上去八卦下囉^^
      HK夏天天氣實在太濕熱,唔少人都鍾意去商場嘆冷氣啦hahaha...

      刪除
    2. 睇番你差不多10年前嘅“2007年俄羅斯之旅”,
      除咗景點10年不變外,連行程都同我的無乜不變,
      莫斯科市況真喺改變好大,經濟大起大跌
      你當年匯率4盧布對1港元,今日12盧布對1港元,
      啲嘢平咗,
      哈..見到你同女伴都好年青!!

      刪除
    3. 你寫咗“2007年俄羅斯之旅”5年,直情創舉,好詳盡,
      我都要慢慢細睇,哈...啲相太細。

      刪除
    4. 嘩~~~~~眨下眼又差不多十年前了,時間真係過得好快呢
      對呀歐洲啲景點真係十年不變,好多時都係睇古蹟,我諗如果一百年後去都係睇果D嘢啦XXXD
      依家盧布平咗真係抵好多,我記得當年去個廁所都要收30盧布,覺得好貴:P
      年青都正常嘅,十年人事幾番新丫嘛,依家講返真係好似上個世紀嘅事咁wakakakaka....

      刪除
    5. 其實我間中都會睇返D舊旅行blog,有時都會覺得幾特別,因為會發現自己寫旅行故事的手法已經有好多改變了,好多時好似變得陌生,唔記得係自己寫咁:P
      不過有時勾起返D回憶都好開心,這就是寫blog最大的樂趣吧!
      路霸兄會唔會間中睇返自己以前寫過的旅遊網誌呢?

      刪除
    6. 我亦有去台灣網站"隨意窩"睇番寄存舊blog,回味一下,真喺唔信喺自己寫,
      寫得咁好😂😂,嘻...😂
      記錄往事,哩啲就喺blog嘅最大功能😊😊
      自己睇番,人地睇番都好有回憶,
      有朋友去過世界各地,問番佢乜都話唔記得,太可惜😑😑

      刪除
    7. 識咗好多blog友,做埋朋友,出席佢地結婚,生BB...見證人生大事,真喺好開心😄😄

      刪除
    8. 好犀利@@.....咁有冇試過一齊去旅行?

      刪除
    9. 對呀,我都覺得你寫得幾好,好多地方我都未去過嘅^^
      寫返低啲回憶都幾好,是最佳的旅行紀念品

      刪除
  4. I like Peng Chau which is more tranquil and less touristy than other outlaying islands.

    回覆刪除
    回覆
    1. 對呀我覺得坪洲難得仍然似返個離島,遊人少好多,感覺悠閒D!!不過如果係想行山啲話,去南丫島也是不錯的選擇....

      刪除
  5. 外國形容D山分得好仔細,唔知獅子山算不算是山?
    其實行山我都鍾意用「長者慢速」,可以慢慢欣賞風景,快嘅唔啱我。

    回覆刪除
    回覆
    1. 獅子山應該算啦,個山有氣勢hahaha....
      太快我體能都未必應付到:P同埋我都係鍾意行下又睇下景,又同人hea下傾下偈果隻!

      刪除
  6. 和我夢想阿伯生活一樣,都係咁悠閒嘅

    回覆刪除
    回覆
    1. 間中一兩日都OK,如果長時間係咁我驚你會悶喎kakakakaka....

      刪除
  7. 英文的Hill指細山丘,其實都冇講錯…
    單憑一個磅去磅重未必準,搵多幾個先能作準!
    你影相背後張壁畫,有點似馬來西亞嗰類壁畫~~

    回覆刪除
    回覆
    1. 成日覺得至少100米以上才叫山吧,幾十米只算是小山崗:P
      話時話依家好似除了診所或健身室之外好似都好少見有磅,以前戲院門口經常有.....
      都有啲似,係咪有啲異國風情

      刪除
  8. 平洲係香港咁多島之中我最鍾意嘅一個,夠靜又夠舊...秋天要帶毛毛去行返轉~

    回覆刪除
    回覆
    1. 順便要影返多D毛毛寫真畀我地睇下先得啦hahahahaha....

      刪除
  9. 我都有朋友住坪洲呢, 不過佢地話無野玩所以肥人一直都無去過呢!
    閒日放假真係好高興架...見到其他人趕住返工自己就慢慢行...hahahaa

    回覆刪除
    回覆
    1. 如果只係想清清閒閒咁行下踩下單車都係個唔錯選擇㗎....不過如果係想要有好多唔同特式食店或者咩手信賣之類就唔駛諗喇,一定係去長洲好D!!
      閒日放假有個最大好處係唔駛同人逼,同埋搭船平好多,周末周日去離島船費貴到飛起XXD

      刪除
  10. 睇到個山海拔95米, 仲以為好易行添, 原來都要個半鐘, 斜路個半鐘好唔簡單! 輕咗6-7磅咁利害?! 游早水掂喎!!!!!!!!!!
    唔知IFC竟然有免費參觀咁好, 如果過開海都要上去睇吓先

    回覆刪除
    回覆
    1. 其實上山條路都有點斜,感覺上不似只有95米咁矮^^
      有好多樣嘢加埋一齊,早水+晨跑+夜晚食少D+少食油鹽糖,唔知邊樣最見效呢?
      如果去開果頭不妨去睇下囉....

      刪除
    2. 早水+晨跑, 淨做1樣已經唔簡單, 仲要好事成雙! 睇嚟好快fit過晒啲香港先生, 下次份報告, 醫生實讚你靚仔 ^.*

      刪除
    3. 最緊要係個報告靚仔XXD

      刪除
  11. 今日香港落黃雨,我嘅朋友幾驚唔可以飛回到呀。^^

    回覆刪除
    回覆
    1. 臨近端午節,HK的天氣總會是時晴時雨,今日早上確是下大雨,但下午又轉晴了,天色不差呢!!

      刪除
  12. 幾個老外在學耍太極扇?無相呢?
    坪洲好正!

    回覆刪除
    回覆
    1. 冇影呀,如果你朝早九點前出到鐘樓一定見到佢地,唔駛影啦:P
      正㗎,很閒適的小島

      刪除
    2. 原來你們去過節玩龍舟水,哈哈哈
      端午節愉快!

      刪除
    3. 今個週末又有甚麼活動呢?

      刪除
  13. cafe前留影好似曾相識,無記錯好似係電影王嘉欣嘅其中一個畫面

    回覆刪除
    回覆
    1. Really~~~~?!!我又無睇到齣戲喎,等第時電視播留意下,thx^^

      刪除
  14. 我未去過坪洲@@
    連cafe都冇左咁咪冇得hea>.<
    如果見到迪士尼煙花就正啦~
    我都上過金管局個展覽廳,印象中係見唔到尖沙咀個邊@@

    回覆刪除
    回覆
    1. 其實HK好多地方我都仲未有時間行勻:P
      都有其他店舖食肆嘅,不過選擇一定無長洲咁多就真嘅
      我諗大利島果邊係應該可以遙望到煙花啩
      係可以斜斜地望到尖沙嘴果邊嘅,不過對正維港景果邊個view咁正,一定係做晒啲高官office㗎啦,唔會咁浪費用來做展廳啦!!:P

      刪除
  15. 上次去坪洲半日游,時間有限,無行到山路個 part...

    回覆刪除
    回覆
    1. 要上山來回也不太花時間,下次可以考慮下^^

      刪除
  16. 問過info counter原來觀景台是在55樓,好介紹呀,坪洲甚麼都平,連食海鮮都咁平,正,我想問人少少兩,三個人有無得預訂?

    回覆刪除
    回覆
    1. 對呀,要先去做登記拎返個pass先可以去搭lift
      咦,咁應該叫做平洲先啱喎XXXD
      我諗也有,不過你可先打電話去問下

      刪除
  17. 有機會我都要試下去坪洲~~~~d海鮮平到!!!咁多野食先170蚊!!!我見d野好大碟喎!!!!!!!!!
    你有運動嘛~梗係有瘦到~
    唔使錢上55樓觀景台...真心好既節目!

    回覆刪除
    回覆
    1. 雖然係無買到鮑魚扇貝果D,不過我覺得以這個錢價仍算係抵食嘅!!
      上完晒啦,依家又懶返wakakakaka....
      當日我都見有外籍遊客來觀景台,我諗對遊客而言都有一定吸引力,反正就在中環也很方便去

      刪除
    2. 係極抵啦!!!!我見你仲有雞食喎!!!!!!!!
      wakakaka~你無星期六日早d起身去游咩~~~~~~
      梗係!!!如果我去到某地方...有呢種免費觀景台我一定去啦~~~

      刪除
    3. 有呀有呀,我睇返張相先記得:P
      Weekend要好早去,因為暑假到咗,都好多人去游㗎!
      又係喎,數數埋埋我都去過好幾個塔,包括你地頭果個都有去過^^

      刪除
  18. 全球暖化嚴重,英國6月都轉冷,凍到要開暖氣呢。

    回覆刪除
    回覆
    1. 咁老DAD今年個種菜大計駛唔駛延後呢?

      刪除
  19. 閒日都咁多人陪你郊遊嘅?

    回覆刪除
    回覆
    1. 有D係返shift有D就請假有D就真係退咗休嘅^^

      刪除
  20. 基伯伯晨運一日減肥實錄.kaka...

    回覆刪除
  21. IFC個觀景台開放時間如何?

    回覆刪除
    回覆
    1. 網上search到資料可供你參考:
      國際金融中心二期
      觀景點:55樓金管局資訊中心
      地址:中環金融街8號國際金融中心二期55樓
      資訊中心開放時間:星期一至星期五10:00-18:00;星期六10:00-13:00;星期日及公眾假期休息。
      查詢:28781111(www.hkma.gov.hk)
      導賞服務時間:星期一至五10:30-11:00及14:30-15:00;星期六10:30-11:00(每次名額15位,先到先得)

      刪除
  22. 說來真汗顏,沒有到過坪洲,就算是長洲都有十幾年沒有到過。閒日郊遊,較寫意。

    回覆刪除
    回覆
    1. 坪洲都值得去呀,冇長洲咁多人,雖然無長洲咁多野食無咁熱鬧,但就睇到真正離島一面^^

      刪除
  23. 去坪洲有冇見到李健和呀

    回覆刪除
    回覆
    1. 又冇喎,不過可能見到都未必認得,因為依家佢剪短咗頭髮XXD

      刪除
  24. 你的是日行程真的不錯喎 ^^
    但基爾做乜咁快叫自己做「長者慢速」行呢 !?

    回覆刪除
    回覆
    1. 一日遊通常都係簡單啲,志在hea下囉^^
      要㗎啦依家好多人都係興慢活呀嘛

      刪除
  25. 閒日去街'又唔多人~真係感覺好輕鬆.
    海鮮餐連工包料$170個人~ok喎!

    回覆刪除
    回覆
    1. 所以其實返shift都唔錯嘅,閒日放假冇咁多人行街,輕鬆自在好多^^
      喱個價錢唔錯呀,如果唔駛等就更佳!!

      刪除
  26. 我上年行左平洲北邊, 下次返來時, 行埋南邊, 同埋上IFC的展覽廳看看,.

    回覆刪除
    回覆
    1. 以一日遊計,坪洲也不錯吧^^

      刪除
  27. 基爾,第一次探你,原來你寫的日誌寫得好流𣈱生動,讚啊!
    你話自己係阿伯,咁你呢篇咪係叫「老生常談」咯…因我覺得你應該係很健談的人?
    而你只有一百三十多磅重,老人家好少咁fit 㗎…哈哈…哈!

    回覆刪除
    回覆
    1. 你好,希望無悶親你:P 其實都寫咗接近十年了,熟得生巧吧hahahaha....
      Exactly~~~「老生常談」正是此意^0^
      好多老人家都好fit㗎喎XXXD

      刪除
  28. N 年前去過一次坪洲 , 景物全都忘記了 , 謝謝分享 !
    觀景台不用入場費 , 真好介紹呀 !

    回覆刪除
    回覆
    1. 如果唔怕熱都可以去巡一圈嘅,不過最好weekdays去啦,因為我覺得weekend船飛好貴....
      對呀,很值得一遊

      刪除