2011年4月30日 星期六

遊滘西洲扮上等人@西貢

出身草根的基爾閒來都只會參與一些草根玩意,高爾夫球這類上等人運動之前只去過白石打過一次,覺得唔太好玩,試過就算。喱次無意中來到滘西洲,有機會再見識下這種有錢人玩意。


滘西洲碼頭

說是「無意中」,是因為這次去到西貢碼頭本打去算鹽田仔,點知無船,見喱度來回船飛也不過是$60,而且船期密,反正之前也沒去過,只知島上有個高爾夫球場,船程也只約15分鐘,見咁方便就去一趟!


坐穿梭小巴由碼頭可直達哥爾夫球中心行政大樓

未坐暖張凳,閃電就咁到了滘西洲登岸。咦,唔見有高爾夫球場?唔緊要,本住「人行我行」的原則,就跟住一眾背住大大個高球袋的人去到一個小巴站,原來是要坐免費接駁小巴的,車程約數分鐘就到達高爾夫中心行政大樓。


哥爾夫球中心大樓內有間偌大的餐廳,價錢也不貴

這次明顯係「醉翁之意不在酒」,對golf興趣不大,純粹想睇下咩係高爾夫球場,點知在高球中心大樓裏閒蕩時有驚喜發現,原來2樓有間幾大的餐廳,仲有半自助tea buffet供應,只$45一位,姑且一試!


Tea Buffet不過$45位,雖然提供的菜式極簡單,但總算是有個可以hea坐的好地方

$45蚊當然不能抱太高期望,野食也只是很簡單的中西例湯、三文治、炒蛋、雞翼薯條沙律、炒雜菜炒飯炒麵之類吧了,但由於餐廳居高臨下,全落地窗的設計很開揚,外面陽台還可280度睇晒球場靚景。


煎到金黃色的雞翼,配薯條簡直fit到震

在餐廳裏任坐任hea感覺幾perfect,事實上雞翼也煎得不錯,金黃香脆幾好味。寫blog前再返看他們的official web site,似乎已不再提供這款tea buffet了,只見有午、晚市$110-125,是否值得一試就不知了!


哥爾夫球中心大樓的露台上,可270度遠眺整一望無際的哥爾夫球場和無敵海景

食飽飽之後,再移玉步去超級無敵大露台那邊,一路睇下靚景一路伸個懶腰!看單張介紹,才知滘西洲是香港唯一的公眾高爾夫球場,由賽馬會撥款興建,擁有東、南、北場3個18個洞的標準球場。


滘西洲這個公眾高爾夫球場規模非常大,單睇這幅全景照就知

唔講唔知,雖然滘西洲部份山頭的丘陵草原已改建為高球場,但為了保育島上的自然生態,高球場內仍經常有麻鷹、白鷺、蒼鷺以及赤麂等出沒,可惜這天見不到牠們,否則同佢地影下沙龍都好!


扮懵靜靜雞走到高爾夫球的賽道和大草坪上影相先

睇睇下風景,不如試下走落球場蕩蕩吧!沿高球車道一直走,可以見到唔少路標和一望無際的草披地。翻查資料,原來滘西洲是香港第5大洲(前4位依次為大嶼山、香港島、南丫島和青衣島)。


有人在果嶺上推杆,看來似模似樣的,都係唔好行咁近以免影響到人

滘西洲面積6.69平方公里,有「巨洲」之稱!島上山勢不太險峻,多為高原平地,加上面積夠大,所以就畀政府睇中建成公眾高球場。雖然基爾對打高爾夫球興趣不大,但睇人地打也感受到那份悠閒愜意!


如果將球打進沙池就很麻煩了 / 蜿蜒曲折的高爾夫球車道,在起伏的丘陵草原上伸延

由於球場內的行車道較一般行山徑平坦,走起來也不太辛苦,當然烈日當空又是另一回事,畢竟高球場內不會有太多樹,只在外圍有大樹遮陰,其餘地方都要暴曬,難怪愛打高球的人都曬到黑鼆鼆。


好想在這一大片草頭上打筋斗,好正呀!

迆行一陣,近距離睇睇發球台、球道、果嶺、長草、沙坑、水池等常見的高球場設施。白石和以前佐敦圓方隔籬果個高球場也只有發球台,來到滘西洲這裏才真正見識過標準高球場有幾壯觀。


黃昏時份坐船返回西貢碼頭,見到漫天紫霞 / 哥爾夫中心大樓外的路標

由於基爾個樣明顯不是來打波,行行下就被職員發覺,被友善地請上高球車,由他專人載返中心大樓(還是首次坐高球車)。在車上聽他講,遊客如非打波,是不可在高球場隨處遊逛的,否則很易被球擊中受傷。


不常見的紫色晚霞,夕陽看來也醉了

返回中心大樓後再閒逛一下那裏的高爾夫球用品店,還有些櫃位專供報讀高球班。白撞完一輪後就在黃昏時份坐小巴返回碼頭,再乘船返回西貢,同場加映漫天紫霞,為美好的一日遊畫上圓滿句號。

4 則留言:

  1. 基爾兄的文筆利落,揮灑自如;兼且圖片扼要清晰,真是一個美好的分享!

    回覆刪除
    回覆
    1. 秋:謝謝欣賞^^我寫的其實也只是些瑣碎生活雜記,希望不會悶親大家
      btw,滘西洲確是個不錯的地方

      刪除
  2. 我仲想問你唔打球可以入去咩?睇到最尾先知你被請走,睇來想扮下上等人都唔得!哈哈!

    回覆刪除
    回覆
    1. 如果唔係去打波,我諗只可以留在廳餐了

      刪除