2011年8月11日 星期四

永利歲月情尋足印@上環

雖然到依家都仲未有機會睇《歲月神偷》,但這套戲上映時鬧得熱烘烘的永利街,反而早前同友人去過一次,見近排無乜寫過本地遊,不如又摷返D相出黎post下,懷舊得來依然有新鮮感!



在上環皇后大道中找到樓梯街,沿喱條古老長樓梯一路上山(少D腳骨力都唔掂,一把年紀的基爾都有少少索氣),經過荷李活道文武廟之後再上……其實沿路都有唔少古老野睇,而樓梯街本身亦是古蹟,行下停下影下相,其實都ok應付到。無耐見到儒林臺,就差唔多到了。不過睇見上面喱個路牌,即時有少少頭痕,到底係「儒林臺」定係「裕林臺」先?!



夷………咦!睇下喱條樓梯的石圍欄係咪好古董feel呢!據聞這道石欄杆都有上百年歷史,所以話中上西環一帶真係撞口撞面都係古蹟,只要小心觀察就不難發現到。儒林臺是一塊大平台,面積約有一個網球場般大小,東面是樓梯街,西面也是樓梯,名叫水池巷。翻查資料,原來昔日曾於港大任教的許地山教授曾居於此。唔知係咪因為以前有好多學者居於此,所以就叫儒林臺呢?



行過儒林臺後,穿過樓梯街就來到樓梯台。樓梯台比儒林臺保存得更古雅,兩幢只有4、5層高的五、六十年代唐樓也保養得不錯,很有粵語長片的情懷。表面上睇,樓內好似無人住,但留意到大廈外的空地有人曬衫,所以估計係有人住的。在新舊大廈對照中,基爾更愛舊唐樓這邊的感覺,在烏黑剝蝕的外牆上,似乎呼吸到歲月的痕蹟。可惜香港寸土萬金,加上喱度係屬於半山區的「超級金礦地段」,所以老唐樓應該都唔會擺得幾耐,過多幾年也會變成旁邊這幢40幾層高的豪宅大廈,好可惜(好彩基爾影返落黎做紀念唧)!



從樓梯台望落去下面的必列者士街,採英國愛德華式紅磚牆設計的青年會就在眼前。青年會全名叫「香港中華基督教青年會中央會所」,是中華基督教青年會昔日的總部,由芝加哥YMCA會員籌建,1918年落成啟用。它是香港首個市民會堂及體育場館,會所內擁有當時最先進的康體設施,包括香港首個室內游泳池。1927年2月,中國著名作家魯迅曾於會所禮堂內演講,二次大戰日治時期曾用作日語學校,目前已列為香港二級歷史建築。繼續向前走已見到永利街,其中一座唐樓的外牆寫滿字,睇真並唔係皇帝墨寶,原來是反對市建局收購清拆的大字報。



拿……睇到路牌大大隻字寫住「永利街」,就知無搵錯。唔知喱幢係咪就係戲中吳君如同任達華一家住的唐樓場景呢?!裏面家俬廚具齊備,而且中門大開(唔係講deep V)任影唔嬲的,很有昔日家不閉戶的睦鄰感覺!



抬頭往上一望,好鍾意喱種小騎樓,因為唔係僭建的,圍欄上仲有晾衫竹。基爾細個時都有用喱種晾衫竹,所以覺得格外有懷舊味,一枝竹就可以晾晒所有底衫褲上去曬,而且任晾唔嬲,唔會畀人投訴不雅!



記得兩年前套戲上果陣,聽聞喱度係多人到好似維園年宵花市咁旺場,而且仲係相機博覽展會場,乜牌子DC、DSLR都到齊來騷quali……不過今次同友人黎到,原來早已「人去樓空」(再次證明香港人鍾意新屎坑)!Anyway,人少少仲正,真正可以任影唔嬲,又唔會影到人頭湧湧,影出來更有歲月感!



一道陳舊斑駁的木門、一個將近鬆脫的門牌、一個危危乎的鐵簷篷、一排橫趟的晾衫竹、幾盤零落的盆栽……簡簡單單就構成了老香港的風貌。如果擺一億在基爾面前,問應唔應該拆喱度,基爾都覺得應該反對的!



行入樓梯入面望望,喱幅相入面如果再加多一部鳳凰牌單車就更有mood!影飽之後,臨離開前再依依回眸一下這條老街,斜陽下似乎也不算太舊!



落兩級樓梯再影過,kakakaka……樓梯下面其實仲有個荒廢了的必列者士街街市。半掩的拉閘,好似在叫基爾﹕「入黎睇下啦!」究竟入面有咩架呢?!會唔會今次又見到街市照蛋的「婀娜」紅燈罩?



必列者士街街市除了是本港首個永久街市外,原址也是美國基督公理會佈道所,國父孫中山先生於1883年在此受洗並居住了兩年,可說擁有雙重歷史價值。市建局初步構思是把街市活化為紀念孫中山的小博物館,屆時會在街市內擺放與孫中山有關的珍貴文物作展覽。街市上蓋還會大規模綠化成為空中花園,增加休憩空間……不過對政府喱D所謂「活化」大計其實已經無乜信心,都係趁佢未搞禍個古蹟檔攤前,先影下裏面的原貌先,咁基爾喱個blog攀車邊都可以成為古蹟檔案館喇!

沒有留言:

張貼留言