2017年11月11日 星期六

周末日常之爽爽單車遊

夏天時日日30幾度驕陽似火,真係提唔起勇氣去踩單車,一來怕熱到標汗兼中暑,二來又驚晒到個人兩截色好異相!反而秋天就似乎與單車畫上了等號,趁住涼涼地又咁好天氣,點懶都要出去踩一轉吧!



慣常見的城門河景,係咪百看不厭!Weekend來到更加熱鬧,幸好這天沒有「塞車」的誇張情況,感覺上仍算很愜意,合乎慢活的標準。



望下山再望下海,另一邊就係濾水廠,之前有聽聞想搬濾水廠入岩洞,這大片空地又可以賣畀大財團地產商大賺一筆了,將來就不復見這片靚絕的海闊天空,先把這美景永久封存在基爾blog中吧!



再踩去畫舫果邊,剛剛連這座歷史悠久的畫舫也執笠了,聽聞好快又會改建為婚禮宴會場地,唔知第時船上會唔會有部份設施作公眾開放呢?



對岸另一邊是沙田馬場,小學時學校有去過彭福公園旅行的請舉手……嘩!原來真係都幾多人去過喎!沙田彭福公園同西貢大坳門和大埔大美督係咪可以合稱為「小學秋季旅行三大至hit聖地」呢?其實唔多明白點解年年投票最終都係要揀喱幾處地方去……



緬懷完小學秋季旅行之後繼續出發,沿河岸一路踩返去烏溪沙方向。唔係講笑喎!秋天單車徑旁的石壆上,原來除了有勁多人晒果皮之外,第一次見有人晾枝竹竿在晒咸魚添喎(上圖右)!記得春天時這裏又係晒木棉花的熱門地,整片紅花海都好壯觀。



好喇最後踩到來烏溪沙個小碼頭,點都要歇一歇睇陣吐露港靚景先。這天相信仍有23-4度左右,不少大叔大嬸都愛來這裏碧波暢泳,碼頭邊也有唔少叔叔來釣魚,加埋八八卦卦做塘邊鶴的基爾就更加熱鬧了。



心水清的blog友可能會問基爾做乜唔去影影個「海洋之心」?好簡單因為來到時剛好係中午潮漲時份,心心都浸在水裏了,唔好咁懶下次就自己踩單車來睇吧!

64 則留言:

  1. 我小學旅行時都未有彭福公園,我地係去紅梅谷、小夏威夷,呢個代溝好大喎。

    回覆刪除
    回覆
    1. 我可能同EE同一年代,去的地方一樣,不過那時小夏威夷是叫井欄樹的。
      那些小學年代,我還去過蓬贏仙館。

      刪除
    2. EE:紅梅谷係咪獅子山郊野公園果度?秋天都唔少學校去果度旅行㗎喎^^

      刪除
    3. ShuSiu:小夏威夷喱個名好正,井欄樹都有聽過,睇blog友都有寫過呢!蓬贏仙館係咪在粉嶺?好似有得食齋.....

      刪除
    4. 蓬贏仙館係喺粉嶺,嗰陣時學校旅行我還記得帶茄汁沙甸魚夾麵包當lunch 呢!
      逢贏,哈哈,打麻將就好喇…

      刪除
    5. 咦,茄汁沙甸魚夾麵包真係好經典喎^^
      咁有冇咸牛肉午餐肉腸仔夾面包?!
      你在外國生活咁耐仲記唔記得點打麻將㗎?...XXD

      刪除
    6. 鹹牛肉就應該冇(太貴嘛),但午餐肉同腸仔都常常食,尤其是亞媽冇時間買餸…
      我都冇打麻將好多年,聽講依家打的跟以前不同,所以係識打都變咗唔識打喇!

      刪除
    7. wakakaka.....不過咸牛肉都不宜食太多,味精重鹽份也多不太健康:P
      我都唔係好識㗎咋@@

      刪除
  2. 回覆
    1. 我都係第一次見,唔知會唔會有人偷呢?

      刪除
  3. 你好掂呀,可以踩咁遠,
    一聽到話踩單車,即刻諗起沙田單車公園,但而家就變咗共享單車 我已經好耐冇踩過單車,咁鬼辛苦,咪搞我...

    回覆刪除
    回覆
    1. 其實唔算好遠㗎咋,因為果日都有其他野做:P
      依家天氣涼涼地算係舒服咗好多啦,踩下短途都唔錯嘅^^
      仲有單車公園不過搬咗,如果唔想用電話app都仲可以去單車舖租.....

      刪除
  4. 最記得大美督, 秋季大旅行, 去黎都係個幾度啦

    回覆刪除
    回覆
    1. 老師帶隊我諗都要安全為主,成大班小朋友驚兼顧唔到,所以多數去啲大路地方....

      刪除
  5. 婚禮宴會場地,唔使等公眾開放啦,你結完就分結完就分咪時時都可以去囉.

    回覆刪除
    回覆
    1. 嘩,咁要靠晒王子介紹多啲可以結完就分結完就分果啲先掂喎.....XXXD

      刪除
  6. 最近天氣唔冷唔熱,踏單車真係一流啦 ;-)

    回覆刪除
    回覆
    1. 依家天氣涼咗可以多點戶外活動啦,你又可以出動多啲影靚相^^

      刪除
  7. 畫舫越做越差,希望未來可以起死回生!
    呢個時候踏單車最爽,可以踏多幾轉!

    回覆刪除
    回覆
    1. 我都好耐無去過唔知係咪真係無乜生意,我諗酒席係少咗好多,單靠茶市賺唔夠吧!!
      同埋石門果邊開咗好幾間新茶樓都會分薄咗好多生意啦^^
      都會㗎,只要不落雨就可以了.....

      刪除
  8. 你去城門河,我就去咗更晒嘅地方行,就係船灣淡水湖條堤壩啦^^

    回覆刪除
    回覆
    1. 你好堅喎,有冇行埋上山?
      大壩果度風景好靚靚,不過假日就多人過旺角,同埋好多人放風箏,堤壩上踩單車要好小心^^

      刪除
  9. 大美督同大坳門除咗燒烤,仲有其他嘢玩嘛,例如踩單車、放風箏。我估因為咁所以多學生選GWA

    回覆刪除
    回覆
    1. 對呀,以前這兩度地方都係放紙鳶聖地,燒烤又多人,汀角路係超塞車:P

      刪除
  10. 踩下踩下或者就踩佐去台灣環島喇~ 哈哈

    回覆刪除
    回覆
    1. 有排未到你女車神級數喎,我玩下㗎咋....:P

      刪除
  11. 回覆
    1. 依家你住果邊咁多湖邊大公園有好多地方,有冇諗過買架單車來練習下?^^

      刪除
  12. 但係在河裡釣的魚可以用來食嗎??
    Gael兄講的美景,我幾乎日日車程都經過~~~

    回覆刪除
    回覆
    1. 我見有啲人係會食㗎喎,但我個人都唔敢喇!
      係咩係咩?@@咁都有可能見過森兄喎.....

      刪除
    2. 應該唔會…只係車程經過城門河~冇咩可能會見到…

      刪除
    3. 同埋先決條件係你要戴返副黑超我先有少少機會認得你囉.....XXXD

      刪除
    4. 咁認呀Gael兄可能要留意頂擰轉嚟戴的鴨咀帽喎……
      如果…咁…都相認倒真係要去填張六合彩飛~~~~XXXXXD

      刪除
    5. 嘩,好陳年喎喱個image.....我都好耐無戴帽,唔記得擺咗去邊....XXXD
      六合彩期期都有人中㗎喎(包括安慰獎)!!!看你有冇時間去買啦:P

      刪除
  13. 大眾踩單車郊野上,良朋共享身心舒暢......

    回覆刪除
  14. 我都勁耐未踩過真單車~成日踩d唔識郁哥d單車~~~~~
    呢個時候去踩單車天氣真係夾岩哂~~~有陽光得黎又唔怕熱~

    回覆刪除
    回覆
    1. 喺好耐好耐以前.........我好似記得路環海邊果度有單車租^^
      夾㗎,有冇試過同公子們去踩?
      你去南美非洲都唔怕曬,咁在自己地頭一定唔會怕嘅XXXD

      刪除
    2. 係呀!!!!你應該好細個有黎過喎!!..我就成日係氹仔~~~~~~~我以前細個都有去踩~~~我就係氹仔學識的~~~
      又真係無喎~咁有益身心~
      南美哥次黑到離哂譜..所以非洲哥時已經知要點保護自己....塊面~~~~~~唔係架我係澳門都好驚曬架!!

      刪除
    3. 果然無記錯^^
      對了,我覺得踩單車踩roller踩滑板同游水都係最好細細個時去學好好多,細個時個膽大啲,容易學得識^^
      咁夏天都係有基本防晒好啲嘅,你去南美哥陣可能估唔到佢地勢高紫外線咁勁啫!!!

      刪除
  15. 我有時會跑呢條路線架

    回覆刪除
    回覆
    1. 係啊我印象中見你blog都有寫過....

      刪除
  16. 好環保喎,返工都爽爽踏單車啦!kaka..

    回覆刪除
    回覆
    1. 咦咦咦,JJ又會估到嘅?????喱個係我其中一個好重要的願望:P

      刪除
    2. 孤寒自己就會環保,孤寒人地就係賴貓囉!kaka..

      刪除
    3. 同孤寒有乜關係???@@
      我只係覺得返工放工唔駛塞車逼車已經係天大樂事而已:P

      刪除
  17. 我都好中意睇城門河風景,彭福公園我無去過,景色OK嗎?

    回覆刪除
    回覆
    1. 咁有空不妨同家人去逛逛啦,不過要留意如果係賽馬日就不開放公園,唔好摸門釘要check咗先去囉^^

      刪除
  18. I also like cycling along Shing Mun River.

    回覆刪除
    回覆
    1. 咦,你係咪全副裝備果隻?
      依家假日多咗啲車隊來練車.....

      刪除
  19. 勁爽的活動,可惜我忙到無朋友囉!

    回覆刪除
    回覆
    1. 記得要忙裏偷閒,間中要放鬆下喎.....
      提議你抽空寫下故仔,可以減壓呢wakakakaka^^

      刪除
  20. 上次單車遊係暑假旅行在日本福岡.
    二年前在香港單車徑踏單車,假日多人多車,
    我小學雞踏單車,驚驚....

    回覆刪除
    回覆
    1. 我都覺得HK踩單車也真越來越逼,反而在外地才可以享受到真正的悠閒:P
      我都係小學雞咋,都驚㗎!

      刪除
  21. 驕陽似火既天氣已經過左!
    秋風送爽既天氣最啱單車樂啦.

    回覆刪除
    回覆
    1. 下周好似話仲會涼啲,到時會唔會同大佬和大小姐去踩單車?

      刪除
    2. 比較少去踩單車,多數行山睇風景.

      刪除
    3. 依家天氣去行山最好,夠涼夠爽^^

      刪除
  22. 有人唔記得跌斷手係診所痛到劏豬咁叫��
    雙11仲唔夠要刻意整double ,想點��

    回覆刪除
    回覆
    1. 係喎....你唔提起都唔記得啦....咁耐歷史!!!XXXD
      更係啦,整多幾孖油炸鬼旺下啲桃花丫嘛wakakakaka....

      刪除
  23. 基爾兄是否比較少踩單車?睇開你卜唔多聽你提過踩單車嘅?

    回覆刪除
    回覆
    1. 間中都有去踩嘅,不過唔係次次會寫啦....因為太日常,我諗唔係咁多人想睇吧:P

      刪除