舊金山居閑話@Monarch Grove

2019的第一blog繼續寫金山……睇完海浪、睇完海鷗、睇完松鼠之後，再去睇多樣特別的東西先，有冇人知咩係Monarch Butterfly？

有冇人睇過帝王斑蝶大遷徙的Discovery紀錄片，基爾有少少印象好似睇英文台有睇過。距離上回那處的太平洋海岸不遠，原來有個Monarch Butterfly Sanctuary，反正山長水遠來到就唔駛考慮一於睇埋先走！



先講返少少紀錄片資料，帝王斑蝶主要於中北美和南美洲北部以及東南亞和澳紐等地棲息，但會進行越季大遷徙的就主要是北美地區品種，每年12月初至1月底數以百萬計帝王斑蝶會由加拿大安大略一帶南飛到墨西哥以至中南美洲的叢林過冬，也有部份會飛到加州沿岸的森林棲息。至於斑蝶靠什麼長程導航一直是個謎，科學家一般相信是靠陽光和地磁云云……



由於到訪的這處蝴蝶叢林是位處於住宅區內，為免滋擾當地居民和棲息的帝王斑蝶，遊客必須嚴守規矩保持肅靜，明顯這裏並非適宜開大喇叭跳唱大媽廣場舞的地方。



叢林保護區內的入口有告示講解帝王斑蝶飛來棲息過冬的最佳觀賞季節，另外除了不能聯群結隊喧囂跳大媽舞之外，森林內亦嚴禁吸煙和放狗。



這天來到其實遊人也幾多，可能12月也是來賞碟的旺季吧！但在叢林小徑裏遊走時四周都寧靜到只剩下風聲葉聲和間中的鳥聲，感覺真似進入了深山。沿小徑有很多告示牌，指示留意觀看帝王斑蝶的地方。



在告示牌上，當然還有講解帝王斑蝶為何選擇老遠由加拿大飛過來聚居過冬的原因，除了氣候夠暖之外，原來這裏種植的澳洲桉樹，還有原生的美洲松樹可為蝴蝶提供充足的花蜜食糧和良好繁殖環境。



夠眼利的應該睇到樹上有隻帝王斑蝶吧！牠又稱黑脈金斑蝶，翼展可達10厘米，是目前世界上唯一能長程遷徙的蛾蝶類昆蟲。基爾無去過鳳園唔知香港常唔常見到佢地呢？



在保護區裏行行下，忽然仲見到路邊set了一套腳架和ipad等攝影器材，八卦行埋去一望才知係畀遊客睇，原來係live影住遠處樹上吊住成群帝王斑蝶，真係同紀錄片睇果D一模一樣好興奮呀！



原來一般帝王斑蝶由蟲卵蛻變到蝴蝶的生命周期只有4-5個星期，但秋冬飛越幾千公里的大遷徙期間則可存活達7個月之久，果然係奇妙大自然！睇完蝴蝶後立即返去town入面看看有乜late lunch可以食下先。



睇睇隻手錶，嘩！原來已經成兩點幾鐘（唔怪得打晒鼓咁肚餓），但可能這個小區本身遊客就不多，午後好多食肆也落場，所以可選擇的食店亦不多，最後揀了去食快靚正的Subway！



這間快餐店在香港應是好多OL的午餐至愛，基爾好似都有幫襯過中環碼頭果間，但肯定無這間設有咁大堂食區，大部份在港分店只做takeaway吧！



店外貼的特價6吋巨型潛艇三文治套餐（含6安士汽水和大塊曲奇餅）都只售5.5美金幾抵，其餘好多款三文治包都只係廿零三十蚊港紙左右（仲連無限添飲），係咪仲抵過在港分店？



最緊要係即叫即整夠新鮮，而且全店就只得一位師傅在整三文治包，所以務必要耐心等一等（要暫且switch off港式日常的急趕繁忙mode）。



基爾已忘記了這個是雞肉餡還是吞拿魚（多數都係，除非唔係），同時夾雜有大量蔬菜和沙律醬確實不錯吃；另外最愛其自斟自飲，印象中有紅莓茶和檸茶可選（當然不揀可樂），茶量可自行調配適隨尊便，可以溝到自己最愛的少甜茶濃口味。