2018年4月19日 星期四

新田購物城運吉遊@元朗

回歸老家之後,心裏其實一直有幾處新地方想去逛逛,不過一直都很忙沒餘暇時間,趁住喱個weekend咁又即刻坐言起行,用短短一個優閒下午去閃電速遊一轉!



其實之前已聽閒這個新田購物城早於新年前後開幕了,然而由於交通實在不太方便,始終沒太大意欲去看看有什麼賣點。基爾這天就相約幾個同學仔先來到上水吹水聚餐,怎知一坐落就天南地北大傾了一餐,再看看手錶已經成3點了,還不快起行恐怕就要天黑!結果火速跑去搭76K,約半個鐘就來到新田,上圖是在新田落車的巴士站,請找亮點……



千奇百趣睇真D,到底喱個巴士站有乜咁爆趣呢?有冇人發現,點解喱度要幢兩個完全一模一樣的76K巴士站牌呢?莫非係驚巴士司機叔叔睇唔清楚會唔小心飛站?Anyway……都係唔好咁八卦,先行去車站旁邊喱間東山古廟睇睇先,反正搭咁遠車一場來到,係咪睇多個景點會著數D?



喱間位於新田永平村口的東山古廟咪見佢修葺得咁新淨光鮮,翻查資料才知原來佢始建於15世紀明朝成化六年(1470年),至今已經有500幾年歷史,果然是「古廟」吧!最近一次重修於1970年,現獲列為香港三級歷史建築。基爾入內簡單走了一圈,是很典型的中式廟堂設計,常見的神像香塔祭祀設施一應俱備,很值得入去參觀。



之後再去行埋另一景點,基爾都係來到先知原來這裏仲有個文天祥公園,如果中學時有讀中國歷史應該一定知文天祥是誰吧!就是那位「宋末三傑」之一的南宋末代丞相,之前基爾都聽過文氏係新界五大姓氏之一(聞說是小學名校入學試題目云云),不過都係依家先知原來佢地係文天祥後人,至今仍定居於元朗新田一帶。



文天祥公園裏有座十幾廿尺高的巨型文天祥石像,由於公園位於小山上,向北遠望可以見到深圳鬧市一帶的高樓大廈;園內還有非常宏偉的環型浮雕石碑,記載文天祥護送宋帝一直南遷的歷史,還有之後文氏後人的族譜之類。離開公園行過另一邊仲見到上圖這間古色古香的大夫第,是清朝同治四年(1865年)文頌鑾所建的府第,他曾獲賜封大夫銜。可惜這天來到正在維修,無法入內參觀。



咁就繼續行返出去大路先。沿住喱條分岔路左轉入去東永安路,已經見到大大個新田購物城的路牌,相信應該不會太難找吧!



再向前行三兩分鐘已經見到購物城的入口了,門口其實設計都幾簡約幾靚,很期待入面會有咩野睇咩野買咩野食呢?



入左去之後就見到喱架人力車,是典型畀遊客打卡影相的道具景點吧!隔籬就係一個好大的碰碰車場,又令人諗返起以前去荔園玩果類碰碰車。記憶中細個時仲有D類似冒險樂園之類的迷你遊樂場會有小朋友版碰碰車玩,依家舖租貴當然不再可能有咁大地方玩碰碰車了。



望入去個賽車場其實規模都幾大幾有睇頭喎!當天去到也不是太多人去玩,基本上也不用排隊輪候,可能如果係長假期會比較旺場吧!印象中價錢也不太便宜,冇記錯好似10分鐘都要成60-70蚊,基爾都無去玩純粹做一陣塘邊鶴就算!



睇完人地玩碰碰車繼續再四圍行多陣,其實整個購物城範圍都幾大,但可惜開業的店舖就寥寥可數門堪羅雀。就如上圖這間連鎖服裝店outlet,相信任何人都應可預計到不會特別多遊客會山長水遠搭咁耐車來幫襯吧!而且折扣也不特別吸引,對基爾來說是0%吸引力……



其餘地方長這樣……眼見仲有數字屋或萬寧之類的藥妝店以及一些遊戲攤位之類,也不特別好生意;就連三數間茶廳餐或小食亭也只是小貓兩三隻,如非有舖租津貼也真不太清楚如何經營下去!若以現時經營模式看,不論係對大陸遊客還是本地人,吸引力也是欠奉。



行到邊沿地帶就更加「荒涼」了,基本上大部份都係丟空的吉舖,很多都沒租出,其餘還有些外面圍板寫上有VR War Game的體驗場地,但又聽唔到入面有人聲在玩緊喎!相信這個大型購物城要變成真正的熱門outlet消費玩樂場地,確實還有很遙遠的發展計劃,希望最終不會爛尾收場吧!

51 則留言:

  1. 我仲以為係一個mall或者好似外國嘅outlets靚靚咁.睇怕都係爛尾收場。

    回覆刪除
    回覆
    1. 我諗佢地原意係想似外國outlet模式,但眼高手低.....
      唔知第時附近果個口岸開咗係咪會多大陸人來買嘢?
      提議佢地重金禮聘王子回流返來重新策劃過店舖類型又或者搞多啲show做暖場嘉賓XXXXD

      刪除
  2. 睇新聞時知道呢到靜英英,個班議員係咪要負責?

    回覆刪除
    回覆
    1. 佢地應該完全唔會得閒理喱啲嘢XXXD

      刪除
  3. 如果個性質係好似搞工展會咁,我諗就一定會好啲!

    回覆刪除
    回覆
    1. 仲有,最好有車費津貼畀番啲參觀人士。

      刪除
    2. Good idea~~~~~!!!咁下屆不如就在這裏搞工展會或者花展之類,但一定要免入場費同埋有免費交通接駁,否則一樣拍烏蠅XXXD
      其實租個場畀人搞band show也可以,叫五月天唔好去迪士尼,來喱度搞啦wakakakaka

      刪除
  4. 係咪俾內地人去架?等佢地唔駛買水貨.對香港人應冇乜吸引力.

    回覆刪除
    回覆
    1. 反正名店應該都不會來,索性全場開晒藥房和金舖^0^

      刪除
  5. 在報章上已聞「慘況」,現在多謝你現場報導。

    回覆刪除
    回覆
    1. 現場記者直擊報道完畢,謝謝收看!!!XXD

      刪除
  6. 回覆
    1. 提議佢地不如開放個場畀人地塗鴉.......XXXD

      刪除
  7. 我都唔知開張左, 政府宣傳不夠吧, 咁清靜既, 唔係咁睇好囉。

    回覆刪除
    回覆
    1. 年頭開張果陣有宣傳,依家就無乜....
      不過其實單靠宣傳都無乜用,因為根本都無乜野畀人行:P

      刪除
  8. 搞outlet
    冇乜問題呀
    始終都有個新嘅開始
    萬事起頭難
    當吸取經驗

    回覆刪除
    回覆
    1. 咁佢原意都係想搞個吸引大陸遊客嘅購物景點啫,索性規定所有旅行團都要來這裏至少半天就一定旺晒場XXXXD

      刪除
  9. 回覆
    1. 下次擺啲selfie上去唔知有冇幫助.....或者更趕客XXXXXD

      刪除
  10. 沒有吸引力,睇怕幾時執。

    回覆刪除
  11. 回覆
    1. 轉做特賣場大撻地散貨場,又或者奶粉城XXD

      刪除
  12. 真係好荒涼..............
    文天祥公園反而幾有吸引力喎~好古色古香~

    回覆刪除
    回覆
    1. 未開果part索性改造單車公園好過...XD
      估唔到喎,今次這處古蹟反而吸引到你,還以為你專攻潮場或美食地方wakakaka

      刪除
  13. 回覆
    1. 一早運咗去夢飛場果邊啦,留言都無回覆嘅:P

      刪除
    2. 人問東你就答西,咁樣係回覆咩? ..!!!

      刪除
    3. 至少都有幾隻字先丫.....:P

      刪除
  14. 呢個所謂購物城,真係遠到唔識去,如果唔用旅遊車車遊客過去,真係好難有人特登去買嘢喎。

    回覆刪除
    回覆
    1. 唔記得係咪元朗和上水係有梭穿巴士,不過班次都幾疏嘅:P
      真係唔知,但至少我暫時都唔會再去囉XXXD

      刪除
  15. 呢個新田購物城係咪話要俾大陸人去買野的果個地方?咁荒涼!遲早執笠!

    回覆刪除
  16. 雖然0%吸引力都要好多謝你去一轉分享出嚟,留給強人去好D

    回覆刪除
    回覆
    1. 如果去開元朗都可以順腳去行一陣嘅^^

      刪除
  17. 聽講話九龍都有唔少吉舖,新田這種購物場,不旺場不是意外事啦。
    如果有車免費接送來回,相信就會熱鬧啲嘅。

    回覆刪除
    回覆
    1. 如果九成做遊客生意的,遊客不來就自然變吉舖了吧:P
      果度幾年後會有個新口岸,我諗都係為將來而投資.....不過依家至少會守幾年先掂!
      有穿梭巴去上水和元朗,不過好似班次不太多,客量也不多,我見大部份人係自駕去!

      刪除
    2. 因為上水啲街坊成日投訴話啲水貨客阻塞道路,同埋買晒啲奶粉藥物,先會建起這個購物場。
      如果將來新田有個新口岸,或者會有新的轉機也未定。

      刪除
    3. 係呀如果齋走水貨喱度來回都算快,同埋相對上影響社會民生的機會較細吧:P

      刪除
  18. 我聽返嚟的見聞是新田購物城唔成功。遊客唔會為咗玩而去新田購物城,加上地點又唔係太好,如果都係藥房、阿信屋果D,咁點解唔去其他更就腳的旺區?

    回覆刪除
    回覆
    1. 將來果度附近會開個新口岸,可能係希望啲水貨客去果度搬貨唔係逼晒去上水啩:P
      玩樂設施明顯只係點綴一下吧!

      刪除
  19. 唔知新田係邊!
    唔知過場開左!

    回覆刪除
    回覆
    1. 元朗去其實都幾近,不過我果次係由上水去!

      刪除
  20. 原來香港有五百年歷史的古廟, 看石雕牆都保持得幾好!
    大陸人唔只係來藥房買貨, 還睇樓 ... 唔係市中心有其他景物都好難吸引大批人 ... 加上上網購物容易, 誰有神心熱逛它呢!?

    回覆刪除
    回覆
    1. 對,我都係去到先知,我覺得古蹟還值得去一遊呢^^
      我諗名店或者金舖未必會去這種半臨時場地開喇,一來保安問題,二來交通未完善,同原先構想好似歐美日本那類大型outlet有很大落差:P

      刪除
  21. 雖然肥人住得好近...但都無興趣過去行一轉呢..HAHAA

    回覆刪除
    回覆
    1. 暫時都無乜必要去啦,因為根本都無野好睇又無野好買:P

      刪除
  22. 嘩'睇落得少貓三幾隻~啲檔口點做生意呀!

    回覆刪除