Donki唐吉訶德@尖沙嘴

記得舊年7月暑假期間在紛擾時局中開幕的驚安之殿堂，雖然位處暴風圈中心的尖沙嘴旺區，依然吸引大批日本控fans排幾粒鐘入去朝聖！不過基爾怕煩，姑且就不去趁這種三日香，直至熱潮過後……

某晚見稍早收工，也見尖沙嘴區局勢平靜應不會突然拉閘閂檔，咁就快閃出一出去巡舖。美麗華地庫以前係乜野舖頭已無乜印象（畢竟一直都係深居簡出甚少去旺區逛街），網上資料話上一手租戶是時裝店云云。



逛激安店對於大部份經常「返日本」的港人而言應不是什麼新鮮事，但這間首度登陸香港的分店依然人氣十足。若要排幾粒鐘入去對基爾而言一定no way！幸好這晚weekday日子不算墟陷，在店內叫做可以優哉悠哉無壓力下閒蕩睇野。見佢個和牛專櫃也不是太多人，就埋去八下。唔知百五蚊pack算唔算是夜晚才有的激安價？



由於對和牛沒特別偏好（平時也極少食牛肉），咁不如再去其他檔口望望。行過去另一檔賣scallop售價也不貴，這款照燒汁口味一盒有4隻$50有找可以一試。另外，生果檔見有巨峰香印都係幾十蚊有交易，仲有幾特別的山梨縣水蜜桃和蜜瓜的Jelly，唔知會唔會激甜呢？



睇完濕貨再去睇乾貨，沒有驚喜地都有好多日本藥妝和立雜十二元店日用品出售，基爾就無謂逐樣去影咁無聊了（各式cosplay衫也費事影，只去影了Tomica車仔）。為慳時間還是集中去逛零食區看看有乜特別收穫吧！



零食區比較矚目是有一整幅牆咁多的抹茶類食品，純粹參觀下無妨，搬貨就可免了，因為其實有些應該在數字屋或AEON之類日超都有售吧！不過第時如果去日本旅行又買唔夠手信派同事的話，來這裏「補貨」也是不錯的選擇（笑）……

p.s.幾乎忘了講，基爾也總算不是齋睇無幫襯，買了支洗面膏叫做有點收穫！因為之前夏天用開的那支竹炭成份來到秋冬天似乎不太合用比較乾，而這支Whip Premium保濕功效明顯強一點，就靠佢過冬了！



番外篇：短短半年估不到激安於荃灣某新商場再開分店，大除夕那天不用返工咁又過去八下。新商場位於荃灣西站上蓋的新樓盤，不過大部份店舖仍沒出租所以都幾靜蠅蠅，人流也不算多；而新開張的荃灣激安店也不似尖咀店開張時排長龍四五個鐘入場咁癲。



荃灣店入面個人覺得比尖咀店大和闊偌少少（逛得鬆動一點），各種日式食品專櫃例如壽司生果和牛之類都好似大一點貨多一點，不過似乎就沒有尖咀店那些周二超激安的大減價貨賣，其他乾貨藥妝野亦不見有二三折令人有衝動想買的東西，所以最後巡完舖就快閃走人了！