2017年6月20日 星期二

繪畫‧金庸@文化博物館

睇完宣傳雷聲比較大的羅浮宮展覽之後,再行返落博物館地下果層,因為要睇埋個金庸展先走。



唔講唔知,原來金庸展已經成為文化博物館裏的常設展館,咁就唔駛經佢會咁快完結了,有興趣去參觀的,可以等有空慢慢先來睇都未遲,而且係唔駛入場費呢!



金庸館裏展示了不少屬於金庸先生的珍藏物品,包括有上圖的私人印鑒、書刊、手稿、五六十年代早期版本小說和報章連載版甚至相機等等,當然還有很多他的舊照片……



金庸由1955年寫第一部武俠小說《書劍恩仇錄》開始,一直到1972年完成《鹿鼎記》後封筆,十幾年間總共寫了15部膾炙人口的經典武俠小說,之後仲有好多漫畫、電影和電視劇版,不斷翻拍又重播,說他是二十世紀最具影響力的武俠小說作家絕對當之無愧。



依家電視正播緊最新翻拍的《射鵰英雄傳》,可能金庸人氣又再度回升,來博物館參觀的遊人都幾多。上圖右是李志清畫的郭靖水墨畫;左上圖是館內擺設的一座巨型金漆屏風,上面又係畫滿射鵰人物造型,非常有氣勢;左下圖是金庸與屏風合照,旁邊仲有最經典的一副對聯:「飛雪連天射白鹿,笑書神俠倚碧鴛」。



如沒記錯上圖已泛黃的原稿紙,上面寫的就是金庸的《笑傲江湖》手稿,這本經典小說原來是於1967-69年在明報連載,當時正值文革火紅年代,唔知同小說中的人物有冇關係呢?



另外仲有好經典的金庸武俠電視劇劇照,首輪夜晚黃金時段做果陣唔係好識睇,不過好彩後來中午經常有重播,基本上天龍八部、神鵰射鵰和鹿鼎記重播得最多,故事人物最熟悉,展廳裏仲有重播八十年代經典劇集片段,依家我諗電視台就唔會重播了(畀錢頻道好似有得睇)!



上圖用明報陳年日月logo信紙寫的又係乜東東?睇睇佢個簡介,原來係「1988年查良鏞致明報編輯部手諭」,當中談到明報副刊的方針,還有逐一評說明周、明月和明報,提到新聞版風格要做到「新聞副刊化,副刊新聞化」……明唔明?



再睇埋明報明周創刊號,原來明報是在1959年開始發行,數數手指原來都有差不多60年歷史。依家報紙多數跟英文由左向右讀,以前就是由右向左讀,比較特別。另外,關正傑和射鵰果兩隻碟基爾家中都有喎!不過當然是復刻版而不是這裏展示的原版。



記憶中基爾細個時有在報紙上追看過每日連載的衛斯理科幻小說,但金庸的就沒看過,上面這張副刊是六十年代產品,連載的是《倚天屠龍記》。話時話依家報紙仲有冇連載小說呢?可能時代唔同了,已經唔興了吧!



走之前記得要玩下喱個「高手過招」真人融入漫畫的玩意。基爾見成班印傭姐姐爭住同漫畫人物影相玩得好開心,而且影出來效果又真係好逼真喎,幾有趣!

「繪畫.金庸」
地點:沙田香港文化博物館
展期:1.3.2017 - now

60 則留言:

  1. 我完全冇睇過佢啲書。呢個展一定會冇興趣。

    回覆刪除
    回覆
    1. 以前有冇睇無記啲金庸武俠劇?佢有展出部份電視劇片段....

      刪除
    2. 你知啦,我嗰時咁細,唔記得喇。。。kakakakak

      刪除
    3. 哈...唔喺呀麻
      年記大...唔記得啩...嘻

      刪除
    4. 食咗誠實豆沙包......XXXD

      刪除
  2. 唔明點解仲不停有人翻拍
    初睇天龍八部時, 唔知原來有部份唔係佢寫, 後來先知呢

    回覆刪除
    回覆
    1. 大陸劇好似樂此不疲XXXD
      係咪好似有些係倪匡代筆?
      其實無記以前好似較少拍梁羽生,如果拍萍踪唔知會搵乜人去拍??不過依家可能無乜資源(演員+導演編劇)再去拍武俠劇了.....

      刪除
    2. 我反而無睇過梁羽生D小說
      我只記得佢有部白駛魔女傳

      刪除
    3. 以前亞記好似係拍過,無記就好似無乜拍,只拍金庸

      刪除
  3. 呢個展覽我有興趣!不過唔知道下次返港仲有無。中學時期我都係金庸迷(同學有嗮全套,我有得借),但主力睇兒女私情,武打場面skip嗮......

    回覆刪除
    回覆
    1. 如果佢係常設展覽應該都至少擺幾年,不用擔心^^
      寫感情線好睇,但拍劇好多時側重去武打場面...

      刪除
  4. 如你所講金庸展慢慢再睇,羅浮宮展覽我睇咗,最有印象是油畫,會多睇一次添!

    回覆刪除
    回覆
    1. 油畫我覺得比想像中少,展廳也太細了....
      佔三分一介紹羅浮宮歷史,我諗就不一定太吸引到人,如要睇羅浮宮歷史我覺得更加要親身去,所以我覺得佢似賣廣告吸客多過真正想展出藝術珍品:P

      刪除
  5. 香港長大又愛看小說的人、即使沒看過金庸的書、也看過他作品改編的電視劇吧!“金庸展” 成為常設館好呀… 大家可以慢慢再去看也不遲!

    回覆刪除
    回覆
    1. 對,以前無記啲金庸刻全部都過50點,我諗成長於80's的一定有晚晚睇過,劇集送飯XXXD
      去看看當是集體回憶也不錯呢

      刪除
  6. 真失禮~金庸的作品只是靠電視劇才認識…
    相中是否有金庸先生個蠟像?!

    回覆刪除
    回覆
    1. 我諗大部份人都係先睇劇再睇書吧^^
      唔係蠟像,係一幅相,放在展廳內,影出來係咪好有立體感?

      刪除
  7. 我也覺得那個羅浮宮展覽有點欺世盜名,金庸館好看多了。

    回覆刪除
    回覆
    1. 介紹羅浮宮歷史佔太大篇幅了(反而展品真的比想像中少),似為佢個博物館賣廣告多D,同埋佢新開果個伊斯蘭館都係好sell客feel^^

      刪除
  8. 這些電視劇選段在館內劇院都有得播的!
    “金庸武俠電影及電視劇選段”
    “諸子百家說金庸訪問片段”
    和“李小龍風采一生”都是值得推介,是剪輯得非常有心思的!

    回覆刪除
    回覆
    1. 係呀我都企係度睇咗好多D劇集短片,有好多集體回憶:P
      李小龍果個我都覺得好值得去睇,我次次去親都順便去行一圈^^

      刪除
    2. “李小龍風采一生”都有短片在劇院放映的,
      那短片也非常值得睇!

      刪除
    3. 我好似都有睇過,以前剛開李小龍館時好墟陷,要排隊買飛,依家就唔駛,無乜人方便好多....

      刪除
  9. 我亦無過書,電視劇就睇哂,但有啲都唔記得,
    查生真喺近代香港風雲人物,明報社評當年亦由佢執筆,有啲影响力,但賣盤後,明報公信力日走下坡。

    回覆刪除
    回覆
    1. 依家播果套大陸版我就睇下唔睇下,始終演員唔吸引,也可能因為以前80's先入為主,不過武打場面係先進咗好多,拍得好睇!!
      我成日諗,如果依家黃金時段索性重播返舊版射鵰神鵰鹿鼎記和天龍八部雪山飛狐,我諗收視一定唔只30點...XXXD
      老細唔同咗,辦報方針會改,始終是一盤生意而已!

      刪除
  10. 記得 Daddy Dearest 講佢年輕時睇過金庸全部嘅小說。

    回覆刪除
  11. 我最近番睇"鹿鼎記"同"書劍恩仇錄"兩部金庸武俠小說,每隔一段時間都會番睇金庸的武俠小說。

    回覆刪除
    回覆
    1. 係咪好有百看不厭feel^^
      睇小說果陣會唔會諗返起睇電視時的畫面?

      刪除
    2. 係呀,你都係?
      我都係睇左電視才去睇原著嘅。

      刪除
    3. 通常都係啦,以前細個好少睇咁厚本書,又唔識睇咁多字wakakaka....

      刪除
  12. 雖然我係女仔,但以前讀書時都差唔多睇曬佢個小說,真係好厲害的一個人!

    回覆刪除
  13. 金庸的小說,用早期比較其實好多作品都有修改過

    回覆刪除
    回覆
    1. 佢經常有修改版,最早版本要睇返舊報紙:P

      刪除
  14. 不得了, 本人係中學年代會躲在被窩看金庸,睇到冇訓覺嗰種, 我點都要去一次睇下 ~

    回覆刪除
    回覆
    1. 要去啦,咁近^^
      反而我細個時其實睇得不多,多數只看電視劇......小說都係睇衛斯理居多:P

      刪除
  15. 金庸一早就該有個常設館啦,其實政府係應該出錢起個獨立永久展館才啱!

    回覆刪除
    回覆
    1. 我都覺得係,至少武俠小說佢是最經典作家...
      依家有錢都先拎去起西九故宮先啦wakakaka....

      刪除
  16. 金庸由1955年寫第一部武俠小說《書劍恩仇錄》開始,
    一直到1972年完成《鹿鼎記》後封筆
    飛雪連天射白鹿
    笑書神俠倚碧鴛

    回覆刪除
  17. 金庸哥哥d武俠故事又真係幾好睇既~雖然我無睇過書...但係電視劇我都有睇架~~~~~~~不過唔係最舊版哥d..係張衛健做鹿鼎記哥d je~

    回覆刪除
    回覆
    1. 咁有冇睇林青霞扮東方不敗?

      刪除
    2. 無喎~~~~~
      頂盡我有睇古天樂做過兒~~~~

      刪除
    3. 斬手果幕驚唔驚....XXD

      刪除
  18. 常設展館?正!得閒去吓先~
    我都好鍾意睇金庸D書,不過就無睇晒佢嘅著作,射鵰三部曲就睇咗好多次。
    不過金庸寫的小說真係好吸引,就算是較冷門的連城訣,也令我廢枕忘餐!

    回覆刪除
    回覆
    1. 係呀,隨時去都可以,閒日會少人啲.....
      連城訣唔冷門啦,至少無記都有拍過劇,劉華做主角的

      刪除
  19. 小說,全都看過,最愛《神鵰俠侶》,其次是《笑傲江湖》。查先生是一代宗師,相信後無來者。

    回覆刪除
    回覆
    1. long time no see....一定很忙吧^^
      神鵰寫情特別出色我也很喜歡!看來阿摩特別喜歡非世俗類的人情故事...
      我諗就應該後無來者了,始終時代不同了吧!很難再有作家能寫出這種武俠小說獨特韻味!

      刪除