2017年6月12日 星期一

羅浮宮的創想@文化博物館

成日掛住睇郵票和聽CD,基爾近排好似真係少了去巡博物館,不過近排有幾個大型展覽都好值得去睇下,近近地先去巡一巡文化博物館,睇睇個宣傳雷聲幾大的羅浮宮展覽吧!



咁耐以來好似都未試過晨早出沙田行博物館咁神心,所以一直唔係好知佢幾時開門,以為政府部門都係開9:00am吧!點知老定的基爾9:30am迤行到去大門口時,只見到成班叔叔嬸嬸在晨運耍劍耍太極,發現原來博物館要到10:00am才開門,這就是太懶唔先上網check之過……



Anyway咁都無計啦!唯有先在博物館外圍行下睇下野,基爾睇見巨柱上的裝飾才知道原來除了羅浮宮展之外,現時館裏仲有個金庸展都好值得一睇,一陣入去要預留返少少時間睇埋金庸展先走!



迤蕩左一陣之後,突然醒起可以行返去中央公園果邊睇D野,咁就無謂浪費時間先行返去遊公園吧!晨早留留去行公園真係好有晨運feel,將來能有這種退休生活也真不錯。平時假日來公園都幾多人幾嘈雜,不過原來閒日朝早來又回復了小橋流水的清幽境界。



基爾其實唔exactly知道想搵果樣野在公園邊弗,只好在公園裏亂蕩走一圈憑記憶找找吧!最後果然皇天不負有心人終於找到上圖喱棵植物!睇blog友介紹先知原來HK也可看到紫藤花,比較多的是在沙田這公園裏(另一處是長洲某涼亭)。



問問公園掃地阿姐確定這片翠綠的藤蔓就是紫藤,基爾初夏五月天來到當然不可能欣賞到紫藤花盛放,估計都係要早春二月時節先有機會睇到(當然不要期望有日本果種瀑布式氣勢)。既然賞不到紫藤花就順腳行過去水池邊睇埋睡蓮才走,幸好蓮花是幾乎四季也盛開的。



在公園無無謂謂行一圈之後睇睇錶時間也差不多,再沿城門河邊單車徑行返去博物館。返到去大門口發現開始有人排隊,仲有好多幼稚園小朋友來參觀,唔知係咪因為周三免費日所以特別多人,不過如果去睇羅浮宮展覽就一樣要畀$20門票。



排隊買完飛趁仲未係好多人就火速上2樓,羅浮宮展廳外除了有皇宮實景壁畫之外,仲有個幾靚的發光三角金字塔裝飾,都算佈置得幾像真度高、幾有心思!至於展廳入面有乜特別野睇?因為唔可以影相所以就冇post了,令基爾覺得有趣的是,記得2004年去巴黎時都有入過羅浮宮,果陣真係不論中外遊客都可以不停舉機對住各式名畫係咁狂影相(唔知依家仲得唔得),依家運到來香港反而唔畀影相,係咪有少少奇怪?總括而言,在眾多展品當中基爾印象最深係那三大幅掛氈畫,真係由樓頂一直掛到地面好大幅好宏偉壯觀!



其實唔影相最大好處就係唔會有人阻住睇名畫雕塑,全程可以安心細賞。不過如果之前有去過巴黎羅浮宮就可能沒有太大驚喜,始終運來的珍品不太多,而且差不多一半展廳用來介紹羅浮宮的800年歷史,老實說吸引力比真正看藝術品遜色得多!另有一part就主力介紹新開的伊斯蘭藝術館(有點賣廣告feel),將來如有機會重遊巴黎都想去逛逛那個新的伊斯蘭館。上圖是另一處互動資訊展廊,除了有led版蒙羅麗莎可供遊人拍照之外,仲有古埃及木乃伊仿製品和古董大鐘。

「羅浮宮的創想:從皇宮到博物館的八百年」
地點:沙田香港文化博物館
展期:26.4.2017 - 24.7.2017

57 則留言:


  1. 「羅浮宮的創想:從皇宮到博物館的八百年」
    地點:沙田香港文化博物館
    展期:26.4.2017 - 24.7.2017

    回覆刪除
  2. 我已經睇咗羅浮宮展、金庸展、徐展堂和粤劇展,不能拍攝,相信是外借的關係,要好好保管完完整整歸還吧?!又也許這是外借條件之一罷?!

    回覆刪除
    回覆
    1. 我估都係啦,要影就留返去巴黎影囉XXXD

      刪除
  3. 金庸展張畫又幾有氣勢…羅浮宮以為幾多嘢睇, 原來冇乜驚喜咋!!
    我時時覺得運來香港的名畫之類,很多都係仿品, 若果佢唔畀影相可能係真跡…

    回覆刪除
    回覆
    1. 李志清作品,大師級嘛^^
      今次展品係比想像中少囉
      通常都有註明係咪仿製品,而且一般都唔會呃人啩:P

      刪除
  4. 如果去唔到實地咁遠,來到這個近近哋"羅浮宮"都ok嘅!

    回覆刪除
    回覆
    1. 而且香港啲博物館入場平好多,巴黎羅浮宮印象中入場費係唔平的呢

      刪除
  5. 中央公園啲環境好靚下,值得一看。

    回覆刪除
  6. 最近這個裏成了參觀熱點。

    回覆刪除
    回覆
    1. 通常每年暑假都好多比較大型的展覽,值得去睇下

      刪除
  7. 這個展覽唔係主要睇展品,
    係睇成個presentation !
    應該用了不少成本在展覽廳裝飾上... :(
    看來因為20週年關係,近期的展覽都加注在裝飾上...
    木乃伊那邊也一樣“豪裝”...也同樣人山人海!

    回覆刪除
    回覆
    1. 如果係咁就未免太本末倒置了吧XXD
      我都幾鍾意展館裝修有氣氛的展覽,能生色不少,更吸引人注意,不過展品始終係最主要,如果展品不吸引又似乎妹仔大過主人婆了吧:P
      我都估大英果個多人睇,所以都係遲啲先去啦^^

      刪除
  8. 羅浮宮係行一日都唔會行完

    回覆刪除
  9. 睇完你呢篇我都有興趣去行下!😆

    回覆刪除
    回覆
    1. 電影資料館最近有冇特別展覽呢?

      刪除
  10. 唔畀影相我聽過嘅解釋係因為展出嗰間博物館冇版權喎.

    回覆刪除
    回覆
    1. 喱個解釋我反而接受喎,至少明白點解......

      刪除
  11. 回覆
    1. 係呀都幾多宣傳㗎,好彩我果日係晨早去,又比想像中少人啲啲....

      刪除
  12. 回覆
    1. 去睇下啦,都值得去睇,展品幾特別

      刪除
  13. 我未去過巴黎 , 所以都有興趣去行吓呢~!!

    回覆刪除
    回覆
    1. 周末去可能較多人,揀閒日去啦^^

      刪除
  14. 幫我改咗blog名?驚唔記得咗我係邊個?哈哈!我個blog關閉咗喇,間中上來你度吹下水就算。Btw, 我剛剛完成咗葡萄牙朝聖之路,由里斯本附近既Santarem出發,途中兜埋花地瑪,最後終結於西班牙聖雅各。而家已經構思緊另一條路線!

    回覆刪除
    回覆
    1. 係呀因為你最近好少留言仲停埋個blog丫嘛,你唔再寫有點可惜以後無得睇你啲旅行經歷和感受了.....我覺得你寫得很好已follow咗好多年了^^
      唔怪得唔見你一排原來已完成葡西之行,可惜無得睇下靚相:P
      花地瑪多唔多人?今年係咪百周年?
      下次健行路線諗住係咪都係歐洲?
      唔好嫌我太多嘢問因為你太少現身XXXXD

      刪除
    2. 如再在google blogger開新blog記得留條link畀我^^

      刪除
    3. 花地瑪顯靈100週年,梗係多人啦,不過個廣場好現代化,同想像中好大差距。歐洲仲有大把其他聖雅各之路,我現正構思從德國出發既路線。行聖雅各之路好容易上癮,好多人已經行過好多次,有人次次行同一條路,有人每次走唔同路線,各適其適,就好似好多人跑馬拉松一樣,跑完一個比賽又一個,心目中好似有個 list 要 tick off 咁。假若他日我東山復出再寫blog,將pixnet嗰個解凍就得啦,唔會再搬屋囉。

      刪除
    4. 係啊100周年我諗會好熱鬧有好多慶典....
      原來聖雅各之路咁hit,由德國可以行去邊?會唔會有啲行去瑞典芬蘭?北歐我諗要揀暑假時段去方便啲.....
      仲諗住你會過埋blogger,留言可以方便啲wakakaka...google好似都有相簿,寫幾句caption都可以!

      刪除
    5. 從德國出發都係一樣去西班牙聖雅各(途徑比利時/法國/瑞士),就算從丹麥出發亦都係一樣,否則又點會叫「聖雅各之路」呀,哈哈!不過如果我行德國,只會行一小段,唔會一路行到西班牙囉。Pixnet 最大好處係可以私人留言,而且非私人留言可以唔使sign in,Google唔得。

      刪除
    6. OIC~~~~!!@@原來是這樣.....
      嘩,如果由德國行到去西班牙,全程我諗要幾個月吧!犀利過毅行者....
      咁等你復出先再算啦,暫時靠你來留言^^

      刪除
  15. 呢篇又係奇趣篇,你介紹啲地方我又係唔識嘅。。。

    回覆刪除
  16. 懶鬼~上網check時間都懶~
    個公園其實幾靚幾舒服喎~~~~~~~
    但$20入場費都算抵睇啦~~~~~~睇到羅浮宮展品喎~~~~~~~

    回覆刪除
    回覆
    1. 依家就一定記得係開十點:P
      朝早都幾多人來晨運,環境算好寧靜的!
      如果比較外國收費的博物館,HK算係平.....另外仲有年票好似都係五十幾蚊,去三次可回本XXD

      刪除
    2. 下次咪咁懶啦~
      我其實好耐無試過放假咁早貢出黎~~~(旅行除外).....連自己屋企附近既松山都好耐無去過~睇黎得閒要去行行山先得~不過上個周末都係落雨中渡過~
      50幾蚊勁平喎!!!平過澳門添喎~~抵買啦~你成日睇做咩唔買既?

      刪除
    3. 如果係一啲重要事項就一定先check定好啲啦:P
      我估都係,因為見你寫日記果part通常都係由lunch開始,真係好少好少好少見你寫放假朝早係做乜嘅wakakakaka....
      松山幾乎次次去澳門總會抽少少時間去行下,環境正好舒服,交通又方便不太花時間!
      你有冇發覺自從上周打風之後一直落雨落到依家:P
      澳門啲博物館聽聞係咪多數唔駛錢?我都想去科學館未去過....我以前都有買半年pass(依家取消咗只有一年pass),不過後來因為唔係成日有外地展覽所以就無買,我多數對來路貨較有興趣:P

      刪除
  17. 呢個展覽好吸引,睇黎我又要去睇下先得~

    回覆刪除
    回覆
    1. 都值得一遊,你通常揀乜時段去睇?

      刪除
    2. 唔一定架,個日得閒又想出街行下就會去架啦@@

      刪除
    3. 我都多數係閒日,因為周末好多人:P

      刪除
  18. 金庸展有興趣。
    原來香港都有紫滕花

    回覆刪除
    回覆
    1. 金庸果個都好值得去睇....
      我都係睇人地blog先知果度有咋,不過同日本比當然會差好遠不要期待好壯觀

      刪除
  19. 天氣熱'去參觀博物館都係一個唔錯節目,可以知多一點點.

    回覆刪除
  20. 蛇來探你!差點記要去這個展覽添!

    回覆刪除
  21. 展品雖然少,但值得一逛。那幾張掛氈,相信用了不少時間造成。

    回覆刪除
    回覆
    1. 對,可能真係好大張所以我特別有印象,就像幅大壁畫般宏偉,一定花了很多時間去織.....

      刪除