2017年6月8日 星期四

So Thai So Good@大埔

行行重行行,上次提到某周末來到大埔行街市又逛過古蹟,之後沿天橋商場過商場咁慢慢行到去大埔超級城覓食。



唔記得上次來已經係幾多年之前,印象中這裏以前係咪吉之島?依家同樣係日式百貨公司,但變了成為一田。因為沙田比較就腳,基爾通常都係去沙田果間一田;至於大埔喱間就細少少,第一次來其實入面都係果D攤檔舖位,中庭就有個特價區散貨場,想執平野都不妨去睇下。



不過基爾去到時由於已經成晏晝點幾鐘,襯住仲係lunch hour就同基爾媽先去醫肚吧!行過商場2樓見有喱間So Thai So Good入面有大量吉位,唔駛諗立即入去試試……搵個靚位坐低望望個menu,原來有個幾抵食的lunch set只係$62,而且選擇都幾多喎!



上圖左見到頭盤,可以揀泰式青木瓜沙律和大蒜薯仔湯,因為叫左兩個set咁就兩樣都可以試齊,味道同樣算係above average!主菜方面有7樣粉麵飯揀,其中一樣揀左少少辣的香蒜辣椒西班牙腸意大利麵;上圖右是另外叫的蝦沙律,入面都幾多腰果蝦仁和芒果,幾fresh幾好食!



至於lunch set另一主菜就叫了上面喱個泰式香草包糠焗龍利柳配薯條,同樣係不錯之選。另外幾味想試的仲有香葉辣椒肉碎炒金邊粉、海南雞配油飯、紅酒燴牛肋條配白飯、冬陰海鮮炒飯和番茄煙肉菠菜意大利麵,可惜基爾當日唔記得帶個大少少的胃來,咁唯有留返下次再試吧!

p.s.個lunch set本身包凍/熱咖啡或茶,如果+$20可轉配乳酪冰飲,佢個乳酪冰好好飲值得一試!

So Thai So Good
大埔超級城B區2樓202號舖

58 則留言:

  1. 我間中都去一田逛逛,因為都如你話齋,就腳!

    回覆刪除
    回覆
    1. ok喎大埔果間無咁多人,唔似沙田經常逼爆....

      刪除
  2. 我好似食過其中一間分店,印象中唔錯。原来都係 king parrot group 旗下一間餐廳

    回覆刪除
    回覆
    1. 係呀我見佢銅鑼灣好似都有分店

      刪除
  3. 平時又好少諗去大埔…所以對大埔冇乜印象~~~
    如果想食特別少少的菜式,睇你介紹又唔錯!乳酪冰飯定乳酪冰飲呢?!!
    時時聽到gael兄提起基爾媽,又好少聽你提基爾爸…人大了反而珍惜了和家人相處的時光…

    回覆刪除
    回覆
    1. 沙田係咪就腳啲?
      係喎寫錯咗,手文之誤多讚森兄提點,即去改返:P
      係呀依家要多啲陪下屋企人好啲^^

      刪除
  4. 看名字原以為是泰式餐廳,誰知卻有多款不同選擇…
    而你入去時不知有沒有考慮過有那麼多吉位?通常這會是一種signal!

    回覆刪除
    回覆
    1. 對,如果驚唔受得傳統泰菜的辣,都可以試喱間嘅,相對上傳統泰菜在menu上選擇不多,不過好似記得都有冬蔭功和泰式小食拼盤之類,可以散叫....
      通常在門口會見望下個menu,覺得ok都會入去試一試,如果真係唔啱食就無下次囉:P

      刪除
  5. $62吾算貴,睇落都抵食﹗

    回覆刪除
    回覆
    1. 算係抵㗎啦,因為依家食個焗豬都成四十幾蚊....

      刪除
  6. 呢間真係好抵食味道又唔差, 肥人食過青衣同尖沙咀分店呀~

    回覆刪除
  7. lunch set 睇落都唔錯,值得一試。

    回覆刪除
  8. 在香港,呢個價位可以享受到咁豐富嘅套餐,超值喇!

    回覆刪除
  9. 咁乖同基爾一齊撐枱腳呀~~好仔好仔~~~
    泰國野我都超鐘意食~
    我回來了~

    回覆刪除
    回覆
    1. 向你學習嘛:P
      估到啦你周不時有介紹泰菜....
      今次係咪有好多難忘經歷呢?快啲分享下^^

      刪除
  10. 我雖然住沙田,但鍾意行大埔一田,人少D,好行D。但講到食野,就喜歡在街市樓上食地道食物。

    回覆刪除
    回覆
    1. 大埔好似多啲小店,可以試多啲唔同嘢,沙田因為多大型商場,來來去去比較多連鎖店

      刪除
  11. 大埔超級城其實都幾大,只係規划上啲店舖有啲分散有啲亂,要重新執一執就唔比沙田差!

    回覆刪除
  12. 好次只係去過大埔超級城兩次@@
    一田開左都唔知@@

    回覆刪除
    回覆
    1. 我都唔係去過好多次,好多時都係路過咋
      一田都係開咗幾年,以前係咪吉之島?

      刪除
  13. 好想知基爾媽係食辣辣地嘅意粉?還是生生地嘅沙律呢?

    回覆刪除
  14. 吉之島好似全線無左,都變成一田了.

    回覆刪除
    回覆
    1. 吉之島變左Aeon好耐啦.....
      一田以前叫西田丫嘛

      刪除
  15. 個lunch set睇落幾得下喎!~
    ~香草包糠焗龍利柳配薯條~個樣唔錯!

    回覆刪除
  16. lunch好抵食,睇相覺得唔錯喎

    回覆刪除
  17. 這間餐廳我最愛吃的是甜品。下午茶餐也不錯!

    回覆刪除
    回覆
    1. 乳酪沙冰很正,夏天佳品!
      阿摩愛吃甜品卻依然咁fit....羨慕XXD

      刪除
    2. 把配額都留給甜品,正餐吃少一點!

      刪除
    3. wakakaka...果然好方法^^

      刪除