2017年2月11日 星期六

Le Grand Pokka@旺角

新年話咁快又來到元宵佳節和情人節,除了非常勤力密密手寫blog之外仲有同學仔飯聚,諗返上次見原來已是舊年的開年飯局(正如人地話齋:friend唔一定成日見),真係光陰似箭咁快又一年……



其實唔單止飯聚少,基爾近年都好少去旺角,至於去雅蘭就更加似隔了成個世紀咁耐,以前記憶中好似都幾多小商店,依家就好多食肆,同學提議去2樓的Pokka Cafe唔會限時限刻坐個半鐘畀人趕走,當然沒有異議。



基爾收工後去到雅蘭,發現人流唔算太墟陷,如果以紅字假期來看甚至有點兒冷清(難得無乜拖篋客,實在太正了!)在商場1樓還發現原來仲有久遺了的Cotton On(以為實體店早已全線結業撤出香港了),火速行一圈無乜收穫,立即上去會合同學。



咪住咪住電梯轉角位仲有個幾得意的清仔展覽,反正仲有時間快快手snap多幾張,除了上面這副清仔麻雀之外(東南西北中發白變了出前一丁圖樣),仲有好多清仔嘜頭食具例如碗筷、多士爐和煮麵機之類,另外還有幾精緻的迷你夾公仔機、老虎機和印有清仔廣告的巴士電車模型等等。



為免同學久等,都係拿拿林上去cafe,一陣食飽先再落黎睇。喱間叫得做Grand Pokka又真係幾大,菜式選擇又好似幾多,除了慣常的飯和意粉外,仲有烏冬和韓食供應,可謂西日韓齊備……



初頭諗住叫個Set Dinner再散叫其他share,不過同學仔想各自獨立order都無所謂,反正見個CNY期間限定的Dinner Set望落亦唔錯有魚豬牛選擇,如果有選擇障礙懶諗食乜也一試無妨吧(而且價錢望落係低食D)!



Pokka好似之前聖誕都有喱類Special,估計情人節前後也有期間限定供應吧!基爾最後揀上面喱個香芒三文魚焗飯,menu括住話製作需時20分鐘,幸而客人實在不多又唔覺咁耐!飯來之前仲有個Appetizer或Soup,基爾揀了羅宋湯和牛角包,不過見同學的溫泉蛋配Parma Ham Salad也不錯試了一啖(掛住食忘了影)!至於個三文魚飯如果係「芝士控」一定好開心,因為芝士份量真係超多,若能再多些芒果就更perfect了!



同學叫的喱個香煎美國上級牛柳(配黑椒汁)是七成熟,基爾本身唔太食牛,所以對牛扒也沒有太多研究,雖然望落係有點偏熟,不過見同學食落話ok應也是不錯之選。餐牌上其實仲有個唔知係乜的Australian Orange Roughy(有冇人食過?)中文名叫做「金獅魚」,本來都想試,不過最後都驚好多骨就放棄了!



另一同學就order了上面喱個Premium Set,有齊沙律、湯及包之餘,main course個美國西冷仲大件好多,但價錢其實比上面個牛柳只貴幾十蚊而已,感覺上好似抵食D(而且個賣相都精緻D)。如果好似搭飛機咁可以免費upgrade去premium也不錯……哇卡卡卡!(發夢中!)



席間當然少不了談近況和旅行大計,教書的同學仔諗住復活節長假去立山黑部睇雪牆(教書真好!)單單聽佢講個schedule都已經興奮。隨傾隨食上面喱個芒果布甸都幾正,可惜只有雞精樽仔咁少唔夠喉。另外餐飲方面除了檸茶外,也有Sidama和Yirgacheffe咖啡選擇,初頭聽侍應姐姐講希達姆和耶加雪菲,基爾孤陋寡聞完全唔知係乜,後來八卦上網check下才知係近年比較hit的貴價埃塞俄比亞咖啡,食飯學英文又長知識了!



食完飽飽地再落去行多陣Cotton On,其實個Big Sale又唔係太多野揀,大部份短袖tee又無乜逼切性要買,最後都係無收穫……咁反正時間尚早而且食甜品又有D意猶未盡,這時見到隔籬有間HD,咁又去encore個雪糕先走啦!不過雅蘭喱間實在不好坐,座位好逼幾乎人貼人,最後求其食了個綠茶cone就走人,再行過去睇清仔展覽。



臨走前,同學仔眼利發現展覽攤位原來有野送(在商場內消費滿一定金額就可換禮物云云!)剛才在Pokka食了700幾蚊咁就順手拎張單去換,結果換到兩個清仔即食麵A4 file,分別係泡菜味和豬骨湯味,印刷又幾精美喎!基爾好似都有食過豬骨湯味那款,快佬背面仲有清仔媽和清仔妹,農曆新年特別版有舞獅又有金蛋幾可愛又應節!



基爾份工大時大節都年中無休,相比起教書同學仔假期一定無咁多,anyway農曆年假返工都有個好處,就係等大老細們的「巡幸大隊」逗返封大利市,今年一步都唔敢行開,行雷急尿都一於黐實張凳終於無走雞(舊年走雞行開左激到紮紮跳)都算係幾豐富的新年禮物!

Le Grand Pokka
旺角彌敦道639號雅蘭中心2樓206號舖

74 則留言:

  1. 香港人食野真係好刁鑽喎。做老師壓力好大架!

    回覆刪除
    回覆
    1. 好同意啊不是人人有能力做好老師

      刪除
  2. 清仔夾公仔機o個時我有換嚟玩㗎。玩完送咗畀小朋友。

    回覆刪除
    回覆
    1. 勁喎,我仲以為只係裝飾而已,原來真係可以夾到公仔....@@

      刪除
  3. 好想要副麻雀哦,不過玩起來都幾混亂 :P

    回覆刪除
    回覆
    1. 對,好驚會適應唔到啲圖案容易會打錯牌出充又或者食炸糊XXXXD

      刪除
  4. 我和清仔都有過緣份,十幾年前抽獎中獎得到六安士黃金清仔一座,更早前抽獎中獎得到兩尊11吋限量版瓷器清仔,我雖然已經很少吃他的產品,但感覺仍存在。

    回覆刪除
    回覆
    1. 嘩!!犀利喎!咁你同清仔真係好有緣份^^
      即食麵間中食就無妨,成日食就不太健康了

      刪除
    2. 即食麵不健康
      Grand Pokka真係大pk

      刪除
    3. 對呀不可當作日常主糧呢
      咁都畀你諗到XXD

      刪除
  5. 記得雅蘭有幾層M floor, 等搭 lift 都要等幾耐架

    回覆刪除
    回覆
    1. 係呀,依家都係㗎,上稻香果啲要排隊排好耐唔方便

      刪除
  6. 我都好少出旺角,怕太多人。

    回覆刪除
  7. 清仔展覽都幾好!
    幾時得閒食餐飯?

    回覆刪除
  8. 哩間未食過,但同系太古城,百佳咖啡食物出品都幾好,咖啡唔錯,我有買佢原豆返屋企用,今年農曆年市道真喺麻麻,四周圍都好靜,食肆仲差,今年市道唔樂觀!!

    回覆刪除
    回覆
    1. 咖啡我真係無乜研究,不過間中有時數字屋那種UCC特價就會買啲,主要用來煮麥皮做早餐^^
      主要係睇啲人賺唔賺到錢(樓市/股票),如果賺到都會提高少少消費意欲(不過有時係寧願留返外遊時駛XXD)

      刪除
    2. UCC咖啡偏淡,味道我麻麻,UCC咖啡被做爛哂,廿幾蚊平到...。
      唉...唔好講啲炒家,喺普通打工仔都減少在港消費,你都喺咁諗,做零售難,整個市面差。

      刪除
    3. 可能我唔太識飲hahahaha....不過我買黑樽果款我個人就覺得幾ok,同埋我多數煮麥皮加啲啲有少少咖啡味而已,極少就咁飲:P
      本地人少咗出街行係真嘅,因為油尖旺區跟本都無乜嘢好行了

      刪除
  9. 有利是逗, 開心呢.

    教書工雖多假, 但一樣要同人迫, 最後係假多而揀不放學校假, 不單不用迫, 而且淡季超平.

    回覆刪除
    回覆
    1. 純粹係祝福嘅啫hahahaha....
      係呀通常係high season長假期,如果外遊就通常貴一點,每個行業都有佢特定模式,最緊要適應到,做得開心就ok

      刪除
  10. 清仔麻雀好撹笑呀)))
    教書假期永遠都是貴

    回覆刪除
    回覆
    1. 如果用喱種麻雀就影相都唔怕啦,人地只以為你係覺得有趣而唔係做大牌wakakakakaka....
      都係㗎,不過人工高都無問題嘅XXD

      刪除
  11. 雅蘭節日應該勁多人,真係唔敢去,原來都ok哦...

    回覆刪除
    回覆
    1. 咁啱果日人少,平時其實都幾鬼多

      刪除
  12. 我堂姐姐之前都做教師, 好大壓力架真係~
    佢生左BB就無做啦~

    回覆刪除
    回覆
    1. 我諗一定啦,對人的工作一定係大壓力^^
      不過另一方面諗都係好有意義的工作,可作育英才!!

      刪除
  13. 出前一丁麻雀超可愛喎。
    基哥今年多啲寫blog啦。

    回覆刪除
    回覆
    1. 新年你果邊興唔興開枱wakakaka....
      咁啱多嘢寫㗎咋:P

      刪除

    2. 我奶奶家現在冇打麻雀,以前就陪老人家玩下。
      情人節快樂!

      刪除
    3. 過年過節圍埋打牌當作聯誼也好,夠熱鬧^^
      Happy Valentine's Day!!

      刪除
  14. 套麻雀好得意喔!
    有無得買架?
    送人或自家用...都有趣!

    回覆刪除
    回覆
    1. 幾有趣,但如果真係要打就要先熟習一下囉XXD
      我諗未必有得買,又有可能係抽奬的奬品又或者食好多包麵先換到果隻都未定?也可能有人放上網賣吧?

      刪除
    2. 想問一個Technical問題...
      可能係自己...唔識...
      在別人的blog留言後,
      點知blog主有回覆呢.... :(

      刪除
    3. 如果blog主setup咗用google+回覆格式,其他人留言才會收到電郵回覆,如果無set就無架啦!!!
      我就通常係留言時順手click去上一篇睇下blog主有乜回覆架咋,唔記得click就睇唔到了.....

      刪除
    4. 另一個方法係你留言時順手click埋右下角果個「通知我」果個box,才再按發佈.....
      不過有個唔好處係所有人留言和回覆都會收到電郵,要唔怕煩先得囉XXXD

      刪除
  15. 很多年沒有去Pokka Cafe了,賣相還有水準。
    開工利是大豐收喎!

    回覆刪除
    回覆
    1. 至少坐得舒服,同埋唔駛畀人趕走可以慢慢坐囉!!
      今年都ok呀,因為近年都好少主動去𢭃,多數係同事主動送上門,所以非常感謝大家的祝福^^

      刪除
  16. 餐又真係幾抵食喎~~~~最貴哥個塊牛望落好正~~~
    教書係最多假放啦~仲有聖誕新年暑假~不過教書壓力好大..唔岩我~

    回覆刪除
    回覆
    1. 係呀Premium果塊牛扒係幾大件幾抵,如果愛牛人士不妨一試...
      你成日對住小朋友,應該都幾大潛質㗎喎^^

      刪除
    2. 我是愛牛人士(舉手)
      nonono...識我既人知我無耐性...絕不能長時期對住小朋友..我會發瘋!!

      刪除
    3. 除了愛牛我諗你都係識食blogger啦,睇你寫食評就知^0^
      對呀,照護小朋友真係好花費心力,少啲EQ都唔掂...

      刪除
    4. 我好鐘意食..但真係唔係好識形容佢好食到底佢好食在係邊....醜醜~
      咪囉...何況依家d小朋友仲要咁醒~

      刪除
    5. 唔係喎我覺得你已經形容得好好...wakakaka...
      絕對係呀,父母唔易做呢

      刪除
  17. 基爾, 我睇到尾段笑到kaka聲 :)
    Pokka宜家咁多花款嘅, 望落唔錯喎

    回覆刪除
    回覆
    1. wakakaka....喱封大利是好重要㗎!!!XXD
      唔知有冇出情人節餐,不妨同你husband去撐下枱腳囉^^

      刪除
  18. 出前一丁麻將,幾得意哦!

    回覆刪除
  19. 新年大豐收吖!
    間中同朋友仔食下飯、行下街聯繋感情都幾好~
    可惜,除佐旅行... 我好懶行街/ shopping :P

    回覆刪除
    回覆
    1. 希望大家新一年都一樣豐收wakakaka....
      其實各有各忙,真係好耐先有一次機會呢:P
      又係喎,通常都係去旅行先會去行街XXD

      刪除
  20. 你幾時去旅行呀?等睇旅行blog呀!

    回覆刪除
    回覆
    1. 冇planning喎,乘機偷下懶先XXXD

      刪除
    2. 你就尼變呆佬喇!快d去旅行叉下電喇!

      刪除
    3. 係咪小新個同學.....XXXD

      刪除
  21. 我同你都係一樣年中無休,但就可以淡季旅行。教書假期係好同多,但就焗限旺季。以前都同你一樣好羨慕,但依家我一d都唔羨慕了~

    回覆刪除
    回覆
    1. 各有各好啦我諗,旺季可以同friend一齊去,淡季就比較難夾多數好似銀哥咁一個或二人型遊wakakaka.....

      刪除
  22. 眾多即食麵中,應該最好味都係呢個牌子……

    回覆刪除
    回覆
    1. 麵的質地係幾好食,同埋好似無油炸果啲咁肥(雖然多食都係肥XXXD)

      刪除
  23. Australian Orange Roughy––––聽都未聽過,不過我本身係唔食魚既......

    回覆刪除
    回覆
    1. 上網search過條魚係紅紅地橙橙地,產地係南澳喎

      刪除
  24. 出前一丁麻雀都念到.係得喎!
    香芒三文魚焗飯...睇落係幾掂下!

    回覆刪除
    回覆
    1. 我諗純粹係裝飾用,應該唔會有人用來打,因為會好混亂呢XXD
      如果少啲芝士多啲香芒會更加正^^

      刪除
  25. A4 file 又几特別喎^^ 實用又好睇添 ~

    回覆刪除
    回覆
    1. 係呀好似一包巨型一丁麵咁hahahaha.....

      刪除