2018年4月12日 星期四

舊金山居閑話@Santa Cruz:上

又繼續寫返D金山見聞錄先……喱日趁住天氣幾好陽光普照,又去了處遠少少的地方行下,今次都係約莫坐一個鐘左右車程,就來到南邊這個小城去看海(準備好開動浪漫mode未)!



出發前,不如先介紹個靚女畀大家認識下先!之前寫了咁多篇山居閑話,好似都無講過喱位新相識的美國甜姐兒喎,基爾旅美期間幾乎朝朝早都同佢出去拍下拖行個圈,佢個芳名叫做高兒,今年只係3歲幾,睇睇佢張出世紙原來係mix來的,當然不是ABC果隻港美竹昇妹,而係Yorkshire Terrier和臘腸狗的混種,唔怪得知你咁靚女。



這位美國甜心初頭都有點生保,每次見到基爾都要吠兩聲,後來相處熟落了又幾鬼熱情,經常來投懷送抱之餘仲會又舔又錫,令平時在老家沒有養開貓狗的基爾都有點尷尬臉紅,招架不住了……好喇sweet sweet野就講住咁多先,時間不早要上車出發喇!



坐左成粒鐘車,終於來到Santa Cruz喱個wharf,不過喱度同三藩市果個漁人碼頭有好大分別,一來地方無咁大,亦明顯無咁人頭湧湧和喧鬧墟陷;二來外地遊客(e.g.大媽大叔)亦明顯無咁多,紀念品店舖也少D,沒有太濃的旅遊景點商業味道,基爾覺得正喎!絕對值得坐咁遠車來這裏海邊chill下,吃個下午茶。



來到時其實已經下晝點幾兩點,幸好不少店舖仍open沒有打烊落場,泊好車就拿拿林入去喱間Gilda's食個late lunch(個肚有小小打鼓)。快速掃視佢個menu,叫set一般比較快有得食是常識吧!可惜一望佢個Weekday Specials實在太唔吸引了,Thursday只有個平平無奇的Meatballs Spaghetti(雖然平就係好平只售USD$9.95),如果遲一日來就勁正了,因為Friday果個係Seafood Cioppino,又有crab又有prawns又有scallops又有calamari和cod幾乎成隊海龍皇的蝦兵蟹將都到齊晒,都只係USD$16.95(圍起HKD$132咋喎係咪好抵食),真係既心心眼又揼心!



咁唯有退而求其次啦!好彩佢仲有個Daily Specials。咁有乜好野食呢?原來都有炭燒三文燒,另外仲有Sandabs和Petrale Sole應該都係類似多寶魚果類扁魚;突然醒起上次去三藩市個漁人碼頭都無食Crab Cakes,都想試下喎,就叫喱個(USD$18.95)!望落少少又係魚,Halibut上網check過又係多寶魚果類,喱度係咪盛產扁魚,多數用來起肉做魚柳?



最尾見到終於不是魚的菜式,Steak and 1/2 Lobster Tail即時又心心眼(USD$25.95),係就係無果個海鮮拼盤咁抵食架啦,不過話晒有龍蝦尾喎,一於order埋佢!個餐其實仲有包一碗chowder湯+牛油餐包,仲有伴碟菜幾棵,仲可揀跟飯 / 薯條 / 焗薯,咁計落3個人食兩個餐都ok夠晒飽!



入座時特登同拉丁靚女侍應講想坐海邊位,原因唔駛多講,睇睇上面喱個超級無敵靚靚海景就知!有個咁chill的海岸線陪住食lunch係咪即使食半塊方包都覺得好愜意呢……結果在這餐廳一hea就hea了個幾鐘都唔願走。



雖則話靚景配美食令人唔願走,不過食飽飽之後點都要埋單走人出去行多一陣,斷估無理由山長水遠來回坐成兩粒鐘車就只係來這裏食個lunch咁有型吧!一於出去行多陣個wharf先啦!咦,乜碼頭下面好似有D肥嘟嘟野攤晒係度?仲有D人在欄杆邊望下望下咁喎,行埋D睇真係咩先!



卡娃衣呢……原來係有成班加州海獅在睡午覺!以前去海洋公園睇海豹海獅海象就有試過,不過今次基爾都係第一次睇到咁大群天然野生海獅,有D老大哥仲要係好大隻的(目測腰圍超過80寸),直情似海象咁大隻,同埋原來佢地會叫得好大聲!



睇完海獅之後,再行多一陣碼頭上的食店,除了餐廳食肆外,類似上圖這種售賣海鮮的店舖也有不少,不過可能這天是weekday,所以來光顧的客人不算多,不過望落新鮮程度可以接受。至於價錢方面無仔細留意看,唔知會唔會比超市略貴呢?



除了關心食之外,基爾都有留意上圖喱類souvenir shop,這間貨品種類都算多,除了一般的匙扣、磁貼和postcard之外,仲有tee恤 / 水杯 / 筆 / 郵票 / 擺設飾物等等,好多都印有Santa Cruz字樣!



再行過少少又見到上面喱間餐廳,門口擺了個好吸睛、造型栩栩如生的八爪魚雕塑,唔知點解基爾覺得好有魔盜王feel,唔通喱間餐廳有得食韓式果種會郁郁下的八爪魚鬚刺身?



以前睇美劇又或者懷舊復刻的美國老電影,好多時都會見到上圖喱種放在街頭的報紙售賣機,估唔到今時今日來到漁人碼頭都仲畀基爾發現了這兩部上世紀的老古董,只見佢個鐵皮機面早已鏽蹟斑斑,明顯都有返咁上下年紀了吧!見佢仲係入coins再揭開門自己拎報紙,突然間很有點時光倒流七十年feel!忽發奇想:唔知會唔會遇到Jane Seymour撐住把喱士太陽傘來這裏買報紙呢又?

41 則留言:

  1. 個餐好抵喎
    呢度唔算熱門景點, 所以無咁多人?

    回覆刪除
    回覆
    1. 佢星期五果個Weekday Specials真係幾抵食,可惜遇唔啱時間去:P
      我諗唔算係外地遊客景點,但當地人都幾多,多數係來滑浪!!

      刪除
  2. 咁多野生海獅會唔會好大味㗎?

    回覆刪除
    回覆
    1. 又唔係好覺臭,可能風比較大即使有味都好快吹散,行近係會有少少腥味,似去了海洋公園果啲

      刪除
  3. 咁靚海景,吸引過D食物。 Halibut 係貴價魚,幾十鎊一k架

    回覆刪除
    回覆
    1. ICIC~~~~~!!原來係貴價魚,好似HK唔多見,可能多數係冰鮮雪藏吧

      刪除
  4. 離開人多擠迫,在悠閒海景享受美食真的一樂也!

    回覆刪除
    回覆
    1. 在HK見慣了人口密集,外遊多數想揀返啲休閒地方靜一靜....XXD

      刪除
  5. 食物好大份,要夾份食先可食得晒!

    回覆刪除
    回覆
    1. 一定係啦,果邊通常三人食二人餐都夠晒飽:P

      刪除
  6. 西餐好多都用halibut or bass ,cod啦
    以前係南非見成堆海獅, 臭到冇盆友

    回覆刪除
    回覆
    1. 係咪肉地夠厚可以方便起肉做炸魚柳?
      可能你企正個順風位所以索到應,會臭啲XXD

      刪除
  7. 上篇係廣告咋,又一腳踏兩船的制作喇!

    回覆刪除
    回覆
    1. 海獅海象留堂等你報導完畢先可以放學。

      刪除
    2. 踏三四船都試過㗎,幾隻船一齊開實行睇到你眼花花...XXXD
      佢地長期留堂㗎喎,日日都來這裏瞓個靚晏覺^^

      刪除
  8. 睇住海景食海鮮,真係人生一大享受.

    回覆刪除
    回覆
    1. HK如果有喱種靚海景的食肆,係咪多數貴到無鄰?!

      刪除
  9. Babe Dearest 非常鍾意臘腸狗 <3

    回覆刪除
  10. 同是海獅,我想見到野生的會興奮好多呢。

    回覆刪除
  11. 到處都係海岸線,海產一定好豐富了!

    回覆刪除
  12. 呢邊食嚟食去都係 halibut cod bass haddock 全都係白肉,無乜骨,很啖啖肉的魚,因為嚟嚟去去都係炸或煎魚柳。你係海邊食,如果係繁忙嘅餐廳,都會有新鮮魚食嘅,其他的就多數係雪藏架喇。

    回覆刪除
    回覆
    1. 你好!歡迎留言!
      係喎我都覺,多數係炸魚柳食得多有D厭同埋驚熱气:P
      有些華人超市會有游水魚賣,加州鱸魚肉質不錯吃^^

      刪除
  13. 肥嘟嘟嘅加州海獅真喺幾卡娃衣呢……

    回覆刪除
    回覆
    1. Kaka係咪都係走這一路線?XXXD

      刪除
    2. 我緊係唔係走這一路線喇!
      我走嘅係"Cool魔"路線!kakaka…

      刪除
    3. Hi,Captain Cool Kaka.....XXXXD

      刪除
  14. 回覆
    1. 唔錯呢,勝價比高之餘又有靚景可賞^^

      刪除
  15. 野生海獅又好少機會見,我諗會好嘈吵!...
    牠們唔上岸聚集?!!會在欄杆邊咁得意…

    回覆刪除
    回覆
    1. 會聽到叫聲㗎,但可能環境都好空曠,又唔係覺得好嘈嘅^^
      唔會上岸喎,可能始終要同人類保持一定距離,多數只在碼頭下面啲木欄躺睡,又或者在近岸的礁石上瞓陣,佢地知人類唔會行近較有安全感!!

      刪除
  16. 真正外國人ABC係扮唔到嘅🤣
    無乜人的Santa Cruz聽你講都吸引!
    美加餐份量太大了,自認大食都吃不消~
    肥嘟嘟好可愛呀~

    回覆刪除
    回覆
    1. 係呀本地人多遊客相對就較少了,無SF咁墟陷囉^^
      你多數同銀嫂同行,二人一餐就最fit啦!
      你講啲海獅啫係咪...wakakaka

      刪除
    2. 但經常都一人一餐,食C人😆 但我就一磅都無重過⋯⋯

      刪除
    3. 係咪運動量好勁?先可以keep到咁fit先...

      刪除
  17. 食物份量大呀﹗吾使去海洋公園都睇到海獅,正﹗

    回覆刪除
    回覆
    1. 一餐當兩餐食都得XXD
      喱啲純天然,唔識表演嘅!!^^

      刪除