跟住雷神過大海@序章

一不離二二不離三，繼金山閑話和武漢花潮的大長篇之後，再開多個最新鮮滾熱辣的遊誌先，不過預計今次喱個應該可以簡單快捷完成好多……唔講咁多廢話，拿拿林上船過大海！

基爾今次趁住五一大陸長假前夕搶先過去澳門走一轉，一來費事搭車搭船同人逼，二來酒店又平少少！不過千算萬算都估唔到會遇上初夏第一個雷暴警告添，無計喎買晒package天氣點惡劣都要去啦！



這朝早因為搭早船關係，晨早7點已出門口，來到上環碼頭見仲有時間就食個澳門茶餐廳早餐先，好耐無幫襯過佢依家都幾鬼貴，除了蛋治之外其餘粉麵類都好一般。食飽就入閘準備登船了，雖則話未到五一，但來到上環碼頭依然見好多黃衫和紅帽子大陸團，為免被推撞就畀佢地boarding晒先啦！登了船好快就起航，可惜沒有預期的刺激拋浪feel（回程時夜航就有，感覺超high），莫非雷神眷顧基爾所以遲少少先來？



一粒鐘左右就到了氹仔碼頭，今次住路氹那邊的酒店所以揀喱邊上岸方便D。過關時都係讓晒D大媽大叔走晒先，因為驚左佢地D篋。出左碼頭就去搵酒店shuttle，第一次來氹仔碼頭喱邊真係大好多，行好遠先搵到綠色果架酒店穿梭巴士，其實酒店同碼頭距離唔遠，途中基爾第一次路經了澳門機場覺得幾有新鮮感，同埋依家澳門正在建造架空輕軌鐵路接駁機場這一帶，上圖右那條天橋就係其中一截路軌，不過唔知起到幾時才竣工！



沿路會經過好多這一帶的酒店和豪宅，基爾似大鄉里好多地方都未去過，例如上圖左這個迴旋處的圓形行人天橋就覺得好grand好壯觀，目測行一圈應該有超過300米吧！想像如果當作是跑步徑的話，三得個三六得個六，計落跑3圈就差不多1K了，真好！



幾乎忘了交待一聲，基爾對上一次來澳門大大話話都有成十幾年前了，所以路氹這一帶好多地方都未來過，8字摩天輪和鐵塔都無見過，今次即使唔上去都可以在路邊望下啦！搭了十幾分鐘車就來到酒店，個天仲未落出雨但已開始勁黑勁厚烏雲了，係咪好有山雨欲來的感覺？咁唔理三七二十一先入去酒店擺低行李先算。



來到酒店還未夠十一點，基爾老奉以為五星酒店應可以check-in住先，放低行李佢會到時到候有房就自動有bellboy拎上房。依家先知原來係無喱支歌仔唱（基爾住cheap房無這服務，貴房應該有），一定要等到下晝三點幾專登返一返酒店去check-in咁鬼麻煩，幸好行李仍可先拎去寄存否則鬧爆佢！咁settle左D行李就在酒店行一陣先啦，因為聽到出面已經勁行雷，實在不宜冒濕身之險行出街咁傻咁天真……



酒店除了必然有個grand賭場之外，其實佢個商場又真係幾多店舖行喎（都係齋行下無乜野買）！入面仲有個金沙城劇場唔知係睇show定係真係有戲睇，佢攔住門口應該係上午時段未開！無聊行了一陣又出去大門口望一望睇睇咩情況先……妖！仲勁過先前，落雨落到倒水咁款，真係有遮都無用果隻，咁唯有乖乖行返入酒店hea多陣再算啦！



旅行一刻值千金，但雷神駕到天氣不似預期也是無可奈何的事，咁再去行多陣shop先囉！咦，酒店入面喱間M&S又幾大喎，不過D衫就依然都係走佢一貫的成熟型market路線，基爾暫時仲未有興趣買喱類衫住。



對腳自自然行了去food hall果邊比較吸引，見佢有賣英國紅巴士和電話亭餅乾，其實佢個包裝係幾靚，但在老家的M&S都有咁就無謂拎咁遠以免舟車勞頓搞到碎晒先返到屋企，留返D位拎杏仁餅和肉切酥好過啦！上圖左那款cookies唔記得聽邊個講係好食的，但都係唔買住！運完一輪吉見有點累，就去商場個food court坐多陣……



八卦去巡了一圈food court的食店，估唔到係都幾貴，澳門今時今日應該係唔會再有平野了。休息了一陣又去行下Esprit，基爾發現澳門這裏都仲有好幾間分店，反而香港就差不多全部摺晒（似八佰伴咁）。行多陣見已經再無咩特別店舖想行了，咁一於起錨啦！出去一睇開心返D只係微雨而已，唔駛諗火速閃過去巴士站先！上圖見到有位北方佳麗在影相，佢個方向係正在影巴黎人鐵塔作背景；至於圖中的玻璃建築物就係有個8字摩天輪的新濠影匯。



好彩好快就有巴士（忘了是搭25還是26A）！因為唔想行到太夜先返去check-in，咁先近近地去路環果邊食個簡單葡餐做個lunch吧！好耐好耐無坐過Transmac，雖然仍是單層但就睇落新淨左好多，同埋發現依家全部劃一晒收6蚊車費，感覺有點貴（後來八卦裝一下人地用澳門八達通原來只係3蚊咋，差成五折咁多呢）！



p.s.這次在澳門搭了幾程巴士，無獨有偶竟遇到幾次網上常見那類鬧交幾乎打交的場面（乜依家D澳門人咁躁火），就好似喱程去路環途中，有兩位年近八旬的大叔仲好好火氣，為了爭位落車問題初則口角繼而幾乎動武（有明顯肢體性推撞），雙方互問候家人語句此起彼落，幸好剛巧有位身穿貌似懲教人員制服人士（澳葡裔）笑笑口地將兩位大叔勸開及扶其中一個趕快落車，戰況才沒有升級……