遺忘的唱盤時光@Enya

之前講開New Age，有冇人即刻有興趣走去唱片舖買返幾隻夜晚play來聽聽幫助入睡減少失眠呢？（不過話時話家陣要搵間唱片舖逛逛都幾難）……Anyway，今次再摷來Enya這隻精選碟重溫一下！

上次聽開Secret Garden都有提過一提Enya同埋Enigma，基爾印象中都有買過他們的CD，但因為實在太耐無聽所以一時間只找到Paint the Sky with Stars這張1997年推出的Enya精選碟；至於Enigma可能是記錯了只買過群星雜錦那類CD，最後火速去圖書館借了張精選碟充數！



咁就先來聽聽Enya（單單看上圖這張以星空概念設計的CD已經靚到驚為天人吧）！基爾也不知New Age音樂是否來自愛爾蘭，但無獨有偶Secret Garden和Enya與這英倫島國都有很深厚淵源。來自愛爾蘭音樂世家的Enya早在八十年代初已經出道，當年基爾也不懂什麼是New Age，認識Enya純粹源自當年電視台一個非常熱播的旅遊節目而已……



基爾blog友名單中大多都係旅遊達人，對電視台播的旅遊節目應該都會有興趣收看吧！之前有冇追看過Michael Portillo的Railway Journeys系列？好喜歡看他跟隨十九世紀那些古董旅行書重踏的「古蹟旅程」；仲有Jonathan Legg的踏破鐵鞋無地圖同埋台灣的冒險王都係基爾杯茶……

如果仲記得八九十年代的王牌旅遊節目寰宇風情的話，證明你都算幾資深了！（咪傻！記得都扮失憶……）寰宇風情的主題曲正正就用了Enya的這首Orinoco Flow；與此同時周末任你點仲有播過Orinoco Flow的MV（彩繪佈景設計相當美），那時才知唱的就是Enya。

那些年，寰宇風情拍攝地點主要都是歐美日之類的外國地方，小基爾那時第一次看到Big Ben仲有巴黎鐵塔和多瑙河，也應是靠這個節目了！順帶一提同期仲有個以大陸風光作主題的旅遊節目叫大江南北，應該也是電視送飯年代的集體回憶之一，有冇人仲記得小鳳姐唱的這首主題曲呢？

講講下Enya的精選碟離晒題講了去旅遊節目……咁再補充返少少她的威水史吧！基爾原本想再翻看短片網站試試搜尋Enya近年的Live演出片段，但發現近十年都甚少她的公開演出，可能已是半退隱狀態。特別找來她於2001年度第74屆奧斯卡的片段，當年她憑魔戒的May It Be問鼎最佳電影原創歌曲獎。

p.s.當屆奧斯卡競逐該獎項的可謂粒粒巨星，除了Enya之外仲包括有：Kate & Leopold（隔世俏佳人：由狼人Hugh Jackman和90年代愛情片天后Meg Ryan主演）Sting主唱的Until；Vanilla Sky（魂離情外天：由Tom Cruise和Penelope Cruz主演）Paul McCartney主唱的Vanilla Sky；仲有珍珠港大熱之作由Faith Hill主唱的There You'll Be；不過最後全部都輸了給怪獸公司那首If I Didn't Have You算唔算有點半爆冷？基爾個人就最喜歡Sting那首Until，或許下次有機會介紹Sting的舊碟時，再聽聽喱首好歌吧！