2015年1月7日 星期三

冰極閃行:下@北京

在京城開工期間無乜時間出去四圍行,加上天氣實在太乾太凍又經常天陰陰霧霾非常勁,有時還颳起八號風球般強勁的陣風,簡直像利刀割面感覺就如整個人都爆策,每次洗手、掂任何金屬物品和人都有觸電痛楚,如無必要都不太想外出了!



幸而大風過後吹散了霧霾終於見到藍天,可惜凍成咁都無落雪,可能因為濕度太低。工作過後,雖然只剩大半天餘暇時間才搭機返港,但見咁好天都一於坐同事車出去行一陣啦!



沿長安大街一直走,突然又諗返廿幾年前同一大班同學仔來交流團時都有來過,記憶中好似就係由天安門這裏入故宮了,今次時間不多就沒有入去遊逛,只在天安門外簡單經過就算。



遊完車河之後同事又車來喱度食午飯,聽講喱間福滿園係食好地道的家常北京菜,由於來到時正好是lunch時段全店滿座要等位呢!



基爾唔飲得,食飯一般都唔飲酒(包括啤酒),多數以茶代酒就算,這次來京城還識多一樣就係喱樽酸梅湯,比廣東人慣常煲的稍甜,基爾還是較愛有濃濃酸梅味的酸梅湯。不過在京城無乜其他選擇下,這種樽裝酸梅湯也是不錯之選。



菜式果然係好地道的小菜模樣,賣相雖然平凡但完全係意料之外的好味道,上圖右聽同事說是該店名菜煎牙帶魚,食落有點似少少甜味的豆豉鯪魚,質感又有D似零食那種紅色魚柳乾,不過魚骨頗多基爾唔太識吐骨,同事則食得津津有味。



叫到成台不同菜式好彩每碟份量不算多,正好小食多滋味吧,是食得開心的一餐。上圖最遠圓形餅狀的唔記得係咪番薯玉米餅之類,用來點汁食一流。



食胞返office坐多陣與同事寒喧幾句就差不多時間say goodbye了,幸好這次晏晝四點幾出機場又唔太塞車喎!



首都機場離境大堂都有一棵水晶聖誕樹,但感覺好似無香港機場果棵奧國鵝仔牌聖誕樹咁大咁靚。



唔知係咪因為仲未到大陸假期,成班機都幾吉下,基爾坐economy後排可以打橫霸晒4個位,如果飛歐洲就正啦!

52 則留言:

  1. 回覆
    1. Stella:果磚唔係一般腐乳咁簡單,係佢地啲「名物」臭腐乳XXD

      刪除
  2. 舊年係暑假去北京玩,天氣真係好熱下,都有想過揾個冬天去北京玩,但我比較怕凍但又想睇下雪景,真係好矛盾呀!

    回覆刪除
    回覆
    1. Manman:不過如果畀我揀我都係寧願夏天去,冬天實在不宜人居住kakakaka,聽聞9-10月天氣最好也最靚!
      北京通常要2-3月才較多機會下雪吧
      怕凍但又想睇下雪景====>可以浸在溫泉賞雪景應該最適合你了^^

      刪除
    2. 如果去日本浸温泉,係咪好d呢?

      刪除
  3. 我有次由台北返香港, 全EY class 只有五個人

    回覆刪除
    回覆
    1. Ahmo:嘩~~~~咁間航空公司蝕大本了XXD

      刪除
  4. 食野都是南方好。 現在北京應該更加凍,遲D會下雪呢,真係走得快。

    回覆刪除
    回覆
    1. Samwei:一定啦,始終係粵菜比較啱口味,食慣咗!
      凍成咁真係無乜心機出去行><

      刪除
  5. 搭順風車呀!咁多餸好多人同你餞行喇!

    回覆刪除
    回覆
    1. JJ:唔多呀一隻手數晒

      刪除
    2. 咁!6舊腹肌囉!kaka....................

      刪除
    3. 閃呀!閃去東面喇喂!

      刪除
    4. JJ:快鳥!快鳥!唔洗心急啦!!

      刪除
  6. ""返office坐多陣與同事寒喧幾句...""
    睇嚟GaelGael兄的普通話都唔錯喎!!
    感覺國內唔會太興聖誕節...有棵水晶聖誕樹都已經唔錯~~

    回覆刪除
    回覆
    1. 森:唔叻架,求其亂講就算,佢地聽唔明會再問你XXXD
      D商場都有少少裝飾,反正新年都要順便搞少少氣氛刺激消費吧!
      不過話時話那時行過一個mall真係靜過鬼,可能啲大陸人都落晒香港鳩鳴kakakakakak.....

      刪除
  7. 回覆
    1. 摩:應該都唔係我同阿摩杯茶XXD

      刪除
    2. 哈哈 !! 你們真是同一陣線了 ^^

      刪除
    3. Sky:你係咪想加入喱个联盟XXD

      刪除
  8. 凍都唔係大問題,天陰陰霧霾等先討厭,北京好快不宜居住!

    回覆刪除
    回覆
    1. 銀:太凍對我都係大問題喎:P
      同埋空氣真係好差,成日周圍都好大塵咁

      刪除
  9. 我呢邊有幾日攝氏零下35度;好彩冇落雨 (落雪),太陽伯伯開工,藍天白雲又唔刮大風,個感覺原來唔係好凍。

    回覆刪除
    回覆
    1. Hamby:零下35度~~~@@
      如果唔大風都仲好D,室內一定有暖氣先掂啦^^

      刪除
  10. 北京咁凍如果仲加埋落雪,就真係邊度都唔駛去了!

    回覆刪除
    回覆
    1. Wan:我寧願夏天囉~~~雖然熱D但好過掂乜都觸電(靜電)!!

      刪除
  11. 北京夏天very hot +天陰陰霧霾, 好討厭!!!
    北京無落雪, 但(靜電)真係....電C人!!

    回覆刪除
    回覆
    1. Longbell:我唔驚熱但驚乾凍和電XXD
      今次真係電到我暈,開水喉洗手都電,好離譜><

      刪除
  12. 我二十多年前到過北京 , 印象已很模糊 , 但就超記得無論酒店或店鋪的靜電 , 電到嚇 C 0架 .

    回覆刪除
    回覆
    1. Ak:係呀真係好誇張掂乜野都電一電,好煩人;好想學運油車咁拎住條電線拖落地先出街XXXXXD
      反而當地同事就無反應,可能佢地習慣晒,定還是訓練到完全唔會過電呢XXXXXD

      刪除
  13. 二十多年前在北京試過零下五度,因大雪要封通往長城的交通,我們改坐火車行過去............

    回覆刪除
    回覆
    1. Kamchoa:依家好似係有地鐵去到,方便好多咁話
      當年我記得都係要坐好耐車先去到八達嶺長城

      刪除
  14. Gael,北京好少藍天白雲,但給你遇上了.

    回覆刪除
    回覆
    1. Andrew:尤其冬天初春我諗日日都霧霾,今年聽說尤其嚴重呢

      刪除
  15. 我試過冬天去北京又凍又大風, 在街企多一秒都唔願.

    回覆刪除
    回覆
    1. Rity:對於南方人來說實在太凍太乾了,凍到個人都無乜興致出去行下

      刪除
  16. 走前,食番餐北京菜都唔錯啦!
    酸梅湯個樣幾吸引下!

    回覆刪除
    回覆
    1. Andy:可能為咗迎合大部份人口味,我覺得偏甜,都係自己煲好味D酸D醒神D^^

      刪除
  17. 我只去過一次北京, 就係十多前的中學交流團, 我想而家應該大不同了吧 !
    今次似乎來去匆匆咁喎 ~

    回覆刪除
    回覆
    1. 魚:咦,我上次去也是跟同學一齊去交流,事隔咁多年依家唔同晒啦,天灰阻空氣差咗XXD

      刪除