舊金山居閑話@Old Wharf

上回金山網誌講到去飲啖茶再食完個三文治包之後夠晒飽暖，咁緊接住仲唔係去……繼續逛逛基爾心水至愛的歷史景點！

最初以為去美國沒什麼歷史景點好逛（畢竟立國都係得二百幾年）！但遊遊下又發掘到唔少古蹟幾值得一睇，例如之前去的Sacramento同Golden Gate以至Stanford和SF舊城一帶都有唔少舊事舊物保留下來……



如果似基爾叔叔一樣閒來喜歡重看Cary Grant、James Stewart、Gregory Peck、Grace Kelly、Audrey Hepburn之類的懷舊荷李活片的話，見到熟口熟面的場景都一定會有驚喜。



咁來到這個Monterey State Historic Park有乜特別野睇呢又！真係無來過都唔知，原來Monterey在好耐好耐以前，也曾經成為加州的首府，它的歷史甚至比SF和Sacramento還要耐！



話說19世紀中葉立國還未滿百周歲的美國，與同樣獨立不久的墨西哥因爭奪Texas而爆發美墨戰爭，結果當然是船堅炮利的美國獲勝，順手還鯨吞埋New Mexico、Arizona、Nevada、Utah、Colorado和加州等中西部地區省份，1849年剛收歸星條花旗下的Monterey就成為加州的重鎮要塞（上圖白色的是美國郵車，比香港的醒目得多）。



與Monterey舊城相連的就是這個舊漁人碼頭（似乎任何沿海城市都有個fisherman's wharf），原來早在18世紀美國立國前已有不少葡萄牙捕鯨船來到這裏經營魚市場買賣（唔怪得之前在公園見到鯨魚雕塑），難道這裏是最早的「加州築地」？



都講明話係百年漁港，咁海邊有座lighthouse一定是少不了。喂喂喂！有冇留意到燈塔屋個露台竟然有個聖誕老人在揮手，係咪歡迎基爾來到此一遊呢？（才剛剛過了聖誕，仲見有少少節日裝飾是常識吧！）



懷舊漁人碼頭這邊的海岸線令人好有peaceful的感覺，同之前上晝去睇天崖海角那邊的吹甩髻巨浪有好大落差喎！但其實兩處地方都唔係相距好遠，由漁人碼頭駕車去17-Mile Drive那邊的最美海岸線應不用半粒鐘。



咁唔怪得幾百年前葡萄牙漁夫都揀old town喱邊港口上岸，確實係風平浪靜好多；有冇留意這邊有舊礁石都企滿了海鷗，唔知係咪等漁船回來時順便分一杯羹？有冇留意隔籬仲有件貌似三文魚壽司的seal rock！



喱件「海豹壽司」又真係幾夠肥大肉厚，手機再zoom到盡睇睇佢，真係睡到日上三竿都仲未轉側喎！睇完海豹再將視線轉回岸上，碼頭舊港話明係古蹟，當然也有些歷史人物銅像吧！上圖右這位按基座上的石碑所講原來是意大利漁民供奉的中世紀守護聖人Santa Rosalia。



碼頭上就有不少這類木牌介紹這裏悠久的歷史，昔日的Monterey因為multi-million dollar fishing industry而繁華一時，時至今日都成了歷史，紀錄了舊日漁民出海捕魚的艱苦生活歲月。



同大澳一樣，依家在這裏當然早已經不會見到有漁民出海結網捕魚啦！古蹟成為了旅遊區，這也是必然定律，來這裏的遊客相信大部份是為了大快朵頤，又或者參加觀鯨day tour吧！



漁人碼頭裏開設的店舖，其實同之前去SF果個也大同小異，不過店面規模就明顯無咁大，賣遊客野的souvenir shop對基爾始終沒太大吸引力，主力係去賣clam chowder麵包湯果D檔口去哄一哄……（乜唔係才剛剛食了隻Subway潛艦咋咩？）



人地都無話要去食，行埋去八卦睇下望下咋嘛！望落價錢好似比SF漁人碼頭那些同類型檔口平少少，而且個包又好似都大個少少，就咁企在店外欣賞師傅仔在舀湯也是件樂事。



睇完師傅仔舀湯佢仲問基爾試唔試飲，仲舀了一小杯遞過來，咁梗係恭敬不如從命啦！好老實講如果只齋飲這款周打忌廉蜆湯確實會有點咸，如果送埋個包試食下就perfect喇！（請問到底係咩人呀喱位……）



食完個免費tea之後三點幾鐘繼續四圍再行多陣，除了有例牌幫遊客畫畫果類攤檔之外（這次沒有八卦行埋去睇畫人像要幾錢），仲見到有上圖這間是去報名參加出海whale watching的舖頭，不過原來要9:00am咁早出發，反正年前去花蓮時也有去過觀鯨團，應也是大同小異的東西吧！



在碼頭遊走也有好多免費活動，除了試飲試食之外仲可以觀海鷗，成群巨鳥迎面飛撲過來其實都幾得人驚，有冇人睇過希治閣的《鳥》？同埋成群大海鷗在近距離不停咁叫其實都幾吵耳。



引到咁多海鷗飛過來，是因為剛好有漁夫來這裏劏魚，不少魚內臟就隨手丟給海鷗吃。可能因為咁，這裏的海鷗亦特別肥大肉厚，翼展大多都超過一米至一米半好勁！



睇完餵海鷗表演之後，再行落少少去到遊艇停泊區喱邊，有冇少少似去了西貢白沙灣果類？這裏的帆船遊艇都幾多，風和日麗正好是出海季節呢！



又行落去碼頭橋底，看看有沒有海獅海豹來午睡，但今次又唔見有喎！記得上次在Santa Cruz果個碼頭，有超多肥大加州海獅爭位晒太陽，仲會嗌交甚至打交（同埋有點腥臭）！



既然都冇海獅睇咁就走人啦！夕陽西下沿途返歸，路經一處Gilroy Premium Outlets，唔賣野都去個廁所先！見佢有交叉牌outlet咁又入去睇，間店超大可惜不算特平，但都比老家平少少（香港買好交叉貴）！



基爾買了咩就姑且留待最後的番外篇先講！行完outlet當然最佳節目就係去dinner了，今晚食乜好？不如試下去食日本菜……



只係六點幾好似時間尚早間店都無乜客人，這間Hatcho相比之前食過果間Chikara又有點不同格調，除了有日式拉麵店常見那類bar檯之外，仲有幾間和室偏廳（幸好有凹槽位可以伸腳落去）。



不要以為這杯是sake，其實只係杯清水而已！翻開睇睇個menu有乜好野食先……sedo方便選擇都幾多，有Sukiyaki又有Sashimi和Tempura晚餐，Vegetarian唔食肉又可以揀Tofu Teriyaki，唔鍾意的話仲可以叫返Steak（如果去食日式料理叫個扒來鋸又幾型喎件事）。



唔研究咁耐啦一於邊食邊再研究（好明顯主力係負責食），先上些前菜來試試味先，這味豆腐頭盆應不會感到陌生好多日式食店都有，平時唔食蔥的基爾都接受到，可以食少少蔥花都無問題。



已忘了這一大碗是什麼飯，望落好似有少少照燒汁雞肉洋蔥滑蛋之類，係咪有少少似吉野家果隻style，基爾印象中有舀少少飯墊一墊胃。



之後這個端上檯時貌似煲仔飯的物體，打開蓋才知原來係似潮州打冷式的蚵仔粥，日本人乜原來都興喱味Oyster Porridge咩？即管又舀少少蠔仔粥來暖一暖胃。



唔知上面喱個sedo係咪之前在menu睇到果個Sashimi and Tempura Dinner（USD$22.5），以這價錢來說算係抵食定係略貴（明顯這blogger是食米唔知價）。



好喇上面這一味借問聲又係乜呢？又睇一睇返個menu，會唔會就係Sushi Gozen（USD$15.95），佢話係有Tuna、Salmon和Hamachi幾款，油甘魚魚生基爾成日覺得有點韌，如果切碎卷埋入手卷好似又唔太覺韌喎！



最後由老闆娘即席來親自主理的這個類似三文魚茶漬飯之類的Salmon Porridge都幾有趣不錯吃，見有三文魚生、有紫菜又有米菓，仲有一碗溫度好高的茶湯。



見老闆娘好細心地將食材逐一擺到飯面（好似足夠有4-5小碗），然後倒入茶湯將魚生淥熟，再洒一點脆脆米菓撈埋就食得。至於價錢因為掛住食無take notes所以唔記得了。



臨走前埋單，見cashier後面幅牆都掛了唔少威水獎狀喎！除了本地仲有些係用日文寫唔知係咪老家頒發的呢？聽老闆娘講佢地來了加州已經成三四十年，老公是主廚佢就負責店面，仲好煙韌咁話老公會間中私房整大阪燒給她吃（menu上不供應），乜原來日本男人都有咁sweet的一面！