2018年4月9日 星期一

武漢迎花潮@序章

心水清的blog友可能已留意到基爾換了張櫻花招牌相,冇錯最近趁住花期又火速陪同基爾媽去了一趟賞櫻,咁事不宜遲就在金山之外先加插多個新鮮熱辣的花潮網誌吧!



復活節長假期可能好多人會選擇去比較熱門的日韓賞櫻花,慳家基爾就揀了比較冷門少少的路線(其實係貪平吧),北上神州的武漢快遊一轉,聽聞那裏也有很多日殖時代的櫻花可賞。



好耐無試過旅遊旺季去旅行,機場人山人海是常識吧!不過基爾都係第一次在機場巧遇上friend,事前雙方都沒通報所以感覺這種緣份幾搞笑又神奇,證明high season出遊遇到熟人的機會率估計也應超過50%吧!吹水時才知友人是排隔離港航條line,正準備出發去九州,寒酸基爾就坐南航去武漢(但勝在夠近唔駛悶坐咁耐飛機……全力開動自我安慰mode)!



例牌係咪要影一影喱個登機閘口牌,不過原來復活節檔期係無乜特別裝飾,只得聖誕新年有!坐南航飛武漢有個最大好處就係班機唔太早也不太遲,11:30am上機明顯fit晒時間,唔需要倒C咁早起身趕出機場,如果坐KA就要搭凌晨的N線機場巴了,基爾試過有次送基爾媽搭N線要成三四點未天光出發,實在太辛苦!



拿!就係坐喱架飛機仔出發。回顧返基爾個旅程地圖(其實唔係好大),如果唔計前年飛北京出trip做野,基爾數數手指都有成七八年無真正去過大陸旅行了(對上一次係咪已經係去上海睇世博果次),唔太記得之前有冇坐過南航,也可能去雲南或上海有坐過都未定。



通常如果係坐短途機的話,基爾會比較prefer坐窗口位,不過這次出發坐正個機翼位,若要影航拍照可能會有少少難度。對面見到果架淺南色的大韓機唔知係咪飛首爾呢!話時話其實基爾這些年來都從未踏足過韓國這片土地,可能對韓菜一直沒太大期待吧!或許將來也會有機會一遊也未定……(事先聲明不是去整容!)



話咁快就飛喇!沒有delay真好!以前成日聽人地講飛大陸九成會delay比較煩,基爾這次旅程總算有個完美的開始吧!上圖左是香港機場上空航拍,飛了個多小時就見到下面有條大河流過,係咪長江呢?



這次坐的南航是737-800,坐位是3-3只有左右兩排,同飛金山的大機最唔同又最唔慣係無私家電視睇,幸好只係坐個零鐘就到步問題也不大,同飛台灣都係差不多,食個飯就準備落機了。



至於果個飛機餐飯盒就不提也罷,但為免浪費食物基爾還是咬緊牙關吃下去了(盡了力只食剩少少),回程時如果可以的話寧願叫佢畀多幾個餐飽仔仲好食D。上圖是中午點半鐘左右飛機已安抵武漢機場。



武漢這座新航廈好似話開幕了無耐而已,基爾雖然係大鄉里不過都要畀個讚佢,可能因為地方夠新淨關係,路標指示亦算清晰,過海關也非常快捷有效率,完全沒有以往常見那種既混亂又令人焦躁不安的感覺。



最令人喜出望外就是上圖這個機場廁所,乾淨程度恍如以為是去了日本,真心希望佢地能夠keep住這種高尚而進步的國民質素,並繼續推廣到內地每一處旅遊區就好了,善哉善哉!



過完關來到寄艙行李輸送帶,仍未見佢開始運作,證明先去個靚靚廁所是上策了!幸好行李也不太慢出來(環顧四周同時間好似就只有這班機到著),最後順利拎齊就可以正式出發,武漢櫻花我來也!

59 則留言:

  1. 乜復活節有假放咁好吖?

    回覆刪除
  2. 大陸航機之食物,有些地方好似是外判,那便知質素可有多高?

    回覆刪除
    回覆
    1. 食物外判,那知質素有多高 !?

      刪除
    2. Siu:如果係外判我覺得可以盡量用一些簡簡單單的餐單,只要係做得好食我唔介意食三文治或者麵包乳酪之類,飯麵如果煮得難食寧願佢唔好提供,以免浪費食物不環保XXXD

      刪除
    3. 大夫:外判只要簡單便宜又好食,都可以接受嘅,但入得口是抵線:P

      刪除
  3. 我覺得到內地賞櫻不寒酸,一樣是要消費,最寒酸是我在香港賞櫻冇消費,香港的賞櫻少得又寒酸添!
    我乘坐飛機十之八次都見到機翼,否則是坐333座位的中間。

    回覆刪除
    回覆
    1. 係呀一樣要消費,同埋啲消費真係覺得貴咗好多,以前(十幾年前)返大陸玩係覺得平同抵玩,依家完全唔會覺得平囉:P
      HK賞櫻都唔錯,最大優點都唔駛煩交通和食住問題,長洲大帽山和CU我都有去過睇,明年要mark定日子試下去科學園和單車館,HK花期一般都幾難捉,如果係暖年,長洲2月已開花了!
      短途我唔抗拒坐窗口位,十個鐘以上長程機必揀aisle seat!!!:P

      刪除
  4. 你又諗到去武漢賞花,夠新鮮,終於有啲特別賞花地區,見到絕大部份朋友,唔喺去韓國就喺日本,真心講喺靚,但見得多都悶
    期待...

    回覆刪除
    回覆
    1. 其實舊年都已經想去睇㗎啦但放唔到假,今年放到一於坐言起行啦!幸好金山回來仲未放晒啲年假wakakaka.....
      韓國我都未去過呢,有機會都想去睇下嘅^^

      刪除
  5. 喂喂!湖南春賞花秋賞黃葉我早前都有諗過架!我當時想去極具歷史的岳麓書院岳麓山走走~

    回覆刪除
    回覆
    1. 今次去我覺得比我想像中靚喎,雖然都係人多但啲花都幾密幾靚,同埋你要有心理準備常會見到有人會折樹枝或者搖樹,有公園管理員會不斷吹銀雞警告啲過火遊人XXXXD
      返大陸我都喜歡睇歷史,以前讀中史讀過果啲古蹟都想親身去睇下^^

      刪除
    2. 無辦法,人民質素有待改善~
      咁中國歷史又確是比西方歷史更有親切感嘅~

      刪除
    3. 有進步空間....^^
      喱種係咪叫讀萬卷書不如行萬里路!

      刪除
  6. 大陸飛機肥人而家真係唔太敢坐....
    坐過一次東方航空去上海, 呆坐係飛機3個鐘, 第一次係地面食飛機餐呢~
    回程好在早左到機場, 去到機場已見到DELAY, 即刻改機票坐早一班返香港呢...haaaa

    回覆刪除
    回覆
    1. 沿海城市可能會比較常有軍演令飛機delay,中招機會比較大,內陸城市會唔會好少少?
      今次我來回都好準時(來回程也是遲15分鐘左右我唔當佢delay),好好彩!!
      可以改機票坐早一班真好,駛唔駛加錢?

      刪除
  7. 宜家坐高鐵去武漢都係另一種選擇,幾年前去武漢賞過櫻花,真係靚!對果度印象都幾好.

    回覆刪除
    回覆
    1. 高鐵我諗應該都要成五六個鐘係咪?如果有一個禮拜左右的假期,坐火車也是不錯之選,我或者會中途揀停留一兩個小站玩多處地方也不錯呀,又或者火車去飛機返也很正,有buddy旅腳更佳wakakaka!

      刪除
  8. 唔好睇到d膠花充場面XXD

    回覆刪除
    回覆
    1. 咁叻嘅你又知有膠花嘅....?!!!XXXD
      有啲商場同埋步行街果啲,真係有好多膠花膠樹喎,不過就唔會有人影囉wakakaka....

      刪除
  9. 我以前去武漢都係坐車,要坐十幾粒鐘,現在真方便。

    回覆刪除
    回覆
    1. 係咪坐火車?我諗都要坐成十個鐘喎係咪?
      依家就多咗選擇啦,有高鐵又有飛機,兩者玩法不同,但都ok嘅^^

      刪除
    2. 會唔會係成個車廂逼滿人果隻....^^

      刪除
  10. 坐到機翼位都無問題, 欣賞黃昏、日出、雲海當然窗口位好!
    自從回鄉証到期我都沒回過大陸旅遊, 起碼十年 ...

    回覆刪除
    回覆
    1. 前排係咪多數要預留畀有小朋友或BB果啲?
      黃昏日出雲海正呀,同埋可以望到下面草原農田森林山區或者城市都開心,好少機會咁樣航拍嘛^^
      會唔會再去拎返?我覺得返大陸睇自然風景或歷史景區依然係好值得一遊嘅^^

      刪除
    2. 唔知點答 ... 有想做的事, 唔知做成做不成, 旅遊要排隧 XD

      刪除
    3. wakakaka.....總有機會,做正經野緊要^^

      刪除
  11. 你唔會去到有份搖櫻花樹掛 😂😂😂

    回覆刪除
  12. You should have visited the University to see the sakura.

    回覆刪除
    回覆
    1. 可能近年入大學睇櫻花的遊人實在太多,依家要幾日前上網預約,所以我都無去呢

      刪除
  13. 武漢櫻花全國聞名,但亦都是超多人去賞花,好心急想睇多啲櫻花相,我都有4,5年無回國內玩啦,我都有去過大陸賞櫻花,華東個邊的櫻花都好靚,不比日本差,只是旅客品德令人討厭。

    回覆刪除
    回覆
    1. 上面頂果張湖景相就係啦,暫時睇住先我手腳慢要花點時間執一執啲相wakakaka!!!
      喱方面確實係很嚇人,需要多點時間去改善,希望增加宣傳教育提高多點自律自覺性:P

      刪除
    2. p.s.聽聞大連也是賞櫻勝地,有機會要去睇下^^

      刪除
  14. 我就諗緊舊金山完左喇咩???原來係尖隊~~~~
    華~好乖仔呀~~同媽媽復活節出遊~~~你近排旅行運滿滿!!!
    你又係對上一次係上海世博呀??我又係呀!!!!!!!!但我覺得上海世博好恐怖~~~~~~搞到我唔敢番內地...人太多..

    回覆刪除
    回覆
    1. 未完㗎,有排寫啦,最驚你話睇到悶啫!wakakakaka......
      你都係啦,今次台遊係咪好happy^^
      係呀無計錯應該係世博果次,會場入面啲熱門館真係超級長龍,好多都skip咗算,冇咁好氣去排XXXD
      我諗唔好揀啲太熱門地方和日子,可能會好一點吧!

      刪除
  15. 好開心吖!飛完長線,飛埋短線!

    回覆刪除
    回覆
    1. 如果可以好似你咁有business坐就更好了XXXXD

      刪除
  16. 放完個長假,再放個短都好啦,好爽架!

    回覆刪除
  17. 回覆
    1. 仲見到好多cosplay和model著到靚一親去影櫻花相添喎!我心諗如果菲臘哥也來一定又會忙住按shutter....XXD

      刪除
  18. 羡慕, 基仔有得去賞花.
    今期 Longbell 有假, 但日本機太遲BOOK, FULLED.
    唯有留香港促進本城經濟繁榮~~~~

    回覆刪除
    回覆
    1. 日本真係要好早,人丁太旺了....!!
      促進本土經濟也不錯啊,美食美景多得很,同埋最重要係長假期好多人外遊了,反而留港銷費不會太多人,交通也路路暢通^^

      刪除
  19. 強國好多地方都有櫻花睇,等你的靚相啊,一定唔少得美食呢^^

    回覆刪除
    回覆
    1. 美食也有不少,但湖南湖北菜感覺都係偏油膩和重口味,我個人就一般而已...:P

      刪除
  20. 看你的交通選擇,高鐵要搶到航空公司生意都未必易啊。

    回覆刪除
    回覆
    1. 如果諗住玩下中途停留幾站,高鐵也是不錯之選吧!
      我只有短短幾日假,寧願慳少少交通時間囉^^

      刪除
  21. 乜神州武漢也可以賞櫻花咩?真係唔知道了!

    回覆刪除
    回覆
    1. 所以咪要寫咁大篇blog話你知囉....XXD

      刪除
  22. 妹仔出場形容詞都好多喇,小姐化好妝幾時出場呀?

    回覆刪除
    回覆
    1. 咁梗係等JJ化好妝出場先啦仲洗問嘅!XXD

      刪除
    2. 櫻花小姐係叫CC呀,名都攪錯呀基伯。

      刪除
    3. CC剩係聽過有cream咋喎.....:P

      刪除
  23. 回覆
    1. 剛剛想起阿摩好似好耐無現身,突然就收到你留言了^^

      刪除