2018年4月6日 星期五

金山粥店@西貢

從金山歸來之後,突然有點掛住想去食返碗粥和炸兩,火速去了西貢的金山粥店吃一轉,是巧合吧!竟又同「金山」拉上了關係……想繼續睇金山blog也不用著急,基爾容後仍會陸續寫埋餘下的旅程見聞!



基爾平時也不特別偏好食粥,但耐無食好似又會有點期待。然而近年有好食炸兩出售的本地食肆買少見少,基本上多數係失望而回。之前聽人地講西貢喱間老字號不錯,回來後反正仍是紅字假,咁又火速去試試佢。



睇返網上資料才知原來炸兩是這店的招牌菜,咁應該有返咁上下水準吧!老店就在橫街入面,其實不容易搵,但見不少街坊都來買外賣,相信在這一帶應頗有名氣。基爾來到時可能正值中午時段,要在店外等了約10分鐘位。入坐後隨即點了普通的皮蛋瘦(忘了影價錢牌,記憶中好似廿幾蚊左右),另外當然重點還要叫炸兩,這裏的炸兩仍沿用傳統的整孖油炸鬼包腸粉製成,如果嫌太飽可以叫單條的「炸一」。食完行返出去會路經柴太郎咖啡店,這間應該好多人都熟悉了。



一路再往前走仲會經過經常逼滿人的許姑娘家鄉茶粿檔,基爾其實對茶粿好一般,但基爾媽就多數會買,仲要係偏愛咸茶粿,基爾為趁高興都食了一個當係應酬下。最後總結食後感:如果可以選擇的話,依然比較愛食甜茶粿,紅豆綠茶類更佳!



在街邊食過茶粿之後,繼續隨人潮行返出去近碼頭果邊。由於假期關係這裏真係旺過旺角,岸邊除了有艇仔賣海鮮和乾貨之外,乜依家竟然仲有賣貓狗寵物咩?行近少少睇……噢!誤會了!原來係愛護動物慈善團體搞的收養寵物活動。基爾路過時只餘下兩隻半睡中的小狗,希望佢地最終真可遇到有緣的好主人。



好耐無來西貢,咁點都要影返張經典的碼頭相先似樣!假期來到真係超級多人,成個碼頭都堆滿遊人,大部份應該都係來湊熱鬧吧!真正要幫襯海鮮艇的眼見就不算太多了。依家碼頭兩邊仲越開越多外島遊的遊船河公司,基爾之前都係坐喱類船仔出海去滘西洲和鹽田仔,第時等夏天可以又試下去橋咀半月灣睇下蕩下!



唔出海咁又繼續行埋碼頭另一邊……咦!原來喱日海邊仲有個農墟喎!不過當然係好小型的,農產品其實也不算太多,齋睇下無妨,要在這裏買斤菜買磅番薯返屋企拎咁鬼遠就免啦!再行遠少少仲有D係賣手作仔的攤檔,最有趣係竟然仲有「線面」這類傳統扮靚攤位,印象中好似線一次面要成$70-80蚊呢!



當街當巷玩線面其實都有點尷尬(基爾覺得),因為預左有好多基爾喱類好事之徒走埋去八卦睇示範,事實上圍觀的都唔只基爾一個,成村人三唔識七圍住睇你線加上三姑六婆你一言我一語係咪都幾有喜劇效果?塘邊鶴基爾睇睇下都忍唔住笑,拿拿林行返出去海邊以免打擾人。海邊這裏泊了很多龍舟,醒起過多個零兩個月又到扒龍船季節了,時間過得真快!



時光飛逝,這趟西貢閃遊又來到尾聲,既然用粥和炸兩做序幕,自然要以甜品作結束才算是「首尾呼應」吧!咁來西貢食甜品又多數會來十字路口喱間名店,主要原因係基爾媽掛住佢個榴槤班戟,另外仲叫了薑汁撞奶和楊枝甘露,估唔估到邊味係基爾order呢又?

金山粥店
西貢舊村西貢正街

48 則留言:

  1. 塘邊鶴好事之徒基爾
    order楊枝甘露

    回覆刪除
    回覆
    1. 如果唔係邊有咁多嘢寫畀你睇先.....XXXD
      Bingo~~~咁叻嘅你?!!@@

      刪除
  2. 我舊年有BLOG友帶我去金山食粥,真係唔錯,很地道。 不過那間賣茶果的就麻麻,好多地方做得好過佢。可惜今年無時間入西貢。

    回覆刪除
    回覆
    1. 我都係第一次去幫襯,個粥底都ok嘅,炸兩也不錯算是合格,不過依家要成廿幾蚊一碗粥就真係有點貴,如果有時間多數自己煲算:P
      茶果檔就在大街旁,所以好多人行過當係貪得意買少少食下囉,我個人也不太熱衷於茶果類,可食可不食客^^!
      你梗係啦,每次回來都好忙呢wakakaka...

      刪除
  3. 先要讚一讚基爾這個孝順仔,你去食粥都諗住亞媽,咁你做乜唔同佢一齊去呀?
    再講,吃粥與甜點又怎是首尾呼應,原因我只聽過粥粉麵飯…嘻嘻!

    回覆刪除
    回覆
    1. 有呀,佢有份一齊去食㗎,我唔記得咗寫咩?!!^^
      我諗住都係講下食嘢丫嘛wakakaka....

      刪除
  4. 啲粥掂唔掂呀?出面食粥好多時都係食糊仔咁.

    回覆刪除
    回覆
    1. 我覺得好過一粥麵海皇果啲,不過廿幾蚊就自覺有點貴,我還停留在以前細個時去冬菇亭大排檔食幾蚊碗粥的日子XXXXD

      刪除
  5. 食炸兩多數係失望而回,因為好食的炸兩是即炸即包。
    我在街頭見過幾次線面,其餘冇乜好睇姐,電視訪問過幫人線面的大姐和接受線面的大姐,原來線面都有痛楚架,幫人線面的大姐手指都有職業病喎!

    回覆刪除
    回覆
    1. 茶樓如果有炸兩都係多數林晒韌咗唔好食....
      因為依家真係好少機會在街上見到啦,可能只有在舊區先有吧!我都係只在電視上見過,真人示範就第一次見^^!

      刪除
  6. Gael兄終於返來lu!yeah!!!
    本身都喜歡粥,不過要自家煲,外邊就很少食……
    估薑汁撞奶係Gael兄點卦?!!...

    回覆刪除
    回覆
    1. 返來啦,你估真係唔駛撈咩XXXXD
      我都好同意,自家煲可以落自己喜歡的材料,不過就要花時間睇火,成日驚滾瀉粥...
      通常在街比較少掂奶製品:P

      刪除
  7. I have tried the congee. The quality is OK.

    回覆刪除
    回覆
    1. 原來喱間又真係幾出名喎,咁多blog友都有去過呢...

      刪除
  8. 肥人愛吃咸茶粿, 因唔愛甜食..hahaaa

    回覆刪除
    回覆
    1. 可能我仲未識得欣賞咸茶粿啦...:P

      刪除
  9. 依家香港地越來越回歸 , 當街當巷修甲, 敷面都有=.=
    十字路口隔離間意餐係我曾經飯堂

    回覆刪除
    回覆
    1. 你係咪講水晶甲果類?我都有見過喎,敷面又幾誇張,未見過呢....
      可能依家舖租貴舖又細間,無乜地方畀個客入店裏搞,如果有個屏風仔遮擋一下視線,心理上可能會C服少少吧^^
      其實有時有些當街當巷足浴果啲,某程度上好似仲有點不雅觀XXXXD
      咩名?下次行過留意下,有冇pizza?

      刪除
  10. 已經好耐無食過呢家野 T-T

    回覆刪除
    回覆
    1. 我依家其實都好少食粥,在家裏都係多數煲咸麥皮,好似方便快捷啲:P

      刪除
  11. 假日的西貢真係旺過旺角>_<可以叫單條的「炸一」,對食量細的人幾好喎,我估是薑汁撞奶﹗

    回覆刪除
    回覆
    1. 係呀方便好多,因為有時食了其他野又唔係太肚餓,食一大碟炸兩會太飽,如果純粹想過下口癮可以選擇炸一都係不錯之選^^
      奶類唔係好經常食,所以在街多數都不會點呢:P

      刪除
  12. 我以為在美國的金山也有個西貢,原來是香港的西貢.呵呵.

    回覆刪除
    回覆
    1. wakakaka......咁果邊都有好多海港風情睇嘅,但就無乜炸兩食囉XXD

      刪除
  13. 我估你order楊枝甘露
    金山粥我們多數買腸粉炸兩,佢嘅柴魚花生粥比較好吃。
    許姑娘我只幫襯過一次,我都係喜歡甜多啲。
    先母缐面手勢很好,我結婚前她依俗例為我線面。

    回覆刪除
    回覆
    1. Bing~~Bingo....^^
      下次如再去都試埋你講果個柴魚花生粥先得!
      就好似豆腐花咁,如果食咸的總係覺得有點怪怪XXD
      以前應該都係女士們的一門手藝吧,就好似縫紉做衫煮餸一樣

      刪除
  14. 很久很久沒到過西貢逛……
    茶粿,我鍾意食!

    回覆刪除
    回覆
    1. 是不錯的消閒好去處,去看看山看看海也不錯,還有不少美食呢
      愛咸的還是甜?

      刪除
    2. 依家市區好像也不常見,都係郊外離島才有售了....

      刪除
  15. 一碗粥就寫成千字,你係咪隱形作家呀?

    回覆刪除
    回覆
    1. 你唔係依家先知呀化......XXXD

      刪除
    2. 呀化係你筆名,依家先知咋!kaka......

      刪除
    3. 喱個咁型嘅筆名真係無乜聽過喎.......:P

      刪除
  16. "當街當巷玩線面其實都有點尷尬...好事之徒走埋去八卦睇示範,事實上圍觀的都唔只基爾一個,成村人三唔識七圍住睇你線加上三姑六婆你一言我一語係咪都幾有喜劇效果? "....其實 "線面" 也不是新鮮的事,有些舊式屋村的街市都有人擺擋替人 "線面"的, 見那些被線面者一 點也不尷尬喎。

    回覆刪除
    回覆
    1. 對我來說都幾新鮮呀,第一次在街上見真人示範呢,之前只在電視睇過:P
      可能啲顧客已經習慣咗有人會睇示範啦^^

      刪除
  17. 金山粥店在西貢好出名的,門口做布包腸粉也是生招牌。

    回覆刪除
    回覆
    1. 係囉原來咁多blog友都有幫襯過,真係名店喎
      你有冇見過背心老闆拉腸粉?

      刪除
  18. 有人出o左奧地利郵票blog呀!你估邊個?

    回覆刪除
    回覆
    1. 仲駛估咩一定係最熱門果位啦....XXXD

      刪除
  19. 我估楊枝金露,因為張相最大張~

    回覆刪除
  20. 好耐冇去西貢了,原來仲係咁多人!

    回覆刪除
  21. 如果早啲睇到就好啦~
    上星期日都去左西貢,又係遇到有市集好熱鬧~
    有好多年冇食過炸兩,好想食:)

    回覆刪除
    回覆
    1. 今个禮拜天气也不錯可以去食過啦^^
      我都係好耐冇食過炸兩,有時去一粥面果D就一般般唔算太好食:P

      刪除
  22. 西貢要 hea 都真係幾好 hea !

    回覆刪除
    回覆
    1. 你明顯是超級fans,上山落海都啱你^^

      刪除